Yehowa Dwen Mmɔborɔfo Ho

SO ƐSƐ sɛ yɛyɛ soronko anaasɛ yɛda nsow wɔ ɔkwan bi so ansa na Onyankopɔn ahu yɛn? Wɔkyerɛ sɛ Abraham Lincoln, United States mampanyin a ɔto so 16, kae sɛ: “Awurade pɛ mpapahwekwa asɛm. Ɛno nti na wabɔ wɔn pii no.” Nnipa pii te nka sɛ wɔba fam araa ma wonni biribi titiriw biara a wɔde bɛma. Sɛ́ obi bɛyɛ ɔpapahwekwa no betumi akyerɛ sɛ “odi hia, ɔba fam.” Saa ara na asɛmfua “ɔpapahwekwa” no betumi akyerɛ “hokwan anaa dibea titiriw bi a obi nni,” “gyinapɛn a ɛba fam a onnu ho,” anaasɛ mpo “to a ɔnto afoforo.” Nnipa bɛn na wobɛpɛ sɛ wo ne wɔn bɔ? Ahantanfo, anuɔdenfo, ahohoahoafo? So worempɛ sɛ wo ne nnipa a wɔwɔ adamfofa su, wodwo, wɔnhoahoa wɔn ho, na wofi komam kyerɛ afoforo ho anigye no bɛbɔ?

Esiane sɛ ateetee ne fɛwdi abu so wɔ wiase nnɛ nti, ɛyɛ den ma ebinom sɛ wobegye adi sɛ Onyankopɔn kyerɛ wɔn ho anigye. Obi a ɔkenkan nsɛmma nhoma yi kyerɛwee sɛ: “Mifi abusua bi a ɔdɔ nnim mu. Wobuu me animtiaa, dii me ho fɛw, serew me. Enti, wɔ m’asetra mfiase pɛɛ na metee nka sɛ me ho nni mfaso. Nneɛma a esisii wɔ m’asetra bere a atwam mu no da so ara hyɛ me so na ɛno ma m’abam bu bere a mahyia ɔhaw no.” Nanso, ntease wɔ hɔ a enti yebegye adi sɛ Onyankopɔn kyerɛ mmɔborɔfo ho anigye.

Sɛnea Onyankopɔn Dwen Mmɔborɔfo Ho

Ɔhene Dawid kyerɛwee sɛ: “[Yehowa, NW] sõ, na ɔsɛ ayeyi kɛse, ne kɛseyɛ mu nni hwehwɛbea.” (Dwom 145:3) Nanso, eyi nsiw Yehowa kwan sɛ obedwen yɛn ho wɔ ɔdɔ ne ayamhyehye kwan so. (1 Petro 5:7) Sɛ nhwɛso no, odwontofo no kae sɛ: “[Yehowa, NW] bɛn wɔn a wɔn koma abubu, na ogye wɔn a wɔn honhom apɛtɛw.”—Dwom 34:18.

Nneɛma a ɛtwe adwene wɔ wiase mu, te sɛ nipaduam ahoɔfɛ, edin, anaa ahonyade, nyɛ nneɛma a Onyankopɔn bu no sɛ ɛho hia. Onyankopɔn Mmara a ɔde maa Israelfo no daa no adi sɛ ofi ayamhyehye mu dwen ahiafo, nyisaa, akunafo, ne ahɔho ho. Onyankopɔn ka kyerɛɛ Israelfo a wɔyɛɛ wɔn nso ayayade wɔ Misraim no sɛ: “Na ɔhɔho de, mmɔ no atirimmɔden, nso nhyɛ no so . . . Monnhyɛ ɔbaakunafo anaa ayisaa so. Sɛ wohyɛ wɔn so, na wosu frɛ me pɛ a, otie na metie wɔn sufrɛ no.” (Exodus 22:21-24) Bio nso, odiyifo Yesaia daa ahotoso a ɔwɔ sɛ Onyankopɔn dwen mmɔborɔfo ho no adi sɛ: “Na woayɛ aban a ɛyɛ den ama mmɔboroni, aban a ɛyɛ den ama ohiani, n’ahohia mu, ahum ano guankɔbea, ahohuru mu onwini, atirimɔdenfo ahome ayɛ sɛ ahum ne osu a ɛboro fasu.”—Yesaia 25:4.

Wɔ Yesu Kristo, a ɔyɛ Onyankopɔn “sɛso,” no som adwuma nyinaa mu no, ɔyɛɛ mmɔborɔfo  ho a odwen ho nhwɛso maa n’asuafo no. (Hebrifo 1:3) Bere a Yesu huu nnipakuw a “wɔabrɛ, na wɔsam hɔ sɛ nguan a wonni hwɛfo” no, ne “yam hyehyee no maa wɔn.”—Mateo 9:36.

Hyɛ nkurɔfo ko a Yesu paw wɔn sɛ n’asomafo no nsow—mmarima a wɔkaa wɔn ho asɛm sɛ “wonsuaa nhoma da, na mmom wɔyɛ mpapahwekwa.” (Asomafo no Nnwuma 4:13) Wɔ Yesu wu akyi no, n’akyidifo no fii ase too nsa frɛɛ nnipa ahorow nyinaa sɛ wontie Onyankopɔn Asɛm. Ɔsomafo Paulo kyerɛwee sɛ “obi a onnye nni anaasɛ onnim biribi” betumi aba Kristofo asafo no mu abɛyɛ gyidini. (1 Korintofo 14:24, 25) Sɛ́ anka Onyankopɔn bɛpaw wɔn a wogyina wiase gyinapɛn so bu wɔn nkutoo ma wɔayɛ ne som adwuma no, ɔpaw nnipa mpapahwekwa a wɔba fam mmom. Ɔsomafo Paulo kae sɛ: “Na, anuanom, monhwɛ mo frɛ no, sɛ ɛnyɛ ɔhonam fam anyansafo pii, ɛnyɛ atumfo pii, ɛnyɛ adehye pii na wɔafrɛ wɔn, na mmom wiase nkwaseade na Onyankopɔn apaw sɛ ɔde bɛhyɛ anyansafo aniwu. Na wiase ade a ɛyɛ mmerɛw na Onyankopɔn apaw sɛ ɔde bɛhyɛ nea ɛyɛ den no aniwu. Na wiase nneɛma a ɛmfra ne nea wommu na Onyankopɔn apaw, ne nea enni hɔ, sɛ ɔde betu nea ɛwɔ hɔ, na ɔhonam biara anhoahoa ne ho n’anim.”—1 Korintofo 1:26-29.

Ɛnnɛ, saa ara na Onyankopɔn fi komam dwen yɛn ho. Onyankopɔn pɛ ne sɛ “wogye nnipa nyinaa nkwa na wɔba nokware nimdeɛ mu.” (1 Timoteo 2:4) Sɛ Onyankopɔn dɔɔ adesamma araa ma ɔsomaa ne Ba baa asase so bewu maa yɛn a, ɛnde na yenni biribiara a yebegyina so ate nka sɛ wɔnnɔ yɛn anaa yɛn so nni mfaso. (Yohane 3:16) Yesu Kristo kyerɛɛ n’akyidifo hia a ehia sɛ wɔne ne honhom fam anuanom a wɔba fam koraa no mpo bedi nsɛm, sɛ nea wɔne Yesu ankasa na ɛredi nsɛm no. Ɔkae sɛ: “Sɛ moayɛ ama me nuanom nketewaa yi mu biako yi, moayɛ ama me.” (Mateo 25:40) Ɛmfa ho sɛnea wiase no bebu yɛn biara no, sɛ yɛdɔ nokware no a, yɛsom bo wɔ Onyankopɔn ani so.

Saa na Francisco, * Brazilni abarimaa bi a onni agya, tee nka bere a ɔne Onyankopɔn nyaa abusuabɔ no. Ɔkyerɛkyerɛ mu sɛ: “Yehowa ne n’ahyehyɛde a mibehui no boaa me ma migyinaa ahobammɔ a na minni ne osuro ano. Mihui sɛ Yehowa dwen yɛn mu biara ho.” Francisco fam no, na Yehowa yɛ Agya ankasa.

Odwen Mmofra Ho

Yehowa dwen mmofra ho ankasa, ɔnyɛ saa sɛ kuw, na mmom, sɛ ankorankoro. Nokwarem no, sɛ́ yɛyɛ mmofra anaa mpanyimfo no, yɛmpɛ sɛ yebesusuw yɛn ho atra so. Nanso, ebia na yɛwɔ ɔdom akyɛde ne su horow bi a Onyankopɔn betumi de adi dwuma daakye. Yehowa nim nsiesiei ne ntetee a yehia na ama yɛatumi de akyɛde a yɛwɔ no adi dwuma  akosi ase. Sɛ nhwɛso no, hyɛ kyerɛwtohɔ a ɛwɔ 1 Samuel ti 16 no nsow. Esiane sɛ na odiyifo Samuel bu nnipa afoforo bi sɛ wɔfata paa sɛ wɔbɛyɛ Israel ahene nti, Yehowa kyerɛkyerɛɛ nea enti a Ɔpaw Dawid, Yisai ba akumaa koraa, no sɛ Israel daakye hene no mu sɛ: “Nhwɛ ne ho tebea ne ne nipadua tentenyɛ, na mempɛ no [Dawid nuabarima panyin]; na menhwɛ nea onipa hwɛ, na onipa hwɛ nea etua aniwa, na [Yehowa, NW] de, ɔhwɛ komam.”—1 Samuel 16:7.

So mmofra a wɔwɔ hɔ nnɛ betumi anya awerɛhyem sɛ Yehowa dwen wɔn ho ankasa? Susuw Ana, Brazilni ababaa bi, ho hwɛ. Te sɛ mmofra foforo pii no, na dwowtwa ne atɛnkyea a ohu no haw no. Afei ne papa fii ase de ɔne ne nuabeanom kɔɔ Kristofo nhyiam horow. Bere bi akyi no, ofii ase kyerɛɛ nea ɔresua afi Onyankopɔn Asɛm mu no ho anigye. Ana fii ase kenkan Bible ne Kristofo nhoma ahorow na ɔbɔɔ Yehowa Nyankopɔn mpae. Nkakrankakra no, ɔne Onyankopɔn benyaa abusuabɔ a emu yɛ den. Ɔkyerɛkyerɛ mu sɛ: “Ná m’ani gye ho sɛ mɛtra me baesekre so akɔ koko bi a ɛbɛn me fie so, baabi a na metumi ahu owiatɔe a ɛyɛ fɛ no. Mebɔɔ Yehowa mpae daa no ase wɔ n’ayamye ne n’adɔe ho, na mebɔɔ mmɔden kyerɛɛ sɛnea medɔ no ankasa. Yehowa Nyankopɔn ne n’atirimpɔw ahorow a mibehui no maa minyaa asomdwoe ne ahobammɔ.” So wo nso wobɔ mmɔden gye bere de susuw ɔdɔ mu a Yehowa fi dwen wo ho no ho?

Nokwarem no, ebia tebea a yɛwom no bɛma ayɛ den ama yɛn sɛ yɛne Yehowa benya abusuabɔ a emu dɔ. Fa Lidia sɛ nhwɛso. Bere a ɔkaa asɛm bi a ɛhaw no yiye kyerɛɛ ne papa no, papa no teɛɛm guu ne so sɛ: “Nkwaseasɛm.” Ɛwom sɛ Lidia tee ase sɛ ne papa pɛ sɛ ne werɛ fi ɔhaw no de, nanso ɔka sɛ: “Bible a misuae no maa minyaa nea mehwehwɛ no ne pii a ɛkeka ho. Yehowa su a ɛyɛ anigye no maa mede no yɛɛ m’adamfo a ɔsen biara. Seesei mewɔ Agya a ɔwɔ dɔ ne ntease a metumi aka me komam asɛm ne nea misuro nyinaa akyerɛ no. Metumi de nnɔnhwerew pii ne Onipa a ne ho hia sen biara wɔ amansan no mu no adi nkɔmmɔ, a mewɔ awerɛhyem sɛ obetie me.” Bible mu nsɛm te sɛ Filipifo 4:6, 7 boaa no maa ɔtee nka sɛ Yehowa fi ɔdɔ mu dwen ne ho. Nea ɛhɔ ka ne sɛ: “Monnna nnnwen biribiara nnhaw mo ho, na mmom ade nyinaa mu momfa mpaebɔ ne ɔsrɛ, ɛne aseda mma mo adesrɛ nnu Nyankopɔn asom; na Onyankopɔn asomdwoe a ɛtra adwene nyinaa so no bɛhwɛ mo koma ne mo adwene so Kristo Yesu mu.”

Nea Ɛbɛboa Wo Ma Woadi W’ahiade Ho Dwuma

Yehowa dwen n’asomfo ho sɛ ankorankoro, na odwen wiase nyinaa asafo no nso ho. Yɛn nso yebetumi ada ɔdɔ a yɛwɔ ma yɛn soro Agya no adi denam bere a yebegye ne no adi nkɔmmɔ so. Ɛnsɛ sɛ yebu yɛn ani gu abusuabɔ a yɛne no wɔ no so da. Dawid kaee abusuabɔ a ɔne Yehowa wɔ no bere nyinaa. Ɔkae sɛ: “[Yehowa, NW], kyerɛ me w’akwan, na fa me fa w’atempɔn so. Ma mennantew wo nokware mu, na kyerɛkyerɛ me, na wone me nkwagye Nyankopɔn, m’ani da wo so daa nyinaa.”—Dwom 25:4, 5.

Ebia adwene a ɛne sɛ wo ne Onyankopɔn benya abusuabɔ a emu yɛ den no yɛ ade foforo ma wo. Ɛmfa ho ɔhaw biara a wowɔ no,  wubetumi anya awerɛhyem bere nyinaa sɛ Ɔsorosoroni no betumi aboa wo, sɛnea ne pɛ te. (1 Yohane 5:14, 15) Enti, sua sɛ wobɛka nsɛm pɔtee wɔ wo mpaebɔ mu, a egyina wo nsɛm tebea ne w’ahiade ahorow so.

Wosi hia a ehia sɛ yɛka yɛn ahiade ho asɛm no so dua wɔ mpae a Ɔhene Salomo bɔe bere a wɔrehyira asɔrefie no so no mu: “Sɛ ɔkɔm ba asase yi so, sɛ ɔyaredɔm ba, sɛ ɔhow ne ɔpo, ntuntummɛ ne mmɛbɛw ba, sɛ wɔn atamfo behia wɔn ho wɔn kurow biara mu a, ɔhaw biara oo, ɔyare biara oo, ɛnde mpaebɔ biara, nkotɔsrɛ biara a onipa biara wɔ na wo man Israel nyinaa wɔ, na obiara nim ne haw ne ne yaw . . . wo ara tie ɔsoro . . . na fa firi, na ma onipa no sɛ n’akwan nyinaa te.” (2 Beresosɛm 6:28-30) Nokwarem no, wo nkutoo na ‘wunim wo haw ne wo yaw.’ Ɛnde, hwɛ sɛnea ɛho hia sɛ wobɛka wo haw ne w’apɛde ankasa ho asɛm. Sɛ woyɛ saa a, ‘Yehowa bɛma wo nea wo koma pɛ.’—Dwom 37:4.

Hyɛ Wo ne Yehowa Ntam Abusuabɔ Mu Den

Yehowa ani gye ho sɛ ɔbɛma mmɔborɔfo ne no anya abusuabɔ a emu yɛ den. N’asɛm ma yɛn awerɛhyem sɛ: ‘Mɛyɛ mo agya, na moayɛ me mmabanin ne mmabea, sɛnea Yehowa tumfoɔ se ne no.’ (2 Korintofo 6:18) Nokwarem no, Yehowa ne ne Ba no pɛ sɛ esi yɛn yiye na yenya daa nkwa. Hwɛ nkuranhyɛ ara a ɛyɛ sɛ yebehu sɛ Yehowa bɛboa yɛn ma yɛadi yɛn asɛyɛde ho dwuma wɔ abusua mu, wɔ adwumam, ne Kristofo asafo no mu!

Nanso, yɛn nyinaa hyia mmere a emu yɛ den. Ɔyare, abusua mu nsɛnnennen, ohia, anaa biribi foforo betumi ama yɛadi yaw. Ebia yenhu sɛnea yebegyina sɔhwɛ bi ano. Nhyɛso bebrebe a Satan Ɔbonsam, omumɔyɛfo a ɔbɔ sobo a ɔne Onyankopɔn nkurɔfo redi honhom fam ako de ba no betumi ayɛ tẽẽ anaasɛ ɛnyɛ tẽẽ. Nanso, obi wɔ hɔ a ɔte yɛn ase na ɔboa yɛn ma yɛne Yehowa nya abusuabɔ pa. Ɛnyɛ obiara sɛ Yesu Kristo a wɔama no dibea a ɛkorɔn wɔ soro no. Yɛkenkan sɛ: “Yenni ɔsɔfo panyin a ontumi nhu yɛn mmerɛwyɛ mma yɛn, na mmom nea wɔasɔ no ahwɛ ade nyinaa mu sɛ yɛn ara, nso onni bɔne. Enti momma yɛmfa nnam mmra ɔdom ahengua no anim, na yɛanya mmɔborohunu, na yɛahu ɔdom, na ɛbere a ɛsɛ mu aboa yɛn.”—Hebrifo 4:15, 16.

Hwɛ abotɔyam ara a ɛyɛ sɛ ɛnsɛ sɛ yegye din anaa yɛyɛ adefo ansa na yɛanya Onyankopɔn anim dom! Sɛ wokɔ ahohia mu mpo a, yɛ sɛ odwontofo a ɔbɔɔ mpae yi no: “Me de, meyɛ mmɔbɔ, na meyɛ ohiani de, nanso [Yehowa, NW] dwen me ho. Wone me boafo ne me gyefo.” (Dwom 31:9-14; 40:17) Nya awerɛhyem sɛ Yehowa dɔ mmɔborɔfo a wɔbrɛ wɔn ho ase. Nokwarem no, ‘yebetumi de yɛn dadwen nyinaa ato no so, efisɛ odwen yɛn ho.’—1 Petro 5:7.

[Ase hɔ asɛm]

[Mfonini ahorow wɔ kratafa 29]

Ná Yesu akyidifo pii yɛ nnipa a wonnim nhoma na wɔyɛ mpapahwekwa

[Mfonini wɔ kratafa 30]

Kristofo bɔ mmɔden sɛ wɔn gyidi mu bɛyɛ den

[Mfonini ahorow wɔ kratafa 31]

Ɛnsɛ sɛ yɛyɛ nnipa titiriw ansa na yɛanya Onyankopɔn anim dom