So Wubisa Sɛ, ‘Yehowa Wɔ He?’
So Wubisa Sɛ, ‘Yehowa Wɔ He?’
“Wofii me ho kɔɔ akyirikyiri . . . Na wɔanka sɛ: [Yehowa, “NW”] wɔ he?”—YEREMIA 2:5, 6.
1. Sɛ nkurɔfo bisa sɛ, “Onyankopɔn wɔ he?” a, dɛn na ɛyɛ a na ɛwɔ wɔn adwenem?
“ONYANKOPƆN wɔ he?” Nnipa pii abisa saa asɛm no. Saafo yi mu bi abɔ mmɔden kɛkɛ sɛ wɔbɛte Ɔbɔadeɛ no ho nokwasɛm titiriw, a ɛne sɛ ɛhe na ɔwɔ, no ase? Nnipa binom abisa saa asɛm yi bere a adebɔne bi asi anaa bere a wɔn ankasa aba ahokyere mu na wontumi nhu nea nti a Onyankopɔn amfa ne ho annye asɛm no mu no. Afoforo nso nnwene eyi ho koraa efisɛ wɔpo adwene a ɛne sɛ Onyankopɔn wɔ hɔ no.—Dwom 10:4.
2. Henanom na wodi nkonim wɔ Onyankopɔn a wɔhwehwɛ no no mu?
2 Nokwarem no, nnipa pii wɔ hɔ a wogye adanse pii a ɛkyerɛ sɛ Onyankopɔn bi wɔ hɔ no tom. (Dwom 19:1; 104:24) Nea saafo yi mu bi ani gye ho ara ne sɛ wɔde wɔn ho bɛhyɛ ɔsom bi mu. Nanso nokware no ho dɔ a emu yɛ den akanyan afoforo ɔpepem pii a wɔwɔ nsase nyinaa so ma wɔahwehwɛ nokware Nyankopɔn no. Wɔn mmɔdenbɔ no nyɛɛ kwa efisɛ “ɔne yɛn mu biara ntam kwan nware.”—Asomafo no Nnwuma 17:26-28.
3. (a) Ɛhefa na Onyankopɔn te? (b) Dɛn na Kyerɛwnsɛm mu asɛmmisa ‘Yehowa wɔ he’ no kyerɛ?
3 Sɛ obi hu Yehowa ankasa a, ohu sɛ “Onyankopɔn yɛ honhom” a nnipa ntumi mfa wɔn aniwa nhu no. (Yohane 4:24) Yesu frɛɛ nokware Nyankopɔn no sɛ ‘m’agya a ɔwɔ soro.’ Dɛn na ɛno kyerɛ? Ɛkyerɛ sɛ baabi a yɛn soro Agya no te no yɛ honhom fam atrae, beae a ɛkorɔn, te sɛ nea ɔsoro a ɛhata hɔ yi korɔn sen asase no. (Mateo 12:50; Yesaia 63:15) Ɛwom sɛ yentumi mfa yɛn ani nhu Onyankopɔn de, nanso, ɔma yetumi hu no na yesua n’atirimpɔw ahorow ho ade pii. (Exodus 33:20; 34:6, 7) Obua nsɛmmisa a nnipa komapafo a wɔpɛ sɛ wohu asetra atirimpɔw bisa no. Ɛdefa nneɛma a ɛka yɛn asetra ho no, ɔma yenya biribi pa a yebetumi agyina so ahu n’adwene, kyerɛ sɛ, sɛnea obu nneɛma a ɛtete saa ne sɛ ebia nea yɛpɛ no ne n’atirimpɔw ahorow hyia a. Ɔpɛ sɛ yɛyɛ nneɛma a ɛtete saa a ɛka yɛn asetra no mu nhwehwɛmu na yɛbɔ mmɔden biara a yebetumi de hwehwɛ ho mmuae. Yehowa nam odiyifo Yeremia so kaa tete Israelfo no anim esiane sɛ wɔanyɛ eyi nti. Ná wonim Onyankopɔn din, nanso wɔammisa sɛ, ‘Yehowa wɔ he?’ (Yeremia 2:6) Ná Yehowa atirimpɔw ho asɛm nhia wɔn. Ná wɔnhwehwɛ n’akwankyerɛ. Sɛ ɛho behia sɛ wusisi gyinae ahorow, akɛse ne nketewa a, so wubisa sɛ ‘Yehowa wɔ he?’
Wɔn a Wɔhwehwɛɛ Onyankopɔn
4. Ɔkwan bɛn so na yebetumi anya Dawid nhwɛso a ɛfa sɛnea ɔhwehwɛɛ akwankyerɛ fii Yehowa hɔ no so mfaso?
4 Bere a na Dawid, Yisai ba barima no da so yɛ aberante no, onyaa Yehowa mu gyidi a emu yɛ den. Na onim Yehowa sɛ “Onyankopɔn teasefo no.” Ná Dawid ankasa anya Yehowa ahobammɔ. Gyidi ne ɔdɔ a Dawid wɔ ma “Yehowa din” no kanyan no ma okum Filistini bran Goliat a na akode ayɛ ne ho ma no. (1 Samuel 17:26, 34-51) Nanso, nkonim a Dawid dii no amma wamfa ne ho anto ne ho so. Wanka sɛ afei de, nea ɔbɛyɛ biara no, Yehowa behyira no. Wɔ mfe a edi hɔ no, Dawid kɔɔ so hwehwɛɛ Yehowa hɔ akwankyerɛ bere a ɛho behiae sɛ osi gyinae ahorow no. (1 Samuel 23:2; 30:8; 2 Samuel 2:1; 5:19) Ɔkɔɔ so bɔɔ mpae sɛ: “[Yehowa, NW] kyerɛ me w’akwan, na fa me fa w’atempɔn so. Ma mennantew wo nokware mu, na kyerɛkyerɛ me, na wone me nkwagye Nyankopɔn, m’ani da wo so daa nyinaa.” (Dwom 25:4, 5) Nhwɛso pa a ɛsɛ sɛ yedi akyiri bɛn ara ni!
5, 6. Ɔkwan bɛn so na Yehosafat fa hwehwɛɛ Yehowa wɔ mmere ahorow mu wɔ n’asetra mu?
5 Wɔ Ɔhene Yehosafat, ɔhene a ɔto so anum wɔ Dawid adehye abusua no mu bere so no, aman abiɛsa a wɔaka abom asraafo tu bae sɛ wɔne Yuda rebedi ako. Bere a Yehosafat resi nea ɛsɛ sɛ ɔyɛ wɔ ɔhaw yi a ɔman no rehyia a na ɛsɛ sɛ wodi ho dwuma ntɛm ho gyinae no, ‘ɔde n’ani too Yehowa hwehwɛ so.’ (2 Beresosɛm 20:1-3) Na ɛnyɛ eyi ne bere a edi kan a Yehosafat ahwehwɛ Yehowa. Ná ɔhene no akwati Baal som a na Israel ahemman a ɛwɔ atifi fam a awae no de ne ho ahyem no, na na wapaw sɛ ɔbɛnantew Yehowa akwan so. (2 Beresosɛm 17:3, 4) Enti afei bere a Yehosafat hyiaa nsɛnnennen no, ɔkwan bɛn so na ‘ɔhwehwɛɛ Yehowa’?
6 Wɔ mpae bi a Yehosafat bɔe wɔ Yerusalem wɔ mmere a emu yɛ den yi mu no, ɔkyerɛe sɛ na wakae Yehowa tumi a ɛkorɔn sen biara no. Ná wasusuw Yehowa atirimpɔw a na wɔada no adi denam aman foforo a Otuu wɔn na ɔde asase bi maa Israel sɛ n’agyapade so no ho akɔ akyiri. Ɔhene no gye toom sɛ ohia Yehowa mmoa. (2 Beresosɛm 20:6-12) So Yehowa maa wohuu no saa bere no? Yiw, ɔma wohuu no. Yehowa nam Yehasiel, a ɔyɛ Lewini so de akwankyerɛ pɔtee bi mae, na da a edi hɔ no, Ɔmaa Ne nkurɔfo dii nkonim. (2 Beresosɛm 20:14-28) Wobɛyɛ dɛn agye atom sɛ Yehowa bɛma wo nso woahu no bere a wodan kɔ ne nkyɛn kɔhwehwɛ akwankyerɛ no?
7. Henanom mpaebɔ na Onyankopɔn tie?
7 Yehowa nhwɛ onipa anim. Ɔto nsa frɛ nnipa a wɔwɔ aman nyinaa so sɛ wɔnhwehwɛ no wɔ mpaebɔ mu. (Dwom 65:2; Asomafo no Nnwuma 10:34, 35) Onim nea ɛwɔ wɔn a wɔde wɔn adesrɛ to n’anim no koma mu. Wama yɛn awerɛhyem sɛ otie treneefo mpaebɔ. (Mmebusɛm 15:29) Ɔma ebinom a kan no na wɔnkyerɛ ne ho anigye nanso afei de wɔafi ahobrɛase mu hwehwɛ n’akwankyerɛ no hu no. (Yesaia 65:1) Otie wɔn mpo a wɔanni ne mmara so nanso afei de wofi ahobrɛase mu asakra wɔn adwene no mpaebɔ. (Dwom 32:5, 6; Asomafo no Nnwuma 3:19) Nanso, sɛ obi mmrɛ ne koma ase mma Onyankopɔn a, onii no mpaebɔ yɛ ɔkwa. (Marko 7:6, 7) Susuw nhwɛso ahorow bi ho hwɛ.
Wobisae Nanso Wɔn Nsa Anka
8. Dɛn na amma Ɔhene Saul mpaebɔ ansɔ Yehowa ani?
8 Bere a odiyifo Samuel ka kyerɛɛ Ɔhene Saul sɛ esiane n’asoɔden nti Onyankopɔn apo no no, Saul paa Yehowa kyɛw. (1 Samuel 15:30, 31) Nanso na ɛyɛ aniso adeyɛ kɛkɛ. Na ɛnyɛ nea Saul pɛ ne sɛ ɔbɛyɛ osetie ama Onyankopɔn, na mmom sɛ wobedi no ni wɔ nnipa anim. Akyiri yi, bere a na Filistifo reko atia Israel no, Saul kobisaa Yehowa ɔko no ho asɛm a na emfi ne koma mu na mmom sɛ asɛyɛde bi a ɛsɛ sɛ odi ho dwuma kɛkɛ nti. Nanso, bere a wannya mmuae biara no, ɔkɔɔ samanfrɛfo bi hɔ, ɛwom sɛ na onim sɛ Yehowa kasa tia adeyɛ a ɛte saa de. (Deuteronomium 18:10-12; 1 Samuel 28:6, 7) Sɛ yɛbɛbɔ asɛm no mua a, 1 Beresosɛm 10:14 ka Saul ho asɛm sɛ: “Wanhwehwɛ [Yehowa, NW] akyi kwan.” Dɛn ntia? Efisɛ na Saul mpaebɔ nnyina gyidi so. Enti, na ɛte sɛ nea wammɔ mpae koraa.
9. Dɛn na na enye wɔ Sedekia adesrɛ a ɛfa Yehowa akwankyerɛ ho no ho?
9 Saa ara na bere a na Yuda ahenni no reba n’awiei no, wɔbɔɔ mpae pii na wobisaa Yehowa adiyifo hɔ nsɛm. Nanso, bere a na nkurɔfo no ka sɛ wobu Yehowa no, bere koro no ara mu no na wɔsom abosom. (Sefania 1:4-6) Ɛwom sɛ wɔhwehwɛɛ Onyankopɔn akyi kwan de, nanso wɔansiesie wɔn koma sɛ wofi nokwaredi mu bɛyɛ n’apɛde. Ɔhene Sedekia srɛɛ Yeremia sɛ ommisa Yehowa hɔ ade mma no. Ná Yehowa aka nea ɛsɛ sɛ ɔhene no yɛ akyerɛ no dedaw. Nanso gyidi a na onni ne nnipa ho suro nti, ɔhene no antie Yehowa nne, na Yehowa amma no mmuae foforo biara a na n’ani begye ho.—Yeremia 21:1-12; 38:14-19.
10. Dɛn na na enye wɔ ɔkwan a Yohanan faa so hwehwɛɛ Yehowa akwankyerɛ no ho, na dɛn na yesua fi ne mfomso no mu?
10 Bere a wɔsɛee Yerusalem na Babilon asraafo faa Yudafo no nnommum kɔe akyi no, Yohanan siesiee ne ho sɛ ɔde Yudafo kakraa bi a na wɔaka wɔ Yuda no bɛkɔ Misraim. Wɔyɛɛ wɔn nhyehyɛe, nanso ansa na wɔrebɛkɔ no, wɔsrɛɛ Yeremia sɛ ɔmmɔ Yehowa mpae nhwehwɛ n’akwankyerɛ mma wɔn. Nanso, bere a wɔannya mmuae a na wɔrehwehwɛ no, wɔyɛɛ nea na wɔabɔ wɔn tirim sɛ wɔbɛyɛ no. (Yeremia 41:16–43:7) So wuhu asuade bi wɔ saa nsɛm yi mu a ebetumi aboa wo ma sɛ wohwehwɛ Yehowa anim a, ɔbɛma woahu no no?
‘Monkɔ so Nsɔ Nhwɛ’
11. Dɛn nti na ehia sɛ yɛde Efesofo 5:10 di dwuma?
11 Nokware som hwehwɛ pii sen nsu mu asubɔ a yɛde bɛyɛ yɛn ahosohyira ho sɛnkyerɛnne, asafo nhyiam ahorow a yɛbɛkɔ, ne ɔsom adwuma no mu kyɛfa a yebenya. Yɛn asetra nyinaa ka ho. Da biara da yɛba nhyɛso—a ebi yɛ anifere kwan so de, ebi nso da adi pefee—a ebetumi atwetwe yɛn adwene afi onyamesom pa kwan a yɛnam so no so ase. Yɛbɛyɛ yɛn ade dɛn wɔ eyinom ho? Bere a na ɔsomafo Paulo rekyerɛw krataa akɔma Kristofo anokwafo a wɔwɔ Efeso no, ɔhyɛɛ wɔn nkuran sɛ: “Monsɔ nea ɛsɔ Awurade ani yiye no nhwɛ.” (Efesofo 5:10) Wɔakyerɛkyerɛ mfaso a ɛwɔ eyi a yɛbɛyɛ no mu wɔ nsɛm tebea horow a wɔayɛ ho kyerɛwtohɔ wɔ Kyerɛwsɛm no mu mu.
12. Bere a Dawid ma wɔfaa apam adaka no kɔɔ Yerusalem no, dɛn nti na Yehowa ani annye ho?
12 Bere a wɔsan de apam adaka no baa Israel na wɔkoraa so wɔ Kiriat-Yearim mfe pii akyi no, Ɔhene Dawid pɛe sɛ oyi adaka no fi hɔ kɔ Yerusalem. Obisaa dɔm so asafohene no na ɔkae sɛ ‘sɛ eye ma wɔn na Yehowa pene so a’ obeyi Adaka no afi hɔ. Nanso obuu n’ani guu Yehowa adwene wɔ asɛm no ho a na ɛsɛ sɛ ɔhwehwɛ mu kɔ akyiri no so. Sɛ na wayɛ eyi a, anka wɔamfa Adaka no ansi teaseɛnam a apɔnkɔ twe so da. Anka Kehat Lewifo no na wɔbɛsoa wɔ wɔn mmati so, sɛnea na Onyankopɔn de ho akwankyerɛ a emu da hɔ fann ama no. Ɛwom sɛ Dawid hwehwɛɛ Yehowa hɔ akwankyerɛ mpɛn pii de, nanso saa bere yi de wanyɛ no ɔkwan pa so. Nea efii mu bae no yɛɛ ɔhaw kɛse. Dawid kae akyiri yi sɛ: “[Yehowa, NW] yɛn Nyankopɔn bu baa yɛn so, sɛ yɛanhwehwɛ no n’atɔremude no so.”—1 Beresosɛm 13:1-3; 15:11-13; Numeri 4:4-6, 15; 7:1-9.
13. Nkaesɛm bɛn na na ɛwɔ dwom a wɔtoe bere a wotumi de Adaka no baa Yerusalem no mu?
13 Bere a awiei koraa no Lewifo no faa Adaka no fii Obed-Edom fie kɔɔ Yerusalem no, wɔtoo dwom bi a Dawid hyehyɛe. Na nkaesɛm a ɛka koma yi wɔ dwom no mu: “Mompɛ [Yehowa, NW] ne ne tumi akyi kwan, monhwehwɛ n’anim daa yi. Monkae n’anwonwade a wayɛ, n’ahodwiriwde ne n’anom atemmusɛm.”—1 Beresosɛm 16:11, 12.
14. Ɔkwan bɛn so na yebetumi anya Salomo nhwɛso pa ne ne mfomso ahorow a odii wɔ ne mfe a edi akyiri mu no so mfaso?
14 Ansa na Dawid rebewu no, otuu ne ba Salomo fo sɛ: “Sɛ wohwehwɛ [Yehowa] a, ɔbɛma woahu no.” (1 Beresosɛm 28:9) Bere a Salomo bɛtraa ahengua no so no, ɔkɔɔ Gibeon, baabi a na ahyiae ntamadan no wɔ no, kɔbɔɔ afɔre maa Yehowa. Ɛhɔ na Yehowa ka kyerɛɛ Salomo sɛ: “Srɛ nea memma wo.” Bere a Yehowa de Salomo abisade no ho mmuae rema no no, ofi ayamye mu maa no nyansa ne nimdeɛ a ɔde bebu Israel atɛn, na ɛno akyi no, Ɔde ahonya ne anuonyam nso kaa no ho. (2 Beresosɛm 1:3-12) Bere a Salomo hwɛɛ ɔdansi nsusuwso a Yehowa de maa Dawid no so no, osii asɔrefie fɛfɛ bi. Nanso ɛdefa Salomo aware ho nsɛm ho de, wanhwehwɛ Yehowa. Salomo waree mmea a na wɔnsom Yehowa. Wɔ ne mfe a edi akyiri mu no, wɔmaa ne koma twe fii Yehowa ho. (1 Ahene 11:1-10) Ɛmfa ho sɛnea ebia yɛagye din, yenim nyansa, anaa yɛyɛ animdefo no, ɛho hia sɛ ‘yɛkɔ so sɔ nea ɛsɔ Awurade ani yiye no hwɛ’!
15. Bere a Etiopiani Serah betuu Yuda so sa no, dɛn nti na Asa tumi de ahotoso bɔɔ mpae sɛ Yehowa begye Yuda?
15 Wɔnam Asa, Salomo nanankansowa, ahenni ho kyerɛwtohɔ so asi hia a eyi ho hia no so dua. Bere a Asa bedii hene mfe dubiako akyi no, Etiopiani Serah dii asraafodɔm ɔpepem biako anim betuu Yuda so sa. So na Yehowa begye Yuda? Bɛboro mfe 500 a na atwam no, na Yehowa aka nea sɛ ne nkurɔfo no tie no na wodi ne mmara nsɛm so a ɛbɛto wɔn ne nea sɛ wɔantie no a ɛbɛto wɔn no ho asɛm akyerɛ wɔn pefee. (Deuteronomium 28:1, 7, 15, 25) Wɔ Asa ahenni mfiase no, oyiyii afɔremuka ne adum ahorow a na wɔde di dwuma wɔ abosonsom mu wɔ Yuda nyinaa fii hɔ. Ná wahyɛ nkurɔfo no nkuran sɛ ‘wɔnhwehwɛ Yehowa.’ Asa antwɛn amma amanehunu amma ne so ansa na ɔreyɛ saa. Enti na Asa betumi abɔ Yehowa mpae sɛ ɔmmoa wɔn, esiane ne mu gyidi a na ɔwɔ no nti. Dɛn na efi mu bae? Wɔmaa Yuda dii nkonim korakora.—2 Beresosɛm 14:2-12.
16, 17. (a) Ɛwom sɛ Asa dii nkonim de, nanso nkaesɛm bɛn na Yehowa de maa no? (b) Bere a Asa anyɛ n’ade nyansam no, mmoa bɛn na wɔde maa no, nanso ɔyɛɛ n’ade dɛn? (d) Yɛbɛyɛ dɛn atumi anya Asa nneyɛe no a yebesusuw ho no ho mfaso?
16 Nanso, bere a Asa kodii nkonim bae no, Yehowa somaa Asaria sɛ onkohyia ɔhene no na ɔnka nkyerɛ no sɛ: “Asa ne Yuda ne Benyamin nyinaa, muntie me. [Yehowa, NW] ne mo te, sɛ mo ne no te yi. Na sɛ mohwehwɛ no a, ɔbɛma moahu no, na sɛ mugyaw no a, obegyaw mo.” (2 Beresosɛm 15:2) Asa nam ne nsiyɛ a wɔakanyan no no so maa nokware som nyaa nkɔso. Nanso wɔ mfe 24 akyi, bere a Asa san hyiaa ɔko no, wanhwehwɛ Yehowa. Wanhwehwɛ Onyankopɔn Asɛm akyi kwan, na wankae nea na Yehowa ayɛ bere a Etiopia asraafodɔm betuu Yuda so sa no. Odii nkwaseasɛm ne Siria kɔyɛɛ apam.—2 Beresosɛm 16:1-6.
17 Eyi nti, Yehowa maa ɔdehufo Hanani kaa Asa anim. Wɔ saa bere no mpo, bere a wɔkyerɛkyerɛɛ Yehowa adwene wɔ asɛm no ho mu kyerɛɛ Asa no, anka obetumi anya so mfaso. Mmom no, ɔmaa ne bo fuwii na ɔde Hanani kɔtoo nneduadan mu. (2 Beresosɛm 16:7-10) Awerɛhosɛm bɛn ara ni! Na yɛn nso ɛ? So yɛhwehwɛ Onyankopɔn nanso yɛpo sɛ yebegye afotu atom? Sɛ ɔpanyin bi a odwen yɛn ho de Bible no tu yɛn fo esiane sɛ yɛde yɛn ho rehyɛ wiase no mu nti a, so yɛkyerɛ mmoa a ofi ɔdɔ mu de rema yɛn ama yɛahu “nea Awurade pɛ yiye” no ho anisɔ?
Mma Wo Werɛ Mmfi sɛ Wubebisa
18. Ɔkwan bɛn so na yebetumi anya Elihu nsɛm a ɔka kyerɛɛ Hiob no so mfaso?
18 Sɛ yɛba ahokyerɛ mu a, obi a wabɔ mmɔden paa wɔ Yehowa som mu mpo betumi ayɛ biribi a Yehowa mpɛ. Bere a yare bɔne bi yɛɛ Hiob, ɔhweree ne mma ne n’agyapade, na ne nnamfo bɔɔ no atoro sobo no, ɔde n’adwene nyinaa baa ne ho so. Elihu kaee no sɛ: “Nanso obi nka sɛ: Ɛhe na Onyankopɔn, me yɛfo no wɔ?” (Hiob 35:10) Na ɛsɛ sɛ Hiob ma n’adwene kɔ Yehowa so na osusuw sɛnea Ohu tebea no ho. Hiob fi ahobrɛase mu gyee nkaesɛm no toom, na ne nhwɛso no betumi aboa yɛn ma yɛayɛ saa ara.
19. Dɛn na Israelfo no anyɛ no mpɛn pii?
19 Na Israelfo no nim sɛnea Onyankopɔn ne wɔn man no dii nsɛm fae. Nanso mpɛn pii no, wɔankae bere a wɔredi nneɛma pɔtee bi ho dwuma wɔ wɔn asetra mu no. (Yeremia 2:5, 6, 8) Sɛ ɛho behia sɛ wosisi nneɛma ho gyinae wɔ wɔn asetra mu a, wodi wɔn ankasa anigyede akyi sen sɛ wobebisa sɛ, ‘Yehowa wɔ he?’—Yesaia 5:11, 12.
Kɔ So Bisa Sɛ, ‘Yehowa Wɔ He?’
20, 21. (a) Henanom na nnɛ wɔada honhom a na Elisa wɔ no bi adi wɔ Yehowa akwankyerɛ a wɔhwehwɛ mu? (b) Ɔkwan bɛn so na yebetumi asuasua wɔn gyidi nhwɛso no na yɛanya so mfaso?
20 Bere a Elia baguam som adwuma no baa awiei no, ne somfo Elisa faa Elia nguguso a efi ne ho gui no kɔɔ Yordan ho, na ɔde bɔɔ nsu no mu bisae sɛ: “Ɛhe na [Yehowa, NW] Elia Nyankopɔn no wɔ?” (2 Ahene 2:14) Yehowa maa mmuae denam kyerɛ a ɔkyerɛe sɛ afei de ne honhom wɔ Elisa so no so. Dɛn na yebetumi asua afi eyi mu?
21 Biribi a ɛte saa sii wɔ nnɛ bere yi mu. Kristofo a wɔasra wɔn a na wɔadi asɛnka adwuma no anim no binom wui. Wɔn a wɔde ɔhwɛ adwuma hyɛɛ wɔn nsa no hwehwɛɛ Kyerɛwnsɛm no mu na wɔbɔɔ Yehowa mpae hwehwɛɛ akwankyerɛ. Wobisae bere nyinaa sɛ, ‘Yehowa wɔ he?’ Ne saa nti, Yehowa akɔ so adi ne nkurɔfo anim na wama wɔanya nkɔso wɔ wɔn dwumadi no mu. So yesuasua wɔn gyidi no? (Hebrifo 13:7) Sɛ ɛte saa, yɛbɛkɔ so de yɛn ho afam Yehowa ahyehyɛde no ho, adi n’akwankyerɛ akyi, na yɛanya adwuma a ɛreyɛ wɔ Yesu Kristo akwankyerɛ ase no mu kyɛfa akosi ase.—Sakaria 8:23.
Wubebua Dɛn?
• Adwene bɛn na ɛsɛ sɛ yɛde bisa sɛ, ‘Yehowa wɔ he?’
• Ɔkwan bɛn so na yɛn a yɛwɔ hɔ nnɛ no betumi anya asɛmmisa a ɛne ‘Yehowa wɔ he’ no ho mmuae?
• Dɛn nti na Onyankopɔn mmua mpae bi a wɔbɔ de hwehwɛ ɔsoro akwankyerɛ no?
• Bible mu nhwɛso ahorow bɛn na ɛma yehu hia a ɛho hia sɛ ‘yɛsɔ nea ɛsɔ Awurade ani yiye no hwɛ’?
[Adesua no ho Nsɛmmisa]
[Mfonini wɔ kratafa 9]
Ɔkwan bɛn so na Ɔhene Yehosafat hwehwɛɛ Yehowa?
[Mfonini wɔ kratafa 10]
Dɛn nti na Saul kɔɔ samanfrɛfo hɔ?
[Mfonini ahorow wɔ kratafa 12]
Bɔ mpae, sua ade, na dwennwen nneɛma ho fa hu ‘baabi a Yehowa wɔ’