Aduhuam a Wɔhyew—So Ɛwɔ Afã Bi Wɔ Nokware Som Mu?

“ANYAME dɔ nneɛma a ɛyɛ huam.” Ná ɛno yɛ asɛm a wɔtaa ka wɔ tete Misraim. Wɔn fam no, na aduhuamhyew yɛ wɔn som fã titiriw. Esiane sɛ na Misrifo no wɔ gyidi sɛ anyame no bɛn wɔn nti, na wɔhyew aduhuam daa wɔ wɔn asɔrefie ahorow ne afɔremuka a esisi wɔn afie mu so, ne bere a wɔredi gua mpo. Ná aman foforo wɔ amammerɛ a ɛte saa ara.

Dɛn ne aduhuam? Asɛm no betumi akyerɛ wusiw anaa ade a wɔhyew. Aneneduru a ɛyɛ huam ne hyehuam te sɛ kurobow ne akyenkyennuru na wɔde yɛ. Wosiw eyi ma ɛyɛ muhumuhu, na mpɛn pii no wɔde nneɛma te sɛ ahuamhuanne, dua bona, ne nhwiren fra mu ma eyi hua ahorow ma wɔde di dwuma pɔtee bi.

Ná aduhuam yɛ ade a wohia na ɛsom bo wɔ tete mmere mu araa ma nneɛma a wɔde yɛ no bɛyɛɛ nneɛma titiriw a wodi ho gua. Ná aguadifo a wotu kwan kodi gua no de eyi fi akyirikyiri nsase so ba. Ebia wobɛkae sɛ wɔtɔn Yakob babarima kumaa Yosef maa Ismael aguadifo a na “wofi Gilead rekɔ Misraim ne wɔn yoma a wɔsoso hyehuam ne akyenkyennuru ne kurobow reba” no. (Genesis 37:25) Aduhuam ho behiae araa ma aduhuam ho aguadi nhyehyɛe, a akyinnye biara nni ho sɛ aduhuam ho aguadifo na wofii ase no, buee kwan ma wotumi tuu kwan fi Asia kɔɔ Europa.

Wɔda so ara de aduhuam di dwuma wɔ ɔsom mu afahyɛ ne amanne pii mu nnɛ. Bio nso, nnipa pii paw sɛ wɔbɛhyew aduhuam wɔ wɔn fie na wɔate ne hua no kɛkɛ. Ɛsɛ sɛ Kristofo bu aduhuamhyew dɛn? So Onyankopɔn gye tom wɔ ɔsom mu? Momma yɛnyɛ nea Bible ka fa asɛm no ho mu nhwehwɛmu.

‘Ɛnyɛ Wo Kronkron Mma Yehowa’

Wɔ tete Israelfo mu no, na aduhuamhyew ka nnwuma atitiriw a na asɔfo no yɛ wɔ ntamadan no mu ho. McClintock ne Strong Cyclopedia ka sɛ: “Nokwarem no, ɛte sɛ nea na Hebrifo no bu aduhuamhyew sɛ ɔsom mu adeyɛ anaa afɔrebɔ kronkron araa ma yɛnkenkan aduhuam a wɔde yɛ biribi foforo biara ho asɛm nka eyi ho.”

Yehowa Nyankopɔn kaa nneɛma anan a ɛsɛ sɛ wɔde fra hyew wɔ ntamadan no mu ho asɛm: “Fa nnuhuam, aneneduru ne nworahuam ne ɔprɛkɛsɛ huamhuam ne ohuamfufu gyenennyenen, wonsusuw ne nyinaa pɛ, na fa yɛ aduhuam a wɔhyew, adufrafo nyansa so adufrae a wɔaposa a ɛyɛ gyenennyenen ne kronkron. Na siw bi fekɔfekɔ, na fa si Adanse no anim ahyiae ntamadan no mu.” (Exodus 30:34-36) Nhomanimfo kyerɛ sɛ Yuda rabifo no de nneɛma foforo kaa ho akyiri yi de dii dwuma wɔ asɔrefie hɔ.

 Ná aduhuam a wɔhyew wɔ ntamadan no mu no yɛ kronkron, na na wɔde di dwuma wɔ Onyankopɔn som mu nkutoo. Yehowa hyɛe sɛ: “Aduhuam a worebɛyɛ yi, munnsusuw so nnyɛ bi mmfa: Ɛnyɛ wo kronkron mma [Yehowa, NW]. Obiara a ɔbɛyɛ bi a ɛte sɛ ɛno ahuam ahwɛ no, wobetwa no afi ne man mu akyene.” (Exodus 30:37, 38) Ná asɔfo no hyew aduhuam mprenu da biara wɔ afɔremuka pɔtee bi so. (2 Beresosɛm 13:11) Na edu Mpata Da a, na ɔsɔfopanyin no hyew aduhuam wɔ Kronkron Mu Kronkronbea hɔ.—Leviticus 16:12, 13.

Ná ɛnyɛ aduhuam a na wɔhyew no nyinaa na ɛsɔ Onyankopɔn ani. Ɔtwee wɔn a wɔnyɛ asɔfo a wofi anuonyamhunupɛ mu hyewee te sɛ nea wɔyɛ asɔfo no aso. (Numeri 16:16-18, 35-40; 2 Beresosɛm 26:16-20) Ná aduhuam a Yuda man no hyew no tia Yehowa mmara bere a bere koro no ara na wɔde wɔn ho hyɛ atoro som mu na mogyahwiegu ayɛ wɔn nsam mã no. Wɔn nyaatwomyɛ no kaa Yehowa ma ɔkae sɛ: “Aduhuam yɛ m’akyide.” (Yesaia 1:13, 15) Israelfo no yɛɛ anibiannaso wɔ ɔsom a na ɛsɛ sɛ wɔde ma Yehowa no mu araa ma wɔtoo asɔrefie no mu hyew aduhuam wɔ afɔremuka foforo so. (2 Beresosɛm 28:24, 25) Mfe bi akyi no, na wɔde aduhuam kronkron no mpo di dwuma wɔ atoro anyame som adapaade mu. Ná nneyɛe a ɛte saa yɛ Yehowa abofono.—Hesekiel 16:2, 17, 18.

Aduhuam ne Tete Kristofo

Mmara apam no, a ahyɛde a na ɛhwehwɛ sɛ asɔfo no hyew aduhuam kronkron no ka ho no, baa awiei bere a Kristo de apam foforo no sii hɔ wɔ afe 33 Y.B. mu no. (Kolosefo 2:14) Kyerɛwtohɔ biara nni hɔ a ɛkyerɛ sɛ tete Kristofo no hyew aduhuam wɔ ɔsom mu. Ɛdefa eyi ho no, McClintock ne Strong Cyclopedia no ka sɛ: “Ɛyɛ nokware sɛ [tete Kristofo no] amfa aduhuam anni dwuma. Mmom no, na abosonsomfo na wɔde di dwuma . . . Aduhuam kakraa bi a okyidini de begu abosonsom afɔremuka so no kyerɛ ɔsom adeyɛ.”

Tete Kristofo no poe sɛ wɔbɛhyew aduhuam ama Roma Ɔhempɔn no de akyerɛ sɛ ɔyɛ “onyame,” ɛmfa ho sɛ na ɛno betumi ama wɔahwere wɔn nkwa no. (Luka 4:8; 1 Korintofo 10:14, 20) Esiane sɛ na wɔde aduhuam di dwuma wɔ abosonsom mu saa bere no nti, ɛnyɛ nwonwa sɛ tete Kristofo no amfa wɔn ho anhyɛ aduhuam ho aguadi mpo mu.

Aduhuam a Wɔhyew Nnɛ

Ɔkwan bɛn so na wɔde aduhuam di dwuma nnɛ? Wɔ Kristoman asɔre ahorow pii mu no, wɔde aduhuam di dwuma wɔ afahyɛ ne ɔsom mu amanne mu. Wɔ Asiafo mu no, mmusua pii hyew aduhuam wɔ asɔrefie ahorow mu anaa afɔremuka a ɛwɔ wɔn afie no so de hyɛ wɔn anyame anuonyam na wɔde bɔ awufo ho ban. Wɔ ɔsom mu dwumadi ahorow mu no, wɔde aduhuam adi dwuma wɔ akwan horow  so de pun ɔdan mu, sa yare, dwira biribi ho, de bɔ biribi ho ban nso.

Wɔn a wɔnyɛ nyamesomfo mpo de aduhuam redi dwuma nnansa yi. Ebinom hyew aduhuam de susuw nneɛma ho. Akwankyerɛ nhoma bi ka sɛ wɔde aduhuam di dwuma de “adwene si nneɛma so kɔ akyiri” na wɔde nya “tumi” a ɛboro nnipa de so. Ɛkamfo kyerɛ nso sɛ sɛ yebenya asetram nsɛnnennen ano aduru a, ɛsɛ sɛ yɛhyew aduhuam de yɛ amane a ɛma yɛne “ahonhom” nya nkitahodi. So nneyɛe a ɛte saa fata ma Kristofo?

Yehowa kasa tia wɔn a wɔbɔ mmɔden sɛ wɔde atoro som nneyɛe bɛfra ɔsom kronn mu no denneennen. Ɔsomafo Paulo kaa Yesaia nkɔmhyɛ no mu asɛm faa Kristofo ho, na ɔhyɛɛ wɔn nkuran sɛ wɔntwe wɔn ho mfi atoro som nkɛntɛnso bɔne ho. Ɔkyerɛwee sɛ: “Mumfi wɔn mu, na montew mo ho, sɛnea [Yehowa, NW] se ne no, monnka nea ɛyɛ fi; na me nso magye mo.” (2 Korintofo 6:17; Yesaia 52:11) Nokware Kristofo hwɛ yiye sɛ wɔbɛkwati biribiara a ɛne atoro som anaa ahonhonsɛmdi wɔ abusuabɔ no.—Yohane 4:24.

So nokwasɛm a ɛyɛ sɛ wɔde aduhuam di dwuma wɔ nyamesom amane ne ahonhonsɛmdi mu no kyerɛ sɛ aduhuamhyew nyinaa nye? Ɛnte saa ankasa. Ebia obi bɛpɛ sɛ ɔhyew aduhuam wɔ ne fie na ama fie hɔ ayɛ huam. (Mmebusɛm 27:9) Ɛno mpo no, ansa na Kristoni bi besi gyinae sɛ ɔbɛhyew aduhuam no, ɛsɛ sɛ osusuw nneɛma atitiriw bi ho. So wɔn a wɔwɔ beae a wote no de aduhuamhyew bata atoro som nneyɛe ho? Wɔ wo mpɔtam hɔ no, so mpɛn pii no wɔde aduhuamhyew bata ahonhonsɛmdi ho? Anaasɛ wɔtaa de di dwuma wɔ nneɛma a ɛmfa nyamesom ho mu?

Sɛ obi paw sɛ ɔbɛhyew aduhuam a, ɛsɛ sɛ osusuw n’ankasa ahonim ne afoforo nkate ho wɔ ne gyinaesi no mu. (1 Korintofo 10:29) Ɔsomafo Paulo nsɛm a ɔde kɔmaa Romafo no fa ho. Ɔkyerɛwee sɛ: “Momma yenni nea ɛma asomdwoe ne nea ɛbɛma yɛn nkɔso akyi. Aduan nti nsɛe Onyankopɔn adwuma! Ade nyinaa ho tew de, nanso ɛyɛ bɔne ma onipa sɛ odi nea ɛto hintidua. Eye sɛ wunni nam, anaasɛ wonnom nsa, anaasɛ biribiara a ɛbɛto wo nua hintidua.”—Romafo 14:19-21.

Mpae a ‘Wosiesie no sɛ Aduhuam’

Ná aduhuam a Israelfo hyew no yɛ mpae a Onyankopɔn tie ho sɛnkyerɛnne a ɛfata. Ɛno nti, odwontofo Dawid too dwom kyerɛɛ Yehowa sɛ: “Ma me mpaebɔ mmesi w’anim sɛ ohuam.”—Dwom 141:2.

Israelfo anokwafo ammu aduhuamhyew sɛ amanne hunu bi kɛkɛ. Wɔyɛɛ ahwɛyiye kɛse sɛ wobesiesie aduhuam na wɔahyew no sɛnea Yehowa akyerɛ no. Sɛ anka wɔde aduhuam ankasa bedi dwuma no, ɛnnɛ Kristofo bɔ mpae de da wɔn anisɔ a emu dɔ ne obu a wɔwɔ ma yɛn soro Agya no adi. Te sɛ aduhuam a eyi hua a na asɔrefie hɔ asɔfo de ma no, Onyankopɔn Asɛm ma yɛn awerɛhyem sɛ: “Teefo mpaebɔ yɛ n’anisɔde.”—Mmebusɛm 15:8.

[Mfonini ahorow wɔ kratafa 29]

Ná aduhuam a wɔhyew wɔ ntamadan no mu ne asɔrefie hɔ no yɛ kronkron

[Mfonini wɔ kratafa 30]

So aduhuam a wɔhyew de dwennwen nneɛma ho no fata ma Kristofo?