Yɛsom Nnipa a Wɔka Kasa Soronko Bi Wɔ Korea

NNIPAKUW bi a wɔwɔ anigye kɛse nanso wɔayɛ komm hyiaam sɛ wɔreyɛ Yehowa Adansefo ɔmantam nhyiam wɔ 1997 ahohuru bere mu. Ná eyi ne nhyiam kɛse a edi kan a wɔreyɛ ama mum ne wɔn a wɔn asom yɛ den wɔ Korea. Nnipa dodow a ɛsen biara a wɔbaa ase no ano si 1,174. Woyii dwumadi no nyinaa—ɔkasa ahorow, nsɛm a wobisabisa afoforo, ne drama—kyerɛe wɔ sini kɛse bi a na wohu wɔ Nhyiam Asa no so nyinaa mu wɔ Korea Mum Kasa mu. Adwumaden a atuhoamafo pii de mfe bebree yɛe no na ɛmaa eyi yɛɛ yiye.

Bere bi bɛba wɔ asase so paradise mu a ‘asotifo aso betue.’ (Yesaia 35:5) Ɛsɛ sɛ obiara a asotifo ka ho di kan hyɛn honhom fam paradise, Onyankopɔn nkurɔfo a wɔwɔ anigye no honhom fam tebea pa no mu na ama wanya Paradise no mu atra. Ɛsɛ sɛ wɔyɛ Yehowa Adansefo a wɔahyira wɔn ho so, wɔabɔ wɔn asu, a Yehowa kyerɛkyerɛ wɔn.—Mika 4:1-4.

Mfiase Ketewa

Ɛwom sɛ wɔkaa asɛm no kyerɛɛ wɔn a na wɔyɛ mum no wɔ 1960 mfe no mu de, nanso 1970 mfe no mu ansa na wɔn mu kakraa bi fii ase kɔɔ Yehowa Adansefo nhyiam ahorow ase wɔ Korea ahenkurow Seoul mu. Kristoni barima bi a na otumi kyerɛw ade ntɛmntɛm kyerɛw kasa ahorow no mu nsɛntitiriw, ne Bible kyerɛw nsɛm a wɔde dii dwuma no guu kyerɛwpon so.

Wɔ 1971 mu wɔ kurow Taejon mu no, Ɔdansefo bi fii ase kyerɛɛ ne babarima a na ɔyɛ mum ne ne nnamfo a wɔyɛ mum Ahenni asɛm no. Kuw yi mu na wɔanya ankorankoro pii a wɔyɛ nsi a wɔn na nnɛ wɔboa titiriw wɔ mum kasa asasesin mu.—Sakaria 4:10.

 Mmabun Fi Wɔn Pɛ mu De Wɔn Ho Ma

Sɛ asotifo benya Yehowa ne Yesu ho nimdeɛ na wɔaba nkwa kwan no so a, ebehia sɛ atuhoamafo afoforo bɔ wɔn ho mmɔden kɛse de boa wɔn. (Yohane 17:3) Nea ɛbɛyɛ na wɔatumi ayɛ eyi no, Yehowa Adansefo kakra asua mum kasa na wɔanya osuahu ahorow a ɛyɛ anigye.

Park In-sun a wadi mfe 15 no de yɛɛ ne botae sɛ obesua mum kasa. Nea ɛbɛyɛ na wayɛ saa no, okosuaa adwuma wɔ adwinnan bi a na asotifo 20 yɛ adwuma wɔ hɔ mu. Ɔne wɔn yɛɛ adwuma boom asram awotwe sɛnea ɛbɛyɛ a obesua asotifo kasa ne sɛnea wodwen. Afe a edi hɔ no, ɔbɛyɛɛ daa ɔkwampaefo, anaa bere nyinaa Ahenni ɔdawurubɔfo, na ɔne asotifo bi a na wɔn ani gye Bible mu nokware ho no yɛɛ adwuma. Kuw no mufo bɛyɛɛ bebree ntɛmntɛm, na ankyɛ na mum bɛboro 35 baa Kwasida nhyiam ahorow ase.—Dwom 110:3.

Ɛno akyi no wɔyɛɛ Kristofo nhyiam ho nhyehyɛe wɔ mum kasa nkutoo mu bere a edi kan wɔ Seoul. Onua Park In-sun somee sɛ ɔkwampaefo titiriw wɔ saa kuw a na ɛreyɛ kɛse yi mu. Wabehu mum kasa yiye mprempren. Wɔ asram bi mu no na ɔne asotifo 28 yɛ ofie Bible adesua. Eyinom mu pii nyaa nkɔso bɛyɛɛ Yehowa Adansefo.

Esiane atuhoamafo adwuma yi nti, wɔhyehyɛɛ mum kasa asafo a edi kan wɔ Seoul wɔ October 1976 mu, na na adawurubɔfo 40 ne daa akwampaefo 2 na wɔwom. Eyi hyɛɛ adwuma a na wɔyɛ wɔ kurow afoforo mu wɔ Korea no mu den. Na asotifo pii ho pere wɔn sɛ wɔbɛte asɛmpa no na na wɔretwɛn sɛ wɔbɛba wɔn nkyɛn.

Adwuma a Wɔyɛ Wɔ Asotifo Mu

Ebia wubebisa ɔkwan a wɔfaa so nyaa asotifo no. Wonyaa wɔn mu pii denam nnipa a wonya wɔn de wɔn ma afoforo so. Afei nso na wɔkɔ wɔn a wɔtɔn ɛmo nkyɛn, na wɔde nkurɔfo a wɔyɛ asotifo din ne wɔn address ma. Aban adwumayɛbea bi nso boa ma yenyaa wɔn ho nsɛm. Mmɔden a wɔbɔe de yɛɛ adwuma wɔ asotifo asasesin mu no sow aba araa ma bere bi akyi no, wɔhyehyɛɛ mum kasa asafo anan. Wɔhyɛɛ Kristofo mmabun pii nkuran sɛ wonsua mum kasa.

Yehowa Adansefo baa dwumadibea no de akwampaefo atitiriw a wɔasua mum kasa kɔɔ hɔ ma wɔne asafo ahorow no kɔyɛɛ adwuma. Nnansa yi ara, wɔde wɔn a wɔawie Asomfo Ntetee Sukuu no akɔ asafo ahorow yi mu na wɔahyɛ wɔn den wɔ honhom fam.

Nsɛnnennen wɔ hɔ a ɛsɛ sɛ wodi ho dwuma. Asasesin no mu a obi bɛsom no hwehwɛ sɛ ɔbɔ mmɔden sɛ ohu sɛnea asotifo asetra te. Wɔyɛ nnipa a wɔkasa penpen na wɔpɛ sɛ biribiara mu da hɔ ma wɔn pefee. Ɛtɔ mmere bi a, eyi ma afoforo ho dwiriw wɔn, na ebetumi ama wɔrente wɔn ase. Bio nso, sɛ Adansefo ne asotifo reyɛ ofie Bible adesua a, ehia sɛ wɔboa wɔn ma wɔte wɔn ankasa kasa no yiye na wɔhyɛ wɔn nkuran ma wɔtrɛw nhyehyɛe a wɔyɛ de kenkan ade na wosua ade no mu.

Asotifo hyia nsɛnnennen wɔ wɔn da biara da asetra mu a afoforo nnim. Mpɛn pii no,  nkitaho a wodi wɔ aban adwumayɛbea ahorow, ayaresabea horow, ne afei aguadi nketenkete mu no taa yɛ asɛnnennen ma wɔn. Esiane sɛ Adansefo a wofi asafo ahorow a ɛbɛn wɔn mu fi ɔdɔ mu ayɛ wɔn mmoa nti, Kristofo asafo no mu asotifo anya anuanom.—Yohane 13:34, 35.

Bɔnnɔ So Adansedi Sow Aba

Wɔ Korea anafo fam mpoano kurow Pusan mu no, Ɔdansefo bi hyiaa asotifo baanu a wɔkyerɛw kratasin bi so sɛ: “Yɛpɛ Paradise. Yɛpɛ sɛ yehu kyerɛw nsɛm a ɛka daa nkwa ho asɛm no.” Onua no kyerɛw wɔn address too hɔ na ɔyɛɛ nhyehyɛe sɛ ɔbɛkɔ akɔsra wɔn. Bere a ɔyɛɛ saa no, okohuu ɔdan bi a asotifo ahyɛ mu ma retwɛn sɛ wɔbɛte Ahenni nkrasɛm no. Osuahu yi kaa no ma ofii ase suaa mum kasa. Ankyɛ na wɔhyehyɛɛ mum kasa asafo wɔ Pusan.

Onua bi a ofi saa asafo no mu huu asotifo baanu a na wɔreka mum kasa na ɔkɔɔ wɔn nkyɛn. Bere a ohui sɛ wofii asɔre bae nkyɛe no, ɔtoo nsa frɛɛ wɔn sɛ wɔmmra Ahenni Asa so wɔ awia nnɔn abien saa da no ara. Wɔbae, na wofii Bible adesua ase. Ɛno akyi bere tiaa bi no, nnipa 2 yi ne wɔn nnamfo asotifo 20 kɔɔ ɔmantam nhyiam ase. Saa kuw no mufo pii ahyira wɔn nkwa so ama Yehowa. Wɔn mu baanu abɛyɛ asafo mu mpanyimfo, na  obiako nso abɛyɛ asafo mu somfo wɔ mum kasa asafo horow mu.

Onyaa Ne Bo a Osii no So Akatua

Esiane sɛ baabi a asotifo no bi te ne mum kasa asafo biara ntam kwan ware kakra nti, ɛtaa gye mmɔdenbɔ ne akokoduru kɛse na wɔatumi ama wɔn honhom fam aduan a efi Bible mu no. Sɛ nhwɛso no, na ɔbarima bi a wadi mfe 31 yi mpataa wɔ supɔw bi mpoano na ɔde hwɛ ne ho. Ɔtee Bible mu asɛm no fii ne nuabarima kumaa a na Yehowa Adansefo akɔ ne nkyɛn no hɔ. Nea ɛbɛyɛ na wakum ne honhom fam kɔm no, ɔpofoni sotifo yi de ahyɛmma twaa kwan kilomita 16 kɔɔ Tongyoung Kuropɔn a ɛda Korea anafo fam mpoano no mu. Na ɔyɛ saa sɛnea ɛbɛyɛ a obehyia ɔkwampaefo titiriw bi a ofi Masan Kuropɔn mu mum kasa asafo mu ba no. Dwoda biara na saa ɔkwampaefo titiriw yi twa kwan kilomita 65 na ɔne ɔpofoni sotifo no akɔyɛ Bible adesua.

Nea ɛbɛyɛ na Bible suani sotifo yi akɔ Kwasida nhyiam wɔ Masan Kuropɔn mu no, na ɛsɛ sɛ ɔde ahyɛmma twa kwan kilomita 16 na afei ɔfa bɔs de twa kwan kilomita 65 ka ho. Onyaa ne bo a osii no so mfaso. Asram kakraa bi akyi no, na wanya nkɔso wɔ mum kasa mu, asua Korea nkyerɛwee pii, na—nea ehia titiriw no—na wahu ɔkwan biako pɛ a wɔfa so ne Yehowa nya abusuabɔ. Esiane sɛ ohui sɛ ɛho hia sɛ ɔkɔ nhyiam na odi adanse daa nti, otu kɔtraa mum kasa asafo no asasesin mu. So na ɛyɛ mmerɛw? Dabi. Na ɛsɛ sɛ ogyae mpataayi adwuma a na ɛma onya U.S. dɔla 3,800 ɔsram biara no, nanso onyaa ne bo a osii no so akatua. Bere a onyaa nkɔso wɔ nokware no mu no, wɔbɔɔ no asu na mprempren ɔne n’abusua de anigye resom Yehowa.

Wɔkyerɛ Nhoma Ase Ma Asotifo

Mpɛn pii no, wɔde ano na ɛka Ahenni ho asɛmpa no kyerɛ. Nanso nea ɛbɛyɛ na wɔaka Onyankopɔn Asɛm mu nkrasɛm no akyerɛ pɛpɛɛpɛ no, ehia sɛ wɔde biribi a ɛbɛtra hɔ daa da Bible mu nokware adi. Ne saa nti wɔ afeha a edi kan mu no, mpanyimfo a wɔn ho akokwaw kyerɛw nhoma ne nkrataa pii. (Asomafo no Nnwuma 15:22-31; Efesofo 3:4; Kolosefo 1:2; 4:16) Yɛn bere yi so nso, wɔnam nhoma ne Kristofo nhoma afoforo so de honhom fam aduan pii ama. Wɔakyerɛ eyi ase kɔ kasa horow ɔhaha pii mu a mum kasa nso ka ho. Nea ɛbɛyɛ na wɔayɛ eyi wɔ Korea Mum Kasa mu no, baa dwumadibea no wɔ mum kasa mu kasa asekyerɛfo dwumadibea. Dwumadibea a wɔyɛ video yɛ mum kasa video ahorow. Eyi ma wonya honhom fam aduan ma asotifo a wɔka asɛmpa no ne anigyefo a wɔwɔ asafo horow a ɛwɔ Korea nyinaa no mu.

Ɛwom sɛ nnipa pii ho akokwaw wɔ mum kasa mu na wɔaboa ma wɔayɛ video ahorow pii de, nanso wɔn a wɔyɛ nsɛm asekyerɛfo a wɔsen biara ne asotifo mma. Wɔasua mum kasa fi wɔn mmofraase. Ɛnyɛ sɛ eyinom tumi ka mum kasa yiye nko, na mmom nso wɔde wɔn nipadua ne wɔn anim yɛbea tumi si nsɛm so dua yiye, ma enti wotumi du adwenem ne komam nso.

Sɛnea yɛahu no, wɔyɛ ɔmantam nhyiam ne amansin nhyiam wɔ Korea daa. Egye adwumaden, sika ne ahoɔden pii na wɔayɛ eyi. Nanso, wɔn a wɔba ase no kyerɛ nhyehyɛe yi ho anisɔ. Sɛ wɔpɔn nhyiam ahorow yi a, wɔn mu pii twɛn kakra a wɔpɛ sɛ wɔkɔ so nya fekubɔ pa yi na wɔka honhom fam aduan pa a wonyae no ho asɛm. Ɛda adi pefee sɛ, kuw soronko yi a obi bɛsom wom no nna fam, nanso honhom fam nhyira a efi mu ba no ma ɛfata.

[Mfonini wɔ kratafa 10]

Mum kasa ho video ahorow a wɔayɛ wɔ Korea: “What Does God Require of Us?,” “Appreciating Our Spiritual Heritage,” “Warning Examples for Our Day,” ne “Respect Jehovah’s Authority”

[Mfonini ahorow wɔ kratafa 10]

Efi benkum kɔ nifa wɔ ase hɔ: Mum kasa ho video a wɔreyɛ wɔ Korea baa dwumadibea; wɔreyɛ agyiraehyɛde a wɔde begyina hɔ ama teokrase nsɛmfua; wɔn a wɔkyerɛ mum kasa ase; wɔreyɛ ma nea ɔka mum kasa no akasa bere a wɔreyɛ video no