Sɛnea Wɔkae Ebinom

BƐYƐ mfe mpem abiɛsa a atwam ni, na Dawid reguan afi Israel hene Saul anim. Dawid somaa nkurɔfo kɔɔ ɔdefo kɛse Nabal, a na ɔyɛn nguan ne mmirekyi nkyɛn sɛ ɔmma wɔn aduan ne nsu. Nokwarem no, na ɛsɛ sɛ Nabal yi ayamye adi kyerɛ Dawid ne n’akyidifo no esiane bɔ a na wɔabɔ Nabal nguankuw ho ban no nti. Nanso, Nabal ampene sɛ obeyi ahɔhoyɛ su biara adi akyerɛ. Ɔyeyaw Dawid mmarima no mpo. Na Nabal de ne nkwa reto asiane mu efisɛ na Dawid nyɛ obi a wogoru no ho.—1 Samuel 25:5, 8, 10, 11, 14.

Na Nabal nneyɛe ne Mediterranea aman no amammerɛ a ɛfa ahɔhoyɛ a woyi adi kyerɛ nsrahwɛfo ne ahɔho ho no bɔ abira. Enti, din bɛn na Nabal gyei? Bible kyerɛwtohɔ ka sɛ na “ɔyɛ den, na ne nneyɛe nye,” na ɔyɛ “ɔbahuhuni.” Na ne din kyerɛ ‘ogyennyentwi,’ na ɛda adi sɛ ɔyɛɛ n’ade saa. (1 Samuel 25:3, 17, 25) So wobɛpɛ sɛ wɔkae wo saa? So woyɛ katee na wunnwen afoforo ho bere a wo ne wɔn redi, ne titiriw sɛ ɛte sɛ nea wɔn na wɔadi amia a? Anaasɛ woyɛ ɔyamyefo, wopɛ ahɔhoyɛ, na wowɔ tema?

Abigail—Ɔbea Nyansafo

Esiane Nabal atirimɔden nti, na watɔ ɔhaw mu. Dawid ne ne mmarima 400 no bobɔɔ wɔn nkrante siim sɛ wɔrekɔkyerɛ Nabal biribi. Nabal yere Abigail tee nea na asi no. Na onim sɛ wɔrebedi ako. Dɛn na na obetumi ayɛ? Ɔde ahoɔhare siesiee nnuan ne nneɛma a ɛdɔɔso na okohyiaa Dawid ne ne mmarima no. Bere a ohyiaa wɔn no, ɔsrɛɛ Dawid sɛ onnhwie mogya nngu kwa. Dawid bo dwoe. Otiee Abigail adesrɛ na wanyɛ nea ɔpɛe sɛ ɔyɛ no. Wɔ nsɛm yi akyi pɛɛ no, Nabal wui. Esiane sɛ Dawid huu Abigail su pa ahorow no nti, ɔfaa no sɛ ne yere.—1 Samuel 25:14-42.

Edin bɛn na Abigail gyei? Sɛnea mfitiase Hebri kasa da no adi no, ná ɔwɔ “adwempa” anaa “nyansa.” Ɛda adi sɛ na ɔyɛ nyansafo ne ɔbadwemma, na na onim bere a ɛsɛ sɛ ɔyɛ biribi. Ɔde nokwaredi yɛɛ ade de bɔɔ ne kunu ɔkwasea no ne ne fiefo ho ban wɔ asiane ho. Awiei koraa no, owui a na ɔwɔ din pa sɛ ɔbea nyansafo.—1 Samuel 25:3.

Edin Bɛn na Petro Gyawee?

Ma yɛnkɔ afeha a edi kan Y.B. no mu nkosusuw Yesu asomafo 12 no ho. Akyinnye biara  nni ho sɛ wɔn mu biako a na ɔde nkate ka nsɛm penpen sen biara ne Petro anaa Kefa a kan no na ɔyɛ ɔpofoni wɔ Galilea no. Ɛda adi sɛ na ɔyɛ nnam, na na onsuro sɛ ɔbɛda ne nkate adi. Sɛ nhwɛso no, bere bi Yesu hohoroo n’asuafo nan ho. Petro yɛɛ n’ade dɛn bere a eduu no so sɛ ɔhohoro ne nan ho no?

Petro ka kyerɛɛ Yesu sɛ: “Awurade, wo na worehohoro me nan ho?” Bere a Yesu rema mmuae no ɔkae sɛ: “Nea mereyɛ yi wonte ase seesei, nanso eyinom akyi no, wobɛte ase.” Petro buae sɛ: “Worenhohoro me nan ho da.” Hyɛ sɛnea Petro fii nkate mu yɛɛ n’ade pefee wɔ ho no nsow. Dɛn na Yesu yɛe wɔ ho?

Yesu buae sɛ: “Sɛ manhohoro wo nan ho a, wo ne me nni kyɛfa biara.” Simon Petro ka kyerɛɛ no sɛ: “Awurade, ɛnyɛ me nan ho nko, na mmom me nsa ho ne me tirim nso.” Afei de, Petro yɛɛ ade traa so! Nanso wunim sɛnea Petro te bere nyinaa. Na nnaadaasɛm biara nnim.—Yohane 13:6-9.

Yɛde nnipa mmerɛwyɛ a na Petro wɔ no nso kae no. Sɛ nhwɛso no, ɔpaa Kristo mprɛnsa wɔ nnipa a wɔbɔɔ no sobo sɛ ɔyɛ Yesu Nasareni no akyidini no anim. Bere a Petro huu mfomso a wadi no, osui yiye. Wansuro sɛ obedi awerɛhow na wanu ne ho wɔ biribi ho. Ɛho hia nso sɛ yebehu sɛ Asɛmpa no akyerɛwfo nyinaa kyerɛw nea Petro yɛe yi ho asɛm—ɛbɛyɛ sɛ Petro ankasa na ɔka kyerɛɛ wɔn! Na ɔwɔ ahobrɛase kɛse sɛ obegye ne mfomso atom. So wowɔ saa su no bi?—Mateo 26:69-75; Marko 14:66-72; Luka 22:54-62; Yohane 18:15-18, 25-27.

 Adapɛn kakraa bi wɔ bere a Petro paa Kristo akyi no, honhom kronkron a ɛhyɛɛ no mã no maa ɔde akokoduru kaa asɛm kyerɛɛ Yudafo pii wɔ Pentekoste. Na eyi yɛ sɛnkyerɛnne ankasa sɛ Yesu a wanyan afi awufo mu no wɔ no mu ahotoso.—Asomafo no Nnwuma 2:14-21.

Bere foforo bi nso, Petro tɔɔ afiri foforo mu. Ɔsomafo Paulo kyerɛkyerɛɛ mu sɛ ansa na Yudafo anuanom bi bɛba Antiokia no, na Petro fi ne pɛ mu ne Amanaman mufo gyidifo bɔ. Nanso, esiane sɛ na “osuro wɔn a wofi twetiafo mu” a na wɔafi Yerusalem aba hɔ no nti, ɔtwee ne ho fii eyinom ho. Paulo paa Petro nyaatwom yi ho ntama.—Galatifo 2:11-14.

Afei, asuafo no mu hena na ɔkasae wɔ bere a emu yɛ den a na ɛte sɛ nea Yesu akyidifo pii asiesie wɔn ho sɛ wɔbɛtwe wɔn ho afi ne ho no? Na saa bere no yɛ bere a Yesu daa biribi foforo adi wɔ nea ne honam a wobedi ne ne mogya a wɔbɛnom kyerɛ no ho no. Ɔkae sɛ: “Sɛ moanni onipa ba no honam na moannom ne mogya a, munni nkwa mo mu.” Eyi too Yesu akyidifo a wɔyɛ Yudafo no hintidua na wɔkae sɛ: “Asɛm yi yɛ den, hena na obetumi atie?” Afei dɛn na esii? “Efi ɛno so no, n’asuafo no mu pii san wɔn akyi, na wɔne no annantew bio.”—Yohane 6:50-66.

Wɔ bere a emu yɛ den yi mu no, Yesu dan n’ani kyerɛɛ asomafo 12 no na obisaa asɛm a ɛka koma yi: “Mo nso, mopɛ sɛ mokɔ bi anaa?” Petro buae sɛ: “Awurade, hena nkyɛn na yɛbɛkɔ? Wo na wowɔ daa nkwa nsɛm; na yɛagye adi, na yɛahu sɛ wone Nyankopɔn kronkronni no.”—Yohane 6:67-69.

Edin bɛn na Petro gyei? Ɛsɛ sɛ obi a ɔkenkan ne ho kyerɛwtohɔ no ani sɔ ne nokwaredi, nsɛm a na ɔka no penpen, ne ne pɛ mu a na ofi sɛ obegye n’ankasa mmerɛwyɛ atom no. Hwɛ din pa ara a onyae!

Dɛn na Nkurɔfo Kae Wɔ Yesu Ho?

Yesu asase so som dwuma no dii mfe abiɛsa ne fã. Nanso, ɔkwan bɛn so na n’akyidifo kae no? Esiane sɛ na ɔyɛ pɛ a bɔne nni ne ho nti, so na ɔnka ne ho nkɔ nnipa ho? Esiane sɛ na onim sɛ ɔyɛ Onyankopɔn Ba nti, so na ɔde ne tumi di dwuma ɔkwammɔne so? So ohunahunaa n’akyidifo anaa ɔhyɛɛ wɔn ma wotiee no? So na obu no ho dodo ara ma enti ɔnserew mpo? So na onni adagyew koraa ma enti na onni bere ma wɔn a wɔyɛ mmerɛw ne ayarefo anaa mmofra? So na obu mmusua foforo mu nnipa ne mmea animtiaa te sɛ nea na saa bere no mu mmarima taa yɛ no? Dɛn na kyerɛwtohɔ no ka kyerɛ yɛn?

Na Yesu ani gye nnipa ho. Ne som adwuma ho nhwehwɛmu da no adi sɛ ɔsaa mmubuafo ne ayarefo yare wɔ mmere pii mu. Ɔde ne ho mae sɛnea ɛbɛyɛ a ɔbɛboa ahiafo. Ɔkyerɛɛ mmofra ho anigye, na ɔkyerɛkyerɛɛ n’asuafo sɛ: “Momma mmofraa no kwan na wɔmmra me nkyɛn, na munnsiw wɔn kwan.” Afei Yesu ‘yɛɛ wɔn atuu de ne nsa guu wɔn so hyiraa wɔn.’ So wunya bere ma mmofra, anaa wunni adagyew koraa sɛ wubehu wɔn?—Marko 10:13-16; Mateo 19:13-15.

Bere a na Yesu wɔ asase so no, na wɔde nyamesom mmara ne ahyɛde a ɛkɔ akyiri sen nea Mmara no hwehwɛ hyɛ Yudafo no so. Na nkurɔfo no nyamesom akannifo no de nnosoa duruduru soa wɔn, bere a wɔn ankasa mfa wɔn nsateaa biako mpo nka nnosoa no. (Mateo 23:4; Luka 11:46) Enti, hwɛ sɛnea na Yesu yɛ soronko! Ɔkae sɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome.”—Mateo 11:28-30.

Nkurɔfo ho tɔɔ wɔn bere a wɔne Yesu bɔe no. Wanhunahuna n’asuafo, ma enti na wonsuro sɛ wɔbɛkyerɛ wɔn adwene. Nokwarem no, obisaa wɔn nsɛm de hyɛɛ wɔn nkuran sɛ wɔnkyerɛ wɔn adwene. (Marko 8:27- 29) Ɛyɛ papa sɛ Kristofo ahwɛfo bebisa wɔn ho sɛ: ‘So saa na me mfɛfo gyidifo nyinaa hu me? So mpanyimfo foforo ka nea wogye di kyerɛ me, anaa wɔtwentwɛn wɔn nan ase sɛ wɔbɛyɛ saa?’ Hwɛ ahotɔ ara a ɛyɛ bere a ahwɛfo yɛ nkurɔfo a wotumi bɛn wɔn, wotie afoforo, na wɔkɔ so yɛ fakaa! Nea ntease a wɔnna no adi yɛ ara ne sɛ ebu afoforo abam ma womfi wɔn pɛ mu mmɔ nkɔmmɔ a wɔka nsɛm pefee wom.

Ɛwom mpo sɛ na Yesu yɛ Onyankopɔn Ba de, nanso wamfa ne tumi anni dwuma ɔkwammɔne so. Mmom no, ɔne n’atiefo susuw nsɛm ho. Saa na ɔyɛe bere a Farisifo no bɔɔ mmɔden sɛ wɔde asɛmmisa besum no afiri no: “Ɛwɔ ho kwan sɛ woyi tow ma Kaesare anaasɛ wonnyi?” Yesu ka kyerɛɛ wɔn sɛ wɔmfa sika no bi mmɛkyerɛ no na obisaa wɔn sɛ: “Hena mfonini ne nkyerɛwee ni?” Wobuae sɛ: “Kaesare dea.” Afei ɔka kyerɛɛ wɔn sɛ: “Ɛnde momfa Kaesare de mma Kaesare ne Nyankopɔn de mma Onyankopɔn!” (Mateo 22:15-21) Ɛyɛ ɔkwan a asete nyɛ den a wɔfa so susuw nsɛm ho.

So na Yesu ma afoforo tumi serew? Ebia akenkanfo bi bɛserew bere a wɔkenkan asɛm a Yesu kae sɛ ɛyɛ mmerɛw ma yoma sɛ ɔbɛfa paane aniwa mu sen sɛ ɔdefo bɛkɔ Onyankopɔn Ahenni mu no. (Mateo 19:23, 24) Adwene ankasa a ɛkyerɛ sɛ yoma bɛbɔ mmɔden afa paane ankasa aniwa mu no yɛ asɛm a wogugu mu. Asɛm a wogugu mu a ɛte saa ho nhwɛso foforo ne sɛ obi behu duaa a ɛda ne nua aniwa so nanso ɔrenhu mpuran a ɛda ne de so no. (Luka 6:41, 42) Na Yesu nyɛ katee. Na ɔwɔ anigye ne adamfofa su. Wɔ Kristofo fam nnɛ no, aseresɛm betumi atew awerɛhow so wɔ ahokyere bere mu.

Ayamhyehye a na Yesu Wɔ Ma Mmea

Mmea tee nka dɛn wɔ Yesu anim? Ɛda adi sɛ na ɔwɔ mmea akyidifo anokwafo pii a n’ankasa maame Maria ka ho. (Luka 8:1-3; 23:55, 56; 24:9, 10) Mmea fii wɔn pɛ mu kɔɔ Yesu nkyɛn araa ma bere bi ɔbea bi a ‘wonim sɛ ɔyɛ ɔdebɔneyɛfo’ de ne nusu hohoroo Ne nan ho na ɔde ngo sraa ho. (Luka 7:37, 38) Ɔbea foforo a na mogya atu no mfe pii no wuraa nnipadɔm mu kosoo n’atade mu sɛnea ɛbɛyɛ na wanya ayaresa. Yesu kamfoo ne gyidi. (Mateo 9:20-22) Yiw, mmea hui sɛ Yesu yɛ obi a wotumi bɛn no.

Bere foforo no Yesu kasa kyerɛɛ Samariani bea bi wɔ asubura bi ho. Ne ho dwiriw no araa ma ɔkae sɛ: “Ɛyɛɛ dɛn na wo a woyɛ Yudani bisa me a meyɛ Samariani bea hɔ nsu anom?” Asɛm no ne sɛ na Yudafo ne  Samariafo mmɔ. Yesu toaa so kyerɛkyerɛɛ no nokware a ɛyɛ anigye faa “nsu abura a efifi kɔ daa nkwa mu” ho. Wanhaw wɔ mmea ho. Wante nka sɛ wɔsɔre tia no.—Yohane 4:7-15.

Wɔde Yesu mmɔborohunu pii a n’ahofama honhom ka ho na ɛkae no. Na ɔyɛ Onyankopɔn dɔ ho nhwɛso. Yesu de gyinapɛn sii hɔ maa wɔn a wɔpɛ sɛ wɔyɛ n’akyidifo nyinaa. Ɛhe na wudi ne nhwɛso akyi pɛɛ kodu?—1 Korintofo 13:4-8; 1 Petro 2:21.

Ɔkwan Bɛn so na Wɔkae Nnɛyi Kristofo?

Wɔ nnɛ bere yi mu no, Kristofo anokwafo mpempem pii awuwu, wɔn mu pii wui wɔ wɔn nkwakoraa bere ne wɔn mmerewa bere mu, afoforo nso wui bere a na wonnyinyinii pii no. Nanso wɔagyaw din pa. Wɔkae ebinom te sɛ Crystal a owui wɔ ne mmerewa bere mu no wɔ wɔn dɔ ne sɛnea na wɔpɛ nnipa no ho. Wɔkae afoforo te sɛ Dirk a owui wɔ ne mfe 40 mu no wɔ wɔn anigye ne wɔn biakoyɛ ho.

Afei José a ofi Spain nso wɔ hɔ. Wɔ 1960 mfe no mu bere a na wɔabara Yehowa Adansefo asɛnka adwuma no wɔ saa man no mu no, José waree na ɔwoo mmabea nkumaa baasa. Ná ɔyɛ adwuma pa bi wɔ Barcelona. Nanso saa bere no na wohia Kristofo mpanyimfo a wɔn ho akokwaw wɔ Spain anafo fam. José gyaee n’adwuma a na eye no ne n’abusua tu kɔtraa Málaga. Na ɛsɛ sɛ wogyina sikasɛm mu ahokyere ano, na mpɛn pii no na onni adwuma a ɔyɛ.

Nanso, na wonim José sɛ ɔnokwafo, ɔyɛ nhwɛso pa wɔ ɔsom adwuma no mu, na ɔnam ne yere Carmela mmoa so tumi tetee ne mmabea. Sɛ wohia obi ma wayɛ Kristofo ɔmantam nhyiam ho nhyehyɛe wɔ ɔmantam no mu a, na José de ne ho ma bere nyinaa. Awerɛhosɛm ne sɛ bere a na ɔwɔ ne mfe 50 mu no, ɔyare bi a emu yɛ den bɔɔ no ma owui. Nanso, ogyaw din pa sɛ obi a wotumi de ho to no so, ɔpanyin a ɔyɛ adwumaden ne okunu ne agya a ɔwɔ ɔdɔ.

Enti ɔkwan bɛn so na wɔbɛkae wo? Sɛ wuwui nnɛra a, anka dɛn na nkurɔfo reka fa wo ho nnɛ? Eyi yɛ asɛmmisa a ebetumi akanyan yɛn nyinaa ma yɛatu mpɔn wɔ sɛnea yɛyɛ yɛn ade mu.

Dɛn na yebetumi ayɛ de anya din pa? Yebetumi anya nkɔso bere nyinaa wɔ honhom aba—ɔdɔ, abodwokyɛre, ayamye, odwo, ahosodi ne afoforo—a yɛda no adi no mu. (Galatifo 5:22, 23) Yiw, ɛda adi pefee sɛ “din pa ye sen ngo pa, na owuda ye sen awoda.”—Ɔsɛnkafo 7:1; Mateo 7:12.

[Mfonini wɔ kratafa 5]

Wɔkae Abigail wɔ ne nyansa ho

[Mfonini wɔ kratafa 7]

Wɔkae Petro wɔ nkate mu a ofi yɛ ade ne ne nokwaredi ho

[Mfonini wɔ kratafa 8]

Yesu nyaa bere maa mmofra