Nsɛmmisa a Efi Akenkanfo Hɔ

Dɛn ne asu a wɔbɔ ma awufo?

Ɔsomafo Paulo rekyerɛw owusɔre a wɔde kɔ soro ho asɛm no, ɔkyerɛw asɛm bi a ɛtwe adwene yiye. Yɛkenkan sɛ: “Anka wɔn a wɔma wɔbɔ wɔn asu ma awufo no, wɔyɛ de gye dɛn? Sɛ awufo nnyan koraa a, ɛdɛn nti na wɔma wɔbɔ wɔn asu ma wɔn?” The New Jerusalem Bible nso ka no sɛ: “Dɛn na nnipa a wɔma wɔbɔ wɔn asu si awufo ananmu no rekyerɛ? Sɛ wonnyan awufo koraa a, wɔbɔ asu si wɔn ananmu yɛ dɛn?”—1 Korintofo 15:29.

So na Paulo rekyerɛ sɛ wɔmmɔ ateasefo asu nsi wɔn a wɔammɔ asu ansa na wɔrewu no ananmu? Saa na ebia Bible nkyerɛase yi ne nkyerɛase afoforo bi bɛma obi asusuw. Nanso, Kyerɛwnsɛm no ne mfitiase Hela kasa a Paulo de dii dwuma no mu nhwehwɛmu a ɛkɔ akyiri de ntease foforo ma. Ná Paulo kyerɛ sɛ wɔbɔ Kristofo a wɔasra wɔn no asu kɔ asetra kwan bi a ɛbɛma wɔakura wɔn mudi mu ara akosi owu mu te sɛ nea Kristo yɛe no mu. Ɛno akyi no, wobenyan wɔn akɔ honhom asetra mu sɛnea wɔyɛɛ Kristo no.

Kyerɛwnsɛm no foa saa nkyerɛkyerɛmu yi so. Paulo kyerɛw wɔ ne nhoma a ɔde kɔmaa Romafo no mu sɛ: “Anaasɛ munnim sɛ yɛn mu dodow a wɔbɔɔ yɛn asu kɔɔ Kristo Yesu mu no, wɔbɔɔ yɛn asu kɔɔ ne wu mu?” (Romafo 6:3) Wɔ Paulo nhoma a ɔde kɔmaa Filipifo no mu no, ɔkaa ɔno ara ho asɛm sɛ: “Manya [Kristo] amanehunu mu kyɛfa de me ho ama owu a ɛte sɛ ne de no, ahwɛ sɛ ebia metumi anya owusɔre a edi anim no anaa.” (Filipifo 3:10, 11, NW) Ná Paulo rekyerɛ sɛ Kristo kyidini a wɔasra no asetra kwan hwehwɛ sɛ okura ne mudi mu wɔ sɔhwɛ mu, ogyina owu ano daa, na awiei koraa no, owu sɛ mudi mu kurafo a obenya owusɔre a wɔde kɔ soro wɔ ɛno akyi.

Ɛfata sɛ yɛhyɛ no nsow sɛ saa kyerɛw nsɛm yi ne afoforo a ɛka owu ne wɔn a wɔabɔ asu ho asɛm tee no twe adwene si ateasefo a na wɔabɔ wɔn asu so na ɛnyɛ awufo. Paulo san ka kyerɛɛ ne mfɛfo Kristofo a wɔasra wɔn no sɛ: “Wɔasie mo ne no asubɔ mu; ɔno mu nso na wɔnam Onyankopɔn a onyan no fii awufo mu no tumi adwuma gyidi so anyan mo bi.”—Kolosefo 2:12.

Hela asɛmfua hy·perʹ, a wɔkyerɛ ase sɛ “ma” anaa “si ananmu” wɔ Bible nkyerɛase ahorow mu wɔ 1 Korintofo 15:29 no, betumi akyerɛ nso sɛ “wɔbɛyɛ nti.” Enti New World Translation of the Holy Scriptures no kyerɛ saa nkyekyɛm yi ase yiye ma ɛne Bible kyerɛw nsɛm afoforo hyia sɛ: “Dɛn na wɔn a awufo a wɔbɛyɛ nti wɔbɔ wɔn asu no bɛyɛ? Sɛ wonnyan awufo koraa a, dɛn nti na awufo a wɔbɛyɛ nti wɔrebɔ wɔn nso asu?”