Berleburg Bible No

PIETISM yɛ nyamesom kuw bi a efii ase wɔ Germany Lutheran Asɔre no mu wɔ afeha a ɛto so 17 ne 18 mu. Esiane kuw yi gyidi nti, wodii wɔn mu binom ho fɛw anaasɛ wɔtaa wɔn mpo. Wɔn mu nhomanimfo pii nyaa guankɔbea wɔ Berleburg, a ɛwɔ kilomita bɛyɛ 150 wɔ Frankfurt am Main atifi fam. Kurow no mu bapɔmma bi a wɔfrɛ no Count Casimir von Wittgenstein Berleburg a na ɔwɔ obu kɛse ma nyamesom no maa wɔn hintabea. Berleburg a asɛnkafo ne nhomanimfo yi kɔe no ma wonyaa Bible nkyerɛase foforo a ɛnnɛ wɔfrɛ no Berleburg Bible no. Ɛyɛɛ dɛn na wɔkyerɛɛ ase?

Wɔn a wɔkɔhwehwɛɛ hintabea no mu biako ne Johann Haug a wɔpam no fii ne fi wɔ Strasbourg esiane sɛ na kurow no mu asɔfo ne n’ani nhyia nti. Ná Haug nim nhoma yiye na na ɔte kasa pii. Ɔkaa ɔpɛ a emu yɛ den a na ɔwɔ sɛ “ɔbɛyɛ Bible nkyerɛase a mfomso biara nnim, asiesie mfomso a ɛwɔ Luther nkyerɛase no mu no, na wakyerɛ nsɛm no ase sɛnea ɛte pɛpɛɛpɛ wɔ Onyankopɔn Asɛm mu” no ho asɛm kyerɛɛ ne mfɛfo nhomanimfo a na wɔwɔ Berleburg no. (Die Geschichte der Berlenburger Bibel [Berleburg Bible no Ho Abakɔsɛm]) Na ne botae ne sɛ ɔbɛyɛ Bible a nkyerɛkyerɛmu ka ho, a nnipa mpapahwekwa bɛte ase. Haug hwehwɛɛ mmoa fii Europa aman foforo mu nhomanimfo hɔ, na ɔde mfe 20 yɛɛ adwuma no. Wodii kan tintim Berleburg Bible no wɔ 1726 mu. Esiane sɛ na nsɛm a wɔakyerɛkyerɛ mu yiye ka ho nti, wɔyɛɛ no apo awotwe.

Ɛda adi sɛ nsɛntitiriw bi wɔ Berleburg Bible no mu. Sɛ nhwɛso no, Exodus 6:2, 3 kenkan sɛ: “Afei nso, Onyankopɔn ne Mose kasae na ɔka kyerɛɛ no sɛ: Me ne AWURADE! Na miyii me ho adi kyerɛɛ Abraham ne Isak ne Yakob sɛ ade nyinaa so tumfo Nyankopɔn: nanso mamma wɔanhu me din YEHOWA no.” Nkyerɛkyerɛmu bi ka sɛ: “Edin YEHOWA . . . edin a ɛda nsow anaa edin a wɔayi akyerɛ.” Onyankopɔn din ankasa a ɛne Yehowa no pue wɔ Exodus 3:15 ne Exodus 34:6 ho nkyerɛkyerɛmu nso mu.

Enti Berleburg Bible no bɛyɛɛ German kasa mu Bible ahorow a aba a ɛde Yehowa din di dwuma wɔ kyerɛwsɛm no ankasa mu, wɔ ase hɔ nsɛm anaa nsɛm ho nkyerɛkyerɛmu mu no mu biako. Nnɛyi nkyerɛase no mu biako a edi Onyankopɔn din ankasa ni no ne New World Translation of the Holy Scriptures a Yehowa Adansefo na wotintimii no.