Nyansahu Ne Nyamesom Nea Ɛkɔfaa Ntawtawdi Bi Bae
Nyansahu Ne Nyamesom Nea Ɛkɔfaa Ntawtawdi Bi Bae
NÁ NSOROMMA ho nimdefo bi a wadi mfirihyia 70 da owupa so a ɔrebɔ mmɔden sɛ ɔbɛkenkan krataa bi a n’ankasa akyerɛw a wɔrebetintim. Sɛ́ na onim anaasɛ onim no, na ne nhoma no bɛma adwene a nnipa wɔ wɔ amansan no ho asesa. Ná ɛbɛsan ama ntawtawdi kɛse bi asɔre wɔ Kristoman mu, na nea efii mu bae no da so wɔ hɔ nnɛ.
Owura a na ɔrewu yi ne Nicolaus Copernicus, Katolekni a na ofi Poland no. Asɛm yi sii wɔ afe 1543 mu. Copernicus kae wɔ ne nhoma On the Revolutions of the Heavenly Spheres (Sɛnea Ewim Abɔde Twa Wɔn Ho) mu sɛ owia no na ɛwɔ amansan no mfinimfini na ɛnyɛ asase. Copernicus nam nhoma yi so yii asɛm a ɛkyere adwene a ɛne sɛ, asase na ɛwɔ amansan no mfinimfini no fii hɔ de nea asete nyɛ den sii ananmu.
Mfiase no, anna adi sɛ ntawtawdi bi bɛsɔre. Nea enti ne sɛ, Copernicus de anifere na ɛdaa ne nsusuwii no adi. Bio nso, saa bere no na ɛte sɛ nea Katolek Asɔre no a na egye di sɛ asase na ɛwɔ amansan no mfinimfini no nya nyansahufo adwenkyerɛ ho koma. Pope no ankasa mpo hyɛɛ Copernicus nkuran sɛ ontintim ne nhoma no. Akyiri yi bere a Copernicus tintim nhoma no, samufo bi a ɔyɛ ohufo kyerɛwee wɔ nhoma no nnianim asɛm no mu sɛ wogyinaa wɔn a wɔaben wɔ akontaabu mu tirimbɔ bi so kɛkɛ na ɛkae sɛ owia na ɛwɔ amansan no mfinimfini, na wɔ nsoromma ho adesua mu de, ɛnkyerɛ sɛ ɛyɛ nokware ankasa.
Ntawtawdi no Mu Bɛyɛɛ Den
Onipa foforo a ɔde ne ho begyee asɛm no mu ne Italiani nsoromma ho nimdefo, akontaa ho ɔbenfo, ne abɔde a aniwa hu, ho nimdefo Galileo Galilei (1564-1642). Ná ɔno nso yɛ Katolekni. Galileo de ahwehwɛ bi a na ɔno ankasa ayɛ a ɛma wotumi twa nneɛma a ɛwɔ akyirikyiri mfonini hyɛɛ afiri bi a sɛ wode hwɛ ade a ɛwɔ akyirikyiri a ɛma ɛyɛ akɛseakɛse mu, na ohuu ɔsoro nneɛma pii a na obiara nhuu da. Nea ohui no maa no gyee Copernicus asɛm no toom sɛ ɛyɛ nokware. Galileo san hui sɛ nsisiinsisii tuntumtuntum bi wɔ owia no so ma enti ogyee nyansapɛfo ne nyamesomfo gyidi a ɛne sɛ owia ho ntumi ntɔ kyima anaa ɛrensesa da no ho kyim.
Galileo anyɛ n’ade sɛ Copernicus, mmom ɔde akokoduru ne ahoɔden na ɛkaa ne nsusuwii no ho asɛm. Saa bere no nso na Katolek Asɔre no asɔre atia Copernicus nkyerɛkyerɛ no denneennen ma enti na nyamesomfo nni koma koraa wɔ nkyerɛkyerɛ a ɛte saa ho. Enti bere a Galileo kae sɛ ɛnyɛ sɛ ɛyɛ nokwasɛm sɛ owia no wɔ amansan no mfinimfini nko, na mmom ɛne Kyerɛwnsɛm no hyia no, asɔre no buu no sɛ ɔyɛ ɔwaefo. *
Galileo kɔɔ Roma sɛ ɔrekoyi ne ho ano nanso ankosi hwee. Asɔre no hyɛɛ no wɔ afe 1616 mu sɛ ɔnka n’ano ntom wɔ Copernicus nkyerɛkyerɛ no ho. Wotumi maa Galileo kaa n’ano toom kosii bere bi. Nanso ɔsan tintim nhoma foforo wɔ afe 1632 mu de foaa nea Copernicus kae no so. Afe a edi hɔ no, Roma Atirimɔden Asɛnni no hyɛe sɛ wɔmfa Galileo nto afiase ne nkwa nna nyinaa. Nanso esiane sɛ na ne mfe akɔ anim nti, wɔtew asotwe no so maa ɔwɛnfo kɔwɛn no wɔ fie.
Nnipa pii afa ntawtawdi a ɛbɛdaa Galileo ne asɔre no ntam no sɛ nkonim kɛse a nyansahu adi wɔ nyamesom so, na sɛ yɛbɛtrɛw mu kakra a, wɔkyerɛ sɛ nyansahu adi nkonim wɔ Bible so. Nanso asɛm a edi hɔ no bɛma yɛahu sɛ, nea wɔka yi nni nnyinaso biara, na ebu ani gu nokwasɛm pii so.
[Ase hɔ asɛm]
^ nky. 7 Galileo nam nyansakwan a na ɔfa so kasa ma ɛyɛ yaw de goru nkurɔfo ho no so maa nnipa a na wɔwɔ tumi tan no kwa. Bio nso, ka a ɔkae sɛ nkyerɛkyerɛ a ɛne sɛ owia no wɔ amansan no mfinimfini ne Kyerɛwnsɛm hyia no maa no bɛyɛɛ sɛ ɔyɛ nyamesom ho onimdefo na ɛno maa asɔre no bo fuw no kɛse.
[Mfonini wɔ kratafa 3]
Copernicus
[Asɛm Fibea]
Taken from Giordano Bruno and Galilei (German edition)
[Mfonini wɔ kratafa 3]
Galileo reyi ne ho ano wɔ Roma Atirimɔden Asenni no anim
[Asɛm Fibea]
From the book The Historian’s History of the World, Vol. IX, 1904
[Mfonini Fibea wɔ kratafa 3]
Akyiri hɔ: Chart depicting Copernicus’ concept of the solar system