Yehowa a Wode No Bɛyɛ Wo Nyankopɔn

NÁ ABUSUABƆ a emu yɛ den paa da nnipa bi ne Yehowa ntam wɔ Bible mmere mu ma enti wɔkaa Yehowa ho asɛm sɛ ɔne wɔn Nyankopɔn. Sɛ nhwɛso no, wɔfrɛ Yehowa “Abraham Nyankopɔn,” “Dawid Nyankopɔn,” ne “Elia Nyankopɔn” wɔ Kyerɛwnsɛm no mu.—Genesis 31:42; 2 Ahene 2:14; 20:5.

Ɛyɛɛ dɛn na nnipa yi mu biara ne Onyankopɔn benyaa abusuabɔ pa saa? Dɛn na yebetumi asua afi wɔn hɔ na ama yɛn nso yɛne yɛn Bɔfo no anya abusuabɔ a emu yɛ den a ɛrensɛe da?

Abraham ‘Gyee Yehowa Dii’

Abraham ne onipa a odi kan a Bible ka faa ne ho sɛ ogyee Yehowa dii. Abraham gyidi titiriw nti na onyaa Onyankopɔn anim dom. Nokwasɛm ni, Abraham nyaa Yehowa anim dom yiye ma akyiri yi Ɔbɔadeɛ no daa ne ho adi kyerɛɛ Mose sɛ ɔne “Abraham,” ne ba Isak, ne ne banana Yakob “Nyankopɔn.”—Genesis 15:6; Exodus 3:6.

Ɛyɛɛ dɛn na Abraham benyaa Onyankopɔn mu gyidi saa? Nea edi kan, na Abraham gyidi no wɔ nnyinaso pa. Ɛbɛyɛ sɛ Noa ba Sem a ohuu sɛnea Onyankopɔn gyee ebinom nkwa no na ɔkyerɛkyerɛɛ Abraham Yehowa akwan. Sem de n’ani huu kora a Yehowa ‘koraa Noa a ɔyɛ trenee sɛnkafo no ne nnipa baason so bere a ɔde nsuyiri bɛsɛee amumɔyɛfo wiase no.’ (2 Petro 2:5) Ɛbɛyɛ sɛ Abraham nam Sem so hui sɛ, sɛ Yehowa hyɛ bɔ nkutoo de a, ɔbɛyɛ ɔkwan biara so. Sɛnea ɛte biara no, bere a Onyankopɔn hyɛɛ Abraham ankasa bɔ no, n’ani gyei, na sɛnea ɔbɔɔ ne bra no daa no adi sɛ ogye di ampa sɛ bɔhyɛ no bɛbam ɔkwan biara so.

Esiane sɛ na Abraham gyidi wɔ nnyinaso pa nti, ɔde nnwuma hyɛɛ ne gyidi mu den. Ɔsomafo Paulo kyerɛwee sɛ: “Gyidi na wɔfrɛɛ Abraham no, ɔde tie fi kɔɔ baabi a daakye obenya hɔ sɛ agyapade, na ofii adi a onnim nea ɔrekɔ.” (Hebrifo 11:8) Osetie a ɛte saa a Abraham yɛe no maa ne gyidi mu yɛɛ den, na ɛno na osuani Yakobo kyerɛw asɛm yi faa ho no: “Woahu sɛ ne gyidi ne ne nnwuma na ɛyɛɛ ade, na efi nnwuma no mu na gyidi no wiee pɛyɛ.”—Yakobo 2:22.

Bio nso, Yehowa maa wɔsɔɔ Abraham gyidi hwɛe na ɛno nso maa ne gyidi mu yɛɛ den paa. Paulo kae sɛ: “Gyidi nti na wɔsɔɔ Abraham hwɛe no, ɔde Isak kɔbɔɔ afɔre.” Sɔhwɛ  ma gyidi yɛ den na ɛma “ne bo yɛ den pii sen sika.”—Hebrifo 11:17; 1 Petro 1:7.

Ɛwom sɛ Abraham antra ase anhu nea Onyankopɔn de hyɛɛ ne bɔ no nyinaa mmamu de, nanso n’ani gyei sɛ ohui sɛ nnipa bi suasuaa no. Bible ka ne yere Sara ne n’abusuafo baasa a wɔne Isak, Yakob ne Yosef ho asɛm sɛ na wɔn nso wɔ gyidi soronko.—Hebrifo 11:11, 20-22.

Gyidi a Ɛte sɛ Abraham De Nnɛ

Ehia paa sɛ obiara a ɔpɛ sɛ Yehowa yɛ ne Nyankopɔn no nya gyidi. Paulo kyerɛwee sɛ: “Gyidi nnim a, obi ntumi nsɔ [Onyankopɔn] ani.” (Hebrifo 11:6) Ɛbɛyɛ dɛn na Onyankopɔn somfo bi a ɔwɔ hɔ nnɛ betumi anya gyidi a ɛyɛ den sɛ Abraham de no?

Ɛsɛ sɛ yɛn gyidi no nya nnyinaso pa sɛ Abraham de no. Bible ne Bible ho nhoma a yebesua no daa ne ɔkwan a ɛfata sen biara a yebetumi afa so ayɛ saa. Bible a yɛbɛkenkan adwennwen ho no bɛma yɛanya awerɛhyem sɛ Onyankopɔn bɔhyɛ bɛbam. Sɛ ɛba saa a, ɛbɛkanyan yɛn ma yɛabɔ yɛn bra ma ɛne saa bɔhyɛ a ɛwɔ nnyinaso no ahyia. Asɛnka ne Kristofo nhyiam a yɛbɛkɔ de akyerɛ sɛ yɛyɛ osetie no nso betumi ato yɛn gyidi so.—Mateo 24:14; 28:19, 20; Hebrifo 10:24, 25.

Ɛyɛ dɛn ara a, ebia ɔsɔretia, yare kɛse, ɔdɔfo bi wu, anaa biribi foforo bi bɛsɔ yɛn gyidi ahwɛ. Yehowa a yebedi no nokware wɔ sɔhwɛ mu no ma yɛn gyidi yɛ den na ɛma ɛbɛyɛ nea ɛsom bo sen sika amapa. Sɛ́ yɛbɛtra ase ahu Onyankopɔn bɔhyɛ horow mmamu anaasɛ yɛntra ase nhu no, yɛn gyidi bɛma yɛatumi abɛn Yehowa yiye. Bio nso, yɛn nhwɛso no bɛma afoforo asuasua yɛn. (Hebrifo 13:7) Saa pɛpɛɛpɛ na esii wɔ Ralph a osuasuaa gyidi a n’awofo daa no adi no fam. Nea ɔka ni:

“Bere a na me ne m’awofo te no, na wɔhyɛ abusua mũ no nyinaa nkuran sɛ yɛnsɔre ntɛm sɛnea ɛbɛyɛ a yɛn nyinaa bɛbom akenkan Bible no. Yɛnam saa kwan no so kenkan Bible mũ no nyinaa.” Ralph da so ara kenkan Bible anɔpa biara, na ɛno ma no hyɛ da no ase yiye. Ná Ralph ne ne papa bom kɔ asɛnka dapɛn biara. Ɔka sɛ, “Saa bere no na misuaa sɛnea wɔyɛ sankɔhwɛ ne ofie Bible adesua.” Mprempren Ralph atu ne ho ama resom wɔ Yehowa Adansefo adwumayɛbea a ɛwɔ Europa no biako mu. Hwɛ adepa a afi gyidi a n’awofo daa no adi no mu aba!

Ɔbarima a Ɔda Yehowa Koma So

Dawid a wɔwoo no mfirihyia 900 wɔ Abraham akyi no da nsow koraa wɔ Yehowa asomfo a wɔka wɔn ho asɛm wɔ Kyerɛwnsɛm no mu no mu. Bere a odiyifo Samuel reka nea enti a na Yehowa bɛpaw Dawid ma wadi hene daakye ho asɛm no, ɔkae sɛ: “[Yehowa, NW] bɛhwehwɛ ne koma so barima afa.” Ná abusuabɔ a ɛda Dawid ne Yehowa ntam no mu yɛ den araa ma akyiri yi odiyifo Yesaia ka kyerɛɛ Ɔhene Hesekia sɛ “w’agya Dawid Nyankopɔn.”—1 Samuel 13:14; 2 Ahene 20:5; Yesaia 38:5.

Ɛwom sɛ na Dawid yɛ Yehowa koma so barima de, nanso mmere bi wɔ hɔ a, n’akɔnnɔ maa no kɔyɛɛ bɔne. Odii mfomso akɛse abiɛsa bi: Ɔmaa wɔfaa kwan a ɛmfata so kɔfaa apam adaka no de baa Yerusalem; ɔne Bat-Seba sɛee aware na ɔfaa kwan bi so maa wokum Bat-Seba kunu Uria; ɔsan maa wɔkan Israelfo ne Yudafo bere a na Yehowa nkae sɛ ɔnyɛ saa. Dawid buu Onyankopɔn Mmara so wɔ saa nsɛm  yi nyinaa mu.—2 Samuel 6:2-10; 11:2-27; 24:1-9.

Bere a wɔka kyerɛɛ Dawid sɛ wayɛ bɔne no, ogye toom na wamfa anhyɛ obi. Ogye toom sɛ ɔkwan a ɔfaa so maa wɔkɔfaa Apam Adaka no kɔɔ Yerusalem no nyɛ ɔkwampa, na ɔkae mpo sɛ ‘yɛanhwehwɛ Yehowa sɛnea n’atɔremude’ anaa amanne te. Bere a odiyifo Natan de aware a na Dawid asɛe no too n’anim no, Dawid kae sɛ: “Mayɛ [Yehowa, NW] bɔne.” Bio nso, bere a Dawid behui sɛ na ɛmfata sɛ ɔkan nnipa no, ogye toom sɛ: “Nea mayɛ yi, mayɛ bɔne pa ara.” Dawid sakrae wɔ ne bɔne ho na ɔkɔɔ so de ne ho bataa Yehowa ho.—1 Beresosɛm 15:13; 2 Samuel 12:13; 24:10.

Bere a Yɛayɛ Bɔne No

Bere a yɛrebɔ mmɔden sɛ yɛde Yehowa bɛyɛ yɛn Nyankopɔn no, Dawid suahu no betumi ahyɛ yɛn nkuran. Sɛ onipa a na ɔda Yehowa koma so saa tumi yɛɛ bɔne ahorow a anibere wom saa a, ɛnde sɛ wɔ yɛn mmɔdenbɔ nyinaa akyi no sɛ yɛfom anaa yɛyɛ bɔne a anibere wom mpo a, ɛnsɛ sɛ yɛma ebu yɛn abam. (Ɔsɛnkafo 7:20) Kyɛ a wɔde Dawid bɔne kyɛɛ no bere a ɔsakrae no betumi akyekye yɛn werɛ. Saa pɛpɛɛpɛ na ɛtoo Uwe * mfe bi a abɛsen kɔ no.

Ná Uwe yɛ Yehowa Adansefo asafo bi mu panyin. Bere bi ɔmaa akɔnnɔ bɔne dii ne so ma ɔde ne ho kɔhyɛɛ ɔbrasɛe mu. Te sɛ Ɔhene Dawid no, mfiase no, Uwe bɔɔ mmɔden sɛ ɔde bɔne no besie a na ogye di sɛ Yehowa bebu n’ani agu so. Nanso, Uwe ahonim haw no araa ma akyiri yi ɔka kyerɛɛ ɔpanyin biako ma wɔyɛɛ nhyehyɛe boaa Uwe ma ɔne Yehowa ntam abusuabɔ bɛyɛɛ yiye bio.

Uwe sakra fii ne bɔne no ho na ɔkɔɔ so ne Yehowa ne asafo no bɔe. N’ani gyee mmoa a asafo mu mpanyimfo no de maa no no ho araa ma adapɛn kakra akyi no ɔkyerɛw krataa kɔmaa mpanyimfo no de daa anisɔ kɛse a wanya wɔ mmoa a wɔde ama no no ho. Ɔkyerɛwee sɛ: “Moaboa me ma mayi ahohorabɔ afi Yehowa din so.” Uwe san ne Yehowa benyaa abusuabɔ pa na bere bi akyi no wɔsan paw no sɛ asafo mu somfo wɔ saa asafo no ara mu.

‘Onipa a Ɔwɔ Nkate Te sɛ Yɛn Ara’

Ná Elia a ɔtraa ase bɛyɛ mfirihyia ɔha wɔ Dawid wu akyi no yɛ Israel adiyifo a wodii kan paa no mu biako. Elia gyinaa nokware som akyi pintinn wɔ bere a na ɔporɔw ne ɔbrasɛe abu so mu, na wamma ahofama a na ɔwɔ ma Yehowa no anhinhim da. Ɛnyɛ nwonwa sɛ bere bi Elisa a obesii Elia ananmu no frɛɛ Yehowa sɛ “Elia Nyankopɔn”!—2 Ahene 2:14.

Nanso, na Elia yɛ onipa a ɔwɔ mmerɛwyɛ ne sintɔ te sɛ yɛn ara. Yakobo kyerɛwee sɛ: “Elia yɛ onipa [a ɔwɔ nkate] te sɛ yɛn ara.” (Yakobo 5:17) Sɛ nhwɛso no, bere a Elia dii Israelfo a wɔsom Baal so nkonim ma no yɛɛ wɔn yaw no, Ɔhemmaa Isebel kae sɛ obekum no. Elia yɛɛ n’ade dɛn? Ehu kaa no ma oguan kɔɔ wuram. Ɔkɔɔ hɔ no, ɔkɔtraa sisia dua bi ase de awerɛhow kae sɛ: “Ɛdɔɔso, afei, [Yehowa, NW] fa me kra, na minye mensen m’agyanom.” Afei de na Elia pɛ sɛ owu mmom sen sɛ ɔbɛyɛ odiyifo.—1 Ahene 19:4.

Nanso, Yehowa de, ɔtee nea enti a na Elia te nka saa no ase. Onyankopɔn hyɛɛ Elia den, na ɔmaa no awerɛhyem sɛ nnipa afoforo wɔ hɔ a wɔsom nokwaredi mu, enti ɛnkaa ɔno nkoaa. Bio nso, Yehowa daa no adi sɛ ɔda so ara wɔ ahotoso wɔ Elia mu ma enti ɔsan maa no dwumadi foforo.—1 Ahene 19:5-18.

Adwennwen a ɛbɛtɔɔ Elia so no nkyerɛ sɛ ɔhweree Onyankopɔn anim dom. Bɛyɛ mfirihyia 1,000 wɔ asɛm yi akyi bere a Kristo Yesu sakraa ne ho wɔ Petro, Yakobo, ne Yohane anim no, henanom na Yehowa paw wɔn sɛ wɔmmɛka Yesu ho wɔ anisoadehu no mu? Mose ne Elia. (Mateo 17:1-9) Akyinnye biara nni ho sɛ Yehowa buu Elia sɛ odiyifo a ɔda nsow. Ɛwom sɛ na ‘Elia yɛ onipa a ɔwɔ nkate te sɛ yɛn ara’ de, nanso Onyankopɔn ani sɔɔ  adwumaden a ɔyɛe de nokware som sii hɔ bio na ɔtew Ne din ho no.

Yɛn Dadwen

Yehowa asomfo a wɔwɔ hɔ nnɛ abam betumi abu anaasɛ dadwen betumi abɛda wɔn so wɔ bere bi mu. Hwɛ sɛnea ɛhyɛ nkuran sɛ yehu sɛ Elia nso kɔɔ tebea a ɛte saa ara mu! Na hwɛ sɛnea ɛsan ma yɛn koma tɔ yɛn yam sɛ yenim sɛ, sɛnea Yehowa tee Elia nkate ase no, saa ara na Ɔte yɛn nso dadwen ase.—Dwom 103:14.

Yɛdɔ Onyankopɔn ne yɛn mfɛfo nnipa, na yɛwɔ ɔpɛ sɛ yɛbɛyɛ Yehowa adwuma de aka Ahenni no ho asɛmpa akyerɛ. Nanso, sɛ nkurɔfo antie yɛn asɛm no a, ebetumi abu yɛn abam na sɛ nokware som atamfo hunahuna yɛn nso a, ebetumi de dadwen paa abɛto yɛn so. Sɛ ɛba saa a, ɛnsɛ sɛ yɛma yɛn werɛ fi sɛ sɛnea Yehowa maa Elia ahoɔden na ɔde yɛɛ n’adwuma no, saa ara na nnɛ nso Ɔma n’asomfo ahoɔden. Wode tie Herbert ne Gertrud suahu yi.

Wɔbɔɔ Herbert ne Gertrud asu sɛ Yehowa Adansefo wɔ kurow bi a wɔfrɛ no Leipzig mu wɔ kan German Democratic Republic wɔ afe 1952 mu. Esiane sɛ na wɔabara Onyankopɔn asomfo asɛnka adwuma wɔ hɔ nti, na wɔn ho kyere wɔn. Herbert tee nka dɛn wɔ afie afie asɛnka adwuma no ho?

“Ɛtɔ da a na yesuro paa efisɛ na yennim sɛ ebia polisifo bɛba abɛtow ahyɛ yɛn so akyere yɛn wɔ afie afie asɛnka mu anaa.” Dɛn na ɛboaa Herbert ne afoforo a aka no ma wotumi dii ehu a na aka wɔn no so? Ɔka sɛ, “Yɛyɛɛ kokoam Bible adesua papaapa. Na Yehowa maa yɛn ahoɔden a yɛde bɛyɛ asɛnka adwuma no.” Herbert nyaa osuahu pii wɔ n’asɛnka adwuma no mu a ɛhyɛɛ no den, na na ebi nso yɛ no serew mpo.

Herbert hyiaa maame bi a n’ani afi kakra a ɔkyerɛɛ Bible no ho anigye wɔ asɛnka mu. Bere a Herbert san kɔsraa no bio wɔ nnafua bi akyi no, na aberante bi wɔ hɔ, na ɔno nso tiee nkɔmmɔ no bi. Wɔbɔɔ nkɔmmɔ kɔɔ akyiri kakra no, Herbert ani kɔbɔɔ biribi so a ɛmaa ne yam hyee no paa. Ohui sɛ polisifo kyɛ da akongua bi a esi ɔdan no mu baabi so. Ná ɛyɛ aberante no dea, na akyinnye biara nni ho sɛ na ɔyɛ polisini a wawe ahinam so sɛ ɔbɛkyere Herbert.

Aberante no teɛɛm sɛ: “Sɛ woyɛ Yehowa Dansefo! Ma menhwɛ kratasin a edi wo ho adanse.” Herbert de maa no. Nanso biribi a na ɔnhwɛ kwan sii. Maame no dan n’ani hwɛɛ polisini no, na ɔbɔɔ no kɔkɔ sɛ: “Sɛ asɛm bi to saa Onyankopɔn nipa yi a, ntu wo nan nsi fie ha bio.”

Aberante no gyinaa hɔ komm kakra, na afei ɔde Herbert kratasin a edi ne ho adanse no maa no, na ɔmaa no kɔe. Akyiri yi Herbert tee sɛ na aberante no pɛ maame no babea aware no. Akyinnye biara nni ho sɛ aberante no tee nka sɛ ɔbea no a ɔrepɛ no aware no ho hia sen sɛ ɔbɛma wɔakyere Herbert.

Yɛmfa Yehowa Nyɛ Yɛn Nyankopɔn

Dɛn na yebetumi asua afi nsɛm yi nyinaa mu? Te sɛ Abraham no, ɛsɛ sɛ yenya gyidi a ɛyɛ den wɔ Yehowa bɔhyɛ ahorow mu. Te sɛ Dawid no, ɛsɛ sɛ bere biara a yɛbɛyɛ bɔne no, yɛde ahonu ankasa dan kɔ Yehowa anim. Afei nso, bere biara a dadwen bɛba abɛda yɛn so no, ɛsɛ sɛ yɛde yɛn ho tweri Yehowa ma ɔhyɛ yɛn den, sɛnea ɔyɛɛ Elia no. Sɛ yɛyɛ saa a, yɛbɛma Yehowa abɛyɛ yɛn Nyankopɔn nnɛ ne daa efisɛ ɔyɛ “Onyankopɔn teasefo a ɔyɛ nnipa nyinaa, ne titiriw no gyidifo, Agyenkwa.”—1 Timoteo 4:10.

[Ase hɔ asɛm]

[Mfonini ahorow wɔ kratafa 25]

Osetie a Abraham yɛe no maa ne gyidi yɛɛ den

[Mfonini wɔ kratafa 26]

Sɛ yɛyɛ bɔne a, ɛsɛ sɛ yɛsakra te sɛ Dawid

[Mfonini wɔ kratafa 28]

Sɛnea Yehowa tee nea enti a na Elia abam abu ase no, saa ara na ɔte yɛn ase