Nneɛma a Ɛbɛma Wo ne Wo Hokafo Abɔ Nkɔmmɔ

‘ƐNSƐ sɛ anka meka saa.’ ‘M’ano na ɛfomee.’ Woabɔ mmɔden sɛ wo ne wo hokafo bɛkasa ama awie wo saa pɛn? Nkɔmmɔbɔ yɛ ade a ɛsɛ sɛ wosua. Sɛnea adwuma biara te no, ebinom tumi sua a wɔmmrɛ ho koraa, nanso ɛyɛ den ma ebinom. Nanso sɛ woka nnipa a nkɔmmɔbɔ yɛ wɔn den no ho mpo a, wubetumi asua sɛ wobɛkasa yiye ama wo nkɔmmɔbɔ ayɛ dɛ.

Ɛtɔ mmere bi a, amammerɛ tumi nya nkurɔfo so nkɛntɛnso ma ɛka sɛnea wɔne wɔn ahokafo di nsɛm no. Ebia wɔbɛka akyerɛ mmarima sɛ ‘ɛnsɛ sɛ wɔkasa pii te sɛ mmea.’ Wobetumi abu mmarima a wɔpɛ kasa animtiaa  asusuw sɛ wɔnyɛ nnipa a ɛsɛ sɛ wɔde wɔn asɛm yɛ asɛm. Nokwarem no, Bible no ka sɛ: “Obiara nyɛ ntɛm asɛntie ho, ɔnyɛ nyaa ɔkasa ho.” (Yakobo 1:19) Nanso saa afotu no fa mmea ne mmarima nyinaa ho na ɛkyerɛ sɛ ɛnyɛ kasa nkutoo so na nkɔmmɔbɔ gyina. Nnipa baanu betumi akasa akyerɛ wɔn ho bere tenten nanso sɛ obiara anyɛ aso antie ne yɔnko a, mfaso bɛn na wobenya? Ɛda adi sɛ ɛno renkyerɛ nkɔmmɔbɔ ankasa. Sɛnea kyerɛw nsɛm a ɛwɔ atifi hɔ kyerɛ no, ade a edi akoten wɔ nkɔmmɔbɔ pa mu ne sɛnea wotie asɛm.

Nneyɛe a Wɔde Kasa

Wɔ aman bi mu no, wɔmma mmea nkyerɛ wɔn adwene, na okununom nso mfa wɔn ho nhyehyɛ abusua no nsɛm mu. Wɔ abusua a ɛte saa mu no, ɛto gye okunu ne ɔyere sɛ wɔde wɔn adwene bebu nea wɔn ahokafo hia bere nyinaa. Ɔyerenom binom tumi de wɔn adwene bu wɔn kununom ahiade ma ɛyɛ fɛ, na wɔhwɛ di ho dwuma ntɛm ara. Wɔ tebea a ɛte saa mu no, nneyɛe na okunu ne ɔyere de kasa. Nanso sɛ yɛbɛka paa a, obaakofo na ohu amane wɔ saa kwan a wɔfa so di nkitaho yi mu. Bere a ebia ɔyere no de n’adwene bebu nea ne kunu pɛ no, okunu no nyɛ saa koraa mma ne yere.

Nokwarem no, wɔ aman bi so no, mmarima ma wɔn ani ku mmea nkate ho na wɔbɔ mmɔden sɛ wɔbɛma wɔn nea wohia. Nanso wɔ mmeae a ɛtete saa mpo no, nea ɛbɛboa awarefo pii ne sɛ wɔbɛbɔ nkɔmmɔ ankasa.

Nkɔmmɔbɔ Ho Hia

Nsɛm a wɔka no penpen betumi aboa ma obiara ate ne yɔnko ase. Wɔ tete Israelfo abakɔsɛm mu no, Ruben, Gad, ne Manase abusua no fã a na wɔte Yordan Asubɔnten no apuei fam no sii ‘afɔremuka kɛse’ bi wɔ Yordan ho. Mmusuakuw a aka no ante wɔn ase. Esiane sɛ na wosusuw sɛ wɔn nuanom a wɔwɔ Yordan agya no atew ɔsom mu atua nti, mmusuakuw a na wɔwɔ Yordan atɔe fam no boaboaa wɔn ho sɛ wɔne ‘atuatewfo’ no bedi ako. Nanso ansa na wɔne wɔn de rekosi ani no, wotuu abɔfo ma wɔne mmusua a ɛwɔ Yordan apuei fam no kɔkasae. Hwɛ ade a nyansa wom a wɔyɛe! Wobehui sɛ na ɛnyɛ sɛ wɔde afɔremuka no rebɛbɔ afɔre ama onyame bi. Mmom no, na mmusuakuw a ɛwɔ Yordan apuei no suro sɛ daakye anhwɛ a na mmusuakuw a aka no aka akyerɛ wɔn sɛ: ‘Munni Yehowa mu kyɛfa bi.’ Ná afɔremuka no bɛyɛ adanse a ɛkyerɛ sɛ na wɔn nso wɔyɛ Yehowa asomfo. (Yosua 22:10-29) Wɔtoo afɔremuka no din Adanse, efisɛ na ɛyɛ adanse a ɛkyerɛ sɛ wogye Yehowa tom sɛ ɔne nokware Nyankopɔn no.—Yosua 22:34.

Wɔn nkyerɛkyerɛmu no tumi dan mmusuakuw afoforo no ti ma wogyae ɔko a na anka wɔasuae sɛ wɔde reba mmusuakuw abien ne fã no so no. Yiw, nsɛm a wofii komam kyerɛkyerɛɛ mu no ma wɔkwatii akodi. Akyiri yi bere a Israelfo tew Yehowa Nyankopɔn a ɔyɛ wɔn sɛnkyerɛnne kwan so kunu no so atua no, ɔka kyerɛɛ wɔn sɛ ‘ɔbɛka abodwoesɛm’ akyerɛ wɔn. (Hosea 2:14) Nhwɛso pa a ɛsɛ sɛ awarefo di akyi bɛn ara ni! Yiw, bɔ mmɔden sɛ wubedu wo hokafo komam sɛnea ɛbɛyɛ a ɔbɛte wo ase. Eyi ho hia titiriw bere a mo mu bi bo afuw no. Pattie Mihalik a ɔyɛ sɛnkyerɛwfo wɔ United States no kae sɛ: “Ebinom ka sɛ ɛnyɛ den sɛ wobebue wɔn ano akasa, nanso ɛyɛ ade a ɛsom bo paa. Ebia ɛbɛyɛ den ama ebinom sɛ wɔbɛda wɔn nkate adi de, nanso sɛ wɔbɔ ho mmɔden a, wobenya so mfaso kɛse.”

Ma Wo Nkɔmmɔbɔ Ntu Mpɔn

Ebia awarefo binom bɛka sɛ ‘yɛamfi yɛn aware no ase yiye.’ Afoforo nso betumi aka sɛ ‘biribiara nni hɔ a ebetumi ama aware yi ayɛ yiye.’ Ebia wɔbɛte nka sɛ biribiara nni  hɔ a wobetumi ayɛ ama wɔn nkɔmmɔbɔ atu mpɔn bere a wɔanya aware awie no. Nanso susuw wɔn a wɔte aman a wɔn abusuafo hyehyɛ aware ma wɔn no ho hwɛ. Nnipa a wɔte aman a ɛte saa mu no pii tumi ma wɔn aware mu nkɔmmɔbɔ tu mpɔn.

Awarefo bi a wɔtraa Asia Apuei fam man bi mu abusuafo na wɔhyehyɛɛ wɔn aware maa wɔn. Wɔsomaa obi ma otwaa kwantenten kɔhwehwɛɛ ɔyere maa ɔbarima no. Nanso awarefo a wɔtraa ase bɛyɛ mfe 4,000 a atwam ni no tumi ne wɔn ho bɔɔ nkɔmmɔ a etu mpɔn. Bere a nea wɔsomaa no no de ɔbea no reba no, ɔbarima no, Isak, hyiaa wɔn wɔ kwan so. Ɔbarima a odii aware ntam yi “kaa nea ɔyɛe no nyinaa kyerɛɛ Isak.” Bible ka saa aware yi ho asɛm sɛ: “Isak de [Rebeka] kɔɔ ne na Sara ntamadan mu [eyi ne ayeforohyia no], na ɔwaree Rebeka, na ɔyɛɛ ne yere, na ɔdɔ no.”—Genesis 24:62-67.

Hyɛ no nsow sɛ, Isak dii kan tiee nea esii ansa na ‘ɛno akyi’ no, ɔrefa Rebeka aware no. Ná nea odi aware ntam no yɛ akoa nokwafo a ɔne Isak nyinaa som Yehowa Nyankopɔn. Enti na Isak wɔ nea obetumi agyina so anya ɔbarima yi mu ahotoso. Ɛno akyi no, Isak ‘nyaa ɔdɔ’ maa Rebeka a ɔwaree no no.

Yemmisa sɛ, Isak ne Rebeka tumi ne wɔn ho dii nkɔmmɔ a na etu mpɔn? Bere a wɔn babarima Esau waree Het mmabea no akyi no, ɛde ɔhaw kɛse baa abusua no mu. Nea na Rebeka ka kyerɛ Isak ‘daa’ ne sɛ: ‘Het mmabea nti asetra afono me. Sɛ Yakob kɔware wɔ Het mmabea no mu a, nkwa yɛ dɛn ma me?’ (Genesis 26:34; 27:46) Akyinnye biara nni ho sɛ ɔkaa nea na ɛhaw no no pefee.

Isak ka kyerɛɛ Yakob a na ɔne Esau yɛ ntaa no sɛ ɔnhwɛ na wanware Kanaanfo mmea. (Genesis 28:1, 2) Rebeka ma wohuu ne komam asɛm. Awarefo yi nam nkɔmmɔbɔ so susuw abusuasɛm a na ɛhaw adwene yi ho, na ɛyɛ nhwɛso pa ma yɛn nnɛ. Nanso sɛ awarefo adwene nhyia wɔ asɛm bi ho nso ɛ? Dɛn na wobetumi ayɛ?

Bere a Mo Adwene Nhyia

Sɛ wo ne wo hokafo adwene nhyia koraa wɔ asɛm bi ho a, ɛne no nyɛ akaw. Ɛno bɛkyerɛ sɛ: W’ani nnye, na wompɛ sɛ wo hokafo no nso ani gye. Nanso ne nyinaa akyi no, ebia na wo hokafo no nnim nea wohwehwɛ ne sɛnea wote nka ankasa.

Ebia ebehia sɛ wo ne wo hokafo no tra ase na mususuw nsɛm ho yiye. Sɛ ɛyɛ aniberesɛm a, ɛrenyɛ mmerɛw sɛ mubedi mo ho so. Bere bi Isak awofo, Abraham ne Sara hyiaa asɛm bi a na ne ka yɛ den. Esiane sɛ na Sara yɛ obonin nti, odii saa bere no mu amammerɛ akyi de n’afenaa, Hagar maa no sɛ ɔne no nwo mma no. Hagar woo ɔbabanin, Ismael, maa Abraham. Nanso akyiri yi Sara ankasa benyinsɛnee, na ɔwoo ɔbabarima, Isak, maa Abraham. Bere a eduu sɛ wotwa Isak nufu no, Sara hui sɛ Ismael redi ne ba no ho fɛw. Enti bere a Sara hui sɛ daakye ɛde asɛm bɛbrɛ ne ba no, ɔka kyerɛɛ Abraham sɛ ɔmpam afenaa no ne Ismael ma wɔnkɔ. Yiw, Sara amfa nsɛm anhyɛ ne mu, na mmom ɔkaa no penpen. Nanso Abraham ani annye n’abisade no ho.

Ɛyɛɛ dɛn na wosiesiee asɛm no? Bible no bɔ amanneɛ sɛ: “Onyankopɔn ka kyerɛɛ Abraham sɛ: Mma abofra no ne w’afenaa asɛm no nnyɛ wo yaw, na nea Sara ka kyerɛ wo nyinaa, tie, na Isak mu na wɔbɛfrɛ w’asefo.” Abraham tiee Yehowa Nyankopɔn na ɔyɛɛ Sara abisade no maa no.—Genesis 16:1-4; 21:1-14.

Ebia wobɛka sɛ, ‘sɛ Onyankopɔn fi soro rekasa akyerɛ yɛn a, ɛrenyɛ den sɛ yɛbɛte yɛn ho ase!’ Ɛno de yɛn ba ade titiriw a ɛboa ma yedi aware mu nsɛmnsɛm ho dwuma no so. Awarefo betumi atie Onyankopɔn. Ɔkwan bɛn so? Ɛdenam Onyankopɔn Asɛm a wɔbɛbom akenkan na wɔagye Onyankopɔn  akwankyerɛ a ɛwom no atom so.—1 Tesalonikafo 2:13.

Kristoni bea warefo bi a ne ho akokwaw kae sɛ: “Mpɛn pii no sɛ ababaa bi de n’awaresɛm ba m’anim bɛhwehwɛ afotu a, mibisa no sɛ ebia ɔne ne kunu bom kenkan Bible anaa. Wɔn a nneɛma nkɔ so yiye wɔ wɔn aware mu no nni saa su no.” (Tito 2:3-5) Ne nyansahyɛ no betumi aboa yɛn nyinaa. Wo ne wo hokafo nkenkan Onyankopɔn Asɛm daa. Saa kwan no so no, ‘wutie’ Onyankopɔn nsɛm na wuhu sɛnea wode bedi dwuma da biara da. (Yesaia 30:21) Nanso nea ɛsɛ sɛ wohyɛ no nsow ne sɛ, ɛnsɛ sɛ wode Bible no yɛ abaa a wode bɛhwe wo hokafo no, na bere biara woatwe n’adwene asi kyerɛw nsɛm bi a wote nka sɛ wantumi amfa anni dwuma no so. Mmom no, bɔ mmɔden sɛ wobɛhwehwɛ ɔkwan a mo baanu nyinaa bɛfa so de nea mokenkan no adi dwuma.

Sɛ worebɔ mmɔden sɛ wubedi asɛnnennen bi ho dwuma a, dɛn nti na wonhwɛhwɛ ade pɔtee a ɛhaw wo no ho asɛm wɔ Watch Tower Publications Index * no mu? Ebia na worehwɛ w’awofo a wɔn mfe akɔ anim ma ɛde wontwiwontwi reba w’aware no mu. Sɛ́ anka wo ne wo hokafo begye kyim wɔ nea ɛsɛ sɛ ɔyɛ ne nea ɛnsɛ sɛ ɔyɛ ho no, dɛn nti na montra ase na mommom nhwehwɛ Index no mu? Nea edi kan no, monhwɛ asɛmti titiriw “Parents” (awofo). Mubetumi ahwɛ nsɛmti nketewa bi te sɛ “caring for aged parents” (awofo a wɔn mfe akɔ anim a wɔhwɛ wɔn) ho nsɛm a wɔde ama no. Mommom nkenkan nsɛm a ɛfa ho a wɔatintim wɔ Yehowa Adansefo nhoma ahorow mu no. Mfaso a wo ne wo hokafo benya afi nsɛm a egyina Bible so a aboa nokware Kristofo pii no bɛma mo ho adwiriw mo.

Nhwehwɛmu a mobɛyɛ na moabom akenkan nsɛm no bɛboa mo ma mode adwempa asusuw mo haw no ho. Kyerɛwnsɛm a wɔafa mu asɛm aka ne nea wɔatwe adwene asi so no bɛma moahu Onyankopɔn adwene wɔ mo haw no ho. Monhwehwɛ wɔ Bible no mu na mommom nkenkan. Yiw, ɛbɛma moahu nea Onyankopɔn ka wɔ ɔhaw a morehyia no ho!

Munnnyae Nkɔmmɔbɔ

Woabɔ mmɔden sɛ wubebue pon bi a wɔtoo mu akyɛ pɛn? Esiane sɛ wobuei akyɛ nti, ɛbɛyɛ dede ansa na abue. Nanso sɛ wɔtaa bue pon no de ngo gugu mponterɛ no mu a, ɛte dɛn? Ne bue renyɛ den. Saa ara na nkɔmmɔbɔ te. Sɛnea sɛ motaa de ngo gugu mponterɛ mu a, ɛremma pon no nyɛ dede no, saa ara na sɛ moda Kristofo dɔ adi a, ɛrenyɛ den mma mo sɛ mobɛkyerɛ mo adwene bere a asɛnnennen bi asɔre no.

Nea ehia ara ne sɛ mubefi ase. Ɛwom sɛ mfiase no ɛrenyɛ mmerɛw sɛ mobɛbɔ nkɔmmɔ de, nanso monyere mo ho. Sɛ moyɛ saa a, mo ani begye na ɛrenyɛ den sɛ mobɛbɔ nkɔmmɔ, na ɛbɛma moate mo ho ase bere nyinaa.

[Ase hɔ asɛm]

[Mfonini wɔ kratafa 7]

Sɛ mo adwene nhyia a, mobɛhwehwɛ Nyankopɔn akwankyerɛ?