So Wokae?

So w’ani agye Ɔwɛn-Aban a aba nnansa yi akenkan ho? Ɛnde, hwɛ sɛ wubetumi abua nsɛmmisa a edidi so yi anaa:

• Dɛn nti na nsɛmmɔnedi abu so nnɛ saa?

Ade biako a enti nsɛmmɔnedi abu so no ne sɛ onipa nsusuwii nyinaa tɔ kɔ bɔne so. (Genesis 8:21) Ade foforo nso ne sɛ nnipa pii nni Onyankopɔn apɛdeyɛ ho nokware nimdeɛ. Bio nso, Satan a ɔyɛ bɔne nyinaa farebae no kɔ so de ne ho gye adesamma nsɛm mu.—1/1, kratafa 4-6.

• Ade pa bɛn na ebetumi afi asɛmpa a wɔka no ne bere mu no mu aba? (Mmebusɛm 12:25)

Ebetumi ama nea wɔrekasa akyerɛ no no anya ahotoso, ɛbɛhyɛ no nkuran na akanyan no, na ɛbɛma wate nka sɛ ɔwɔ adɔfo. Afei nso, bere a yɛhwehwɛ akwan a yɛbɛfa so akamfo afoforo no, ɛboa ma yehu wɔn mmɔdenbɔ.—1/1, kratafa 16-17.

• Nneɛma bɛn na na ɛwɔ apam adaka no mu?

Ná Mmara abopon abien no ne mana na ɛwɔ mu. Kora atuatew no akyi no, wɔde Aaron poma no too Adaka no mu na ayɛ adanse ama saa awo ntoatoaso no. (Hebrifo 9:4) Ɛbɛyɛ sɛ woyii poma no ne mana no fii Adaka no mu ansa na wɔrehyira Salomo asɔrefie no so.—1/15, kratafa 31.

• Dɛn nti na na ɛsɛ sɛ Nehemia bere so Yudafo no de nnyina ba asɔrefie hɔ?

Wɔankyerɛ wɔ Mose Mmara no mu sɛ wɔmfa nnyina mmra. Nanso wɔ Nehemia bere so no, na ɛsɛ sɛ wɔde ba bere nyinaa na ama wɔatumi ahyew afɔrebɔde wɔ afɔremuka no so.—2/1, kratafa 11.

• Dɛn ne Muratori Nhoma Asinasin No?

Ɛka Latin nsaano nkyerɛwee no ho. Wodii kan kyerɛwee wɔ Hela kasa mu bɛyɛ afeha a ɛto so abien Y.B. awiei mu hɔ. Kristofo Hela Kyerɛwnsɛm no mu nhoma ahorow a wogye toom no din a wɔkyerɛwee akyɛ paa no wɔ mu. Wɔakyerɛw nhoma ahorow no ne akyerɛwfo no ho nsɛm nso wɔ mu.—2/15, kratafa 13-14.

• Dɛn nti na Persia Hemmaa Wasti ampɛ sɛ ɔkɔ ɔhene no anim? (Ester 1:10-12)

Bible no ankyerɛ nea enti a ɔyɛɛ saa. Nhomanimfo bi ka sɛ nea enti a wankɔ ne sɛ na ɔmpɛ sɛ okogu ne ho anim ase wɔ ɔhene no ahɔho a wɔabow nsa no anim. Anaa ɛbɛyɛ sɛ na saa ɔhemmaa hoɔfɛfo yi nni ahobrɛase ankasa ma enti na ɔreyɛ nhwɛso bɔne ama ɔyerenom a na wɔwɔ Persia Ahemman no mu no.—3/1, kratafa 9.

• Ɔkwan bɛn so na wɔnam agyede no so gye yɛn?

Yesu afɔrebɔ no betumi agye yɛn afi bɔne a wɔde woo yɛn no mu na ebetumi agye yɛn afi owu a yenya fii bɔne mu no. (Romafo 6:23) Afɔrebɔ yi ma Nokware Kristofo nya ahonim pa. Na ɛdenam agyede no mu gyidi a yɛbɛkyerɛ so no, yebetumi anya gyinabea pa wɔ Onyankopɔn anim. (1 Yohane 2:1)—3/15, kratafa 8.

• Dɛn na yebetumi asua afi bara a wɔbarae wɔ Mmara no mu sɛ ɛnsɛ sɛ wɔnnoa oguan ba wɔ ne na nufusu mu no mu? (Exodus 23:19)

Ɛbɛyɛ sɛ saa kwan a na wɔfa so noa aboa no yɛ abosonsom amanne a wɔyɛ sɛnea ɛbɛyɛ a osu bɛtɔ. (Leviticus 20:23) Onyankopɔn yɛɛ ɛna no nufusu sɛnea ɛbɛyɛ a ɛbɛma oguan ba no ahoɔden na aboa no ma wanyin. Sɛ obi noa oguan ba wɔ ne na nufusu mu a, na ɔrebu ɛna ne ɔba ntam abusuabɔ a Onyankopɔn hyehyɛe no animtiaa. Mmara a wɔhyɛ tiaa adeyɛ yi ma yehu Onyankopɔn ayamhyehye.—4/1, kratafa 31.