Munnsuro Yehowa Ne Mo Wɔ Hɔ!

BƐBORO mfe 50 a atwam ni, bere a wɔtow nuklea atopae a edi kan akyi bere tiaa bi no, Harold C. Urey a onyaa Nobel akyɛde kaa nsɛm a na ebesisi daakye ho asɛm sɛ: “Yebedidi ehu mu, ada ehu mu, atra ase ehu mu na yɛawuwu ehu mu.” Nokwarem no, ɛnyɛ nwonwa sɛ ehu ahyɛ wiase yi mu ma saa! Da biara da, atesɛm nkrataa de nsɛm a ɛyɛ hu a ɛfa amumɔyɛsɛm, nsɛmmɔnedi, ne yare a ɛyɛ hu ho to gua.

Yɛn a yɛyɛ Kristofo no nim nea enti a nneɛma a ɛtete saa kɔ so. Ɛkyerɛ sɛ yɛte wiase bɔne yi “nna a edi akyiri” a Bible kaa ho asɛm siei sɛ ɛbɛyɛ “mmere a emu yɛ den” no mu. (2 Timoteo 3:1) Ɛma ahotoso a yɛwɔ mu yɛ den sɛ ɛrenkyɛ Yehowa Nyankopɔn de wiase foforo a trenee bɛtra mu bɛba. (2 Petro 3:13) Nanso, so ehu ntumi nka yɛn saa bere yi?

Nea Onyankopɔn Asomfo Yɛ Wɔ Ehu Ho

Yakob, Dawid, ne Elia yɛ Yehowa asomfo bi a ehu kaa wɔn bere a na wɔn nkwa da asiane mu no. (Genesis 32:6, 7; 1 Samuel 21:11, 12; 1 Ahene 19:2, 3) Ná ɛnyɛ sɛ saa mmarima yi nni gyidi, mmom no, wɔde wɔn ho too Yehowa so denneennen. Nanso, na Yakob, Dawid, ne Elia yɛ nnipa, enti na ehu betumi aka wɔn. Osuani Yakobo kyerɛwee sɛ: “Ná Elia yɛ onipa a ɔwɔ nkate te sɛ yɛn ara.”—Yakobo 5:17.

Sɛ yɛn nso yesusuw ɔhaw bi a yɛrehyia mprempren anaa nea yebetumi ahyia daakye ho a, ehu betumi aka yɛn. Sɛ ehu a ɛte saa ka yɛn a, ɛnyɛ nwonwa. Efisɛ Bible ka sɛ Satan Ɔbonsam asi ne bo sɛ ɔne wɔn a “wodi Nyankopɔn ahyɛde so na wokura Yesu ho adansedi adwuma mu” no ‘bɛko.’ (Adiyisɛm 12:17) Bere a saa asɛm yi fa Kristofo a wɔasra wɔn no ho titiriw no, Paulo kyerɛwee sɛ: “Wɔn a wɔpɛ sɛ wɔde nyamesom pa tra ase Kristo Yesu mu nyinaa, wɔbɛtaa wɔn nso.” (2 Timoteo 3:12) Nanso, sɛ yehyia nsɛnnennen a, ɛnsɛ sɛ yɛma ehu hyɛ yɛn so. Adɛn ntia?

“Nkwagye Nyankopɔn”

Odwontofo Dawid kyerɛwee sɛ: “Nyankopɔn no ne yɛn nkwagye Nyankopɔn.” (Dwom 68:20) Yehowa ada no adi mpɛn pii sɛ ɔwɔ tumi a ɔde gye ne nkurɔfo, sɛ ebia obegye wɔn afi tebea horow a ɛyɛ hu mu anaasɛ ɔbɛma wɔn ahoɔden a wɔde begyina ano. (Dwom 34:17; Daniel 6:22; 1 Korintofo 10:13) Efi bere a wusuaa Bible no, “nkwagye” a ɛtete saa mu ahe na wubetumi akae?

Adɛn nti na womfa Watch Tower Publications Index * no nyɛ nhwehwɛmu wɔ nsɛm a esisii ankasa te sɛ Noa bere so Nsuyiri no, Lot ne ne mmabea a wogyee wɔn fii Sodom ne Gomora, Israelfo a wofii Misraim na wɔkɔfaa Po Kɔkɔɔ no mu ne Haman pɔw a ɔbɔe sɛ ɔbɛtɔre Yudafo no ase a wɔsɛee no no mu? Nsɛm a ɛka koma a ɛtete saa a wobɛkenkan na afei woasusuw ho no bɛhyɛ gyidi a wowɔ sɛ Yehowa yɛ nkwagye Nyankopɔn no mu den. Eyi nso bɛboa wo ma sɛ wɔsɔ wo gyidi hwɛ a, woammɔ hu.

Nhwɛso Ahorow a Ɛwɔ Hɔ Nnɛ

So wunim obi a watumi agyina sɔhwɛ ahorow ano nnɛ wɔ baabi a wote no? Ebetumi ayɛ obi a nokware a odi ma Onyankopɔn nti wɔde no ato afiase. Ebia wunim Kristoni bi a ne mfe akɔ anim a ɔyare nanso ɔresom Yehowa. Anaasɛ susuw mmabun bi a wɔatwe wɔn  ho afi wiase no ho ɛmfa ho nhyɛso a emu yɛ den a wɔn mfɛfo sukuufo de ba wɔn so no ho hwɛ. Saa ara nso na awofo a wonni ahokafo a wɔn nkutoo retete wɔn mma anaa asigyafo a wɔte nka sɛ wɔayɛ ankonam nanso wɔresom Yehowa wɔ hɔ. Dɛn na wusua fi saafo no hɔ? Sɛ wususuw nokware a saafo no redi no ho a, ɛmfa ho sɔhwɛ biara a worehyia no, ebetumi aboa wo ma wode akokoduru agyina ano.

Ɛnyɛ bere a yɛrehyia ɔsɔretia ne ɔtaa nko na yehia akokoduru, na mmom bere a yenya adwene sɛ gyama Yehowa nnɔ yɛn no nso. Ɛsɛ sɛ yenya ahotoso sɛ yɛn mu biara nya Kristo agyede no so mfaso. (Galatifo 2:20) Sɛ ɛte saa a, yebetumi akɔ Yehowa anim a yennsuro. Sɛ yɛte nka sɛ yɛmfata sɛ Yehowa da ɔdɔ adi kyerɛ yɛn a, yebetumi asusuw asɛm a Yesu ka kyerɛɛ n’akyidifo no ho. Ɔkae sɛ: “Wɔntɔn nkasanoma abien nnye kaprɛ? Nanso emu biako mpo ntɔ fam a mo Agya nnim ho hwee. Na mo ti so nhwi koraa wɔakan. Enti munnsuro: mosom bo sen nkasanoma bebree.”—Mateo 10:29-31.

Ɔwɛn-Aban ne Nyan! nsɛmma nhoma no taa ka Yehowa Adansefo a wɔwɔ hɔ nnɛ a wɔde akokoduru agyina nsɛnnennen ano asetram nsɛm ho asɛm. Eyi nkyerɛ sɛ wɔn nsɛnnennen no anhyɛ wɔn awerɛhow. Ɛwom sɛ wodii awerɛhow de nanso wɔannyae Yehowa som. Wɔn asetram nsɛm no a wobɛkenkan no betumi aboa wo nso ma woanya akokoduru de agyina ano. Susuw emu nhwɛso abien ho hwɛ.

Opira Bi Sakraa N’asetra

Asɛm a ɛne, “Sɛnea Opira Sakraa M’asetra” no baa May 8, 2003, Nyan! mu. Stanley Ombeva, a ɔyɛ Yehowa Dansefo wɔ Kenya no kaa nsɛnnennen a ohyiae bere a kar bi a ɛde mmirika a emu yɛ den bɔɔ no ho asɛm wɔ mu. Bere a ne tebea no mu yɛɛ den no, n’adwuma fii ne nsa na ɔhweree biribiara a na onya fi adwumam no nso. Onua Ombeva kae wɔ n’asɛm no mu sɛ, “Bere a mihuu aniberesɛm a na me tebea no yɛ no, m’adwene sɛee na mebɛyɛɛ anuonyampɛ a na biribiara yɛ me ahi. Ɛtɔ mmere bi a, na me bo fuw, na saa ara nso na na mente asɛm ase.” Kristoni barima yi amanehunu no nyinaa akyi no, wammɔ hu. Wamma abasamtu anhyɛ no so amma wampa abaw koraa. Mmom no, ɔde ne ho too Yehowa so. Onua Ombeva kae sɛ, “Ɔboaa me wɔ ɔhaw a mefaa mu nyinaa no mu—ɔyɛ ma ɛboroo so, ma ɛtɔ mmere bi a, na m’ani awu. Misii gyinae pintinn sɛ mɛkenkan kyerɛw nsɛm a minim sɛ ebetumi akyekye me werɛ wɔ me tebea no mu no na madwennwen ho.”

Onua Ombeva komam asɛm a ɔkae no ama afoforo pii atumi de akokoduru agyina wɔn sɔhwɛ ano. Kristoni bea bi kyerɛwee sɛ, “Bere a mekenkan asɛm yi no, misui. Metee nka sɛ Yehowa nam saa asɛm yi so reda ne dɔ adi akyerɛ me na wakyekye me werɛ.” Ɔdansefo foforo nso kyerɛwee sɛ: “Asetram nsɛm a ɛte sɛ eyi hyɛ yɛn a yɛrehyia tebea horow a ɛte saa na yɛresu gu yɛn mu no nkuran yiye.”

Ogyinaa Adwenemhaw Ano

Osuahu foforo a ɛno nso ka koma ne Herbert Jennings de no a n’asɛmti ne “Munnim Nea Ɛbɛba Ɔkyena” no. * Onua Jennings yare adwenemhaw. Bere a ɔreka ne yare no mfiase  ho asɛm no, ɔkae sɛ: “Ná egye mmɔdenbɔ kɛse na matumi akɔ Kristofo nhyiam ahorow. Nanso na minim sɛnea honhom fam fekubɔ a ɛte saa no som bo fa. Nea ɛbɛyɛ na matumi agyina ano no, na metaa kɔ Ahenni Asa so bere a dɔm no nyinaa atra ase no na na mifi hɔ ansa na wɔayɛ bagyabagya bere a dwumadi no aba awiei no.”

Ná asɛnkakɔ nso yɛ no den. Onua Jennings kae sɛ: “Ɛtɔ da bi na midu fie bi anim a, na ɔpon ano dɔn a mɛbɔ no mpo yɛ asɛm. Nanso na minnyae efisɛ na minim sɛ ɔsom adwuma a yɛbɛyɛ no bɛma yɛne wɔn a wotie yɛn no anya nkwa. (1 Timoteo 4:16) Wɔ bere bi akyi no, na mitumi di me nkate no so, kɔ ɔpon a edi hɔ ano, na mesɔ hwɛ bio. Ɛdenam ɔsom adwuma no a mekɔɔ so de me ho hyɛɛ mu so no, minyaa honhom fam nkɔso a ɛsɛ, na ɛno boaa me ma mitumi gyinae.”

Onua Jennings komam asɛm a ɔkae no boaa akenkanfo pii ma wɔn nso de akokoduru a ɛte saa ara gyinaa ɔhaw a na wɔrehyia ano. Sɛ nhwɛso no, Kristoni bea bi kyerɛwee sɛ: “Wɔ mfe 28 a mede akenkan Ɔwɛn-Aban ne Nyan! nsɛmma nhoma no, menkenkan asɛm bi ma ɛnkaa me koma kɛse saa da sɛ saa asɛm yi. Ɛho behiae sɛ migyae bere nyinaa som adwuma no na m’ahonim buu me fɔ yiye. Metee nka sɛ sɛ na mewɔ gyidi a ɛyɛ den a, anka mannyae. Bere a mekenkan sɛnea na ɛsɛ sɛ onua Jennings de ne dwumadi to hɔ na ɔkɔhwɛ ne ho yare no ho asɛm no, ɛboaa me ma minyaa me tebea no ho adwene a ɛfata. Ná saa asɛm yi yɛ me mpaebɔ ho mmuae ankasa!”

Saa ara na Kristoni barima bi kyerɛwee sɛ: “Bere a mesomee sɛ asafo mu panyin mfe du akyi no, ɛho behiae sɛ mede ɔsom hokwan no to hɔ esiane adwenemyare bi a minyae nti. Metee nka sɛ madi nkogu ara ma na ɛyɛ den ma me mpɛn pii sɛ mɛkenkan afoforo asetram nsɛm a ɛtaa ka nneɛma pii a Yehowa nkurɔfo atumi ayɛ wɔ ne som mu ho asɛm no. Nanso animia a Onua Jennings de asom no ahyɛ me den yiye, na makenkan n’asɛm no mpɛn pii.”

Ahotoso a Yɛkɔ So De Som

Yehowa Adansefo pii akɔ so de akokoduru asom Yehowa Nyankopɔn ɛmfa ho a ɔhaw a emu yɛ den a wohyia te sɛ Onua Ombeva ne Onua Jennings no. Sɛ worehyia a ɔhaw a ɛte saa na wugu so resom Yehowa a, ɛnde wofata nkamfo. Nya awerɛhyem sɛ: “Onyankopɔn nyɛ nea ɔnteɛ sɛ ne werɛ befi mo adwuma ne ɔdɔ a modaa no adi wɔ ne din ho a ɛne sɛ moasom akronkronfo na moda so som wɔn no.”—Hebrifo 6:10.

Sɛnea Yehowa boaa ne nkurɔfo anokwafo a wɔtraa ase tete mmere mu ma wodii n’atamfo so nkonim no, saa ara na obetumi aboa wo ma woadi ɔhaw biara a ebia worehyia no so nkonim. Enti, ma asɛm a Yehowa nam ne diyifo Yesaia so kae yi nna wo koma so: “Nsuro, na me ne wo wɔ hɔ, mma wo bo nntu, na mene wo Nyankopɔn. Mehyɛ wo den, nso meboa wo, nso mede me trenee nifa mikura wo mu.”—Yesaia 41:10.

[Ase hɔ nsɛm]

[Mfonini wɔ kratafa 14]

USAF photo

[Mfonini wɔ kratafa 16]

Nnipa pii de akokoduru resom Yehowa te sɛ Stanley Ombeva (atifi) ne Herbert Jennings (nifa)