Nsrahwɛ a Ɛsesaa Owura Bi Koraa

“NÁ ME ho pere me sɛ mɛka ‘abɔfo’ baanu a Onyankopɔn somaa wɔn me nkyɛn no ho asɛm akyerɛ m’abusuafo.” Saa na owura bi a mmabaa baanu a wɔyɛ Yehowa Adansefo kɔsraa no no kyerɛwee. Bere a mmabaa no kɔsraa no no, na ne yere a wadi mfe 45 awu nnawɔtwe kakra a atwam no. Ná ne werɛ ahow paa. Ɛwom sɛ na ne mma mpanyimfo akyekye ne werɛ de, nanso na wɔte akyirikyiri. Ná ne nnamfo ne n’afipamfo mu biara mmɛsraa no.

Bere a mmabaa no kɔsraa owura no, ɔka kyerɛɛ wɔn sɛ: “Me ne Onyankopɔn nni hwee yɛ.” Nanso, wɔtee no ase na wɔmaa no Bible ho kratawa a wɔato din sɛ Anidaso Bɛn na Ɛwɔ Hɔ ma Adɔfo a Wɔawuwu? Ɔkenkan no saa anadwo no ara na onyaa awerɛkyekye.

Kristofo mmabaa baanu no san bae bere tiaa bi akyi. Wɔkae sɛ da a edi kan a wɔbae no wohui sɛ na ne werɛ ahow, enti wɔasan aba rebɛhwɛ sɛnea ne ho te. Akyiri yi owura no kyerɛwee sɛ: “Me ho dwiriw me paa sɛ nnipa a minnim wɔn baabiara da dwenee me ho saa na wɔbɛhwɛɛ me.” Bible mu asɛm a wɔka kyerɛɛ no no hyɛɛ no nkuran. Mmabaa no kae sɛ wɔbɛsan aba. Owura no ani gyei na ɛkaa no ma ɔkyerɛw asɛm a ɛwɔ atifi hɔ no kɔmaa Yehowa Adansefo asafo a ɛwɔ mpɔtam hɔ no.

Ansa na saa owura yi retu akɔ baabi a ɛbɛn ne mma no mu biako no, ɔkɔɔ Yehowa Adansefo Kristofo asafo nhyiam bi, na mmabaa no biako abusua too nsa frɛɛ no ma ɔne wɔn kodidii. Owura no kyerɛwee sɛ: “Meretu afi mpɔtam ha de, nanso me werɛ remfi saa mmabaa no ne mo asɔre no da, na mɛkae mo wɔ me mpaebɔ mu nso daa. Yiw, seesei mebɔ mpae paa. Masesa koraa. Saa mmabaa no na wɔboaa me kɛse, na me werɛ remfi wɔn da.”