Momma Asafo No Nyi Yehowa Ayɛ
Momma Asafo No Nyi Yehowa Ayɛ
‘Mɛbɔ wo din akyerɛ me nuanom; meyi wo ayɛ wɔ asafo mfinimfini.’—HEBRIFO 2:12.
1, 2. Dɛn nti na mfaso wɔ asafo no so saa, na dwuma titiriw bɛn na edi?
EFI tete na nnipa anya ayɔnkofa ne ahobammɔ wɔ wɔn mmusua ankasa mu. Nanso, Bible ka abusua foforo bi a nnipa pii a wɔwɔ wiase nnɛ nya ayɔnkofa ne ahobammɔ a ɛda nsow wom ho asɛm. Ɛno ne Kristofo asafo no. Sɛ́ woda abusua a emufo de biakoyɛ boa wɔn ho wɔn ho mu anaasɛ ɛnte saa no, wubetumi akyerɛ nhyehyɛe a Onyankopɔn nam asafo no so ayɛ no ho anisɔ, na ɛsɛ sɛ woyɛ saa nso. Nokwarem no, sɛ wode wo ho abɔ Yehowa Adansefo asafo bi dedaw a, wubetumi adi ayɔnkofa pa a ɛda wɔn ntam ne ahobammɔ a wunya no ho adanse.
2 Asafo no nyɛ fekuw bi ara kɛkɛ. Ɛnyɛ fekuw a nnipa a wɔn nyinaa ani gye agodi bi anaa biribi foforo ho dɔm. Mmom no, dwuma titiriw a asafo no di ne sɛ ebeyi Yehowa Nyankopɔn ayɛ. Saa na ɛte fi tete, sɛnea Nnwom nhoma no ka ho asɛm no. Yɛkenkan wɔ Dwom 35:18 sɛ: “Mɛda wo ase, gua kɛse mu, meyi wo ayɛ, ɔman dodow mu.” Saa ara na Dwom 107:31, 32 hyɛ yɛn nkuran sɛ: “Wɔnkamfo [Yehowa, NW], n’adɔe ho, ne n’anwonwade nnipa mma mu, na wɔmma no so, ɔman ahyiae mu.”
3. Sɛnea Paulo kyerɛ no, dwuma bɛn na asafo no di?
3 Ɔsomafo Paulo a ɔyɛ Kristoni no kaa dwuma titiriw a asafo no di nso ho asɛm bere a ɔtwee adwene sii “Nyankopɔn fie a ɛyɛ Nyankopɔn teasefo no asafo, nokware no dum ne ne nnyinaso” so no. (1 Timoteo 3:15) Asafo bɛn na na Paulo reka ho asɛm no? Akwan bɛn so na Bible de asɛmfua “asafo” di dwuma? Tumi bɛn na ɛsɛ sɛ asafo no nya wɔ yɛn abrabɔ ne yɛn anidaso so? Sɛ yebenya nsɛmmisa yi ho mmuae a, momma yenni kan nhwehwɛ sɛnea wɔde asɛmfua “asafo” di dwuma wɔ Onyankopɔn Asɛm mu no mu.
4. Mpɛn pii no, sɛ wɔde asɛmfua “asafo” di dwuma wɔ Hebri Kyerɛwnsɛm no mu a, na ɛfa henanom ho?
4 Wonyaa Hebri asɛmfua a wɔtaa kyerɛ ase “asafo” no fii asɛmfua foforo a ɛkyerɛ “boaboa ano” anaa “bɔ gua” mu. (Deuteronomium 4:10; 9:10) Odwontofo no de “asafo” kaa abɔfo a wɔwɔ soro no ho asɛm, na wobetumi de aka nnipa abɔnefo nso ho asɛm. (Dwom 26:5; 89:5-7) Nanso mpɛn pii no Hebri Kyerɛwnsɛm no de asɛmfua yi ka Israelfo no ho asɛm. Onyankopɔn kyerɛe sɛ na Yakob bɛyɛ “aman asafo,” na ɛbaa saa. (Genesis 28:3; 35:11; 48:4) Wɔfrɛɛ Israelfo no anaa wɔpaw wɔn sɛ wɔmmɛyɛ ‘Yehowa man asafo,’ “Onyankopɔn bagua.”—Numeri 20:4; Nehemia 13:1; Yosua 8:35; 1 Samuel 17:47; Mika 2:5.
5. Hela asɛmfua bɛn na wɔtaa kyerɛ ase “asafo,” na ɔkwan bɛn so na yebetumi de asɛmfua yi adi dwuma?
5 Hela asɛmfua a wɔde gyina hɔ ma asafo ne ek·kle·siʹa. Wonya fii Hela nsɛmfua abien a ɛkyerɛ sɛ “boaboa nnipa ano” mu. Ebetumi nso afa ɔmanfo a wɔboaboa wɔn ano te sɛ “bagua” a Demetrio kanyan wɔn ma wɔtow hyɛɛ Paulo so wɔ Efeso no ho. (Asomafo Nnwuma 19:32, 39, 41) Nanso Bible taa de asɛmfua no ka Kristofo asafo no ho asɛm. Bible ahorow bi kyerɛ asɛmfua no ase “asɔre,” nanso The Imperial Bible-Dictionary ka sɛ “ɛnkyerɛ ɔdan ankasa a na Kristofo hyia mu som.” Nanso wɔ Kristofo Hela Kyerɛwnsɛm mu no, anyɛ yiye koraa no, wɔde asɛmfua “asafo” di dwuma wɔ akwan horow anan so.
Onyankopɔn Asafo a Wɔasra Wɔn
6. Dɛn na Dawid ne Yesu yɛe wɔ asafo no mu?
6 Bere a ɔsomafo Paulo refa Dawid asɛm a ɛwɔ Dwom 22:22 de aka Yesu ho asɛm no, ɔkyerɛwee sɛ: “‘Mɛbɔ wo din akyerɛ me nuanom; mede nnwonto beyi wo ayɛ wɔ asafo mfinimfini.’ Ne saa nti ɛho behiae sɛ [Yesu yɛ] sɛ ne ‘nuanom’ ade nyinaa mu, na wayɛ sɔfopɔn mmɔborohunufo ne ɔnokwafo wɔ nneɛma a ɛfa Nyankopɔn ho no mu.” (Hebrifo 2:12, 17) Dawid yii Onyankopɔn ayɛ wɔ asafo mfinimfini wɔ tete Israel. (Dwom 40:9) Nanso dɛn na na Paulo rekyerɛ bere a ɔkae sɛ Yesu reyi Onyankopɔn ayɛ “wɔ asafo mfinimfini” no? Ná ɛyɛ asafo bɛn?
7. Ɔkwan titiriw bɛn so na Kristofo Hela Kyerɛwnsɛm no de asɛmfua “asafo” di dwuma?
7 Asɛm a yɛakenkan wɔ Hebrifo 2:12, 17 no ho hia paa. Ɛkyerɛ sɛ na Kristo ka asafo no ho bi bere a wɔbɔɔ Onyankopɔn din kyerɛɛ ne nuanom no. Ná henanom ne ne nuanom yi? Ɛyɛ wɔn a wɔbom yɛ “Abraham asefo,” Kristo nuanom a wɔde honhom asra wɔn a ‘wɔka ɔsoro frɛ ho’ no. (Hebrifo 2:16–3:1; Mateo 25:40) Nokwarem no, nea “asafo” kyerɛ wɔ Kristofo Hela Kyerɛwnsɛm mu titiriw ne Kristo akyidifo kuw a wɔde honhom asra wɔn. Nnipa 144,000 a wɔasra wɔn no na wɔbom yɛ “mmakan a wɔakyerɛw wɔn din wɔ ɔsoro no asafo.”—Hebrifo 12:23.
8. Nsɛm bɛn na Yesu kae a ɛkyerɛ sɛ na wɔbɛhyehyɛ Kristofo asafo no?
8 Yesu kyerɛe sɛ na wɔbɛhyehyɛ Kristofo “asafo” yi. Aka bɛyɛ afe ma Yesu awu no, ɔka kyerɛɛ ɔsomafo Petro sɛ: “Wone Petro, na ɔbotan yi so na mesi m’asafo, na Hades apon renni so nkonim.” (Mateo 16:18) Petro ne Paulo nyinaa tee ase yiye sɛ na Yesu ankasa ne ɔbotan a wɔahyɛ ho nkɔm no. Petro kyerɛwee sɛ wɔde wɔn a wɔahyehyɛ wɔn sɛ “ɔbo a ɛte ase” no asi ɔbotan so wɔ honhom mu fie a ɛne Kristo no so, na wɔyɛ “abusua a wɔapaw, adehye asɔfokuw, ɔman kronkron, nnipa a wɔde wɔn ayɛ agyapade soronko” sɛ ‘wɔnka nea ɔfrɛɛ wɔn no nneyɛe pa nkyerɛ.’—1 Petro 2:4-9; Dwom 118:22; Yesaia 8:14; 1 Korintofo 10:1-4.
9. Bere bɛn na wofii ase hyehyɛɛ Onyankopɔn asafo no?
9 Bere bɛn na wofii ase boaboaa “nnipa a wɔde wɔn ayɛ agyapade soronko” yi ano ma wɔbɛyɛɛ Kristofo asafo no? Ɛyɛ Pentekoste 33 Y.B., bere a Onyankopɔn hwiee ne honhom kronkron guu asuafo a na wɔahyiam wɔ Yerusalem so no. Saa da no, Petro maa ɔkasa a etu mpɔn kyerɛɛ Yudafo ne wɔn a wɔasakra aba Yudasom mu no. Yesu wu no haw wɔn mu pii yiye ma enti wɔsakrae ma wɔbɔɔ wɔn asu. Bible bɔ amanneɛ sɛ nnipa mpem abiɛsa bɔɔ asu, na ɛno akyi bere tiaa bi no, wɔbɛkaa Onyankopɔn asafo foforo a ɛredɔre no ho. (Asomafo Nnwuma 2:1-4, 14, 37-47) Nea ɛmaa asafo no dɔree ne sɛ Yudafo ne wɔn a wɔasakra aba Yudasom mu no pii begye toom sɛ Israel man no nyɛ Onyankopɔn asafo bio. Mmom no, na Kristofo a wɔasra wɔn a wɔbom yɛ “Nyankopɔn Israel” no na abɛyɛ Onyankopɔn asafo ankasa.—Galatifo 6:16; Asomafo Nnwuma 20:28.
10. Abusuabɔ bɛn na ɛda Yesu ne Onyankopɔn asafo no ntam?
10 Nsɛm bi te sɛ “Kristo ne asafo no” a Bible taa de di dwuma no ma yehu nsonsonoe a ɛda Yesu ne wɔn a wɔasra wɔn no ntam. Yesu na ɔyɛ Kristofo asafo a wɔde honhom asra emufo no Ti. Paulo kyerɛwee sɛ Onyankopɔn ‘yɛɛ Yesu ade nyinaa ti maa asafo no, ɛno ne ne nipadua.’ (Efesofo 1:22, 23; 5:23, 32; Kolosefo 1:18, 24) Ɛnnɛ, wɔn a wɔde honhom asra wɔn no mu kakraa bi na wɔda so wɔ asase so. Nanso yebetumi anya awerɛhyem sɛ Yesu Kristo a ɔne wɔn Ti no dɔ wɔn. Wɔka sɛnea ɔte nka ma wɔn no ho asɛm wɔ Efesofo 5:25: “Kristo nso dɔɔ asafo no na ɔde ne ho too hɔ mae.” Ɔdɔ wɔn efisɛ wɔde nsi bɔ Onyankopɔn “ayeyi afɔre daa, a ɛne anofafa aba a wɔde bɔ ne din wɔ baguam” sɛnea Yesu mpo yɛe bere a ɔwɔ asase so no.—Hebrifo 13:15.
Akwan Foforo a Wɔde Asɛmfua “Asafo” Di Dwuma
11. Ɔkwan foforo bɛn so na Kristofo Hela Kyerɛwnsɛm no de “asafo” di dwuma?
11 Ɛtɔ mmere bi a, Bible de asɛmfua “asafo” no ka nnipakuw pɔtẽẽ bi ho asɛm. Ɛnyɛ bere nyinaa na Bible de gyina hɔ ma 144,000 no mufo a wɔn nyinaa bom yɛ “Nyankopɔn asafo” no. Sɛ nhwɛso no, Paulo kyerɛw krataa kɔmaa Kristofo kuw bi sɛ: “Monhwɛ na moanto Yudafo ne Helafo ne Nyankopɔn asafo no hintidua.” (1 Korintofo 10:32) Ɛda adi sɛ, sɛ na Kristoni bi a ɔwɔ tete Korinto no yɛ biribi a ɛmfata a, na ebetumi ato nnipa binom hintidua. So ebetumi aba sɛ na nneyɛe a ɛmfata no bɛto Helafo nyinaa, Yudafo nyinaa, anaa wɔn a wɔasra wɔn fi saa bere no besi nnɛ no nyinaa hintidua? Ɛrentumi mma saa da. Enti ɛte sɛ nea wɔ kyerɛwsɛm yi mu no, “Nyankopɔn asafo” no fa Kristofo a wɔwɔ hɔ wɔ bere pɔtẽẽ bi mu ho. Enti yebetumi aka sɛnea Onyankopɔn hwɛ asafo no so, sɛnea ɔboa asafo no, anaa ohyira asafo no so ho asɛm sɛ ɛfa Kristofo a wɔwɔ hɔ wɔ bere pɔtẽẽ bi mu ho ɛmfa ho baabi a wɔte biara. Anaa yebetumi aka anigye ne asomdwoe a ɛwɔ Onyankopɔn asafo mu nnɛ no ho asɛm sɛ ɛfa Kristofo anuanom kuw no nyinaa ho.
12. Ɔkwan foforo bɛn bio so na wɔde “asafo” di dwuma wɔ Bible mu?
12 Bible de “asafo” di dwuma wɔ ɔkwan foforo so nso. Ɛfa Kristofo nyinaa a wɔte beae bi ho. Yɛkenkan sɛ: “Asafo a ɛwowɔ Yudea ne Galilea ne Samaria nyinaa nyaa asomdwoe.” (Asomafo Nnwuma 9:31) Ná ɛnyɛ Kristofo kuw biako pɛ na ɛwɔ beae kɛse saa, nanso wɔkaa Kristofo akuw a ɛtete saa a ɛwowɔ Yudea, Galilea, ne Samaria no ho asɛm sɛ “asafo.” Sɛ yɛhwɛ nnipa dodow a wɔbɔɔ asu wɔ Pentekoste 33 Y.B. ne ɛno akyi bere tiaa bi no a, ebetumi aba sɛ na ɛnyɛ nnipakuw biako pɛ na wɔtaa hyiam wɔ Yerusalem mpɔtam hɔ. (Asomafo Nnwuma 2:41, 46, 47; 4:4; 6:1, 7) Herode Agripa I dii Yudea so kosii sɛ owui wɔ afe 44 Y.B. mu, na 1 Tesalonikafo 2:14 ma ɛda adi sɛ, anyɛ yiye koraa, ebeduu afe 50 Y.B. no, na wɔahyehyɛ asafo ahorow wɔ Yudea. Enti sɛ yɛkenkan hu sɛ Herode “tuu n’ani sii nnipa a wɔwɔ asafo no mu binom so dii wɔn ani” a, ebetumi akyerɛ sɛ na ɛnyɛ kuw biako pɛ a na wohyiam wɔ Yerusalem ho asɛm na wɔreka.—Asomafo Nnwuma 12:1.
13. Ɔkwan bɛn so na Bible taa de “asafo” san di dwuma?
13 Wɔsan de “asafo” taa ka nnipakuw pɔtẽẽ bi ho asɛm. Ɛfa Kristofo a wɔwɔ asafo biako mu wɔ baabi te sɛ obi fie mu ho. Paulo kaa “Galatia asafo ahorow no” ho asɛm. Ná asafo a ɛte saa bɛboro biako na ɛwɔ Roma mansin kɛse no mu. Paulo reka Galatia ho asɛm no, ɔde “asafo ahorow” dii dwuma, a ɛbɛyɛ sɛ asafo a ɛwowɔ Antiokia, Derbe, Listra, ne Ikoniom ka ho. Wɔpaw mpanyimfo anaa ahwɛfo wɔ asafo ahorow yi mu. (1 Korintofo 16:1; Galatifo 1:2; Asomafo Nnwuma 14:19-23) Kyerɛwnsɛm no ma yehu sɛ na eyinom nyinaa yɛ “Onyankopɔn asafo horow.”—1 Korintofo 11:16; 2 Tesalonikafo 1:4.
14. Dɛn na yebetumi aka afa sɛnea wɔde asɛmfua “asafo” di dwuma wɔ kyerɛw nsɛm bi mu no ho?
14 Baabi wɔ hɔ a, ɛbɛyɛ sɛ na Kristofo a wohyiam yɛ nhyiam ahorow no nnɔɔso ma enti na wobetumi ahyia wɔ obi fie. Nanso wɔde asɛmfua “asafo” frɛɛ saa akuw no. Ebi ne asafo ahorow a na wohyiam wɔ Akwila ne Priska, Nimfa, ne Filemon afie mu no. (Romafo 16:3-5; Kolosefo 4:15; Filemon 2) Ɛsɛ sɛ eyi hyɛ asafo horow a esusua a ɛwɔ hɔ nnɛ, na ebi mpo a wohyiam wɔ obi fie daa no nkuran. Yehowa gyee asafo nketewa a ɛtete saa no toom wɔ afeha a edi kan no mu, na akyinnye biara nni ho sɛ ogye tom nnɛ nso, na ɔnam ne honhom so hyira wɔn.
Asafo Ahorow Yi Yehowa Ayɛ
15. Ɔkwan bɛn so na honhom kronkron no daa adi wɔ afeha a edi kan asafo ahorow no bi mu?
15 Yɛadi kan ahu sɛ Yesu yii Onyankopɔn ayɛ wɔ asafo mfinimfini maa Dwom 22:22 no baa mu. (Hebrifo 2:12) Ná n’akyidifo anokwafo no nso bɛyɛ saa ara. Bere a wɔde honhom kronkron sraa nokware Kristofo wɔ afeha a edi kan no mu no, wɔbɛyɛɛ Onyankopɔn mma ne Kristo nuanom, na honhom kronkron de wɔn mu binom dii dwuma wɔ ɔkwan soronko so. Wonyaa honhom akyɛde a wɔde yɛ anwonwade. Honhom akyɛde no bi ne nyansa-kasa anaa nimdeɛ-kasa soronko, tumi a wɔde sa yare anaa wɔde hyɛ nkɔm, anaa mpo tumi a wɔde ka kasa horow a na wonnim.—1 Korintofo 12:4-11.
16. Botae biako bɛn nti na wɔde honhom akyɛde a wɔde yɛ anwonwade no mae?
16 Ɛdefa kasa foforo ho no, Paulo kae sɛ: “Mede honhom akyɛde no bɛto dwom, na mede m’adwene nso bɛto dwom.” (1 Korintofo 14:15) Ohui sɛ ɛho hia sɛ afoforo te asɛm a ɔka no ase sɛnea ɛbɛyɛ a ɛbɛkyerɛkyerɛ wɔn. Ná Paulo botae ne sɛ obeyi Yehowa ayɛ wɔ asafo no mu. Ɔhyɛɛ afoforo a na wɔwɔ honhom akyɛde no nkuran sɛ: “Mommɔ mmɔden sɛ mubenya ma abu so na asafo no” kyerɛ sɛ, asafo a wɔdaa honhom akyɛde adi wom no “anya nkɔso.” (1 Korintofo 14:4, 5, 12, 23) Ɛda adi sɛ na Paulo ani kũ asafo ahorow no ho, na onim sɛ Kristofo benya hokwan ayi Onyankopɔn ayɛ wɔ emu biara mu.
17. Dɛn na yebetumi aka wɔ asafo ahorow a ɛwɔ hɔ nnɛ no ho?
17 Yehowa da so ara de n’asafo no di dwuma na ɔboa wɔn. Ɔrehyira Kristofo kuw a wɔasra wɔn a wɔwɔ asase so nnɛ no. Yehu eyi wɔ honhom mu aduan pii a Onyankopɔn nkurɔfo nya nnɛ no mu. (Luka 12:42) Ɔrehyira anuanom a wɔwɔ wiase nyinaa sɛ kuw. Na ɔrehyira asafo ahorow, baabi a yɛde yɛn nneyɛe ne mmuae a ɛhyɛ yɛn den yi yɛn Bɔfo no ayɛ no. Wɔkyerɛkyerɛ yɛn wɔ hɔ, na wɔtete yɛn sɛnea ɛbɛyɛ a yebetumi ayi Onyankopɔn ayɛ wɔ mmere afoforo mu bere a yenni asafo nhyiam ase mpo no.
18, 19. Dɛn na nokware Kristofo a wɔwɔ asafo biara mu pɛ sɛ wɔyɛ?
18 Kae sɛ ɔsomafo Paulo hyɛɛ Kristofo a wɔwɔ Filipi asafo a ɛwɔ Makedonia mu no nkuran sɛ: “Eyi na mekɔ so bɔ ho mpae, sɛ mo . . . trenee aba a ɛnam Yesu Kristo so ahyɛ mo mã de anuonyam ne ayeyi abrɛ Nyankopɔn.” Ná afoforo a wonni Kristofo asafo no mu a wɔbɛka Yesu mu gyidi ne anidaso nwonwaso a wɔwɔ ho asɛm akyerɛ wɔn no ka eyi ho. (Filipifo 1:9-11; 3:8-11) Enti Paulo hyɛɛ ne mfɛfo Kristofo nkuran sɛ: “Momma yɛmfa [Yesu] so mmɔ Onyankopɔn ayeyi afɔre daa, a ɛne anofafa aba a wɔde bɔ ne din wɔ baguam no.”—Hebrifo 13:15.
19 So wunya anigye wɔ Onyankopɔn a wuyi no ayɛ “wɔ asafo mfinimfini” ho sɛnea Yesu yɛe no, na wode w’anofafa yi Yehowa ayɛ wɔ wɔn a wonnya mmehuu Onyankopɔn na wɔayi no ayɛ no anim? (Hebrifo 2:12; Romafo 15:9-11) Ebia mmuae a yɛn ankasa bɛma wɔ eyi ho no begyina sɛnea yɛte nka wɔ dwuma a asafo no di wɔ Onyankopɔn atirimpɔw mu no so. Ma yɛnhwɛ sɛnea Yehowa rekyerɛ asafo a yɛwom no kwan, sɛnea ɔde redi dwuma ne sɛnea ɛsɛ sɛ dwuma a edi no ka yɛn asetra nnɛ wɔ adesua a edi hɔ no mu.
So Wokae?
• Ɛyɛɛ dɛn na Kristofo a wɔasra wɔn a wɔyɛ “Nyankopɔn asafo” no bae?
• Akwan abiɛsa bɛn bio so na Bible de asɛm “asafo” di dwuma?
• Ɛdefa asafo no ho no, dɛn na na Dawid, Yesu, ne afeha a edi kan mu Kristofo no pɛ sɛ wɔyɛ, na ɛsɛ sɛ eyi ka yɛn dɛn?
[Adesua no ho Nsɛmmisa]
[Mfonini wɔ kratafa 21]
Asafo bɛn na na Yesu yɛ ne fapem no?
[Mfonini wɔ kratafa 23]
Ná Kristofo akuw hyiam sɛ “Onyankopɔn asafo horow”
[Mfonini wɔ kratafa 24]
Yebetumi ayi Yehowa ayɛ wɔ asafo guabɔ kɛse mu te sɛ Kristofo a wɔwɔ Benin no