So Wubekura Wo Mũdi Mu?
So Wubekura Wo Mũdi Mu?
“Meremma wonyi me mudi mfi me ho de bɛkɔ akosi sɛ megyaa mu.”—HIOB 27:5.
1, 2. Dɛn na ɛsɛ sɛ yenya, na nsɛmmisa bɛn na yebesusuw ho?
FA NO sɛ worehwɛ krataa a wɔhwɛ so si ofie bi so. W’ani gye sɛnea sɛ wosi ofie no wie a ɛbɛyɛ no ho. Wode anigye dwennwen sɛnea wo ne w’abusua betumi anya ofie no so mfaso ho. Nanso, wunnye ntom sɛ, sɛ wunsii ofie no ankasa ntu nkɔtraa mu, na afei wunsiesiee mu a, mfaso biara remma sɛnea wɔayɛ ofie no ho nsusuwso wɔ krataa so ne ɛho adwene biara a wubetumi anya no so?
2 Saa ara na yɛn ani betumi agye mũdi ho sɛ ɛyɛ su a ɛho hia paa a ebetumi aboa yɛne nnipa a yɛdɔ wɔn no. Nanso, sɛ yɛannya mũdi sɛ Kristofo na yɛankura mu a, mfaso biara remma yɛn ani a yɛbɛma agye mũdi ho no so ahe biara. Wɔ ɛnnɛ wiase yi mu no, adansi ho ka taa yɛ kɛse. (Luka 14:28, 29) Saa ara na egye bere ne mmɔdenbɔ ansa na yɛanya mũdi, nanso mfaso kɛse wɔ saa a yɛbɛyɛ no so. Enti, ma yensusuw nsɛmmisa abiɛsa a edi so yi ho nhwɛ: Yɛbɛyɛ dɛn atumi ayɛ nnipa a wɔwɔ mũdi? Yɛbɛyɛ dɛn atumi ayɛ Kristofo a wokura wɔn mũdi mu? Sɛ obi gyae ne mũdi mu bere bi a, dɛn na obetumi ayɛ?
Yɛbɛyɛ Dɛn Atumi Ayɛ Nnipa a Wɔwɔ Mũdi?
3, 4. (a) Ɔkwan bɛn so na Yehowa boa yɛn ma yenya mũdi? (b) Yɛbɛyɛ dɛn atumi anya mũdi sɛnea Yesu yɛɛ ho nhwɛso no?
3 Wɔ adesua a edi eyi anim mu no, yehui sɛ Yehowa di yɛn ni denam gyinae a ɔma yɛn ankasa si sɛ yɛbɛyɛ nnipa a wokura wɔn mũdi mu anaasɛ wonkura mu no so. Nanso, anigyesɛm ne sɛ, Yehowa nnyaw yɛn sɛ yɛn ankasa yennya mũdi a ɔremmoa yɛn. Ɔkyerɛ yɛn ɔkwan a yɛbɛfa so anya saa su a ɛsom bo yi, na ofi ayamye mu de ne honhom kronkron ma yɛn ma ɛboa yɛn ma yɛde ne nkyerɛkyerɛ yɛ adwuma. (Luka 11:13) Ɔsan nso mpo bɔ wɔn a wɔbɔ mmɔden sɛ wɔbɛnantew wɔn mũdi mu no ho ban wɔ honhom fam.—Mmeb. 2:7.
4 Ɔkwan bɛn na Yehowa afa so akyerɛkyerɛ yɛn sɛ yɛnyɛ nnipa a wokura wɔn mũdi mu? Nea ɛsen ne nyinaa no, ɔsomaa ne Ba Yesu ma ɔbaa asase so. Yesu yɛɛ osetie a edi mũ wɔ n’asetram. Yesu “yɛɛ osetie kosii owu mu.” (Filip. 2:8) Otiee ne soro Agya no wɔ biribiara mu, na ɔyɛɛ osetie wɔ bere mpo a na ɛyɛ den ma no paa sɛ ɔbɛyɛ saa no mu. Ɔka kyerɛɛ Yehowa sɛ: “Ɛnyɛ me pɛ, na mmom ma wo pɛ nyɛ.” (Luka 22:42) Enti, ɛsɛ sɛ yɛn mu biara bisa ne ho sɛ, ‘So saa na me nso meyɛ osetie?’ Sɛ yɛde adwempa yɛ osetie wɔ yɛn asetram a, yɛbɛyɛ nnipa a yekura yɛn mũdi mu. Ma yensusuw nneɛma bi a ɛho hia paa sɛ yɛyɛ osetie wom wɔ yɛn asetram no bi ho nhwɛ.
5, 6. (a) Ɔkwan bɛn so na Dawid sii so dua sɛ yɛn mũdi mu a yebekura no yɛ ade a ɛho hia bere mpo a nnipa foforo nhu yɛn no? (b) Nsɛnnennen bɛn na Kristofo a wɔwɔ hɔ nnɛ hyia wɔ wɔn mũdi mu a wobekura ho bere a obiara nhu wɔn no?
5 Sɛ yɛwɔ baabi a ɛte sɛ nea obiara nhu yɛn mpo a, ɛsɛ sɛ yɛyɛ osetie ma Yehowa. Odwontofo Dawid huu sɛnea na ɛho hia sɛ okura ne mũdi mu wɔ mmere a ɔwɔ baabi a na obiara nhu no no. (Monkenkan Dwom 101:2.) Esiane sɛ na Dawid yɛ ɔhene nti, na nnipa wɔ ne ho bere nyinaa. Akyinnye biara nni ho sɛ, mpɛn pii no, na nnipa ɔhaha anaa mpempem mpo wɔ ne ho. (Fa toto Dwom 26:12 ho.) Ná ne mũdi mu a obekura wɔ mmere a ɛte saa mu no ho hia, efisɛ sɛ́ ɔhene no, na ɛsɛ sɛ ɔyɛ nhwɛso pa ma ne nkurɔfo. (Deut. 17:18, 19) Nanso, Dawid hui sɛ sɛ ɛkɔba sɛ ɔno nkutoo wɔ baabi a obi nhu no te sɛ bere a ɔwɔ ‘ne fie’ a, na ɛsɛ sɛ ɔnantew ne mũdi mu. Na yɛn nso ɛ?
6 Dawid kae wɔ Dwom 101:3 sɛ: “Meremma ahuhusɛm bi nsi m’ani so.” Ɛnnɛ, tebea ahorow pii wɔ hɔ a ebetumi ama yɛde yɛn ani asi ahuhusɛm so, titiriw, bere a yɛn nkutoo wɔ baabi a obi nhu yɛn no. Intanɛt a aba so no ma ɛyɛ den ma nnipa pii sɛ wɔbɛkwati ahuhusɛm koraa. Ɛnyɛ den koraa sɛ Intanɛt bɛtwetwe obi ma wahwɛ mfonini a ɛmfata anaa aguamansɛm mpo. Nanso, sɛ yɛhwɛ mfonini a ɛmfata a, so na yɛreyɛ osetie ama Onyankopɔn a ɔde ne honhom kaa Dawid ma ɔkyerɛw saa asɛm no? Aguamansɛm tumi sɛe nnipa koma ne wɔn adwene, efisɛ ɛkanyan akɔnnɔ bɔne ne anibere, na ɛsɛe ahonim, ɛsɛe aware, na obiara a ɔhwɛ bi no anim gu ase.—Mmeb. 4:23; 2 Kor. 7:1; 1 Tes. 4:3-5.
7. Nnyinasosɛm bɛn na ebetumi aboa ma yɛakura yɛn mũdi mu bere a yɛwɔ baabi a obiara nhu yɛn no?
7 Nokwarem no, Yehowa somfo biara nni hɔ a obiara nhu no. Yɛn soro Agya no fi ɔdɔ mu hwɛ yɛn. (Monkenkan Dwom 11:4, NW.) Sɛ Yehowa hu wo sɛ worebɔ mmɔden sɛ worenyɛ bɔne a, hwɛ sɛnea ɛbɛyɛ sɛ n’ani gye! Sɛ woyɛ saa a, na woretie Yesu kɔkɔbɔ a ɛwɔ Mateo 5:28 no. Sɛnea ɛte biara no, si wo bo sɛ worenhwɛ mfonini bi a ɛbɛma woayɛ bɔne. Mfa wo mũdi a ɛsom bo no nsesa aguamansɛm a wɔhwɛ, anaa ɛho nsɛm a wɔkenkan a ɛyɛ aniwude no!
8, 9. (a) Asɛnnennen bɛn na Daniel ne n’ayɔnkofo no hyiae wɔ wɔn mũdi mu a na wobekura no ho? (b) Ɔkwan bɛn so na Kristofo mmerante ne mmabaa a wɔwɔ hɔ nnɛ no ma Yehowa ne wɔn mfɛfo Kristofo ani gye?
8 Sɛ yɛyɛ osetie ma Yehowa bere a yɛwɔ nnipa a wonnye nni mu a, ɛno nso betumi ama yɛayɛ nnipa a wokura wɔn mũdi mu. Susuw Daniel ne n’ayɔnkofo baasa no ho hwɛ. Wɔfaa wɔn sɛ nkoa kɔɔ Babilon wɔ wɔn mmerantebere mu. Ɛhɔ no, na Hebrifo baanan no ne nnipa a wonni Yehowa ho nimdeɛ papa, anaasɛ wonnim no koraa na ɛte, na wɔhyɛɛ mmerantewa no sɛ wonni nnuan a na Onyankopɔn Mmara abara no. Ná ɛnyɛ den koraa sɛ anka mmerantewa no benya biribi de ayi wɔn ho ano na wɔabu Onyankopɔn Mmara so. Efisɛ, na saa mmerantewa baanan no awofo, Yudasom mu mpanyimfo, ne wɔn asɔfo no ntumi nhu nea na wɔreyɛ. Nanso, hena na na obehu nea wɔreyɛ? Ɛyɛ Yehowa ankasa. Ɛno nti, mmerantewa no sii gyinae pintinn yɛɛ osetie maa Yehowa ɛmfa ho sɛ na saa a wɔbɛyɛ no betumi de nhyɛso ne asiane aba wɔn so no.—Dan. 1:3-9.
9 Wɔ wiase nyinaa no, Yehowa Adansefo mmerante ne mmabaa nso reyɛ saa ara, na wɔde Onyankopɔn gyinapɛn a Kristofo de bɔ wɔn bra no reyɛ adwuma, na wonnyae wɔn ho mu mma atipɛnfo nhyɛso bɔne. Sɛ mo a moyɛ mmofra no annom nnubɔne, moanyɛ basabasa, moanka kasafĩ, na moamfa mo ho anhyɛ ɔbrasɛe ne nneɛma bɔne foforo mu a, na moreyɛ osetie ama Yehowa. Sɛ moyɛ saa a, na morekura mo mũdi mu, na mo ankasa munya so mfaso, na ɛma Yehowa ne mo mfɛfo Kristofo ani gye!—Dw. 110:3.
10. (a) Aguamammɔ ho adwene a ɛnteɛ bɛn na ama mmerante ne mmabaa binom agyae wɔn mũdi mu? (b) Ɔkwan bɛn so na mũdi boa yɛn ma yɛtwe yɛn ho fi nneyɛe biara a ɛbɛma yɛabɔ aguamman ho?
10 Ɛho hia sɛ yɛyɛ osetie nso bere a yɛne nnipa a ɛsono wɔn bɔbeasu rebɔ fekuw no. Yenim sɛ Onyankopɔn Asɛm bara aguamammɔ. Nanso, ɛnyɛ den koraa sɛ yebegyae yɛn ho mu na yɛayɛ bɔne. Sɛ nhwɛso no, mmerante ne mmabaa binom ataforo mmea anan mu, na mmea no nso ataforo mmarima no awode ho, anaasɛ wɔafa wɔn ho wɔ wɔn to, anaasɛ wɔagoru wɔn ho wɔn ho awode ho ama wɔn ho asen, na wosusuw sɛ nneyɛe a ɛte saa no nyɛ bɔne, efisɛ ɛno nyɛ “nna” ankasa. Mmerante ne mmabaa a wɔte saa no ma wɔn werɛ fi, anaasɛ wɔhyɛ da bu wɔn ani gu so sɛ asɛmfua a Bible de gyina hɔ ma aguamammɔ no fa saa nneyɛe no nyinaa ho, na ɛyɛ ɔbra bɔne a sɛ obi de ne ho hyɛ mu a ebetumi ama wɔatu no afi asafo no mu. * Nanso, nea enye koraa no, wobu wɔn ani gu wɔn mũdi mu a wobekura no so. Esiane sɛ yɛrebɔ mmɔden sɛ yebekura yɛn mũdi mu nti, yɛnhwehwɛ nneɛma bi mfa nyiyi yɛn ho ano mmu ɔbra bɔne. Yɛmmmɔ mmɔden sɛ yɛbɛyɛ bɔne akodu baabi a sɛ wɔtwe yɛn aso wɔ ho a ɛnyɛ yiye. Ɛnyɛ yɛn asɛm a wobedi na wɔatwe yɛn aso wɔ bɔne bi ho no ne ade a yɛde yɛn adwene si so titiriw. Mmom no, yɛde yɛn adwene si ade a yɛyɛ a ɛbɛma Yehowa ani agye so, na yɛtwe yɛn ho fi biribiara a ɛbɛma wadi yaw no ho. Sɛ́ anka yɛbɛbɛn bɔne ho no, yɛtwe yɛn ho fi ho koraa, na ‘yeguan aguamammɔ.’ (1 Kor. 6:18) Sɛ yɛyɛ saa a, yɛda no adi sɛ yɛyɛ nnipa a wokura wɔn mũdi mu ankasa.
Yɛbɛyɛ Dɛn Atumi Akura Yɛn Mũdi Mu?
11. Dɛn nti na osetie biako a yɛyɛ ho hia? Ma mfatoho.
11 Yɛnam osetie a yɛyɛ so nya mũdi, enti yɛnam osetie a yɛkɔ so yɛ so kura yɛn mũdi mu. Osetie biako a yɛbɛyɛ betumi ayɛ te sɛ nea ɛho nhia anaa ade ketewaa bi. Nanso, osetie a ɛtete saa a yɛbɛkɔ so ayɛ no ma yɛbɛyɛ nnipa a wokura wɔn mũdi mu. Nhwɛso bi ni: Blɔk biako betumi ayɛ te sɛ ade bi a ɛho nhia, nanso sɛ yɛtɔ yɛn bo ase hyehyɛ Blɔk no pii a, yebetumi de asi ofie a ɛyɛ fɛ. Enti, sɛ yɛkɔ so yɛ osetie a, ɛma yekura yɛn mũdi mu.—Luka 16:10.
12. Ɔkwan bɛn so na bere a Dawid hyiaa ateetee ne ntɛnkyea no, ɔkɔɔ so kuraa ne mũdi mu de yɛɛ nhwɛso maa yɛn?
12 Sɛ yegyina ahokyere, ateetee, anaa ntɛnkyea ano a, ɛma ɛda adi paa sɛ yɛyɛ nkurɔfo a yekura yɛn mũdi mu. Susuw Dawid nhwɛso a ɛwɔ Bible mu no ho hwɛ. Bere a na Dawid yɛ aberante no, ɔhene a na ogyina Yehowa tumidi ananmu no taa no. Nanso, na Ɔhene Saul ahwere Yehowa anim dom, na na n’ani bere Dawid a Onyankopɔn apaw no no paa. Nanso, Saul kɔɔ so dii tumi kosii bere bi, na ɔmaa Israel asraafo tiw Dawid, na wɔteetee no. Yehowa maa kwan ma saa ntɛnkyea yi kɔɔ so mfe bi. So Dawid bo fuw Onyankopɔn? So onyaa adwene sɛ ɛho nhia sɛ ɔkɔ so gyina ɔhaw no ano? Wanyɛ saa. Mmom no, ɔkɔɔ so nyaa obu a emu dɔ maa Saul sɛ ɔhene a Onyankopɔn asra no, na bere a onyaa hokwan sɛ obekum Saul no, wanyɛ no bɔne.—1 Sam. 24:2-7.
13. Sɛ obi yɛ yɛn ade ma ɛyɛ yɛn yaw anaasɛ ɔhyɛ yɛn abufuw a, yɛbɛyɛ dɛn atumi akura yɛn mũdi mu?
13 Hwɛ sɛnea ade a Dawid yɛe no yɛ nhwɛso pa ma yɛn nnɛ! Yɛwɔ asafo a ɛwɔ wiase nyinaa a nnipa a wɔwom no nyɛ pɛ mu, na wɔn mu biara betumi afom yɛn, anaasɛ wobetumi afi nokware no mu mpo. Nokwarem no, nea ɛyɛ anigye ne sɛ, yɛte bere bi a wontumi nsɛe Yehowa nkurɔfo nyinaa mu. (Yes. 54:17) Nanso, sɛ obi di yɛn huammɔ anaasɛ ɔyɛ yɛn ade ma ɛyɛ yɛn yaw a, dɛn na yɛbɛyɛ? Sɛ yɛma yɛn bo fuw yɛn yɔnko gyidini bi na yenya ne ho menasepɔw a, ebetumi ama yɛagyae yɛn mũdi mu a yekura ma Onyankopɔn no mu. Ɛnsɛ sɛ afoforo nneyɛe nti yɛn bo fuw Onyankopɔn da, anaasɛ ɛma yegyae Onyankopɔn som. (Dw. 119:165, NW) Sɛ yehyia sɔhwɛ ahorow na yegyina ano a, ɛbɛboa yɛn ma yɛakura yɛn mũdi mu.
14. Nnipa a wokura wɔn mũdi mu no yɛ wɔn ade dɛn wɔ nsakrae a wɔyɛ wɔ ahyehyɛde no ne Bible nkyerɛkyerɛ mu no ho?
14 Sɛ yɛanhwehwɛ Yehowa ahyehyɛde no ho mfomso, na yɛankasa antia nsakrae a wɔyɛ wom no a, ɛno nso bɛma yɛatumi akura yɛn mũdi mu. Na ɛno bɛkyerɛ sɛ yedi Yehowa nokware. Yehowa rehyira ne nkurɔfo nnɛ sen bere biara. Wɔama nokware som so wɔ asase so nnɛ sen bere biara a abɛsen kɔ. (Yes. 2:2-4) Sɛ wɔyɛ nsakrae wɔ Bible nkyerɛkyerɛmu bi mu, anaa ɔkwan a yɛfa so yɛ nneɛma bi wɔ ahyehyɛde no mu a, ɛsɛ sɛ yegye tom. Ɛyɛ yɛn anigye sɛ yehu adanse a ɛkyerɛ sɛ nokware hann no gu so rehyerɛn. (Mmeb. 4:18) Sɛ ɛyɛ den ma yɛn sɛ yɛbɛte nsakrae bi ase a, yɛsrɛ Yehowa sɛ ɔmmoa yɛn mma yɛnte ase. Enkosi sɛ yɛbɛte ase no, yɛbɛkɔ so ayɛ osetie na yɛakura yɛn mũdi mu.
Sɛ Obi Ankura ne Mũdi mu Nso Ɛ?
15. Hena nkutoo na obetumi ayi wo mũdi afi wo ho?
15 So saa asɛmmisa yi mma yennwen nkɔ akyiri? Sɛnea yesuaa ho ade wɔ adesua a edi kan no mu no, yehui sɛ mũdi ho hia paa. Sɛ yenni mũdi a, na yɛne Yehowa nni abusuabɔ biara, na na yenni anidaso ankasa nso. Mma wo werɛ mfi asɛm a edi hɔ yi da sɛ: Wɔ amansan yi nyinaa mu no, onipa biako pɛ na obetumi ayi wo mũdi afi wo ho. Na saa onipa no ne wo ankasa. Ná Hiob nim saa nokwasɛm yi yiye. Ɔkae sɛ: “Meremma wonyi me mudi mfi me ho de bɛkɔ akosi sɛ megyaa mu.” (Hiob 27:5) Sɛ wo nso woasi wo bo sɛ wobɛyɛ saa, na sɛ wokɔ so bata Yehowa ho a, wo mũdi remfi wo ho da.—Yak. 4:8.
16, 17. (a) Sɛ obi yɛ bɔne a anibere wom a, dɛn na ɛnsɛ sɛ ɔyɛ? (b) Na dɛn na ɛsɛ sɛ ɔyɛ?
16 Nanso, ebinom nkɔ so nkura wɔn mũdi mu. Te sɛ nea ɛkɔɔ so wɔ bere a na asomafo no te ase no, ɛnnɛ, Kristofo binom kɔ so yɛ bɔne a anibere wom mpɛn pii. Sɛ saa na ato wo a, so ɛno kyerɛ sɛ wunni anidaso biara? Ɛnte saa. Dɛn na wubetumi ayɛ? Ma yenni kan nsusuw nea ɛnsɛ sɛ woyɛ no ho. Sɛ nnipa yɛ bɔne a, wɔtaa de sie wɔn awofo, wɔn mfɛfo Kristofo, anaa asafo mu mpanyimfo. Nanso, Bible kae yɛn sɛ: “Nea ɔkata ne mmarato so no, ɛrensi no yiye, na nea ɔka na ogyae no, wobehu no mmɔbɔ.” (Mmeb. 28:13, NW) Wɔn a wɔbɔ mmɔden sɛ wɔbɛkata wɔn bɔne so no di mfomso kɛse, efisɛ biribiara nni hɔ wobetumi ayɛ de asie Onyankopɔn. (Monkenkan Hebrifo 4:13.) Ebinom mpo bɔ mmɔden sɛ wɔbɛyɛ wɔn ho te sɛ nea wɔresom Yehowa, nanso na wogu so reyɛ bɔne a anibere wom. Nokwarem no, sɛ obi bɔ ne bra saa a, na wagyae ne mũdi mu. Yehowa ani nnye ɔsom a nnipa a wɔyɛ bɔne a anibere wom na wɔde sie de ma no no ho. Mmom no, nyaatwom a ɛte saa no hyɛ no abufuw.—Mmeb. 21:27; Yes. 1:11-16.
17 Sɛ Kristoni bi yɛ bɔne a anibere wom a, ɔkwampa wɔ hɔ a ɛsɛ sɛ ɔfa so di ho dwuma. Ɛsɛ sɛ ɔhwehwɛ mmoa fi Kristofo asafo no mu mpanyimfo hɔ. Yehowa ayɛ nhyehyɛe a wɔfa so boa wɔn a wɔyare wɔ honhom fam no. (Monkenkan Yakobo 5:14.) Ɛnsɛ sɛ wotwentwɛn wo nan ase sɛ wobɛhwehwɛ honhom fam ayaresa, esiane sɛ wusuro sɛ ebia wɔbɛka w’anim anaasɛ wɔbɛteɛ wo so nti. Nokwasɛm ne sɛ, so paane anaa oprehyɛn yaw a wɔte no bere tiaa bi mu no bɛma obi a onim nyansa atwe asan sɛ ɔrenhwehwɛ yare bi a ebetumi akum no no ho ayaresa?—Heb. 12:11.
18, 19. (a) Ɔkwan bɛn so na Dawid nhwɛso no ma yehu sɛ sɛ yegyae yɛn mũdi mu a, yebetumi asan anya? (b) Dɛn na woasi wo bo sɛ wobɛyɛ wɔ wo mũdi ho?
18 So anidaso wɔ hɔ sɛ wobetumi anya mũdi bio koraa? Sɛ obi gyae ne mũdi a, so anidaso wɔ hɔ sɛ obetumi asan anya bio? San susuw Dawid asɛm no ho hwɛ. Ɔyɛɛ bɔne a anibere wom. Ɔhwɛɛ ɔbarima foforo yere maa n’ani beree no, ɔsɛee aware, na ɔyɛɛ nhyehyɛe ma wokum ɔbea no kunu a na ɔnyɛɛ bɔne biara no. So yebetumi aka sɛ saa bere no na Dawid yɛ ɔbarima a okura ne mũdi mu? Nanso, so na ne tebea no yɛ nea anidaso biara nnim? Ná Dawid hia nteɛso a emu yɛ den, na wɔde maa no. Afei, esiane sɛ onuu ne ho wɔ ne komam nti, Yehowa huu no mmɔbɔ. Dawid suaa biribi fii nteɛso a wɔde maa no no mu, na ɔkɔɔ so tiee Onyankopɔn asɛm wɔ biribiara mu, na ɛno ma ɔsan nyaa ne mũdi. Dawid bɔɔ ne bra sɛnea Mmebusɛm 24:16 ka no. Ɛhɔ ka sɛ: “Mpɛn ason na ɔtreneeni hwe ase na ɔsɔre.” Dɛn na efii Dawid ahonu no mu bae? Susuw Dawid ho asɛm a Yehowa ka kyerɛɛ Salomo wɔ Dawid wu akyi no ho hwɛ. (Monkenkan 1 Ahene 9:4.) Onyankopɔn kaee Dawid sɛ ɔyɛ ɔbarima a okuraa ne mũdi mu. Nokwarem no, Yehowa betumi ayi bɔne a anibere wom mpo ho nkekae afi ɔbɔnefo a wanu ne ho no ho.—Yes. 1:18.
19 Sɛ wufi ɔdɔ mu yɛ osetie a, wobɛyɛ onipa a wukura wo mũdi mu. Enti, fa nokwaredi som Onyankopɔn, na sɛ woyɛ bɔne a anibere wom a, fi wo komam nu wo ho. Hwɛ sɛnea yɛn mũdi som bo fa! Ɛmmra sɛ, yɛn mu biara bɛkɔ so asi ne bo te sɛ nea Dawid yɛe no. Dawid kae sɛ: “Me de, me [mũdi] mu na mɛnantew.”—Dw. 26:11, NW.
[Ase hɔ asɛm]
Wubebua Dɛn?
• Wobɛyɛ dɛn atumi ayɛ obi a okura ne mũdi mu?
• Akwan bɛn na wubetumi afa so akura wo mũdi mu?
• Wobɛyɛ dɛn atumi asan anya wo mũdi?
[Adesua no ho Nsɛmmisa]
[Mfonini wɔ kratafa 8]
‘NÁ ƐYƐ NWONWA’
Ɔbea bi a na wanyinsɛn asram anum na ɔkaa saa asɛm no faa ayamye ne nokwaredi a obi a na onnim no daa no adi no ho. Ɔbea no kɔɔ adidibea bi kɔnom kɔfe, na nnɔnhwerew bi akyi no, ohui sɛ wagyaw ne bag ketewaa bi wɔ hɔ. Ná Amerika dɔla 2,000 hyɛ bag no mu, na onkuraa sika pii saa da. Akyiri yi, ɔka kyerɛɛ ɛhɔnom atesɛm krataa dwumayɛni bi sɛ, “Meyɛɛ basaa paa.” Nanso, ababaa bi huu bag no, na ntɛm ara na ɔde hwehwɛɛ ne wura. Bere a wanhu ne wura no, ɔde kɔmaa polisifo, na polisifo no kɔhwehwɛɛ ɔpemfo no. Sika no wura a n’ani agye no kae sɛ, “Ade a wayɛ yi yɛ nwonwa paa.” Dɛn nti na ababaa no bɔɔ mmɔden a ɛte saa san de sika no kɔmaa ne wura? Atesɛm krataa no kae sɛ, ababaa no kae sɛ ɔyɛ Yehowa Dansefo, na “ɔsom a wɔtetee no wom no na ɛma ɔdaa mũdi a ɛte saa adi.”
[Mfonini wɔ kratafa 9]
Sɛ mmabun hyia sɔhwɛ a, wobetumi akura wɔn mũdi mu
[Mfonini wɔ kratafa 10]
Dawid gyaee ne mũdi mu bere bi, nanso ɔsan nyae