Biakoyɛ Ma Yehu Nokware Som
Biakoyɛ Ma Yehu Nokware Som
“Mɛka wɔn abom te sɛ nguankuw a wɔwɔ nguannan mu.”—MIKA 2:12.
1. Ɔkwan bɛn so na abɔde ma Onyankopɔn nyansa da adi?
ODWONTOFO bi teɛɛm sɛ: “O Yehowa, wo nnwuma dɔɔso dɛn ara! Nyansam na woayɛ ne nyinaa. Wo nsa ano adwuma ahyɛ asase so mã.” (Dw. 104:24) Onyankopɔn nyansa da adi wɔ sɛnea afifide ahorow, nkoekoemmoa, mmoa, ne mmoawammoawa ɔpepem pii boa wɔn ho wɔn ho wɔ asase so ma ɛyɛ nwonwa no mu. Bio nso, nneɛma mpempem pii na ɛwɔ wo nipadua mu, efi akwaa akɛse so kosi nkwammoaa mu nneɛma nketenkete so, na ne nyinaa de biakoyɛ bom yɛ adwuma ma woyɛ onipa mũ a wote apɔw.
2. Sɛnea wɔayɛ ho mfonini wɔ kratafa 13 no, dɛn nti na ɛbɛyɛ sɛ na ɛyɛ nwonwa sɛ biakoyɛ wɔ Kristofo mu?
2 Yehowa bɔɔ nnipa sɛ wɔmmoa wɔn ho wɔn ho. Nnipa a wɔwɔ wiase gu ahorow, ɛsono wɔn hwɛbea, wɔn nipasu, ne nimdeɛ a wɔwɔ. Afei nso, Yehowa maa nnipa a wodi kan no su a ɔwɔ no bi sɛnea ɛbɛyɛ a wobetumi abom ayɛ ade na wɔaboa wɔn ho wɔn ho. (Gen. 1:27; 2:18) Nanso seesei, nnipa dodow no ara atwe wɔn ho afi Onyankopɔn ho, na wontumi nyɛɛ ade wɔ biakoyɛ mu da. (1 Yoh. 5:19) Ná nnipa a wɔwɔ Kristofo asafo a ɛwɔ afeha a edi kan no mu binom yɛ nkoa a wofi Efeso, Helafo mmea a wɔyɛ atitiriw, Yudafo mmarima a wɔyɛ nhomanimfo, ne nnipa a na anka wɔsom abosom. Enti ɛbɛyɛ sɛ na ɛyɛ nwonwa sɛ biakoyɛ wɔ wɔn mu.—Aso. 13:1; 17:4; 1 Tes. 1:9; 1 Tim. 6:1.
3. Bible ka biakoyɛ a ɛwɔ Kristofo mu ho asɛm dɛn, na dɛn na yebesusuw ho wɔ adesua yi mu?
3 Nokware som tumi ma nnipa bom yɛ ade wɔ biakoyɛ mu te sɛ nea yɛn nipadua akwaa bom yɛ adwuma no. (Monkenkan 1 Korintofo 12:12, 13.) Nneɛma a ɛde biakoyɛ ba a yebesusuw ho no bi na edidi so yi: Ɔkwan bɛn so na nokware som ma nnipa yɛ biako? Dɛn nti na Yehowa nkutoo na obetumi ama nnipa ɔpepem pii a wofi aman nyinaa mu ayɛ biako? Nneɛma a ɛsɛe biakoyɛ bɛn na Yehowa boa yɛn ma yedi so? Sɛ yɛreka biakoyɛ ho asɛm a, nsonsonoe bɛn na ɛwɔ nokware Kristosom ne Kristoman mu?
Ɔkwan Bɛn so na Nokware Som ma Nnipa Yɛ Biako?
4. Ɔkwan bɛn so na nokware som ma nnipa yɛ biako?
4 Nnipa a wɔwɔ nokware som mu nim sɛ esiane sɛ Yehowa na ɔbɔɔ nneɛma nyinaa nti, ɔno ne Sodifo a ɔfata sɛ odi amansan no so. (Adi. 4:11) Enti, ɛwom sɛ nokware Kristofo te mmeae pii na ɛsono wɔn nsɛm tebea de, nanso wɔn nyinaa di Onyankopɔn mmara koro so, na wɔde Bible nnyinasosɛm koro na ɛbɔ wɔn bra. Nokware asomfo nyinaa frɛ Yehowa sɛ “Agya” ma ɛfata. (Yes. 64:8; Mat. 6:9) Enti, wɔn nyinaa yɛ anuanom a wɔwɔ Kristofo asafo no mu, na wobetumi anya biakoyɛ a ɛyɛ fɛ a odwontofo no kaa ho asɛm no. Ɔkae sɛ: “Hwɛ! Oye a eye ne fɛ a ɛyɛ sɛ anuanom bom tena biakoyɛ mu!”—Dw. 133:1.
5. Su bɛn na ɛboa ma nokware asomfo yɛ biako?
5 Ɛwom sɛ nokware Kristofo tɔ sin de, nanso wɔbom som wɔ biakoyɛ mu efisɛ wɔasua sɛ wɔbɛdodɔ wɔn ho. Yehowa na ɔkyerɛkyerɛ wɔn ma wɔdodɔ wɔn ho efisɛ obi foforo biara ntumi nyɛ saa. (Monkenkan 1 Yohane 4:7, 8.) Yehowa Asɛm ka sɛ: “Monhyɛ ayamhyehye, ayamye, ahobrɛase adwene, odwo, ne abodwokyɛre. Sɛ obi wɔ asɛm tia ne yɔnko a, monkɔ so nnya mo ho abotare na momfa mfirifiri mo ho korakora. Sɛnea Yehowa de afiri mo no, mo nso monyɛ saa ara. Na eyinom nyinaa akyi no, monhyɛ ɔdɔ efisɛ ɛyɛ koroyɛ hama a ɛyɛ pɛ.” (Kol. 3:12-14) Saa koroyɛ hama a ɛyɛ pɛ a ɛne ɔdɔ no ne su titiriw a ɛma yehu nokware Kristofo. So w’ankasa wunhui sɛ saa biakoyɛ yi yɛ su a ɛma nokware som da nsow?—Yoh. 13:35.
6. Ɔkwan bɛn so na Ahenni ho anidaso a yɛwɔ no boa yɛn ma yɛyɛ biako?
6 Ade foforo nso a ɛma nokware asomfo yɛ biako ne sɛ wɔde wɔn ani to Onyankopɔn Ahenni no so sɛ ɛno nkutoo ne adesamma anidaso. Wonim sɛ ɛrenkyɛ Onyankopɔn Ahenni bɛba abesi nnipa nniso ananmu na ama nnipa a wɔyɛ osetie anya asomdwoe ankasa a enni awiei. (Yes. 11:4-9; Dan. 2:44) Enti, Kristofo tie asɛm a Yesu ka faa n’akyidifo ho no sɛ: “Wɔnyɛ wiase no fã sɛnea menyɛ wiase no fã no.” (Yoh. 17:16) Nokware Kristofo mfa wɔn ho nhyɛ wiase akodi mu; enti sɛ nnipa a wɔatwa wɔn ho ahyia reko mpo a, wɔn de wotumi yɛ biako.
Beae Koro a Yenya Nkyerɛkyerɛ Fi
7, 8. Ɔkwan bɛn so na Bible nkyerɛkyerɛ boa ma yɛyɛ biako?
7 Ná afeha a edi kan no mu Kristofo yɛ biako, efisɛ wɔn nyinaa nyaa nkuranhyɛ fii beae koro. Ná wogye tom sɛ Yesu nam sodikuw bi a asomafo no ne mpanyimfo a wɔwɔ Yerusalem na na wɔwom no so na ɔrekyerɛkyerɛ asafo no, na ɔnam wɔn so nso na ɔrekyerɛ wɔn kwan. Saa mmarima a wɔwɔ ahofama yi gyinaa Onyankopɔn Asɛm so na esisii gyinae, na wɔmaa ahwɛfo akwantufo de wɔn akwankyerɛ kɔmaa asafo ahorow wɔ aman pii so. Bible ka ahwɛfo a wɔte saa no bi ho asɛm sɛ: “Bere a wɔnam nkurow no so no, wɔde mmara a asomafo no ne mpanyimfo a wɔwɔ Yerusalem asi ho gyinae no maa wɔn sɛ wonni so.”—Aso. 15:6, 19-22; 16:4.
8 Ɛnnɛ nso, saa ara na Sodikuw bi a emufo yɛ Kristofo a wɔde honhom asra wɔn no boa ma biakoyɛ tena asafo ahorow a ɛwɔ wiase nyinaa mu. Sodikuw no tintim Bible ho nhoma a ɛhyɛ nkuran wɔ kasa pii mu. Saa honhom fam aduan yi gyina Onyankopɔn Asɛm so. Enti, nea wɔkyerɛkyerɛ no mfi nnipa, na mmom, efi Yehowa.—Yes. 54:13.
9. Ɔkwan bɛn so na adwuma a Onyankopɔn de ama yɛn no boa ma yɛyɛ biako?
9 Kristofo a wɔyɛ ahwɛfo nso di asɛnka adwuma no anim de boa ma biakoyɛ ba. Abusuabɔ a ɛda wɔn a wɔbom yɛ Onyankopɔn som adwuma no ntam no mu yɛ den koraa sen nea ɛka wiase no mufo a wohyiam bɔ fekuw kɛkɛ bom no. Wɔanhyehyɛ Kristofo asafo no sɛ wɔde bɛbɔ fekuw kɛkɛ, na mmom wɔhyehyɛe sɛ wɔde bɛhyɛ Yehowa anuonyam na wɔayɛ adwuma a wɔde ahyɛ wɔn nsa a ɛne asɛmpaka adwuma no, afoforo a wɔbɛyɛ wɔn asuafo, ne asafo no a wɔbɛhyɛ no den. (Rom. 1:11, 12; 1 Tes. 5:11; Heb. 10:24, 25) Enti, ɔsomafo Paulo tumi kaa Kristofo ho asɛm sɛ: “Mugyina pintinn wɔ honhom koro mu, na mode ɔkra koro bom di apere ma asɛmpa no gyidi.”—Filip. 1:27.
10. Nneɛma a ama yɛn a yɛyɛ Onyankopɔn nkurɔfo ayɛ biako no bi ne dɛn?
10 Enti yɛn a yɛyɛ Yehowa nkurɔfo no ayɛ biako, efisɛ yegye Yehowa tumidi tom, yɛdɔ yɛn nuanom, yɛwɔ Onyankopɔn Ahenni no mu anidaso, na yebu wɔn a Onyankopɔn nam wɔn so kyerɛ yɛn kwan no. Yehowa boa yɛn ma yedi su ahorow bi a yɛn sintɔ nti anka ebetumi asɛe biakoyɛ a ɛwɔ yɛn mu no so.—Rom. 12:2.
Sɛnea Yebedi Ahantan ne Anibere So
11. Dɛn nti na ahantan de mpaapaemu ba nnipa mu, na ɔkwan bɛn so na Yehowa boa yɛn ma yedi so?
11 Ahantan de mpaapaemu ba nnipa mu. Obi a ɔyɛ ahantan bu ne ho sɛ ɔkyɛn afoforo, na mpɛn pii no, n’ani gye sɛ ɔhoahoa ne ho. Nanso, eyi ntaa mfa biakoyɛ mma; wɔn a wɔte sɛ ɔrehoahoa ne ho no ani betumi abere no. Osuani Yakobo ka kyerɛ yɛn pefee sɛ: “Ahohoahoa a ɛte saa nyinaa yɛ bɔne.” (Yak. 4:16) Sɛ yebu afoforo sɛ wɔnsɛ hwee a, ɛkyerɛ sɛ yenni dɔ. Nea ɛyɛ nwonwa ne sɛ, Yehowa yɛ ahobrɛase ho nhwɛso, efisɛ ɔne yɛn a yɛyɛ nnipa a yɛtɔ sin na edi. Dawid kyerɛwee sɛ: “[Onyankopɔn ahobrɛase] na ɛma meyɛ kɛse.” (2 Sam. 22:36) Onyankopɔn Asɛm kyerɛkyerɛ yɛn ma yesusuw nneɛma ho yiye de boa yɛn ma yedi ahantan so. Onyankopɔn honhom kaa Paulo ma obisae sɛ: “Hena na ɔma woyɛ soronko? Dɛn koraa na wowɔ a woannya? Na sɛ nya na wunyae a, adɛn na wohoahoa wo ho sɛnea woannya?”—1 Kor. 4:7.
12, 13. (a) Dɛn nti na ɛnyɛ den sɛ yɛn ani bɛbere ade? (b) Sɛ yenya adwene a Yehowa wɔ wɔ afoforo ho no bi a, dɛn na efi mu ba?
12 Anibere yɛ ade foforo a ɛtaa de mpaapaemu ba. Esiane sɛ wɔawo yɛn wɔ sintɔ mu nti, yɛn nyinaa ‘ani tumi bere’ ade, na ɛtɔ mmere bi a Kristofo a wɔde mfe pii asom mpo ani betumi abere tebea a afoforo wom, wɔn agyapade, ɔsom hokwan a wɔwɔ, anaa nneɛma a wotumi yɛ. (Yak. 4:5) Sɛ nhwɛso no, onuabarima bi a ɔwɔ yere ne mma ani betumi abere ɔsom hokwan ahorow a bere nyinaa somfo bi wɔ, bere a onuabarima a ɔwɔ yere ne mma no nnim sɛ bere nyinaa somfo no nso ani betumi abere no kakra. Dɛn na yebetumi ayɛ na yɛamma anibere a ɛte saa ansɛe biakoyɛ a yɛwɔ no?
13 Nea ɛbɛboa yɛn na yɛn ani ammere ade no, ɛsɛ sɛ yɛkae sɛ Bible de Kristofo asafo no mufo toto nipadua akwaa ho. (Monkenkan 1 Korintofo 12:14-18.) Sɛ nhwɛso no, ɛwom sɛ nkurɔfo tumi hu w’ani ntɛm na wonhu wo koma de, nanso so ɛno kyerɛ sɛ w’ani ho hia sen wo koma? Saa ara nso na ɛwom sɛ ebinom begye din kɛse asen afoforo wɔ bere bi mu de, nanso asafo no mufo nyinaa ho hia Yehowa. Enti, momma yennya adwene a Yehowa wɔ wɔ yɛn nuanom ho no bi. Sɛ́ anka yɛn ani bɛbere afoforo no, yebetumi ama wɔahu sɛ yedwen wɔn ho na yɛn ani gye wɔn ho nso. Sɛ yɛyɛ saa a, yɛboa ma nkurɔfo hu nsonsonoe a ɛwɔ nokware Kristofo ne wɔn a wɔwɔ Kristoman mu asɔre ahorow mu no.
Mpaapaemu Ahyɛ Kristoman mu Ma
14, 15. Ɛyɛɛ dɛn na mpaapaemu baa Kristosom a awae no mu?
14 Biakoyɛ a ɛwɔ nokware Kristofo mu no ma wɔda nsow koraa wɔ Kristoman mu asɔre ahorow a nitan ahyɛ mu ma no ho. Eduu afeha a ɛto so anan no, na Kristosom a awae no mu atrɛw araa ma abɛhyɛ Roma ɔhempɔn a ɔyɛ ɔbosonsonni no ase, na ɛboa maa Kristoman mu trɛwee. Afei, mpaapaemu toatoaa so bae, na ahemman ahorow no mu pii tew wɔn ho fii Roma ho, na wɔn ankasa hyehyɛɛ Ɔman asɔre ahorow.
15 Saa ahemman ahorow no mu pii ne wɔn ho wɔn ho dii ako mfehaha pii. Wɔ afeha a ɛto so 17 ne 18 no mu no, nnipa a wɔwɔ Britain, France, ne United States hyɛɛ ɔsom a wɔde ma Ɔman ho nkuran, na sɛ yɛbɛka a, ɔmampɛ bɛyɛɛ te sɛ nyamesom. Wɔ afeha a ɛto so 19 ne 20 no mu no, nnipa dodow no ara maa ɔmampɛ gyee wɔn adwene. Ewiee ase no, Kristoman mu asɔre ahorow mu paapae bɛyɛɛ asɔreasɔre pii, na emu dodow no ara gye ɔmampɛ tom. Asɔrekɔfo ne wɔn ankasa asɔre mufo a wɔwɔ ɔman foforo mu adi ako mpo. Ɛnnɛ, nea asɔre ahorow no gye di ne ɔmampɛ ama Kristoman mu apaapae.
16. Nneɛma bɛn na ɛde mpaapaemu ba nnipa a wɔwɔ Kristoman mu?
16 Wɔ afeha a ɛto so 20 no mu no, asɔreasɔre pii a ɛwɔ Kristoman mu no bi yɛe sɛ wɔbɛma biakoyɛ aba wɔn mu. Nanso, wɔ mmɔden a wɔabɔ mfe pii nyinaa akyi no, asɔreasɔre no mu kakraa bi na wɔatumi aka abom, na asɔremma no adwene da so ara nhyia wɔ nsɛmmisa te sɛ nea edidi so yi ho: So biribiara nam adannandi so na ɛbae? So ɛyɛ papa sɛ obi betu nyinsɛn agu? So ɛsɛ sɛ wɔma ɔbarima ne ɔbarima nna ho kwan? So ɛsɛ sɛ wɔhyɛ mmea asɔfo? Wɔ Kristoman aman bi mu no, asɔre akannifo bɔ mmɔden sɛ wɔbɛma nkyerɛkyerɛ a ɛde mpaapaemu baa wɔn mu no ayɛ te sɛ nea ɛho nhia sɛnea ɛbɛyɛ a wɔbɛma nnipa a wɔwɔ asɔreasɔre ahorow mu no aka abom. Nanso, nkyerɛkyerɛ a wɔma ɛyɛ te sɛ nea ɛho nhia no mma nkurɔfo gyidi nyɛ den, na ɛmma Kristoman mu asɔre ahorow no mufo nyɛ biako nso.
Wɔmma Ɔmampɛ Mpaapae Wɔn Mu
17. Ɔkwan bɛn so na wɔhyɛɛ nokware som ho nkɔm sɛ ɛbɛma nnipa ayɛ biako wɔ “nna a edi akyiri no mu”?
17 Ɛwom sɛ ɛnnɛ, nnipa mu apaapae paa sen bere biara de, nanso ade a ɛma nokware asomfo kɔ so da nsow ne biakoyɛ. Onyankopɔn diyifo Mika hyɛɛ nkɔm sɛ: “Mɛka wɔn abom te sɛ nguankuw a wɔwɔ nguannan mu.” (Mika 2:12) Mika hyɛɛ nokware som a wɔbɛma so asen ɔsom foforo biara ho nkɔm, sɛ́ ɛyɛ atoro anyame anaasɛ Ɔman no a wɔsom no sɛ onyame no. Ɔkyerɛwee sɛ: “Nna a edi akyiri no mu no, Yehowa fie bepɔw betim hɔ wɔ mmepɔw atifi, na wɔbɛma so asen nkoko nyinaa, na amanaman bɛsen yuu akɔ hɔ. Aman no mu biara bɛnantew ne nyame din mu, na yɛn de, yɛbɛnantew Yehowa yɛn Nyankopɔn din mu.”—Mika 4:1, 5.
18. Nsakrae bɛn na nokware som aboa yɛn ma yɛayɛ?
18 Mika san kaa sɛnea nokware som bɛma nnipa a na wɔyɛ atamfo ayɛ biako ho asɛm. Ɔhyɛɛ nkɔm sɛ: “Aman pii [mu nnipa] bɛkɔ akɔka sɛ: ‘Mommra mma yɛnkɔ Yehowa bepɔw so, Yakob Nyankopɔn fie, na ɔbɛkyerɛ yɛn n’akwan na yɛanantew n’atempɔn so.’ . . . Na wɔde wɔn nkrante bɛyɛ nsɔw na wɔde wɔn mpeaw ayɛ kantankrankyi. Ɔman bi rentwe nkrante wɔ ɔman foforo so, na wɔrensua akodi bio.” (Mika 4:2, 3) Wɔn a wogyae amanaman no anyame anaa anyame a nnipa ayɛ no som na wɔba bɛsom Yehowa no ne wɔn nuanom a wɔwɔ wiase nyinaa ayɛ biako. Onyankopɔn kyerɛkyerɛ wɔn sɛnea wɔbɛyɛ wɔn ade wɔ ɔdɔ mu.
19. Dɛn na nnipa ɔpepem pii a wɔreka wɔn abom wɔ nokware som mu no ma ɛda adi pefee?
19 Nokware Kristofo nkutoo na wɔayɛ biako wɔ wiase nyinaa, na ɛno ma ɛda adi pefee sɛ Yehowa nam ne honhom kronkron so kɔ so kyerɛ ne nkurɔfo kwan. Ɛnnɛ, wɔreka nnipa a wofi aman nyinaa mu abom sen bere biara wɔ nnipa abakɔsɛm mu. Eyi yɛ asɛm a ɛwɔ Adiyisɛm 7:9, 14 no mmamu a ɛyɛ nwonwa, na ɛma yehu sɛ ɛrenkyɛ Onyankopɔn abɔfo begyae “mframa” a ɛbɛsɛe wiase nhyehyɛe bɔne a ɛwɔ hɔ yi no mu. (Monkenkan Adiyisɛm 7:1-4, 9, 10, 14.) So ɛnyɛ hokwan na yɛanya sɛ yɛne yɛn nuanom a wɔwɔ wiase nyinaa ayɛ biako? Dɛn na yɛn mu biara betumi ayɛ de aboa ma saa biakoyɛ no akɔ so atena yɛn mu? Yebesusuw saa asɛm yi ho wɔ adesua asɛm a edi hɔ no mu.
Wubebua Dɛn?
• Ɔkwan bɛn so na nokware som ma nnipa yɛ biako?
• Dɛn na yebetumi ayɛ na yɛamma anibere ansɛe biakoyɛ a ɛwɔ yɛn mu no?
• Dɛn nti na ɔmampɛ ntumi mpaapae nokware asomfo mu?
[Adesua no ho Nsɛmmisa]
[Mfonini wɔ kratafa 13]
Ná Kristofo a wɔwɔ afeha a edi kan no mu no nsɛm tebea gu ahorow
[Mfonini wɔ kratafa 15]
Ɔkwan bɛn so na Ahenni Asa ho adwuma a woyɛ no boa ma biakoyɛ ba asafo no mu?