1-3. Sɛ yɛkenkan Bible na yɛde ne nkyerɛkyerɛ bɔ yɛn bra a, mfaso bɛn na yebenya?

ONUAWA bi kae sɛ: “Mesɔre anɔpa biara a, meda Yehowa ase sɛ waboa me ma mate Bible ase.” Onuawa yi ani afi, na wakenkan Bible mũ no nyinaa mpɛn 40, nanso onnyaee. Onuawa ababaa bi nso kae sɛ Bible akenkan aboa no ma wahu Yehowa yiye. Eyi ama wabɛn ne soro Agya no paa. Ɔtoaa so sɛ: “Biribiara nni hɔ a ɛma m’ani gye sen eyi!”

² Ɔsomafo Petro hyɛ yɛn nkuran sɛ yennya “akɔnnɔ mma asɛm no mu nufusu a wɔmfraa mu” no. (1 Pet. 2:2) Sɛ yesua Bible na yɛde ne nkyerɛkyerɛ yɛ adwuma a, yebenya ahonim pa na yɛahu sɛnea yɛbɛbɔ yɛn bra. Eyi bɛboa yɛn ma yɛne wɔn a wɔdɔ nokware Nyankopɔn na wɔsom no no abɔ kama. Eyi nyinaa nti na ɛsɛ sɛ yɛma ‘yɛn ani gye Onyankopɔn mmara ho.’ (Rom. 7:22) Dɛn bio na yenya fi Bible akenkan mu?

³ Bere biara a wubesua Yehowa ne ne Ba no ho ade no, ɔdɔ a wowɔ ma wɔn yɛ kɛse. Bio nso, ɛma wo ne wo yɔnko nnipa tena fɛfɛɛfɛ. Afei nso Bible bɛboa wo ma woahu sɛnea Onyankopɔn begye adesamma asoɔmmerɛwfo afi wiase bɔne yi mu. Eyi yɛ asɛmpa a wubetumi de akyerɛkyerɛ afoforo wɔ asɛnka mu. Bere a wode nea woakenkan afi Onyankopɔn Asɛm mu rekyerɛkyerɛ nkurɔfo no, Yehowa nso behyira wo.

4. Sɛ wɔka sɛ yɛnkan Bible ‘nnwinnwen’ ho a, dɛn na ɛkyerɛ?

⁴ Yehowa mpɛ sɛ n’asomfo de Bible akenkan tu mmirika. Ɔka kyerɛɛ Yosua sɛ: “Mma mmara nhoma yi mmfi w’anom, na mmom kenkan na dwinnwen ho awia ne anadwo.” (Yos. 1:8; Dw. 1:2) So saa asɛm yi kyerɛ sɛ ɛsɛ sɛ wokenkan Bible mũ no nyinaa ma epue w’ano? Dabi. Nea ɛkyerɛ ne sɛ, sɛ worekan Bible a, wobɛto wo bo ase akenkan no brɛoo sɛnea  wubetumi adwinnwen nea worekan no ho. Eyi bɛma woahu kyerɛwsɛm a ɛbɛboa wo na ahyɛ wo nkuran. Sɛ worekan Bible na wuhu asɛm bi a ɛbɛboa wo a, kan no brɛoo; wubetumi mpo akan ma apue w’ano. Woyɛ saa a, nea worekan no besian akɔ wo komam tɔnn. Dɛn nti na eyi ho hia? Asɛm no ne sɛ, sɛ wote Onyankopɔn afotu ase a, ebepusuw wo ma wode abɔ wo bra.

5-7. Nhwɛso bɛn na ɛkyerɛ sɛ, sɛ woto wo bo ase kenkan Bible a, ɛbɛboa wo ma (a) woabɔ bra pa; (b) woanya afoforo ho abotare na woayɛ wɔn adɔe; (d) wode wo ho ato Yehowa so wɔ ahohia bere mu?

⁵ Bible mu nhoma bi wɔ hɔ a emu yɛ den ma wo anaa? Sɛ worekenkan na woto wo bo ase dwinnwen ho a, wubetumi anya nsɛm pii a ɛbɛboa wo. Wo de, momma yɛnyɛ nhwɛso abiɛsa bi. Nea edi kan, yɛnhwɛ Kristoni aberante bi a wato ne bo ase rekenkan Hosea nkɔmhyɛ no. Bere a oduu ti 4 nkyekyɛm 11 kosi 13 no, ɔhomee so kakra. (Monkenkan Hosea 4:11-13.) Adɛn ntia? Bere a oduu hɔ no biribi twee no. Ne haw ne sɛ nnansa yi nneɛma bi a ɛrekɔ so wɔ ne sukuu mu regyigye no sɛ ommu brabɔne. Odwinnwen saa kyerɛw nsɛm no ho, na ɔkae wɔ ne tirim sɛ: ‘Sɛ obi kɔhyɛ tokuru mu yɛ bɔne mpo a, Yehowa hu. Mempɛ sɛ mɛyɛ biribiara a ɛbɛhaw no.’ Enti onua no sii pi ne komam sɛ ɔremmu Onyankopɔn mmara so.

⁶ Nea ɛto so abien, onuawa bi ato ne bo ase rekenkan Yoel nkɔmhyɛ no. Afei wabedu ti 2 nkyekyɛm 13. (Monkenkan Yoel 2:13.) Odwinnwen nea ɔrekenkan no ho na ohu sɛ ɛsɛ sɛ osuasua Yehowa, efisɛ ɔyɛ “ɔdomfo ne mmɔborɔhunufo, ne bo kyɛ fuw na n’adɔe dɔɔso.” Ebia kan no na ɔne afoforo rekasa a, ɔde abufuw tu nsɛm bumbum na otumi twa ne kunu adapaa mpo. Nanso bere a ɔkenkan saa kyerɛwsɛm no, osii ne bo sɛ ɔbɛyɛ nsakrae.

⁷ Nea ɛto so abiɛsa, momma yɛnhwɛ onuabarima bi a ɔwɔ yere ne mma. N’adwuma afi ne nsa, na ɔkwan a ɔbɛfa so ahwɛ n’abusua agyaw no tipae. Ne Bible akenkan de no abedu Nahum nhoma no so. Bere a ɔrekenkan Nahum 1:7 no, ohui sɛ Yehowa nim “wɔn a woguan toa no,” na ɔbɔ wɔn ho ban te sɛ “abannennen wɔ ahohia bere mu.” Saa asɛm no kyekyee ne werɛ. Ohui sɛ Yehowa dɔ no, enti enhia sɛ odwinnwen haw ne ho pii. Afei ɔtoo ne bo ase kenkan Nahum ti 1 nkyekyɛm 15. (Monkenkan Nahum 1:15.) Asetenam ayɛ den ama onua no de, nanso ohui sɛ, sɛ omia n’ani ka asɛmpa no a, ɛbɛkyerɛ sɛ ɔde Yehowa ayɛ n’abannennen ampa. Onua no bɛkɔ so ara ahwehwɛ adwuma bi ayɛ, nanso seesei ɔde bere pii bɛkɔ asɛnka wɔ dapɛn no mu.

8. Dɛn na wo Bible akenkan ama woakopue so a w’ani gye ho paa?

⁸ Ebinom susuw sɛ Bible nhoma te sɛ Hosea, Yoel, ne Nahum mu yɛ den, nanso kae sɛ nhwɛso fɛfɛ a yɛaka ho asɛm yi nyinaa fi saa nhoma no mu. Enti sɛ worekenkan nhoma a ɛte saa na woyɛ w’adwene sɛ worepɛ biribi ahu a, wubenya nneɛma pa pii afi mu. Nea ehia ara ne sɛ wobɛto wo bo ase akenkan adwinnwen ho. Woyɛ saa a, nyansa ne awerɛkyekyesɛm bebu so ama wo. Bible mu nhoma a aka nyinaa nso betumi aboa yɛn saa ara. Onyankopɔn Asɛm te sɛ asase a wotu dɛnkyɛmmo anaa sika kɔkɔɔ wɔ so. Saa agude no hyɛ fam a ɛsɛ sɛ wutu. Enti sɛ worekenkan Bible a, to wo bo ase hwehwɛ akwankyerɛ ne nkuranhyɛsɛm a ɛwom te sɛ nea worehwehwɛ “dɛnkyɛmmo” a ahintaw.

9. Dɛn na ɛbɛboa yɛn ma yɛate Bible no ase yiye?

⁹ Ehia sɛ yɛkenkan Bible da biara da,  nanso ɛnsɛ sɛ ɛso hɔ ara. Ɛsɛ sɛ yɛbɔ mmɔden sɛ yɛbɛte nea yɛkenkan no ase. Sɛ yɛrekenkan Bible a, yebehu nkurɔfo anaa nkurow bi din anaa nsɛm bi a esisii. Sɛ yɛpɛ sɛ yɛte eyinom nyinaa ase yiye a, yebetumi de Yehowa ahyehyɛde no nhoma ahorow ayɛ nhwehwɛmu. Bio nso, sɛ wokan biribi wɔ Bible mu na wopɛ sɛ wuhu sɛnea wode bɛbɔ wo bra a, wubetumi abisa asafo mu panyin anaa Kristoni bi a ne ho akokwaw ma waboa wo. Momma yɛmfa tete Kristoni bi nyɛ nhwɛso. Na ɔpɛ sɛ ɔte nokware no ase yiye. Wɔfrɛ saa ɔbarima no Apolo.

10, 11. (a) Dɛn na ɛboaa Apolo ma otumi kyerɛkyerɛɛ asɛmpa no yiye? (b) Dɛn na yebetumi asua afi Apolo asɛm no mu? (Hwɛ adaka a wɔato din “Wo Nkyerɛkyerɛ ne Ntease a Yɛwɔ Seesei Hyia?”

¹⁰ Na Apolo yɛ Yudani Kristoni a “onim Kyerɛwnsɛm no mu yiye,” na na “honhom ahyɛ no mã.” Asomafo Nnwuma no ka sɛ: “Ɔkaa Yesu ho asɛm kyerɛkyerɛɛ mu pɛpɛɛpɛ, nanso na Yohane asubɔ no nkutoo na onim.” Na Apolo rekyerɛkyerɛ asubɔ ho nsɛm bi, nanso na onnim sɛ nea ɔrekyerɛkyerɛ no atwam dedaadaw. Bere bi na Apolo rekyerɛkyerɛ wɔ Efeso, na Akwila ne ne yere Priskila tee nea ɔreka no. Enti wɔfaa no kyerɛkyerɛɛ “Onyankopɔn akwan no mu pefee kyerɛɛ no.” (Aso. 18:24-26) Eyi boaa Apolo dɛn?

¹¹ Bere a Apolo fii Efeso no, ɔtoaa so kɔɔ Akaia kɔkaa asɛm no wɔ hɔ. Bible ka sɛ: “Bere a oduu hɔ no, ɔboaa wɔn a wɔnam Onyankopɔn adom so agye adi no paa; ɔde nnam daa no adi pefee wɔ baguam sɛ Yudafo no afom kwan, na ɔde Kyerɛwnsɛm no kyerɛe sɛ Yesu ne Kristo no.” (Aso. 18:27, 28) Saa bere no, na Apolo te Kristofo asubɔ ase yiye, enti ɔboaa afoforo ma wonyaa nkɔso wɔ nokware no mu. Dɛn na yebetumi asua afi asɛm yi  mu? Ɛsɛ sɛ yɛn nyinaa bɔ mmɔden sɛ yɛbɛte nea yɛkenkan fi Bible mu no ase sɛnea Apolo yɛe no. Nanso sɛ yɛn yɔnko Kristoni bi ma yɛn nyansahyɛ bi a ɛbɛma yɛn nkyerɛkyerɛ atu mpɔn nso ɛ? Ɛsɛ sɛ yɛkyerɛ ho anisɔ na yɛde ahobrɛase gye tom. Eyi bɛma yɛasom Yehowa yiye.

12, 13. Yɛbɛyɛ dɛn de Kyerɛwnsɛm no aboa yɛn Bible suani ma wanya nkɔso?

¹² Yebetumi aboa afoforo sɛnea Priskila, Akwila, ne Apolo yɛe no. Sɛ wutumi boa Bible suani bi ma odi ne haw bi so na onya nkɔso wɔ nokware no mu a, ɛka wo dɛn? Anaa fa no sɛ woyɛ asafo mu panyin na wode Bible mu afotu aboa wo yɔnko Kristoni bi a ɔrehyia nsɛnnennen. Onua no aba wo nkyɛn rebɛda wo ase; wobɛte nka dɛn? Nokwasɛm ni, sɛ wode Onyankopɔn Asɛm boa obi ma ɔyɛ nsakrae wɔ n’asetenam a, w’ani gye na wo koma tɔ wo yam. * Ɛnde, wobɛyɛ dɛn ayɛ saa?

¹³ Elia bere so no, na Israelfo bebree nsi pi wɔ nokware som ho. Ná ɛreyɛ akɔyɛ sɛ wɔn nan biako si nokware som mu ɛnna biako si atoro som mu. Sɛ yɛwɔ Bible suani bi a ontumi nsi n’adwene pi wɔ nokware som ho a, asɛm a Elia ka kyerɛɛ Israelfo no betumi aboa no ma wanya nkɔso. (Monkenkan 1 Ahene 18:21.) Anaa ebia Bible suani bi nnamfo anaa n’abusuafo nti ɔntene ne ho nsua nokware no. Ɛba saa a, mubetumi asusuw asɛm a ɛwɔ Yesaia 51:12, 13 ho. (Monkenkan.) Eyi betumi aboa no ma wasi n’adwene pi na wasom Yehowa.

14. Sɛ wopɛ Bible mu asɛm bi aboa obi a, dɛn na ɛbɛboa wo ma woakae?

¹⁴ Sɛ yɛkenkan Bible a, yebenya nsɛm pii a ebetumi ahyɛ yɛn nkuran, ateɛteɛ yɛn akwan na ahyɛ yɛn den. Nanso ebia wubebisa sɛ, ‘Sɛ mihia kyerɛwsɛm bi a, mɛyɛ dɛn ahu no ntɛm?’ Ɛno ara ne sɛ wobɛkenkan Bible da biara da na woadwinnwen ho. Woyɛ saa a, na woreboaboa Bible mu nsɛm pii agu w’adwenem na sɛ wuhia a, Yehowa honhom bɛboa wo ma woakae.—Mar. 13:11; monkenkan Yohane 14:26. *

15. Dɛn na ɛbɛboa wo ma woate Onyankopɔn Asɛm ase yiye?

¹⁵ Bɔ Yehowa mpae na ɔmma wo nyansa a wode bedi w’asɛyɛde ho dwuma wɔ asafo no mu. Saa na Ɔhene Solomon yɛe. (2 Be. 1:7-10) Adiyifo a wɔtenaa ase tete no bɔɔ mmɔden hwehwɛɛ Onyankopɔn Asɛm mu, na wɔpɛɛpɛɛ mu yiye. Sɛ yɛn nso yɛyɛ saa a, ɛbɛboa yɛn ma yɛahu Yehowa yiye na yɛayɛ n’apɛde. (1 Pet. 1:10-12) Ɔsomafo Paulo tuu Timoteo fo sɛ ɔmfa “nsɛm a egyina gyidi ne nkyerɛkyerɛ pa” so ‘nyɛn’ ne ho. (1 Tim. 4:6) Sɛ yɛde Bible ‘yɛn’ yɛn ho a, ɛbɛma yɛasi pi na yɛatumi aboa afoforo. Bere a yɛreyɛ saa nyinaa na yɛrehyɛ yɛn gyidi den.

16. (a) Bere a Beroeafo too wɔn bo ase ‘hwehwɛɛ Kyerɛwnsɛm no mu’ no, dɛn na efii mu bae? (b) Dɛn nti na ehia sɛ yɛkenkan Bible da biara da?

¹⁶ Na biribi wɔ Yudafo a wɔwɔ Beroea no ho a ɛyɛ fɛ paa. Daa na “wɔhwehwɛ Kyerɛwnsɛm no mu yiye.” Sɛ Paulo ka asɛmpa no kyerɛ wɔn a, na wɔde toto Kyerɛwnsɛm no ho hwɛ sɛ ɛte saa anaa. Dɛn na efii mu bae? Wɔn mu pii hui sɛ nokware no ara na Paulo rekyerɛkyerɛ  no, na ‘wɔbɛyɛɛ gyidifo.’ (Aso. 17:10-12) Eyi kyerɛ sɛ, sɛ obi kan Bible da biara da a, ɛma onya Yehowa mu gyidi. Gyidi yɛ “awerɛhyem a yɛde twɛn biribi a yɛn ani da so.” Yehia gyidi a ɛte saa na yɛatumi akɔ Onyankopɔn wiase foforo no mu.—Heb. 11:1.

17, 18. (a) Sɛ yɛn gyidi yɛ den na yɛwɔ ɔdɔ kɛse a, ɔkwan bɛn so na ɛbɔ yɛn koma ho ban? (b) Ɔkwan bɛn so na anidaso bɔ yɛn ho ban?

¹⁷ Paulo kyerɛwee sɛ: “Yɛn a yɛyɛ adekyee dea no, yɛmma yɛn ani nna hɔ, na yɛnhyɛ gyidi ne ɔdɔ nkatabo ne nkwagye anidaso no sɛ dade kyɛw.” (1 Tes. 5:8) Tete no, na ɔsraani hyɛ nkatabo de bɔ ne koma ho ban. Saa ara nso na ɛsɛ sɛ Kristoni bɔ ne koma ho ban wɔ bɔne ho. Ɔbɛyɛ dɛn ayɛ saa? Sɛ Yehowa somfo wɔ gyidi sɛ Onyankopɔn bɔhyɛ ahorow bɛbam na onya ɔdɔ kɛse ma Yehowa ne ne yɔnko nnipa a, na ɛte sɛ nea wahyɛ nkatabo de rebɔ ne koma ho ban. Ɛbɛyɛ den sɛ onipa a ɔte saa bɛyɛ biribi atia Onyankopɔn.

¹⁸ Paulo kaa dade kyɛw nso ho asɛm. Ɛno ne “nkwagye anidaso.” Bible mmere mu no, sɛ ɔsraani gyina akono na wanhyɛ kyɛw ammɔ ne ti ho ban a, na ɔrefrɛfrɛ owu. Sɛ ɔsraani hyɛ dade kyɛw na atamfo tow biribi sɛ wɔde rebɔ ne ti a, kyɛw no nti ɛnka ɔsraani no ahe biara. Sɛ yesua Onyankopɔn Asɛm a, yenya anidaso sɛ Yehowa betumi agye yɛn. Sɛ yɛn anidaso mu yɛ den a, yɛrennyae yɛn ho mma awaefo mfa “nsɛnhunu” a ɛte sɛ “ɔyare bɔne” nnidi yɛn ase. (2 Tim. 2:16-19) Afei sɛ yɛwɔ anidaso a ɛte saa na sɛ obi regyigye yɛn akɔ bɔne mu a, yɛrensosɔ no so koraa.

19, 20. Dɛn nti na Onyankopɔn Asɛm som bo ma yɛn? Dɛn na yɛyɛ de kyerɛ sɛ ampa ara ɛsom bo ma yɛn? (Hwɛ adaka a wɔato din: “Nea Mihia Ara na Yehowa De Ma Me.”)

¹⁹ Ade rekye a ade resa nyinaa na yɛrebɛn wiase no awiei, enti seesei na ehia paa sɛ yɛde yɛn ho to Yehowa Asɛm so. Emu afotu betumi aboa yɛn ma yɛasiesie subammɔne anaa akɔnnɔ bɔne biara a ahintaw yɛn mu. Bio nso ɛbɛhyɛ yɛn nkuran na akyekye yɛn werɛ ma yɛagyina pintinn ako atia sɔhwɛ biara a Satan ne wiase no de bɛba yɛn so. Yehowa Asɛm boa yɛn ma yɛkɔ so nantew nkwa kwan no so.

²⁰ Kae sɛ Onyankopɔn pɛ sɛ “ogye nnipa ahorow nyinaa.” Bible ka “nnipa ahorow nyinaa” a, Yehowa asomfo ka ho. Wɔn a wotie asɛmpa a yɛka no nso ka ho. Nanso sɛ obi pɛ sɛ onya nkwa a, ɛsɛ sɛ onya “nokware no ho nimdeɛ a edi mũ.” (1 Tim. 2:4) Nea eyi kyerɛ ne sɛ, sɛ obi pɛ nkwa a, ɛsɛ sɛ ɔkenkan Bible na ɔde bɔ ne bra. Sɛ yɛkenkan Bible da biara da a, na yɛreda no adi sɛ Yehowa Asɛm som bo ma yɛn ampa.—Yoh. 17:17.