So Wo Nhyehyɛe ne Onyankopɔn Atirimpɔw Hyia?

SƐ WOKƆ kwae a ɛwɔ Amerika Atifi fam atɔe mu a, wubehu anomaa bi a odi akɔneaba wɔ kwae no mu. Afe biara, otumi tetew nnuaba bɛyɛ 33,000 de sie mmeae bɛyɛ 2,500, na sɛ awɔw ba a, ɔde ahwɛ ne ho. Nokwasɛm ni, anomaa yi da ‘nyansa’ adi wɔ sɛnea osiesie ne ho ma awɔw bere no.—Mmebusɛm 30:24.

Nnipa tumi yɛ nneɛma a ɛyɛ nwonwa sen saa mpo. Wɔ Yehowa abɔde a ɛwɔ asase so nyinaa mu no, nnipa nkutoo na wotumi sua biribi fi nneɛma a atwam mu, na wogyina so yɛ nhyehyɛe ma daakye. Ɔhene nyansafo Salomo kae sɛ: “Adwene pii wɔ onipa komam.”—Mmebusɛm 19:21.

Ɛno mpo no, nnipa dodow no ara taa de wɔn nhyehyɛe gyina nea wosusuw sɛ ɛbɛba daakye so. Sɛ mfatoho no, esiane sɛ wususuw sɛ ade bɛkye wo nti, wugyina owia a ɛbɛbɔ ɔkyena so yɛ nneɛma a wobɛyɛ ho nhyehyɛe. Owia de, ɛnyɛ dɛn ara a ɛbɛbɔ, nanso sɛ́ ade bɛkye wo de, wunni so tumi. Nokwarem no, Bible kyerɛwfo Yakobo kae sɛ: “Munnim nea ɛbɛto mo ɔkyena.”—Yakobo 4:13, 14.

Nanso Yehowa Nyankopɔn de, ɔwɔ biribiara so tumi. ‘Ofi mfiase ka awiei asɛm.’ Nea wabɔ ne tirim bɛbam ɔkwan biara so. Ɔka sɛ: “Me tirimpɔw begyina, na nea ɛsɔ m’ani nyinaa mɛyɛ.” (Yesaia 46:10) Nanso, sɛ onipa nhyehyɛe ne Onyankopɔn atirimpɔw nhyia nso ɛ?

Bere a Onipa Nhyehyɛe ne Onyankopɔn Atirimpɔw Nhyia

Bɛyɛ mfe 4,000 a atwam ni no, Babel abantofo bɔɔ wɔn tirim sɛ wɔbɛma nnipa nyinaa atra faako. Wɔkae sɛ: “Wiɛ, momma yɛnkyekye kurow, na yɛnto abantenten a n’atifi bedu soro, na yɛmfa nnye din, na yɛanhwete asase nyinaa ani.”—Genesis 11:4.

 Nanso, na eyi ne atirimpɔw a Onyankopɔn wɔ ma asase no nhyia koraa. Ná Onyankopɔn ahyɛ Noa ne ne mmabarima sɛ: “Monwo na monnɔɔso, na monhyɛ asase so ma.” (Genesis 9:1) Dɛn na Onyankopɔn yɛe wɔ nea na Babel atuatewfo yi de asi wɔn ani so no ho? Ɔmaa wɔn kasa yɛɛ basabasa sɛnea ɛbɛyɛ a wontumi ne wɔn ho wɔn ho nni nkitaho. Dɛn na efii mu bae? “[Yehowa, NW] bɔɔ wɔn hwetee asase nyinaa ani.” (Genesis 11:5-8) Ɛyɛɛ asuade kɛse maa Babel abantofo no. Enti sɛ nnipa nhyehyɛe ne Onyankopɔn de nhyia a, “[Yehowa, NW] agyinatu na ebegyina.” (Mmebusɛm 19:21) So wusua biribi fi nsɛm a ɛte saa a esii tete no mu?

Ɔdefo Bi a na Onnim Nyansa

Ebia wonyɛɛ w’adwene sɛ wubesi abantenten bi, nanso nnipa pii wɔ hɔ nnɛ a wɔayɛ nhyehyɛe sɛ wɔbɛkora sika pii wɔ sikakorabea na wɔahyehyɛ ahonyade pii na sɛ wɔkɔ pɛnhyɛn a, wɔn ho ankyere wɔn. Ntease wom sɛ obi bɛpɛ sɛ odi ne nsa ano adwuma. Salomo kyerɛwee sɛ: “Sɛ onipa biara didi nom hu adepa ne brɛ nyinaa mu a, Onyankopɔn akyɛde ne no.”—Ɔsɛnkafo 3:13.

Ɛsɛ sɛ yebu akyɛde a Yehowa de ama yɛn no ho akontaa kyerɛ no. Bɛyɛ mfe 2,000 a atwam ni no, Yesu yɛɛ mfatoho bi de sii asɛm yi so dua kyerɛɛ n’asuafo no. Ɔkae sɛ: “Ɔdefo bi asase sow aba pii. Enti osusuw ho wɔ ne mu sɛ, ‘Dɛn na menyɛ, seesei a minni baabiara a mɛboaboa me nnɔbae ano yi?’ Enti ɔkae sɛ, ‘Nea mɛyɛ ni: Medwiriw m’asan agu na masi akɛse, na ɛhɔ na mɛboaboa m’awi ne me nneɛma pa nyinaa ano; na mɛka akyerɛ me kra sɛ: “Ɔkra, wowɔ nneɛma pa pii a woaboa ano ama mfe pii, dwudwo wo ho, didi, nom, gye w’ani.”’” (Luka 12:16-19) Sɛ wohwɛ a, so na ntease nni nea na ɔdefo no abɔ ne tirim sɛ ɔbɛyɛ no mu? Te sɛ anomaa a yɛadi kan aka ne ho asɛm no, na ɛte sɛ nea ɔbarima a Yesu kaa ne ho asɛm wɔ mfatoho no mu no resiesie ne ho ama daakye.

Nanso, na asɛm wɔ ɔbarima no nsusuwii no ho. Yesu toaa so sɛ: “Nanso Onyankopɔn ka kyerɛɛ no sɛ, ‘Wo a wunni adwene, anadwo yi wɔregye wo kra afi wo nsam. Afei, hena na nneɛma a wode asie no bɛyɛ ne de?’” (Luka 12:20) So na Yesu rebɔ Salomo asɛm a ɔkae sɛ adwuma ne nneɛma pa a efi mu ba no yɛ akyɛde a efi Onyankopɔn no agu? Dabi. Ɛnde na Yesu kyerɛ dɛn? Ɔkae sɛ: “Saa ara na onipa a ɔhyehyɛ ademude fa  nanso ɔnyɛ ɔdefo wɔ Nyankopɔn fam no te.”—Luka 12:21.

Ná Yesu rekyerɛ yɛn sɛ Yehowa mpɛ sɛ yɛn werɛ fi No bere a yɛreyɛ nhyehyɛe ahorow no. Ná anka ɔdefo no nam nyansa ne ɔdɔ pii a ɔbɛhwehwɛ no so bɛhyɛ ɔne Onyankopɔn ntam abusuabɔ mu den. Nsɛm a ɔbarima no kae no kyerɛ sɛ na saa nneɛma anaa ne nnɔbae no bi a obegyaw ama ahiafo adi so mpɛpɛw anaa sɛ ɔde bi bɛbɔ afɔre ama Yehowa no ho nhia no. Ná nneɛma pa yi a ɔdefo no bɛyɛ no ne Onyankopɔn apɛde hyia, nanso na ɛnyɛ hɔ koraa na ɔhwɛ. Ná nea ɔyɛ a ne ho bɛtɔ no nko ara na ɔdwene ho.

Woahyɛ no nsow sɛ nnɛ, nnipa pii de nneɛma asisi wɔn ani so te sɛ ɔdefo a Yesu kaa ne ho asɛm no? Sɛ́ ebia yɛyɛ adefo anaa ahiafo no, ɛnyɛ den koraa sɛ honam fam nneɛma begye yɛn adwene ma yɛabu yɛn ani agu Onyankopɔn so. Dɛn na wubetumi ayɛ na woankɔ tebea a ɛte saa mu?

Nea Obiara Yɛ a Yɛbɛyɛ Bi

Ebia ahia wo ma enti wonte sɛ ɔdefo a Yesu kaa ne ho asɛm no. Nanso, sɛ woaware a, akyinnye biara nni ho sɛ woreyɛ nhyehyɛe sɛnea ɛbɛyɛ a w’abusua benya asetram ahiade, na sɛ ɛbɛyɛ yiye a, wo mma atumi akɔ sukuu pa. Sɛ woyɛ sigyani a, ɛda adi sɛ woayɛ nhyehyɛe a ɛbɛma woanya adwuma anaasɛ w’adwuma remfi wo nsa, na woanyɛ adesoa amma afoforo. Botae a ɛtete sɛɛ nyinaa ye.—2 Tesalonikafo 3:10-12; 1 Timoteo 5:8.

Nanso, adidi, ɔnom, ne nneɛma a obiara yɛ a wobɛyɛ bi no betumi asɛe wo ne Onyankopɔn ntam. Ɔkwan bɛn so? Yesu kae sɛ: “Sɛnea na Noa nna no te no, saa ara na onipa Ba no mmae bɛyɛ. Na sɛnea nna a edii nsuyiri no anim no, wodidi nomee, mmarima warewaree na wɔde mmea memaa aware kosii da a Noa hyɛn adaka no mu, na wɔanhu kosi sɛ nsuyiri no bae bɛpraa wɔn nyinaa kɔe no, saa ara na onipa Ba no mmae bɛyɛ.”—Mateo 24:37-39.

Ansa na Nsuyiri no reba no, nnipa pii bɔɔ wɔn bra sɛnea eye wɔ wɔn ani so. Nanso nea na ɛhaw adwene ne sɛ, “wɔanhu” Onyankopɔn tirim a na wabɔ sɛ ɔnam nsuyiri so bɛsɛe saa wiase bɔne no. Akyinnye biara nni ho sɛ wosusuwii sɛ na Noa yɛ atetekwaa. Nanso bere a Nsuyiri no bae no, ɛbɛdaa adi sɛ ɔkwan a Noa ne n’abusua faa so bɔɔ wɔn bra no mmom na na eye.

Ɛnnɛ, nneɛma nyinaa di adanse sɛ yɛte awiei bere no mu. (Mateo 24:3-12; 2 Timoteo 3:1-5) Ɛrenkyɛ, Onyankopɔn Ahenni ‘bebubu nniso a ɛwɔ hɔ nnɛ nyinaa ma asa.’ (Daniel 2:44) Wɔ saa Ahenni no ase no, wɔbɛdan asase paradise. Ahenni no beyi yare ne owu afi hɔ. (Yesaia 33:24; Adiyisɛm 21:3-5) Asase so abɔde nyinaa bɛtra ase asomdwoe mu, na ɔkɔm renne obiara bio.—Dwom 72:16; Yesaia 11:6-9.

Ansa na Yehowa bɛkeka ne ho no, wabɔ ne tirim sɛ ɔbɛma wɔaka n’Ahenni no ho asɛmpa “wɔ asase so nyinaa de adi amanaman nyinaa adanse.” (Mateo 24:14) Nea ɛne Onyankopɔn atirimpɔw hyia no, Yehowa Adansefo bɛyɛ ɔpepem ason de kasa bɛboro ahanan reka asɛmpa no wɔ nsase 236 so.

Wɔ nnipa a wɔwɔ wiase no fam no, ebia sɛnea Yehowa Adansefo bɔ wɔn bra no yɛ wɔn nwonwa—na mpo ɛte sɛ nea nyansa nni mu. (2 Petro 3:3, 4) Ɛnnɛ, nneɛma a nnipa dodow no ara yɛ wɔ asetram nti, wonni wɔn ho adagyew te sɛ wɔn a wɔtraa ase ansa na Nsuyiri no reba no ara. Ebia wobebu obiara a ɔmmɔ ne bra sɛnea afoforo yɛ no sɛ ɔyɛ atetekwaa. Nanso wɔ nnipa a wɔwɔ Onyankopɔn bɔhyɛ ahorow mu gyidi no fam no, mfaso pii wɔ Onyankopɔn a wɔde wɔn nkwa nyinaa som no no so.

Enti, sɛ́ ebia woyɛ ɔdefo anaa ohiani anaasɛ woyɛ hɔ-ne-hɔ no, nyansa wom sɛ bere rekɔ so no wususuw nneɛma a woabɔ wo tirim sɛ wobɛyɛ no ho. Bere a woyɛ saa no, bisa wo ho sɛ, ‘So me nhyehyɛe ne Onyankopɔn atirimpɔw hyia?’

[Mfonini wɔ kratafa 11]

Sɛ nnipa nhyehyɛe ne Onyankopɔn atirimpɔw anhyia a, Yehowa agyinatu na ebegyina

[Mfonini wɔ kratafa 12]

Bere a ɔdefo a Yesu kaa ne ho asɛm no reyɛ ne nhyehyɛe no, wansusuw Onyankopɔn ho