Momfa Nkyerɛkyerɛ Mo Mma

Samuel Kɔɔ So Yɛɛ Nea Ɛteɛ

SO WOAHU sɛ afoforo reyɛ adebɔne pɛn?— * Samuel huu bi. Ná ɔte baabi a wonhwɛ kwan sɛ bɔne a ɛte saa bɛkɔ so. Ná ɔte Onyankopɔn ntamadan mu, anaa baabi a wɔsom Onyankopɔn, wɔ Silo kurow mu. Ma yɛnhwɛ nea ɛyɛe a bɛboro mfe 3,000 a atwam ni no, Samuel kɔtraa ntamadan mu.

Ansa na wɔrewo Samuel no, na ne maame Hana ani abere denneennen repɛ ɔba. Bere a Hana kɔɔ ntamadan mu hɔ no, ɔkaa eyi ho asɛm kyerɛɛ Onyankopɔn wɔ mpaebɔ mu. Ná ne mpae no mu yɛ den ara ma wuhu sɛ ɔrebesebese n’ano. Eyi maa ɔsɔfopɔn Eli buu no sɛ ɔsabofo. Nanso bere a Eli hui sɛ ɔmmoroe, na mmom ne werɛ na ahow no, ohyiraa no kae sɛ: “Israel Nyankopɔn bɛma wo w’ade a wosrɛɛ no hɔ no.”—1 Samuel 1:17.

Akyiri yi, wɔwoo Samuel, na Hana ani gyei araa ma ɔka kyerɛɛ ne kunu Elkana sɛ: ‘Sɛ minya twa Samuel nufu ara pɛ a, mede no bɛkɔ ntamadan mu ma wakɔsom Onyankopɔn wɔ hɔ.’ Na saa pɛpɛɛpɛ na ɔyɛe! Saa bere no, ɛbɛyɛ sɛ na Samuel adi mfe anan anaa anum.

Ná Eli abɔ akwakoraa, na na ne mmabarima Hofni ne Pinehas nsom Yehowa yiye. Na mpo, na wɔne mmea a wɔba ntamadan no mu bu brabɔne! Wususuw sɛ dɛn na na ɛsɛ sɛ wɔn papa no yɛ?— Ampa, na anka ɛsɛ sɛ ɔtwe wɔn aso na ɔbra wɔn bɔne a ɛte saa a na wɔreyɛ no.

Ná Samuel renyin wɔ asɔrefie hɔ, na ɛbɛyɛ sɛ ohuu Eli mmabarima no subammɔne no. So Samuel suasuaa bɔne a na wɔreyɛ no?— Dabi, ɔkɔɔ so yɛɛ ade pa sɛnea na n’awofo akyerɛkyerɛ no no. Enti ɛnyɛ nwonwa sɛ  na Yehowa bo afuw Eli. Mpo ɔsomaa odiyifo bi ma ɔkɔkaa asotwe a na ɔde bɛba Eli abusua, titiriw ne mma abɔnefo no so, kyerɛɛ no.—1 Samuel 2:22-36.

Samuel kɔɔ so ne Eli somee wɔ ntamadan no mu. Afei anadwo bi, bere a na Samuel ada no, ɔtee sɛ obi refrɛ no. Enti Samuel tuu mmirika kɔɔ Eli hɔ, nanso Eli ka kyerɛɛ no sɛ ɔmfrɛɛ no. Ɔsan tee ɛnne no bio. Afei bere a ɛnne no san frɛɛ no ne mprɛnsa so no, Eli ka kyerɛɛ Samuel sɛ ɔnka sɛ: “[Yehowa, NW] kasa na w’akoa retie.” Bere Samuel kaa saa no, Yehowa kasa kyerɛɛ no. Wunim asɛm a Yehowa ka kyerɛɛ Samuel?—

Onyankopɔn san tĩĩ asotwe a na wabɔ ne tirim sɛ ɔde bɛba Eli abusua so no mu kyerɛɛ Samuel. Ade kyee no, na Samuel suro sɛ ɔbɛka nea Yehowa aka no akyerɛ Eli. Nanso Eli paa Samuel kyɛw sɛ: “Nsiw me so.” Enti awiei koraa no, Samuel kaa nea na Yehowa aka sɛ ɔbɛyɛ no nyinaa kyerɛɛ Eli—sɛnea na Yehowa diyifo adi kan aka akyerɛ Eli no. Nea Eli kae ne sɛ: ‘Nea eye Yehowa ani so no, ɔnyɛ.’ Ewiee ase no, wokum Hofni ne Pinehas, na Eli nso wui.—1 Samuel 3:1-18.

Ne nyinaa mu no, “Samuel nyinii, na [Yehowa, NW] dii n’akyi.” Saa bere no, ɛbɛyɛ sɛ na Samuel nnya nnii mfe 20; bere a ɛho hia paa wɔ mmofra asetra mu. So wususuw sɛ na ɛyɛ mmerɛw sɛ Samuel bɛyɛ ade pa bere a na afoforo nyɛ saa no?— Ɛwom sɛ na ɛyɛ den de, nanso Samuel kɔɔ so de nokwaredi som Yehowa ne nkwa nna nyinaa.—1 Samuel 3:19-21.

Na wo nso ɛ? Bere a worenyin no, so wobɛyɛ te sɛ Samuel? So wobɛkɔ so ayɛ ade pa? So wobɛkɔ so atie nea Bible kyerɛkyerɛ ne nea w’awofo de akyerɛ wo no? Sɛ woyɛ saa a, wobɛma Yehowa ne w’awofo nyinaa ani agye.

[Ase hɔ asɛm]

Nsɛmmisa:

○ Ɛyɛɛ dɛn na Samuel kɔsomee wɔ Yehowa ntamadan mu?

○ Ɔhaw ahorow bɛn na Samuel hyiae wɔ hɔ?

○ Nhwɛso bɛn na Samuel yɛ maa mmofra?