Nnyanka Agya
Bɛn Onyankopɔn
Nnyanka Agya
“NNYANKA agya . . . ne Onyankopɔn a ɔte ne kronkronbea no.” (Dwom 68:5) Nsɛm a ɛwɔ Bible mu yi ma yesua biribi fa Yehowa Nyankopɔn ho—odwen mmɔborɔfo ho. Sɛnea odwen nnyanka ho no da adi pefee wɔ Mmara a ɔde maa Israelfo no mu. Ma yensusuw bere a edi kan a wɔkaa “agyanka” ho asɛm wɔ Bible mu wɔ Exodus 22:22-24 no ho nhwɛ.
Onyankopɔn bɔɔ wɔn kɔkɔ sɛ: “Monnteetee . . . agyanka.” (Nkyekyɛm 22) Wɔanka eyi sɛnea ɛbɛyɛ a wobehu nnyanka mmɔbɔ kɛkɛ; ná ɛyɛ Onyankopɔn ahyɛde. Agya bɔ ne ba ho ban na ɔde n’ahiade ma no, nanso sɛ owu a, nkurɔfo betumi ateetee abofra no. Ná ɛnsɛ sɛ obiara ‘teetee’ abofra a ɔte saa ɔkwan biara so. Wɔ Bible nkyerɛase afoforo mu no, wɔkyerɛ asɛmfua ‘ateetee’ ase sɛ “ayayade,” “nhyɛso,” ne “sɛ́ wodi obi nya.” Wɔ Onyankopɔn ani so no, na ɛyɛ bɔne paa sɛ obi bɛyɛ agyanka bɔne. Ná Onyankopɔn bu bɔne a ɛte saa dɛn ankasa?
Mmara no toa so sɛ: “Sɛ wohyɛ wɔn so, na wosu frɛ me pɛ a, otie na metie wɔn sufrɛ no.” (Nkyekyɛm 23, Akuapem Twi Bible) Wɔdan asɛm no fi dodow kabea ‘mo,’ a ɛwɔ nkyekyɛm 22 mu no so de ba biako kabea ‘wo,’ a ɛwɔ nkyekyɛm 23 no mu. Enti na ɛyɛ ankorankoro ne ɔman mũ no nyinaa asɛyɛde sɛ wodi Onyankopɔn mmara yi so. Ná Yehowa ani wɔ wɔn so; ná wabue n’aso ama nnyanka, na na wayɛ krado sɛ obetie wɔn sufrɛ.—Dwom 10:14; Mmebusɛm 23:10, 11.
Ɛnde, sɛ obi yɛ agyanka bi bɔne na ɔma abofra no su frɛ Onyankopɔn a, dɛn na ebesi? Yehowa ka sɛ, “M’abufuw bɛdɛw, na mede nkrante bekunkum mo.” (Nkyekyɛm 24) Nhoma bi a ɛkyerɛkyerɛ Bible mu ka sɛ nea asɛm “M’abufuw bɛdɛw” no “kyerɛ ankasa ne ‘me hwenem betu ntutuw,’ a ɛyɛ kasakoa a ɛkyerɛ abufuhyew.” Hyɛ no nsow sɛ Yehowa annyaw amma Israel atemmufo sɛ wɔnhwɛ mma wonni mmara yi so. Ná Onyankopɔn ankasa na obebu obiara a obedi abofra a onni boafo nya no atɛn.—Deuteronomium 10:17, 18.
Yehowa nsakrae. (Malaki 3:6) Ɔda so ara hu mmofra a wonni awofo no mmɔbɔ. (Yakobo 1:27) Hwɛ yiye na woanyɛ nnyanka bɔne bi, na amma nnyanka Agya no abufuhyew amma wo so. Ɔkwan biara so no, “Yehowa abufuhyew” bɛba wɔn a wɔyɛ mmofra a wonni aboafo bɔne no so. (Sefania 2:2) Abɔnefo a wɔte saa no behu sɛ “ɛyɛ hu sɛ obi bɛhwe Onyankopɔn teasefo no nsam.”—Hebrifo 10:31.—w09 04/01-E.