Nea Ɛma Abusua Nya Anigye

Sɛnea Wɔhwɛ Sika So

Ɔbarima no ka sɛ: “Misusuw sɛ me yere, Laura, * sɛe sika wɔ nneɛma a ɛho nhia ho, na mete nka sɛ ɔtotɔ nneɛma a yenhia. Ɛkame ayɛ sɛ sika ntena ne nsam! Ne saa nti, sɛ ɛho behia sɛ yɛde sika yɛ biribi a yɛnhwɛ kwan a, na yɛn ho akyere yɛn. Metaa ka sɛ, sɛ sika bedi me yere nsam ara pɛ a, obedi.”

Ɔbea no ka sɛ: “Ebia minnim sɛnea wosie sika de, nanso me kunu nnim sɛnea aduan, nneɛma a wɔde siesie fie, ne nneɛma a yɛtɔ da biara da no bo yɛ den fa. Nanso esiane sɛ me na mewɔ fie na minim nneɛma a yehia nti, metɔ ɛmfa ho sɛ ebia ɛde ‘akasakasa’ bɛba.”

NNEƐMA a ɛyɛ den paa sɛ awarefo bɛtɔ wɔn bo ase aka ho asɛm no mu biako ne sika. Ɛnyɛ nwonwa sɛ wɔka sɛ ɛno paa na ɛtaa de aware mu akasakasa ba.

Awarefo a wɔn adwene nhyia wɔ sikasɛm ho no betumi ahaw, wɔagye akyinnye, wɔayɛ basaa, na mpo asɛe wɔne Onyankopɔn ntam. (1 Timoteo 6:9, 10) Sɛ awofo antumi ansusuw wɔn sikasɛm ho yiye a, ɛma wɔde wɔn bere pii yɛ adwuma na wonnya bere mma wɔn mma ne wɔn ankasa ho, na etumi sɛe wɔne Yehowa ntam nso. Afei nso, wontumi nkyerɛ wɔn mma sɛnea wɔhwɛ sika so yiye.

Bible ka sɛ: ‘sika bɔ onipa ho ban.’ (Ɔsɛnkafo 7:12) Nanso sɛ sika bɛbɔ w’aware ne w’abusua ho ban a, gye sɛ wusua sɛnea wɔhwɛ sika so, na wuhu sɛnea wo ne wo hokafo bɛka ho asɛm nso. * Nokwarem no, sɛ́ anka awarefo bɛtwe sika ho manso no, wobetumi atena ase asusuw ho, na ama wɔn aware asɔ.

Ɛnde, dɛn nti na sika de ɔhaw pii ba aware mu saa? Na dɛn na wubetumi ayɛ na ama moatumi aka sika ho asɛm asomdwoe mu sen sɛ ɛde akasakasa bɛba?

Nsɛnnennen no Bi ne Dɛn?

Mpɛn pii no, ɛnyɛ sika ankasa anaa ɛka a ɛbɛma awarefo abɔ na ɛde akasakasa ba, na mmom gye a wonnye wɔn ho nni ntia. Sɛ nhwɛso no, sɛ okunu ka sɛ ɔpɛ sɛ ne yere kyerɛkyerɛ nea ɔde sika yɛ biara mu a, nea ɔrepɛ akyerɛ ara ne sɛ onnye ne yere nni sɛ obetumi ahwɛ abusua no sikasɛm so yiye. Na sɛ ɔyere nso ka sɛ ne kunu sɛe sika a, nea ɛkyerɛ ne sɛ ebia na osuro sɛ sɛ asɛm bi si daakye a, abusua no ho bɛkyerɛ wɔn.

Awarefo hyia ɔhaw foforo—abusua a wofi mu ne ntetee a wonyae. Matthew, a waware mfe awotwe no ka sɛ: “Me yere fi abusua a na wɔhwɛ sika so yiye mu. Enti onnwinnwen sika ho sɛnea metaa yɛ no. Ná me papa yɛ kɔwensani a bere biara sigaret si n’ano, na na otumi tena ase bere tenten a ɔnyɛ adwuma biara. Ná yɛn ho taa kyere yɛn, na ɛtɔ mmere bi a na nea yebedi mpo ayɛ den. Eyi ma mebɛyɛɛ obi a na misuro ka. Ne saa nti, ɛtɔ da na sɛ me ne me yere reka sikasɛm a, mente no ase.” Ɛmfa ho nea ɛde akasakasa ba mo aware mu no,  dɛn na wubetumi ayɛ na sika ansɛe mo asomdwoe?

Nneɛma Anan a Ɛde Anigye Ba

Bible nyɛ nhoma a ɛkyerɛkyerɛ sɛnea wɔhwɛ sika so yiye. Nanso afotu pa wom a ebetumi aboa awarefo ma wɔadi nsɛnnennen a sikasɛm de ba no so. Dɛn nti na wunsusuw emu afotu no ho na wonsɔ nyansahyɛ a edidi so yi nhwɛ?

1. Munsua sɛ mobɛka sika ho asɛm odwo so. “Wɔn a wɔbom tu agyina na nyansa ne wɔn te.” (Mmebusɛm 13:10) Esiane ntetee a wunyae nti, ebia ɛrenyɛ wo dɛ sɛ wo ne afoforo, titiriw wo hokafo, besusuw sikasɛm ho. Sɛ saa na ɛte mpo a, nyansa wom sɛ wusua sɛ wo ne afoforo besusuw asɛnhia yi ho. Sɛ nhwɛso no, sɛ wote nka sɛ su a na w’awofo wɔ wɔ sika ho no anya wo so nkɛntɛnso a, dɛn nti na wonkyerɛkyerɛ mu nkyerɛ wo hokafo? Bio nso, bɔ mmɔden sɛ wobɛte sɛnea abusua a wo hokafo fi mu no anya ne nneyɛe so nkɛntɛnso no ase.

Ɛho nhia sɛ mobɛtwɛn ma asɛm aba ansa na moatena ase aka mo sikasɛm. Bible kyerɛwfo bi bisae sɛ: “Nnipa baanu betumi abom anantew bere a wɔnyɛɛ nhyehyɛe nhyiae?” (Amos 3:3) Aba bɛn na ɛwɔ asɛm yi mu? Sɛ mohyɛ bere pɔtee a mode bɛka mo sikasɛm a, ɛntaa mma sɛ akasakasa bɛsɔre esiane sɛ ntease anyɛ adwuma nti.

SƆ EYI HWƐ: Mompaw bere a mode besusuw abusua no sikasɛm ho. Mubetumi ayi da a edi kan wɔ ɔsram biara anaa dapɛn biara mu asi hɔ. Mmma nkɔmmɔbɔ no nkyɛ pii, akyɛ paa na ebia simma 15. Mompaw bere a ɛbɛyɛ ama mo baanu nyinaa. Monte mo ho ase sɛ morenka sika ho asɛm wɔ mmere ahorow bi mu, te sɛ bere a moredidi anaa bere a mo ne mo mma regye mo ahome.

2. Ɛsɛ sɛ mo adwene hyia wɔ sika a munya ho. “Munni kan mfa nidi mma mo ho mo ho.” (Romafo 12:10) Sɛ wo nkutoo na woyɛ adwuma gye akatua a, wubetumi adi wo hokafo no ni bere a wummu sika a wunya no sɛ ɛyɛ wo nkutoo de, na mmom sɛ abusua no sika.—1 Timoteo 5:8.

Sɛ wo ne wo hokafo no nyinaa yɛ adwuma gye akatua a, mubetumi adi mo ho mo ho ni bere a obiara hu sika a ne yɔnko nya ne nneɛma atitiriw a ɔde sika no yɛ no. Sɛ woamma wo hokafo anhu wo sikasɛm mu a, ɛremma onnye wo nni, na ebetumi asɛe mo ntam. Ɛho nhia sɛ biribi ketewaa biara a wobɛtɔ no, woma wo hokafo hu ansa. Nanso sɛ wo ne wo hokafo susuw biribi a egye sika pii ho ansa woatɔ a, ɛkyerɛ sɛ wubu no.

SƆ EYI HWƐ: Munsusuw sika dodow a mobɛpɛ sɛ mo mu biara de twitwa ne ho a ɛho renhia sɛ ɔbɔ ne yɔnko amanneɛ ansa ho. Bere biara a ɛho behia sɛ wuyi sika a ɛboro nea moapene so no so de ayɛ biribi no, ka ho asɛm kyerɛ wo hokafo no ansa.

3. Monkyerɛw nea mode mo sika bɛyɛ no nto hɔ. “Sɛ woyɛ nhyehyɛe na wode nsi yɛ w’adwuma a, wubenya so mfaso pii.” (Mmebusɛm 21:5, Contemporary English Version) Ɔkwan biako a wubetumi afa so ayɛ daakye ho nhyehyɛe sɛnea ɛbɛyɛ a woremmrɛ ngu ne sɛ wobɛyɛ abusua sika ho nhyehyɛe. Nina a waware mfe anum ni no ka sɛ: “Sɛ woyɛ sika a wunya ne nea wudi ho kyerɛwtohɔ a, wo ho bedwiriw wo. Ɛbɛma woahu biribiara mu pefee.”

Ɛho nhia sɛ woyɛ wo sikasɛm ho nhyehyɛe denneennen biara. Darren a waware mfe 26 a ɔwɔ mmabarima baanu no ka sɛ: “Mfitiase no, na yɛkyekyɛ yɛn sika mu de hyehyɛ nhoma kotoku mu. Ná yɛde sika a yebedi wɔ dapɛn biara mu no hyehyɛ nhoma kotoku ahorow mu. Sɛ nhwɛso no, na yɛwɔ nhoma kotoku a yɛde aduan sika, anigyede sika, ne mpo nea yɛde beyi yɛn ti nhwi hyehyɛ mu. Sɛ nhoma kotoku bi mu sika sa a, na yɛbɔ bosea fi foforo mu, nanso na yɛhwɛ hu sɛ sɛ yenya sika ara pɛ a, yɛbɛsan de sika no ahyɛ faako a yeyi fii no.” Sɛ ebia ɛnyɛ sika ankasa na wuyi de tua wo ho aka na mmom wɔtete fi w’akatua  mu a, ɛho hia paa sɛ woma w’ani di ɛka a wobɔ a wɔde tete wo no akyi.

SƆ EYI HWƐ: Kyerɛw wo dan ho ka anaa ɛka a ɛte saa a wutua no nyinaa to hɔ. Munsi sika a munya no dodow a mopɛ sɛ mode sie ho gyinae. Afei kyerɛw ɛka a motaa bɔ wɔ nneɛma te sɛ aduan, anyinam ahoɔden, ne telefon ho no to hɔ. Afei nso ma w’ani nni ɛka a watua no asram dodow bi no nyinaa akyi. Sɛ ɛho hia a, yɛ nsakrae wɔ w’asetena mu sɛnea ɛbɛyɛ a worenne ka pii.

4. Munsi nea obiara bɛyɛ ho gyinae. “Baanu ye sen obiakofo, efisɛ wɔbom yɛ adwuma a, wotumi yɛ pii.” (Ɔsɛnkafo 4:9, 10, New Century Version) Wɔ mmusua bi mu no, okunu na ɔhwɛ sikasɛm so. Wɔ mmusua afoforo mu no, ɔyere no na ɔhwɛ so. (Mmebusɛm 31:10-28) Nanso awarefo pii paw sɛ wɔbɛkyɛ asɛyɛde no. Mario a waware mfe 21 no ka sɛ: “Me yere tua ɛka nketenkete a yɛbɔ no, na me nso mitua tow ahorow, nnwuma a nkurɔfo yɛ ma yɛn, ne yɛn dan ka. Obiara mfa biribiara nsie ne yɔnko, na yɛyɛ nneɛma bom.” Ɛmfa ho sɛnea moayɛ mo nhyehyɛe no, nea ehia ara ne sɛ mobɛyɛ biako.

SƆ EYI HWƐ: Sɛ moredwennwen nea obiara betumi ayɛ ho a, munsusuw nea mo mu biara betumi adi ho dwuma no nso ho. Sɛ asram bi twam a, monsan nsusuw nhyehyɛe a moayɛ dedaw no ho na mumfi mo pɛ mu nyɛ nsakrae. Nea ɛbɛboa wo ma woatumi akyerɛ adwuma a wo hokafo yɛ, te sɛ telefon ho ka a otua ne nneɛma a ɔtotɔ ho anisɔ no, ɛwom ara a monsesa nhyehyɛe no mu na obiara nyɛ ne yɔnko adwuma no bi.

Nea Ɛsɛ sɛ Efi Mo Nkɔmmɔbɔ no mu Ba

Ɛnsɛ sɛ sika ho nkɔmmɔ a mobɛbɔ no sɛe ɔdɔ a ɛwɔ mo ntam no. Leah a waware mfe anum no gye asɛm yi tom. Ɔka sɛ: “Me ne me kunu asua sɛ yɛremfa biribiara nsie bere a yɛresusuw yɛn sikasɛm ho no. Esiane eyi nti, seesei yɛyɛ biribiara bom, na ɔdɔ a yɛwɔ ma yɛn ho no mu ayɛ den.”

Sɛ awarefo tena ase susuw sɛnea wɔpɛ sɛ wodi wɔn sika ho a, ɛma obiara ka ne komam asɛm kyerɛ ne yɔnko, na ɛhyɛ aware no mu den. Sɛ wosusuw nneɛma titiriw a ebehia sɛ wɔde sika pii tɔ ho a, ɛma wɔkyerɛ obu ma wɔn ho wɔn ho. Sɛ wɔma kwan ma obiara fi ne pɛ mu de abusua no sika tɔ nneɛma nketenkete a ɛho nhia sɛ wɔbɔ ho amane ansa a, ɛma wɔkyerɛ sɛ wɔwɔ wɔn ho mu ahotoso. Eyinom boa ma ɔdɔ ankasa tena aware mu. Abusuabɔ a ɛte saa som bo koraa sen sika. Ɛnde, dɛn nti na ɛsɛ sɛ mugye sika ho akyinnye?—w09 8/1-E.

[Ase hɔ nsɛm]

BISA WO HO SƐ . . .

▪ Bere bɛn na etwa to koraa a me ne me hokafo kaa sika ho asɛm wɔ odwo so?

▪ Dɛn na sɛ meka anaa meyɛ a, ɛbɛkyerɛ sɛ m’ani sɔ sika a me hokafo de boa abusua no?

[Mfonini wɔ kratafa 29]

Dɛn na ehia wo paa​—sika anaa w’aware?