Sɛnea Na Asetena Te Wɔ Afeha A Edi Kan Kristofo Bere So

‘Wɔyɛ Fie Nnwuma’

“Afei bere a wɔrekɔ no, ɔkɔɔ akuraa bi ase. Ɛha na ɔbea bi a wɔfrɛ no Marta gyee no kɔɔ fie sɛ ɔhɔho. Ná saa ɔbea yi wɔ onuabea bi nso a wɔfrɛ no Maria, na ɔno de ɔtenaa Awurade nan ase tiee n’asɛm no ara. Nanso Marta de, na nnwuma bebree agye n’adwene. Enti ɔba bɛkae sɛ: ‘Awurade, wunhu sɛ me nuabea no agyaw me nkutoo na mereyɛ ade? Enti ka kyerɛ no na ɔmmɛka me ho mmoa me.’ Awurade bua see no sɛ: ‘Marta, Marta, wudwinnwen bebree na wode nneɛma pii haw wo ho. Nanso, nneɛma kakraa bi na ehia, anaasɛ biako pɛ. Maria de, wapaw nea ɛyɛ papa, na wɔrennye mfi ne nsam.’”—LUKA 10:38-42.

ƐDA adi sɛ na Marta yɛ ɔbea ɔdeyɛfo. Akyinnye biara nni ho sɛ na afoforo bu no paa. Wɔ afeha a edi kan no mu no, na Yudafo no hwɛ sɛnea ɔbea bi yɛ ne fie nnwuma ne sɛnea ɔhwɛ ne kunu ne ne mma na wɔde hu ɔbea kõ a ɔyɛ.

Wɔhyɛɛ afeha a edi kan Kristofo mmea no nkuran sɛ ‘wɔnyɛ fie nnwuma.’ (Tito 2:5) Nanso, wonyaa hokwan sɛ wɔbɛkyerɛkyerɛ Kristofo gyidi a na wɔwɔ no mu akyerɛ afoforo. (Mateo 28:19, 20; Asomafo Nnwuma 2:18) “Nnwuma bebree” a na ɛsɛ sɛ afeha a edi kan no mu Yudafo  mmea yɛ no bi ne dɛn? Na dɛn na yebetumi asua afi asɛm a Yesu ka faa Maria ho no mu?

‘Ná Wɔyɛ Nnwuma Bebree’ Ɛda adi sɛ na Yudani bea warefo sɔre anɔpatutuutu. (Mmebusɛm 31:15) Sɛ ɔka koko ma n’abusua ma wodi wie anɔpa a, otumi kogya ne mmabarima kwan ma wokosua ade wɔ hyiadan mu. Ná ne mmabea no tena fie sua fie nnwuma sɛnea ɛbɛyɛ a wɔn mu biara benyin abɛyɛ ɔyere pa.

Ɔbea warefo ne ne mmabea yɛ fie nnwuma de fi da no ase—wɔde ngo gu akanea mu (1), wɔprapra fie (2), na wokyĩ wɔn apɔnkye nufusu (3). Ɛno akyi no, wɔtõ paanoo a wobedi saa da no. Mmeawa no di kan huhuw awi so yiyi mu fĩ (4), na afei wɔyam awi no wɔ owiyammo so de yɛ esiam (5). Maame no de nsu ne mmɔkaw fra esiam no (6), na ɔfɔtɔw. Afei ogyaw si hɔ ma etu, na ɔtoa so yɛ nnwuma afoforo. Saa bere no nyinaa na mmeawa no ani abere de apɔnkye nufusu no reyɛ kyiis (7).

Sɛ wɔyɛ nnwuma yi nyinaa wie anɔpa no a, maame no ne ne mmabea no kɔ gua so. Sɛ odu hɔ a, ɔte ahuamhuanne, mmoa sũ, ne aguadifo a wɔrepae wɔn nneɛma, na ɔtɔ nneɛma a ohia (8). Nneɛma a ɔtɔ no bi ne afumduan ne nam a wɔahow. Sɛ ɔbea warefo no yɛ Kristoni a, na obetumi aka ne gyidi ho asɛm akyerɛ afoforo wɔ gua no so.—Asomafo Nnwuma 17:17.

Ɛna a n’ani kũ ne mma ho no de Onyankopɔn Asɛm kyerɛkyerɛ mmofra no bere a ɔne wɔn nantew kɔ gua so ba no. (Deuteronomium 6:6, 7) Afei nso, ebia ɔbɛkyerɛ wɔn sɛnea wɔtotɔ nneɛma wɔ gua so a wɔnsɛe sika pii.—Mmebusɛm 31:14, 18.

Adwuma foforo a da biara mmea no yɛ ne sɛ wɔkɔ asubura ho (9). Wɔkɔ hɔ kɔsaw nsu ba fie, na ebia wɔne mmea afoforo a wɔkɔsaw nsu no bɔ nkɔmmɔ. Sɛ wɔba fie a, ɔbea warefo no ne ne mmabea no fi ase tõ paanoo no. Nea edi kan no, wɔbɔ paanoo no ntrantraa, na afei wɔde hyɛ fononoo a adɔ mu (10). Ná wɔtaa si fononoo a ɛte saa no wɔ afikyiri. Bere a paanoo no hua tu fa wɔn so no, wɔbɔ nkɔmmɔ na wɔtwɛn sɛ ɛbɛben.

Ɛno akyi no, wɔkɔ asuten a ɛbɛn hɔ ho kosi wɔn nneɛma (11). Mmea no di kan de samina a wɔn ankasa ayɛ si wɔn nneɛma no. Sɛ wosi nneɛma no wie na wokyĩ mu a, wɔhata wɔ nwura anaa abo a ɛbɛn hɔ so.

Sɛ wɔde nneɛma a wɔasi no bedu fie a, maame no ne ne mmabea no kɔtena ɔdan no atifi, na wɔpompam (12) ntade a atetew no ansa na wɔde akɔ ɔdan mu. Sɛ wowie a, otumi kyerɛ mmeawa no sɛnea wɔnwene  ntama (13). Ɛno akyi no, wɔkɔyɛ anwummeduan (14). Esiane sɛ na ahɔhoyɛ yɛ wɔn asetena fã nti, abusua no siesie wɔn ho sɛnea ɛbɛyɛ a sɛ ɔhɔho bi bɛsra wɔn a, obenya aduan a wɔde paanoo, afumduan, kyiis, ne nam a wɔahow ayɛ no bi adi, na wɔanya nsu a adwo no bi anom.

Sɛ edu anwummere a, ansa na mmofra no bɛkɔ akɔda no, maame no mia wɔn akuru de aduru gugu so. Afei wɔtena kanea ho, na ɛtɔ da a awofo no ka asɛm bi a ɛwɔ Kyerɛwnsɛm no mu kyerɛ wɔn mma no, na sɛ wowie a, wɔabɔ mpae. Bere a mmofra no akɔda ma fie hɔ ayɛ dinn no, afei okunu no benya nea obegyina so aka nsɛm a wonim no yiye yi de akamfo ne yere: “Ɔyere pa, hena na obenya? Ne bo yɛ den sen nhene pa koraa.”—Mmebusɛm 31:10.

“Nea Ɛyɛ Papa” a Yɛbɛpaw Akyinnye biara nni ho sɛ, na mmea a wɔwɔ hɔ wɔ afeha a edi kan no mu a na wɔn ani kũ wɔn mmusua ho no wɔ “nnwuma bebree” a na ɛsɛ sɛ wɔyɛ. (Luka 10:40) Saa ara na mmea a wɔwɔ hɔ nnɛ, titiriw awofo, nso nni adagyew koraa. Nneɛma a aba so nnɛ no ama fie nnwuma bi ayɛ mmerɛw. Nanso, tebea no ama mmea pii fi fie kɔyɛ nnwuma na wɔsan hwɛ wɔn mmusua.

Ɛmfa ho nsɛnnennen a Kristofo mmea a wɔwɔ hɔ nnɛ hyia no, wodi Maria a yɛkaa ne ho asɛm mfiase no nhwɛso akyi. Wɔma Onyankopɔn som ho hia wɔn kɛse. (Mateo 5:3) Wɔhwɛ wɔn mmusua yiye sɛnea Kyerɛwnsɛm no hyɛ wɔn nkuran sɛ wɔnyɛ no. (Mmebusɛm 31:11-31) Nanso, wɔsan de asɛm a Yesu ka kyerɛɛ Marta no yɛ adwuma. Esiane sɛ na Onyankopɔn som ho hia Marta nti, ɛda adi sɛ otiee Yesu afotu no. Mmea a wɔyɛ Kristofo bɔ mmɔden sɛ wɔremma fie nnwuma a wɔyɛ no ntwetwe wɔn adwene mfi Onyankopɔn Asɛm a wobesua no so (15), na saa ara nso na wɔmma ensiw wɔn kwan sɛ wɔbɛka wɔn gyidi ho asɛm akyerɛ afoforo. (Mateo 24:14; Hebrifo 10:24, 25) Wɔnam saayɛ so paw “nea ɛyɛ papa.” (Luka 10:42) Esiane eyi nti, wɔsom bo paa ma Onyankopɔn ne Kristo, na wɔn mmusua nso nni wɔn ho agoru koraa.—Mmebusɛm 18:22.—w10-E 02/1.