Sua Biribi Fi Onyankopɔn Asɛm Mu

Wobɛyɛ Dɛn Ahu Nokware Som?

Saa asɛm yi bisa nsɛm a ebia woabisa pɛn, na ɛkyerɛ faako a wubetumi akenkan ho mmuae wɔ Bible no mu. Yehowa Adansefo ani begye ho sɛ wɔne wo besusuw nsɛmmisa yi ho mmuae ho.

1. So nokware som yɛ biako pɛ?

Yesu kyerɛɛ n’akyidifo no ɔsom biako pɛ, ɛno ne nokware som. Ɛte sɛ ɔkwan a ɛkɔ nkwa mu no. Yesu kaa saa kwan no ho asɛm sɛ: “Nnipa kakraa bi na wohu.” (Mateo 7:14) Ɔsom a egyina Onyankopɔn Asɛm a ɛyɛ nokware so nkutoo na Onyankopɔn gye tom. Nokware asomfo nyinaa wɔ gyidi biako.—Kenkan Yohane 4:23, 24; 14:6; Efesofo 4:4, 5.

2. Dɛn nti na ɔsom ahorow pii mufo ka sɛ wɔyɛ Kristofo?

Atoro adiyifo asɛe Kristosom na wɔde pɛ mfaso. Sɛnea Yesu hyɛɛ nkɔm no, wɔka sɛ wɔyɛ Yesu “nguan” nanso wɔyɛ wɔn ade te sɛ mpataku a ɔkɔm de wɔn. (Mateo 7:13-15, 21, 23) Atoro Kristosom fii ase trɛwee titiriw wɔ Yesu asomafo no wu akyi.—Kenkan Asomafo Nnwuma 20:29, 30.

3. Nneɛma a ɛma nokware som da nsow no bi ne dɛn?

Nokware asomfo kyerɛ obu ma Bible no sɛ ɛyɛ Onyankopɔn Asɛm. Wɔbɔ mmɔden sɛ wɔde emu nnyinasosɛm bɛbɔ wɔn bra. Enti nokware som nte sɛ ɔsom ahorow a egyina nnipa nsusuwii so no. (Mateo 15:7-9) Nokware asomfo yɛ nea wɔka no.—Kenkan Yohane 17:17; 2 Timoteo 3:16, 17.

Nokware som hyɛ Onyankopɔn din Yehowa, no anuonyam. Yesu maa nkurɔfo huu Onyankopɔn din. Ɔboaa nnipa ma wohuu Onyankopɔn na ɔkyerɛkyerɛɛ wɔn sɛ wɔmmɔ mpae sɛ Onyankopɔn din ho tew. (Mateo 6:9) Ɔsom bɛn na ɛka Onyankopɔn din ho asɛm kyerɛ afoforo wɔ baabi a wote no?—Kenkan Yohane 17:26; Romafo 10:13, 14.

 4. Wobɛyɛ dɛn ahu nokware asomfo?

Nokware Kristofo ka Onyankopɔn Ahenni ho asɛm kyerɛ afoforo. Onyankopɔn somaa Yesu sɛ ɔmmɛka Ahenni no ho asɛm. Onyankopɔn Ahenni no ne adesamma anidaso koro pɛ. Yesu kɔɔ so kaa ho asɛm kosii da a owui. (Luka 4:43; 8:1; 23:42, 43) Ɔka kyerɛɛ n’akyidifo sɛ wɔnka Onyankopɔn Ahenni ho asɛm nkyerɛ afoforo. Sɛ obi ba wo nkyɛn sɛ ɔrebɛka Onyankopɔn Ahenni ho asɛm akyerɛ wo a, wubehu no sɛ ɔyɛ ɔsom bɛn muni?—Kenkan Mateo 10:7; 24:14.

Yesu akyidifo nyɛ wiase bɔne yi fã. Wɔmmfa wɔn ho nnhyɛ amanyɔsɛm anaa asetenam ntawntawdi mu. (Yohane 17:16) Afei nso, wonnsuasua wiase no nneyɛe ne wɔn subammɔne no.—Kenkan Yakobo 1:27; 4:4.

5. Dɛn ne nokware Kristosom agyiraehyɛde titiriw?

Nokware Kristofo wɔ ɔdɔ kɛse ma wɔn ho wɔn ho. Onyankopɔn Asɛm a wosua no ma wohu sɛ ɛsɛ sɛ wobu nnipa a wofi mmusua ahorow nyinaa mu. Ɛwom sɛ atoro som agyina amanaman no akodi akyi denneennen mpɛn pii de, nanso nokware asomfo nyɛ saa. (Mika 4:1-4) Mmom no, nokware som mufo de wɔn bere ne wɔn ahode boa afoforo na wɔhyɛ wɔn nkuran.—Kenkan Yohane 13:34, 35; 1 Yohane 4:20, 21.

Kuw bɛn na wɔde wɔn nkyerɛkyerɛ nyinaa gyina Onyankopɔn Asɛm so, wɔhyɛ Onyankopɔn din anuonyam, na wɔka Onyankopɔn Ahenni ho asɛm sɛ ɛne adesamma anidaso koro pɛ? Kuw bɛn na wɔdodɔ wɔn ho na wɔmmoa akodi? Adanse ahorow no kyerɛ sɛ ɛyɛ Yehowa Adansefo.—1 Yohane 3:10-12.—w11-E 08/1.

Sɛ wopɛ nsɛm pii a, hwɛ nhoma a Yehowa Adansefo atintim yi, Dɛn na Bible Kyerɛkyerɛ Ankasa? ti 15.

[Mfonini wɔ kratafa 16]

“Wɔpae mu ka wɔ baguam sɛ wonim Onyankopɔn, nanso wɔde wɔn nnwuma pa no.”—Tito 1:16