So Wunim?

“Atemmu agua” bɛn na wɔde ɔsomafo Paulo kogyinaa anim no?

▪ Asomafo Nnwuma 18:12, 13 ka sɛ Yudafo a na wɔwɔ Korinto no bɔɔ Paulo sobo sɛ ɔreka asɛm a mmara mma ho kwan, ɛno nti wɔde no kogyinaa “atemmu agua” anaa beʹma no anim (Hela asɛmfua a ɛkyerɛ “atrapoe”). Tete Korinto no, na wɔwɔ bamma si petee mu wɔ agora anaa gua kɛse no mfinimfini baabi. Ɛbɛyɛ sɛ na ɛwɔ hyiadan no nkyɛn pɛɛ. Esiane baabi a bamma no wɔ nti, na wotumi gyina hɔ kasa kyerɛ ɔmanfo. Wɔde ahwehwɛbo bruu ne fitaa na ayɛ, ɛnna wɔde nnua a wɔasen no fɛfɛɛfɛ asieisie hɔ kama; wɔasi adan abien abata baabi a wogyina kasa no. Wɔayɛ ahwehwɛbo nkogua wɔ saa adan no mu, na wɔde ahwehwɛbo mfrafrae asiesie fam hɔ.

Ɛbɛyɛ sɛ baabi a wogyina kasa no, ɛno ne atemmu agua a ɔsomafo Paulo kogyinaa Roma mantam Akaia amrado Galio anim wɔ hɔ no. Ɛhɔ na atemmufo tena di asɛm na wɔde wɔn atemmu no to nnipa a wɔwɔ hɔ no anim.

Hela nkurow akɛse mu no, sɛ baguafo betu agyina biara a, beʹma no anim na na wɔtaa hyia. Sɛ yɛhwɛ Mateo 27:19 ne Yohane 19:13 wɔ Hela nkyerɛwee no mu a, ɛka sɛ Pontio Pilato tenaa ne beʹma no so kasa kyerɛɛ nnipakuw no bere a wɔredi Yesu asɛm no.—Asomafo Nnwuma 12:21.

Adɛn nti na ɔkwan a Yesu faa so wui no too Yudafo binom hintidua?

▪ Ɔsomafo Paulo kaa tete Kristofo ho asɛm sɛ: “Yɛka Kristo a wɔsɛn no no ho asɛm; ɔyɛ hintidua ma Yudafo, na ɔyɛ nkwaseasɛm ma amanaman mufo.” (1 Korintofo 1:23) Adɛn nti na ɔkwan a Yesu faa so wui no too ebinom hintidua?

Bible nkyerɛkyerɛmufo Ben Witherington III ka ɔkwan a Yesu faa so wui ne sɛnea na nnipa a wɔwɔ Mediterranea Apuei fam no yɛ wɔn ade wɔ Yesu bere so; ɔkae sɛ “na ɛyɛ animguase paa sɛ obi bɛfa saa kwan no so awu. Wɔammu no sɛ mogya dansefo wu a nidi wom ɔkwan biara so.” Witherington toaa so sɛ: “Ná saa bere no sofo gye di sɛ ɔkwan a obi fa so wu paa na ɛma yehu ne suban. Saa adwene no nti, na wobu Yesu sɛ kohwini ne ɔmammɔfo a asotwe a ɛfata no ara ne nea wɔde ma nkoa a wɔatew atua no.” Sɛ yehu sɛnea na wobu owu a ɛte saa no a, yebetumi aka sɛ ɛnyɛ ade a tete Kristofo no bɛbɔ wɔn tirim aka Yesu wu ne ne wusɔre no ho asɛm saa.