ASETENAM NSƐM
Ahia Me Nanso Meyɛ Ɔdefo Onyankopɔn Mu
Baabi a ɛnnɛ yɛfrɛ hɔ Moldova no, n’atifi fam na kurow ketewa Cotiujeni wɔ, na ɛhɔ na wɔwoo me December 1939 mu. Kuadwuma na wɔyɛ wɔ hɔ kɛse, na fie a na me nanabarima ne me papa te mu no, na wonsi nwiei. Me nanabarima ne me papa bɛyɛɛ Yehowa Adansefo ansa na wɔrewo me. Bere a me maame behui sɛ me nana no nim Bible mu sen kurom hɔ sɔfo no, ɔno nso bɛyɛɛ Ɔdansefo.
Bere a midii mfe abiɛsa no, me papa ne ne nua ne me nana nyinaa, wɔde wɔn koguu adwumayɛban mu; wɔn bɔne ne sɛ wɔaka sɛ wɔyɛ Kristofo nti wɔrenkɔ ɔko. Wɔn nyinaa wuwui ma ɛkaa me papa nko ara. Bere a Wiase Ko II no baa awiei no, me papa san baa fie afe 1947 mu; ɔbae no na n’akyi dompe ho aka. Ná onni ahoɔden, nanso ne gyidi de, na okura mu pintinn.
NSAKRAE AKƐSE BAA YƐN ASETENA MU
Bere a midii mfe akron no, wotwaa yɛn abusua ne Moldova Adansefo bebree asu kɔɔ Siberia. July 6, afe 1949 no, wɔsesaw yɛn guu nantwi kar mu kɔe. Yɛde nnafua 12 twaa kilomita bɛboro 6,400 ansa na yɛregyina wɔ Lebyazhe keteke gyinabea. Yekoduu hɔ no, na aban mpanyimfo a wɔwɔ hɔ no retwɛn yɛn. Ɛhɔ ara na wɔkyekyɛɛ yɛn mu akuw nketenkete de yɛn petee kurow no mu baabiara. Baabi a yenya tenae no, na ɛyɛ sukuu dan ketewa bi a sukuufo no nni hɔ. Ná yɛayɛ hagyaa, na na yɛn werɛ nso ahow. Ɔbaapanyin bi a na ɔka yɛn ho too dwom ne menem; ɛyɛ Adansefo no na wɔhyehyɛɛ saa dwom no wɔ Wiase Ko II no mu. Ankyɛ, yɛn nyinaa de anigye too dwom no bi. Dwom no mu nsɛm ni:
“Anuanom bebree na wotwaa wɔn asu kɔɔ akyirikyiri.
Wɔde wɔn kɔɔ atifi ne apuei.
Onyankopɔn adwuma a wɔyɛe nti, wɔde wɔn too amanehunu mu, na wogyinaa sɔhwɛ a ɛyɛ hu ano.”
Ɛyɛɛ kakra no, na yetumi nantew bɛyɛ kilomita 13 kohyiam sua Bible Kwasida biara. Anɔpahema na na yɛtaa kɔ, na yebesi kwan so no, na sukyerɛmma atɔ araa ma yɛnam mu a ɛdeda yɛn sisi. Sɛnea na awɔw wom no, frigye mu mpo ye. Ná baabi a yehyiam no sua, na na nnipa bɛyɛ 50 ne akyi tumi moa yɛn ho hyɛ dan ketewa bi a ennu sukuu dan mu. Nea na yɛyɛ de fi ase ne sɛ yɛto dwom biako anaa abien bi na yɛabɔ mpae, na afei yesusuw Bible mu nsɛmmisa bi ho. Yɛyɛ no bɛyɛ dɔnhwerew biako. Afei yɛto nnwom no bi ka ho, na yɛama kwan ama obiara a ɔwɔ Bible mu asɛmmisa bi no de ato gua. Ná eyi hyɛ yɛn gyidi den paa!
ƆHAW FOFORO A YƐFAA MU
Dzhankoy keteke gyinabea, bɛyɛ afe 1974 mu
Eduu afe 1960 no, na Adansefo a wotwaa wɔn asu no anya fahodi no bi aka ho. Ná ahia yɛn de, nso mitumi kɔɔ Moldova saa bere no, na ɛhɔ na mikohyiaa Nina a ɔno nso awofo ne ne nananom yɛ Adansefo. Ankyɛ na yɛwaree, na yɛsan kɔɔ Siberia, na ɛhɔ na yɛwoo yɛn babea Dina wɔ afe 1964 mu ne yɛn babarima Viktor wɔ afe 1966 mu. Mfe abien akyi no, yetu kɔɔ Ukraine kɔtenaa fie ketewa bi mu wɔ Dzhankoy, na efi hɔ rekɔ Yalta a ɛwɔ Crimea supɔw so no yɛ kilomita 160.
Ná Crimea hyɛ Soviet Union ase, enti ɛhɔ nso, na wɔabra Yehowa Adansefo. Nanso wɔamfa wɔn ani ansi yɛn so antaa yɛn denneennen. Eyi maa Adansefo no bi ahokeka fii ase kɔɔ fam. Wɔyɛɛ wɔn adwene sɛ wɔbrɛɛ dodo wɔ Siberia nti sɛ wɔanya ahotɔ kakra a, ɛnde wɔbɛyɛ adwuma apɛ honam fam nneɛma.
ANIKASƐM A ESISII
March 27, 1991 no, wɔmaa Yehowa Adansefo kwan sɛ afei de, yebetumi ayɛ yɛn adwuma no wɔ Soviet Union baabiara. Ɛhɔ ara na yɛyɛɛ nhyehyɛe sɛ yɛde nnanu bɛyɛ ɔmantam nhyiam wɔ mmeae nson a obiara benya bi akɔ wɔ ɔman no mu. Ná yɛbɛkɔ yɛn de wɔ Odessa, Ukraine, na na ebefi ase August 24. Aka bosome baako ama nhyiam no adu so no, mekɔɔ hɔ kɔboae ma yesiesiee staduom a yɛbɛyɛ nhyiam no wɔ hɔ no.
Ɛtɔ da bi a yetumi yɛ adwuma araa ma ade sa yɛn, na ɛba saa a, yɛdeda staduom hɔ nkongua no so. Wɔkyekyɛɛ Adansefo mmea no mu ma ebinom siesiee staduom no akyi. Nwura a yɛsesawee no, na ɛnyɛ nwura ketewa. Wɔn a na ɛhyɛ wɔn nsa sɛ wɔbɛhwehwɛ dabere ama nhyiamfo no kyin kurom hɔ nyinaa pɛɛ baabi maa ahɔho 15,000 a na wɔbɛba nhyiam no. Nanso, asɛm kɛse bi sii!
Wɔkyeree Mikhail Gorbachev a saa bere no na ɔyɛ USSR mampanyin no August 19 bere a na ɔregye n’ahome wɔ Yalta; baabi a wɔkyeree no no, na ɛbɛn yɛn kakra. Saa bere no, na aka nnanum ama yɛn nhyiam no aba so. Enti aban mpanyimfo ka kyerɛɛ yɛn sɛ wɔremma yɛnyɛ nhyiam no. Anuanom fii ase frɛfrɛɛ mpanyimfo a wɔhwɛ nhyiam no so bisaa wɔn sɛ, “Bɔs ne keteke a yɛatua ho ka dedaw no, yɛnyɛ no dɛn?” Bere a mpanyimfo no bɔɔ ho mpae no, wɔka kyerɛɛ anuanom sɛ, “Mo de, mommra!”
Ahoboa ne mpaebɔ no annyae. Anuanom a wɔhwɛ akwantufo so no kohyiaa nnipa a wofi Soviet Union mmeae pii bae no de wɔn kɔɔ wɔn asoɛe. Da biara, na Nhyiam Boayikuw no kohu kurom hɔ mpanyimfo hwɛ sɛ wɔbɛma wɔn kwan a, nanso wɔkɔhyɛ mu fi anɔpa kosi anwummere a, wɔnte asɛmpa biara.
YENYAA YƐN MPAEBƆ HO MMUAE
Yawda, August 22, aka nnanu ama nhyiam no adu so no, Nhyiam Boayikuw no tee asɛmpa. Afei de, kurom hɔ mpanyimfo no penee so sɛ yebetumi ayɛ nhyiam no! Yɛde anigye kɛse na ɛtoo dwom a edi kan no bɔɔ mpae fii dwumadi no ase. Yɛpɔn Memeneda anwummere no, na yɛmpɛ sɛ yɛkɔ fie; anuanom ne wɔn nnamfo a wohuu wɔn ho akyɛ bɔɔ nkɔmmɔ saa ara. Ná wɔn nyinaa yɛ Kristofo a wɔwɔ gyidi kɛse paa, enti sɔhwɛ a ɛyɛ den no nyinaa akyi no, wogyinaa pintinn.
Odessa nhyiam no, afe 1991 mu
Yɛyɛɛ saa nhyiam no, mfe 22 atwam, na yehu sɛ asafo no anya nkɔso paa. Yɛasisi Ahenni Asa wɔ Ukraine baabiara, na Ahenni adawurubɔfo 25,000 a na wɔwɔ hɔ afe 1991 no, seesei wɔadɔɔso paa; wɔboro 150,000!
MEDA SO YƐ ƆDEFO ONYANKOPƆN MU
Ofie a yɛn abusua no kɔtenaa mu wɔ Dzhankoy no, ɛhɔ ara na yɛda so te, na kurow no mu nnipa dodow bɛyɛ 40,000. Bere a yefi Siberia kɔɔ Dzhankoy afe 1968 no, mmusua kakraa bi na na wɔyɛ Adansefo wɔ hɔ, nanso seesei asafo asia na ɛwɔ hɔ.
M’abusua nso ayɛ kɛse. Yɛne yɛn mma, yɛn nenanom ne yɛn nanankansowanom na ɛresom Yehowa.
