Owu te sɛ nna, efisɛ obi wu a ɔrentumi nhu nea ɛrekɔ so, na ɔrentumi nyɛ hwee. Nanso Nkwamafo no betumi anyan no afi awufo mu asan aba nkwa mu bio. Onyankopɔn maa Yesu tumi ma ɔde nyanee awufo pii; Onyankopɔn yɛɛ saa de kyerɛe sɛ ampa obetumi anyan awufo.—Kenkan Ɔsɛnkafo 9:5; Yohane 11:11, 43, 44.

Onyankopɔn ahyɛ bɔ sɛ awufo a wɔn ho asɛm wɔ n’adwenem no, obenyan wɔn aba wiase foforo a trenee te mu no mu. Saa bere yi de, wɔretwɛn kosi sɛ Onyankopɔn benyan wɔn. Ade nyinaa so Tumfoɔ no ani gye ho paa sɛ ɔde ne tumi bɛyɛ adwuma asan de awufo aba nkwa mu bio.—Kenkan Hiob 14:14, 15.

Awufo a Onyankopɔn benyan wɔn no, obiara hu obi a onim no a, obehu no; obiara behu ne nnamfo ne n’abusuafo. Ɛwom, sɛ obi wu a, ne honam porɔw, nanso Onyankopɔn betumi anyan onii no ama no nipadua foforo.—Kenkan 1 Korintofo 15:35, 38.

Nnipa kakraa bi na wobenyan wɔn ama wɔakɔtena soro. (Adiyisɛm 20:6) Awufo a wobenyan wɔn no, emu pii bɛtena asase so paradise. Wɔbɛma wɔn afi ɔbra ase bio, na wobenya anidaso sɛ wɔbɛtena ase daa.—Kenkan Dwom 37:29; Asomafo Nnwuma 24:15.