Onipa biara pɛ sɛ ɔne afoforo tena asomdwoe mu, ɔdi nokware, na ɔyi ne yam boa afoforo. Ɛnde, dɛn nti na awudisɛm, nsisi ne atirimɔdensɛm abu so saa? Nsɛm a ani yɛ nyan sisi daa. Adɛn, obi na ɔrepiapia nkurɔfo ma wɔreyɛ nneɛma bɔne saa anaa?—Kenkan 1 Yohane 5:19.

Onyankopɔn de bɔne bɔɔ nnipa anaa? Dabi, Yehowa Nyankopɔn bɔɔ nnipa wɔ ne suban so, enti na wɔbɛtumi asuasua Onyankopɔn dɔ no. (Genesis 1:27; Hiob 34:10) Nanso Onyankopɔn dii yɛn ni, na ɔmaa yɛn hokwan sɛ yɛmpaw nea yɛpɛ. Bere a yɛn awofo a wɔdi kan no de hokwan a wɔwɔ no yɛɛ bɔne no, wɔansuasua Onyankopɔn enti wɔbɛyɛɛ abɔnefo. Wɔde bɔne no woo yɛn, ɛno nti na yɛyɛ bɔne.—Kenkan Deuteronomium 32:4, 5.

Onyankopɔn pɛ sɛ yɛko tia bɔne. (Mmebusɛm 27:11) Enti ɔkyerɛ yɛn sɛnea yɛbɛtwe yɛn ho afiri bɔne ho, ne nea yɛyɛ a yɛbɛnya anigye ankasa. Nanso seesei deɛ, yɛrentumi nsuasua Onyankopɔn dɔ no pɛpɛɛpɛ.—Kenkan Dwom 32:8.

Ɛwom sɛ ɛnnɛ bɔne abu so deɛ, nanso nea enti a Onyankopɔn ama ho kwan bere tiaa bi mu ne sɛ, ɔpɛ sɛ obiara hu awerɛhosɛm a bɔne akɔfa aba no. (2 Petro 3:7-9) Ɛrenkyɛ koraa nnipa a wɔwɔ anigye a wɔtie Onyankopɔn asɛm nko ara na wɔbɛhyɛ asase so mã.—Kenkan Dwom 37:9-11.