Ua oti ïa te tamaˈi, hoˈi mai nei te hau i te peho o Ela. I te hoê avatea, ua hautiuti mǎrû noa te mataˈi i te mau fare ie o te aua faehau, ua faatupu te arii Saula i te hoê putuputuraa e te tahi o to ˈna mau taata. Tei ǒ nei atoa ta ˈna tamaiti matahiapo o Ionatana, e te faatia ra te hoê tiai mamoe apî i to ˈna aamu. Teie taurearea o Davida ïa, e taata itoito rahi o ˈna. Ua faaroo maite Saula i te mau parau atoa a Davida. Eaha râ te huru o Ionatana? Ua upootia hoi o ˈna e rave rahi tamaˈi i te roaraa o to ˈna taviniraa ia Iehova i roto i te nuu. I teie râ mahana, e ere na ˈna teie upootiaraa na teie râ taurearea. Ua haapohe Davida ia Golia te hoê taata rahi! Ua pohehae anei Ionatana no Davida?

 E maere paha outou i te huru o Ionatana. Te taio ra tatou: “I te otiraa ta Davida aparauraa ia Saula, here atura Ionatana ia Davida mai ia ˈna iho, e ati maite aˈera Ionatana raua Davida ei hoa piri.” Ua horoa Ionatana na Davida i ta ˈna haana tamaˈi, oia atoa i ta ˈna fana ei ô na Davida. E taata teˈa aravihi hoi o Ionatana. Hau atu â, ua faaau Ionatana e Davida i te hoê faufaa, oia hoi ua fafau raua e turu te tahi i te tahi.—Samuela 1, 18:1-5.

 Mai te reira ïa te haamataraa te hoê auhoaraa piri roa ta te Bibilia i faataa. Mea faufaa te auhoaraa no te feia faaroo. Mai te peu, e maiti tatou i te hoê hoa paari o te turu ia tatou, te hoê hoa taiva ore, e nehenehe te reira e haapuai i to tatou faaroo i te taime a fifi ai tatou. (Maseli 27:17) No reira, e haapii mai tatou no nia i te auhoaraa o Ionatana.

 Mea nafea to raua auhoaraa i te tupu-oioi-raa? Tei roto te pahonoraa i te niu o to raua auhoaraa. E titauhia ia hiˈo i te aamu o Ionatana o tei faaruru i te mau tupuraa fifi mau. I te roaraa o te mau matahiti, ua taui to ˈna papa te arii o Saula, ua haere o ˈna i te inoraa. Ei taata haehaa e ei taata faaroo, ua riro Saula ei taata teoteo e ei arii faaroo ore.—Samuela 1, 15:17-19, 26.

 I te iteraa e ua taui Saula i to ˈna huru, ua haamauiui te reira ia Ionatana mea piri hoi o ˈna i to ˈna papa. (Samuela 1, 20:2) Ua uiui paha Ionatana, e fifihia anei te nunaa o Iehova no te huru o Saula? E faaatea ê anei te faaroo ore o te arii i te nunaa a ere atu ai ratou i te farii maitai a Iehova? Eita e ore, i tera taime mea fifi roa no Ionatana, teie taata faaroo.

 E tauturu te iteraa i te aamu o Ionatana ia tatou ia taa no te aha oia i faafatata ˈtu ia Davida. Ua ite Ionatana, e taata faaroo rahi o Davida. A haamanaˈo, taa ê atu i te mau faehau a Saula, aita roa ˈtu Davida i riaria ia Golia, te hoê taata rarahi. Ua taa ia ˈna ma te haere i te iˈoa o Iehova e puai aˈe o ˈna ia Golia e ta ˈna mauhaa tamaˈi.—Samuela 1, 17:45-47.

 I te mau matahiti i mairi, mai tera atoa te huru feruriraa o Ionatana. Ua papu ia ˈna, e nehenehe e piti taata, o o ˈna e ta ˈna tavini amo mauhaa, e aro e e haapau i te hoê nuu faehau. No te aha? Ua parau Ionatana: ‘Aita e mea e nehenehe e haafifi ia Iehova.’ (Samuela 1, 14:6) No reira, mea rahi te mau tuatiraa e itehia i rotopu ia Ionatana raua Davida: e faaroo puai e e here hohonu to raua ia Iehova. Tera ïa te niu o te auhoaraa i rotopu i na piti taata. Oia atoa e tamaiti huiarii puai o Ionatana e e fatata 50 matahiti to ˈna, area o Davida e tiai mamoe haehaa o ˈna e aita i naeahia ˈtura 20 matahiti, e ere râ tera taa-ê-raa i te mea faufaa. a

 Mea papu, ua riro teie faaauraa ei parururaa no to raua auhoaraa. E nafea ïa? Ua ite Davida, eaha ta Iehova i opua no ˈna: E riro o ˈna ei arii no Iseraela! Ua huna anei Davida i te reira ia Ionatana? Aita! E maitai mai te hoê auhoaraa maoti te hoê aparauraa aita e parau huna e e haavare. E nafea te iteraa e riro Davida ei arii e haamauiui ai ia Ionatana? Ua tiaturi anei Ionatana e riro oia ei arii i te hoê mahana e e faaafaro i te mau hape a to ˈna papa? Aita roa ˈtu te Bibilia e parau ra e te faaruru ra Ionatana i teie mau manaˈo tano ore no nia i to ˈna tupuraa. Te faahiti-noa-hia ra i to Ionatana taiva ore e to ˈna faaroo. Ua ite o ˈna e te ohipa ra te varua moˈa i nia ia Davida. (Samuela 1, 16:1, 11-13) Ua tapea ïa Ionatana i ta ˈna i fafau e ua tamau o ˈna i te hiˈo ia Davida eiaha mai te hoê enemi, mai te hoê râ hoa. Ua hinaaro Ionatana e ite eaha ta Iehova e rave.

 Ua riro teie auhoaraa ei haamaitairaa rahi. Eaha ta tatou e nehenehe e haapii mai no nia i te faaroo o Ionatana? Ei tavini a te Atua, e titauhia ia hiˈo i te faufaaraa o te auhoaraa. Eita e titauhia ia faahoa i te feia hoê â matahiti aore ra tupuraa e o tatou, tera râ e maitai mai tatou mai te peu e faaroo mau to ratou. Ua haapuai e ua faaitoito Ionatana e Davida te tahi i te tahi e rave rahi taime. E titauhia ia turu raua te tahi i te tahi, no te mea e faaruru to raua auhoaraa e rave rahi tamataraa.

 I te omuaraa, ua au roa Saula ia Davida e ua vaiiho na Davida e faatere i ta ˈna nuu. Tau taime i muri iho, ua faatupu Saula i te huru ino mau, te pohehae, aita râ Ionatana i na reira. Mea rahi te mau tamaˈi ta Davida i upootia i nia i te mau enemi o Iseraela te mau Philiseti. Ua fanaˈo ïa Davida i te arueraa e te hanahana. Ua himene atoa te tahi mau vahine Iseraela: “Ua tausani ta Saula i tairi, e ua ahuru tausani ta Davida.” Aita Saula i au i tera himene. “Mai taua mahana ra, hiˈo ino noa ˈtura Saula ia Davida.” (Samuela 1, 18:7, 9) Ua riaria Saula ia tamata Davida i te haru i ta ˈna faatereraa. Mea maamaa roa ra te reira. Ua ite Davida e na ˈna e faatere i muri iho ia Saula, aita râ o ˈna i tamata i te mono i te arii maitihia e Iehova.

 Ua opua Saula i te haapohe ia Davida ma te tuu ia ˈna i roto i te tamaˈi, aita râ i manuïa. Ua tamau Davida i te upootia e rave rahi tamaˈi e ua faatura noa te taata ia ˈna. I muri iho, ua tamata Saula i te amui i to ˈna utuafare, ta ˈna mau tavini e ta ˈna tamaiti matahiapo no te haapohe ia Davida. A feruri na i te huru o Ionatana a ite ai oia i te haerea a to ˈna papa. (Samuela 1, 18:25-30; 19:1) E tamaiti taiva ore o Ionatana, tera râ e hoa taiva ore atoa o ˈna. I teie nei, te haafifi ra to ˈna taiva ore i to ˈna papa e ia Davida ia ˈna. O vai te upootia mai?

 Parau atura Ionatana: “Eiaha te arii e hamani ino i ta ˈna tavini ia Davida, aita hoi oia i hamani ino ia oe e ua faufaahia oe i te mau mea ta ˈna i rave no oe. Ua faaruru oia i te pohe no te taparahi ia Golia te Philiseti, e ua horoa Iehova i te upootiaraa rahi no Iseraela taatoa. Ite aˈera oe i te reira e oaoa roa ihora oe. Eaha ïa oe e hamani ino ai i te hoê taata hara ore? Aita e tumu e haapohe ai oe ia Davida.” Mea varavara roa to Saula faarooraa ia Ionatana, e ua horeo atoa o ˈna eiaha e haafifi ia Davida. Tera râ, aita roa ˈtu Saula i tapea i ta ˈna i parau. I muri iho, i to Davida manuïa-noa-raa, ua rahi roa ˈtu â te riri o Saula i nia ia ˈna, e ua taora o ˈna i ta ˈna omore i nia ia ˈna! (Samuela 1, 19:4-6, 9, 10) Tera râ ua ape Davida e ua horo ê oia.

 Ua faaruru aˈena anei outou i tera huru tupuraa? E mauiui mau te reira. I roto i tera mau tupuraa, te parau ra vetahi mea titauhia ia tuu na mua roa te utuafare. Tera râ, e ere tera te manaˈo o Ionatana. E nafea o ˈna e nehenehe ai e turu i to ˈna papa a ite ai i te taiva ore o Davida i to ˈna auraroraa ia Iehova? No reira, ua vaiiho Ionatana i to ˈna taiva ore ia aratai ia ˈna. Tera ïa te tumu i paturu ai oia ia Davida. Noa ˈtu ua tuu na mua roa Ionatana i to ˈna taiva ore i te Atua, ua faaite atoa oia i to ˈna taiva ore i to ˈna papa ma te aˈo ia ˈna ma te haavare ore i te parau ia ˈna i ta ˈna e hinaaro. E faufaahia tatou tataitahi, ia pee tatou i te taiva ore o Ionatana.

 Ua tamata faahou Ionatana, ia hau faahou Saula e Davida aita râ i manuïa. Ua haere mai Davida ia Ionatana no te faaite te mǎtaˈu ra o ˈna no to ˈna ora. “Ua fatata roa te pohe ia ˈu nei!” tera ïa ta ˈna i parau i to ˈna hoa. Ua farii ïa Ionatana i te tamata i te huru aau o to ˈna papa e i te faaite ia Davida mai te peu ua ineine Saula e faahau e o ˈna. Ua titauhia ia Davida ia tapuni, e e faaite Ionatana eaha te rave ma te faaohipa i ta ˈna fana e teˈa ei tapao. Hoê noa mea ta Ionatana i ani ia Davida: “Eiaha roa e faaere i to ˈu utuafare i to here taiva ore, ia haamou atoa Iehova i to oe mau enemi atoa i nia i te fenua.” Ua farii Davida i te haapao noa i te utuafare o Ionatana.—Samuel 1, 20:3, 13-27.

 Ua tamata Ionatana i te paraparau no nia ia Davida ia Saula, ua rahi râ te riri o te arii! Ua pii o ˈna ia Ionatana e “tamaiti a te hoê vahine orure hau” e ua parau oia, to ˈna taiva ore ia Davida mea haama roa no te utuafare. Ua tamata ïa oia i te faataui ia Ionatana: “A ora noa ˈi te tamaiti a Iese i nia i te fenua, e ore oe e to oe mana arii e mau papu.” Aita râ Ionatana i tâuˈa, ua taparu noa i to ˈna papa: “Eaha hoi oia e haapohehia ˈi? Eaha ta ˈna i rave?” Rahi roa ˈtu ïa to Saula riri! Noa ˈtu to ˈna matahiti rahi, e aito puai noa o Saula. Ua taora o ˈna i ta ˈna omore i nia i ta ˈna tamaiti! Noa ˈtu mea aravihi o ˈna aita râ i tano. Ma te haama taatoa, ua haere Ionatana ma te riri.—Samuela 1, 20:24-34.

 I te mahana i muri iho, ua haere Ionatana i te vahi i tapuni ai o Davida. Ua teˈa ˈtura o ˈna mai ta ˈna i parau ma te faaite ia Davida e te hinaaro mau â Saula e haapohe ia ˈna. I muri iho, ua tono Ionatana i ta ˈna tavini no te hoˈi i te oire. O raua anaˈe ïa tei faaea mai, e taime no raua no te paraparau. Ua taˈi raua, e i te taime a vaiiho ai Ionatana i to ˈna hoa, i reira to Davida haamataraa e ora mai te hoê taata horo ê.—Samuela 1, 20:35-42.

 Noa ˈtu teie mau tupuraa, ua faaite Ionatana e taata taiva ore iho â o ˈna. Aita o ˈna i haapao noa ia ˈna iho. O Satani, te enemi o te mau tavini taiva ore, eita e ore ua hinaaro paha oia e ite ia Ionatana e pee i te taahiraa a to ˈna papa ma te imi na mua roa te puai e te hanahana. A haamanaˈo râ, mea au roa na Satani ia faaaraara i te hinaaro miimii o te taata. Ua manuïa oia i nia ia Adamu raua Eva, to tatou metua matamua. (Genese 3:1-6) Tera râ, aita oia i manuïa i nia ia Ionatana. Ua riri roa Satani! E patoi anei tatou i tera huru tamataraa? Te ora nei tatou i te hoê tau, te rahi noa ˈtura te taata miimii. (Timoteo 2, 3:1-5) Eaha ta tatou e haapii mai no nia i te miimii ore o Ionatana e to ˈna taiva ore?

 I muri aˈe, ua vaiiho Saula i to ˈna riri ia Davida ia aratai i to ˈna mau manaˈo e huru aau. Aita ta Ionatana e ravea, a hiˈo ai i to ˈna papa e ohipa ra ma te maamaa ma te haaputu i ta ˈna nuu ia ati aˈe te fenua no te imi i te haapohe i te hoê taata hapa ore. (Samuela 1, 24:1, 2, 12-15; 26:20) Ua apiti anei Ionatana i te reira? Aita te Bibilia e faaite ra, e ua haere Ionatana na muri i tera mau taata. Te haapapu ra te taiva ore o Ionatana no Iehova, no Davida e ta ˈna i horeo, aita iho â te reira i tupu.

 Aita to ˈna mau manaˈo no nia i to ˈna hoa i taui noa ˈˈe. I muri aˈe, ua farerei o ˈna ia Davida. Tei Horesa o ˈna, oia hoi o “Vahi ururaau” te auraa. E vahi ano o Horesa, e fenua mouˈa i te pae apatoa hitia o te râ no Heberona. No te aha ua haere Ionatana e hiˈo i teie taata horo ê? Te parau mai ra te Bibilia, no to ˈna hinaaro e tauturu ia Davida “ia faarahi i to ˈna tiaturi ia Iehova.” (Samuela 1, 23:16) Mea nafea Ionatana i te na reiraraa?

 Ua parau Ionatana i to ˈna hoa: “Eiaha e mǎtaˈu.” Ua haapapu atoa o ˈna: “Eita . . . to ˈu metua tane o Saula e ite ia oe.” Ua niuhia teie haapapuraa i nia i te aha? I nia ïa i to ˈna faaroo hohonu ia Iehova, e e tupu iho â ta Iehova i fafau. Ua parau atoa oia: “E riro oe ei arii no Iseraela.” Tera ïa ta te peropheta Samuela i parau i te mau matahiti i mairi, e i teie nei te haamanaˈo ra Ionatana ia Davida e e tupu iho â ta Iehova mau parau. E mea nafea Ionatana i te hiˈoraa i to ˈna a muri aˈe? “Ei raro iti aˈe au ia oe.” E taata haehaa mau â o ˈna! Ua ineine oia i te tavini i raro aˈe i teie taata e 30 matahiti iti aˈe ia ˈna no te turu ia ˈna! Ua parau Ionatana: “Ua ite maitai atoa to ˈu metua tane i te reira.” (Samuela 1, 23:17, 18) I roto i to ˈna aau, ua ite Saula e e pau o ˈna ia aro o ˈna i teie taata ta Iehova i maiti no te riro ei arii i muri iho!

 I te mau matahiti i muri aˈe, ua haamanaˈo faahou Davida i tera farereiraa, tera te taime hopea i ite ai raua. I te mea peapea, aita roa ˈtu Ionatana i nehenehe e turu ia Davida.

 Ua haere Ionatana na muri i to ˈna papa no te aro i te mau Philiseti, te mau enemi o Iseraela. Ua nehenehe o ˈna e aro ma te manaˈo haava maitai, noa ˈtu te mau hape a to ˈna papa aita o ˈna i taiva ia Iehova. Ua aro o ˈna ma te itoito e te taiva ore mai ta ˈna i matau na. Tera râ mea ino roa te faahopearaa o te tamaˈi no Iseraela. No te ino o Saula ua faaohipa o ˈna i te peu tahutahu, e hara rahi teie i roto i te Ture a te Atua, aita ïa Iehova i haamaitai faahou ia Saula. E toru o te mau tamaiti a Saula, oia atoa o Ionatana tei haapohe-atoa-hia i roto i te tamaˈi. Ua pepe roa Saula e ua haapohe o ˈna ia ˈna iho.—Samuela 1, 28:6-14; 31:2-6.

 Ua oto rahi Davida e ua taˈi atoa o ˈna no Saula, tei haafifi rahi ia ˈna! Ua papai ïa Davida i te hoê himene oto na Saula e Ionatana. Peneiaˈe te mau parau putapû mau ta Davida i faahiti, no nia ïa i ta ˈna taata haapii e hoa atoa: “Te oto nei au ia oe, to ˈu taeae e Ionatana, e here rahi to ˈu ia oe. Ua hau aˈe to oe here i te here o te mau vahine.”—Samuela 2, 1:26.

 Aita Davida i haamoˈe i ta ˈna i fafau ia Ionatana. I te mau matahiti i muri aˈe, ua imi o ˈna e ua haapao o ˈna i te tamaiti a Ionatana, o Mephiboseta. (Samuela 2, 9:1-13) Mea papu, mea rahi ta Davida i haapii no nia i te taiva ore o Ionatana, to ˈna faatura e to ˈna hinaaro e vai taiva ore ei hoa noa ˈtu te mau haafifiraa. E huti anei tatou i te tahi mau haapiiraa? E imi anei tatou i te mau hoa mai ia Ionatana? E faaite anei tatou e hoa mau â tatou? Mai te peu e tauturu tatou i to tatou mau hoa ia patu e ia haapuai i to ratou faaroo ia Iehova, ia tuu na mua roa i to tatou taiva ore ia Iehova e ia faaite i to tatou taiva ore i te imiraa i to tatou iho hinaaro, e riro ïa tatou e hoa maitai mai ia Ionatana. E e pee tatou i to ˈna faaroo.