“Parau atura Iesu: ‘O vau te eˈa e te parau mau e te ora. Aita roa e taata e tae i te Metua ra, na roto noa râ ia ˈu.’”—Ioane 14:6, Huriraa o te ao apî.

 “Ua parau atura Iesu ia ˈna, O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu.”—Ioane 14:6, Te Bibilia Moˈa ra.

 Ia hinaaro te hoê taata e haamori i te Metua, oia hoi te Atua ra o Iehova, a e mea tia ia ˈna ia farii i te tiaraa faufaa roa o Iesu.

 “O vau te eˈa.” Ua faaite Iesu i “te eˈa” no te faafatata ˈtu i te Atua mai ta ˈna e hinaaro ra. Ei hiˈoraa, a pure ai i te Atua, e mea tia ia faatae atu i te reira na roto i te iˈoa o Iesu. (Ioane 16:23, 24) Maoti te pohe o Iesu, e nehenehe te taata e faahau atu i te Atua aore ra e fanaˈo faahou i to ˈna farii maitai. (Roma 5:8-11) Ua horoa atoa Iesu i te hiˈoraa maitai. Mea faufaa ia pee atu i to ˈna hiˈoraa no te faaoaoa i te Atua.—Ioane 13:15.

 “O vau . . . te parau mau.” Ua faaite noa Iesu i te parau mau no ǒ mai i te Atua e ua ora o ˈna ia au i te reira. (Petero 1, 2:22) A faaroo ai ia ˈna, e nehenehe te hoê taata e haapii mai i te parau mau no nia i te Atua. (Ioane 8:31, 32) O Iesu atoa “te parau mau” no te mea ua faatupu o ˈna i te mau parau tohu Bibilia. A na reira ˈi, ua faariro o ˈna i te mau parau fafau a te Atua ei mea mau.—Ioane 1:17; Korinetia 2, 1:19, 20; Kolosa 2:16, 17.

 “O vau . . . te ora.” Ua horoa Iesu i to ˈna ora. E nehenehe ïa te feia e faatupu ra i te faaroo ia ˈna e fanaˈo i te ora mure ore. (Ioane 3:16, 36) O ˈna atoa “te ora” no te feia tei pohe no te mea e faatia o ˈna ia ratou mai te pohe mai.—Ioane 5:28, 29; 11:25.

 “Aita roa e taata e tae i te Metua ra, na roto noa râ ia ˈu.” No te fanaˈo i te hoê auhoaraa piri e te Atua, e mea tia ia tatou ia farii i te tiaraa faufaa roa o Iesu. E na reira tatou ma te pure i te Atua na roto i te iˈoa o Iesu, a faaite atu ai e te farii ra tatou i te tiaraa mana o Iesu Mesia. (Ioane 15:16) Ua taa atoa ia tatou e e noaa mai te faaoraraa na roto noa ia Iesu.—Ohipa 4:12; Philipi 2:8-11.

 Te faaite ra te Ioane pene 13 tae atu i te 17 i te aˈoraa ta Iesu i horoa i ta ˈna nau 11 aposetolo taiva ore i te po hou to ˈna pohe. I roto i te pene 14, ua faaitoito Iesu i ta ˈna mau pǐpǐ ia faaite i te faaroo ia ˈna e i to ˈna Metua, oia atoa ia here e ia auraro ia raua. (Ioane 14:1, 12, 15-17, 21, 23, 24) Ua faaite o ˈna i te auhoaraa piri i vai na e e vai noa â i rotopu ia ˈna e to ˈna Metua. (Ioane 14:10, 20, 28, 31) Noa ˈtu fatata o ˈna i te hoˈi i te raˈi, ua haapapu Iesu i ta ˈna mau pǐpǐ e aita o ˈna e faarue ia ratou. (Ioane 14:18) Ua fafau atoa o ˈna i te horoa ˈtu i “te tauturu,” oia hoi “te varua moˈa ta te Metua e tono atu ma to [Iesu] iˈoa.” (Ioane 14:25-27) A na reira ˈi, ua faaineine Iesu i ta ˈna mau pǐpǐ i te mau fifi ta ratou e faaruru atu.