TE AURAA O TEIE MAU IRAVA

Mataio 6:33: “E mata na . . . i te imi i te basileia o te Atua”

FAAROO NA ROTO TE REO

“No reira, a tamau i te imi na mua i te Faatereraa arii a te Atua e ta ˈna parau-tia, e e horoahia mai teie mau mea atoa na outou.”—Mataio 6:33, Huriraa o te ao apî.

“E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.”—Mataio 6:33, Te Bibilia Moˈa ra.

Auraa o te Mataio 6:33

Te Basileia aore ra te Faatereraa arii a te Atua, o te hoê ïa faatereraa i te raˈi o te faatupu i te hinaaro o te Atua i nia i te fenua nei. (Mataio 6:9, 10) Te hoê taata o te imi na mua i te Faatereraa arii a te Atua, e faariro oia i te reira ei mea faufaa roa ˈˈe i roto i to ˈna oraraa. a Eita teie taata e hinaaro noa e haapii no nia i teie Faatereraa arii, e faaite atoa râ oia i te mau maitai ta tera Faatereraa arii e faatupu. (Mataio 24:14) E pure atoa teie taata ia tae mai te Faatereraa arii a te Atua.—Luka 11:2.

Ta te Atua parau-tia, e ô mai te parau o te mea maitai e te mea ino i te aro o te Atua. (Salamo 119:172) Te hoê taata o te imi i te parau-tia a te Atua, e haapao o ˈna i te mau ture e faaueraa tia a te Atua i roto i to ˈna oraraa o te hopoi mai hoi i te maitai!—Isaia 48:17.

Na roto i te mau parau “e horoahia mai teie mau mea atoa na outou,” te fafau ra te Atua i te aupuru i te feia o te haafaufaa na mua i ta ˈna Faatereraa arii e ta ˈna mau titauraa i roto i to ratou oraraa.—Mataio 6:31, 32.

Irava tapiri o te Mataio 6:33

Ua faahiti Iesu i teie mau parau i roto i ta ˈna Aˈoraa tei papaihia i roto i te Mataio pene 5-7. Eita e ore, e rave rahi taata veve i rotopu i te feia e faaroo ra ia ˈna. Ua manaˈo paha ratou mea faufaa aˈe ia imi i te mau mea atoa o te oraraa i te imi i te Faatereraa arii a te Atua. Ua faaitoito râ Iesu ia ratou ia hiˈopoa mea nafea te Atua ia haapao i te mau tiare e te mau animara. Te fafau ra ïa te Atua i te aupuru atoa i te feia o te imi na mua i ta ˈna Faatereraa arii.—Mataio 6:25-30.

Manaˈo hape no nia i te Mataio 6:33

Manaˈo hape: E taoˈahia te taata e imi i te Basileia, aore ra te Faatereraa arii, a te Atua.

Tupuraa mau: Ua parau Iesu e fanaˈo te feia e imi na mua i te Faatereraa arii a te Atua i te mau mea hinaaro-mau-hia mai te maa e te ahu. (Mataio 6:25, 31, 32) Aita râ Iesu i fafau e taoˈahia tatou e e ere atoa hoi te reira i te haapapuraa te haamaitai ra te Atua ia tatou. Ua faaara Iesu eiaha e haapue i te taoˈa i nia i te fenua, e nehenehe hoi te reira e haafifi ia tatou ia imi na mua i te Faatereraa arii. (Mataio 6:19, 20, 24) Ua rohi tamau te aposetolo Paulo no te Faatereraa arii a te Atua, ua ere râ oia i te tahi taime i te mau mea hinaarohia no te oraraa. Mai ia Iesu, ua faaara oia no nia i te fifi ia titau i te taoˈa rahi.—Philipi 4:11, 12; Timoteo 1, 6:6-10.

Manaˈo hape: Eita e titauhia i te tavini o te Atua ia rave i te ohipa.

Tupuraa mau: Te parau ra te Bibilia e titauhia i te mau tavini o te Atua ia rave i te ohipa no te faatamaa ia ratou iho e no te aupuru i to ratou utuafare. (Tesalonia 1, 4:11, 12; Tesalonia 2, 3:10; Timoteo 1, 5:8) Aita Iesu i parau i ta ˈna mau pǐpǐ ia imi i te Faatereraa arii anaˈe, ia imi na mua râ i te reira.

Te feia o te imi na mua i te Faatereraa arii a te Atua e o te rave i te ohipa no te faatamaa ia ratou, e nehenehe ratou e tiaturi e horoa mai iho â te Atua i te mau mea hinaarohia no te oraraa.—Timoteo 1, 6:17-19.

a Na roto i te reo Heleni, te faaite ra te mau parau “tamau i te imi” i te hoê ohipa e titauhia ia tamau i te rave. E nehenehe atoa e hurihia “eiaha e faaea i te imi.” E titauhia ïa ia riro te Faatereraa arii a te Atua ei mea faufaa roa, eiaha râ no te hoê taime poto noa.