“No reira, a faahaehaa ia outou iho i raro aˈe i te rima puai o te Atua, ia faateitei oia ia outou i te taime tano, a huri ai i to outou mau ahoaho atoa i nia ia ˈna, no te mea te haapeapea mai ra oia no outou.”—Petero 1, 5:6, 7, Huriraa o te ao apî.

 “E tena na, e faahaehaa ia outou iho i raro aˈe i te rima mana o te Atua, ia faateitei oia ia outou i te tau mau ra. E huri i to outou ahoaho atoa i nia ia ˈna; oia hoi te tiai mai ia outou.”—Petero 1, 5:6, 7, Te Bibilia Moˈa ra.

 Ma teie mau parau, te haapapu ra te aposetolo Petero i te mau Kerisetiano e e nehenehe ta ratou e faaite i to ratou mau fifi e haapeapearaa i te Atua na roto i te pure. Te haafaufaa ra te Atua i te feia haehaa e e haamaitai rahi o ˈna ia ratou.

 “A faahaehaa ia outou iho i raro aˈe i te rima puai o te Atua.” I roto i te Bibilia, e pinepine te rima o te Atua i te faahohoˈa i to ˈna puai no te faaora e no te paruru. (Exodo 3:19; Deuteronomi 26:8; Ezera 8:22) E faahaehaa te mau Kerisetiano ia ratou iho i raro aˈe i te rima o te Atua ma te turui i nia ia ˈna eiaha râ ma te tiaturi i to ratou iho puai no te haapauma i te mau fifi. (Maseli 3:5, 6; Philipi 4:13). Ua papu ia ratou e e puai to te Atua no te tauturu ia ratou i te taime tano.—Isaia 41:10.

 “Ia faateitei oia ia outou i te taime tano.” Ia papu i te feia o te faaoromai tamau nei i te mau fifi e e faateitei, aore ra e haamaitai, te Atua ia ratou. Eita te Atua e vaiiho i ta ˈna mau tavini ia tamatahia e a muri noa ˈtu aore ra hau aˈe i ta ratou e nehenehe e faaruru. (Korinetia 1, 10:13) Ia tamau râ ratou i te rave i te mea maitai, e haamaitai iho â te Atua ia ratou “i te taime tano.”—Galatia 6:9.

 “A huri ai i to outou mau ahoaho atoa i nia ia ˈna, no te mea te haapeapea mai ra oia no outou.” E nehenehe te mau Kerisetiano e huri, aore ra e taora, i to ratou mau haapeapearaa atoa i nia i te Atua ma te pure ia ˈna ma te haehaa. Ia au i te hoê buka, te auraa o te taˈo “huri,” o te taoraraa ïa i te tahi mea i te atea. Na tatou iho e rave i teie faaotiraa. Ia taora te hoê Kerisetiano i ta ˈna mau haapeapearaa atoa i te Atua ra, e iti mai ïa to ˈna hepohepo, a fanaˈo atu ai i ta te Bibilia e parau ra “te hau o te Atua.” (Philipi 4:6, 7) Ua papu i tera taata e te hinaaro ra te Atua e tauturu ia ˈna, no te mea ua ite o ˈna e te haapeapea ra te Atua ia ˈna e e faaohipa o ˈna i to ˈna puai mana hope no te tauturu atu.—Salamo 37:5; 55:22.

 O te pene 5, te pene hopea o te rata matamua a te aposetolo Petero i te mau Kerisetiano. (Petero 1, 1:1) Mai i teie mahana, i faaruru na te mau pǐpǐ a te Mesia i tera tau ra i te mau fifi e rave rau tei tamata i to ratou faaroo e tei haapeapea ia ratou. (Petero 1, 1:6, 7) No reira Petero i papai ai i te hoê rata mahanahana mau e te faaitoito i te area matahiti 62-64.—Petero 1, 5:12.

 Te faaoti ra Petero i ta ˈna rata e te manaˈo faaitoito mau no te feia o te faaruru ra i te fifi no to ratou faaroo. Ia vai haehaa ratou, ma te turui i nia i te Atua, e nehenehe ratou e tiaturi e e tauturu te Atua ia ratou ia mau papu. (Petero 1, 5:5-10) E nehenehe atoa te mau parau a Petero e faaitoito i te mau Kerisetiano o te hamani-ino-hia ra i teie mahana.

 A mataitai i teie video o te faataa poto noa i te buka Petero 1.