Aita te Bibilia e faaite ra eaha te mahana fanauraa o Iesu. Aita atoa e parau ra mea tia ia faatupu i to ˈna oroa mahana fanauraa. Te faahiti ra te buka Cyclopedia a McClintock e a Strong: “E ere te faatupuraa i te Noela i te hoê faaueraa a te Atua. E ere atoa no roto mai i te Faufaa Apî.”

 Ia au i te mau tuatapaparaa no nia i te oroa Noela aita te mau pǐpǐ a Iesu i faatupu i te reira, no roto mai râ teie oroa i te mau nunaa ěê. Te faaite ra te Bibilia aita te Atua e mauruuru ra ia haamori tatou ia ˈna ia au i to tatou iho hinaaro.—Exodo 32:5-7.

1.   Te faatupuraa i te oroa fanauraa o Iesu: “Aita te mau Kerisetiano matamua i faatupu i te oroa fanauraa [o Iesu] no te mea no ǒ mai teie peu i te mau nunaa ěê.”—The World Book Encyclopedia.

2.   Te 25 no Titema: Aita e haapapuraa e ua fanauhia Iesu i taua mahana ra. Ua maiti te mau tia faaroo i teie taio mahana no te faatano i nia i te mau oroa faatupuhia e te mau nunaa ěê i te tau toˈetoˈe.

3.   Te opereraa ô, tamaaraa, arearearaa: Ia au i te buka The Encyclopedia Americana: “No roto mai te mau peu arearearaa a te Noela i te hoê oroa Roma parauhia Saturnales faatupuhia i ropu i te avaˈe Titema. Ei hiˈoraa, e faatupuhia te mau tamaaraa rahi, te opereraa ô e te tutuiraa i te mau mori hinu.” Ia au i te buka Encyclopædia Britannica “ua faaea te taata i te rave i te mau ohipa atoa i taua area tau ra.”

4.   Te mau mori no te Noela: Ia au i te buka The Encyclopedia of Religion, i Europa ua faanehenehe te taata i to ratou fare i “te mau mori e te tahi atu mau mea” no te faahanahana i te mahana i te tau toˈetoˈe e no te faaatea ê i te mau varua iino.

5.   Te tumu raau faanehenehehia: Ia au i te buka Encyclopædia Britannica: “Noa ˈtu ua riro ratou ei Kerisetiano ua tamau noa to Europa i te haamori i te mau tumu raau.” Ei hiˈoraa, “i te tau Noela ua faanehenehehia te hoê tumu raau tei tuuhia i roto i te fare aore ra i te pae uputa.”