Te parau nei te Bibilia, teie te hinaaro a te Atua, “ia haapae [te mau taata] i te mau peu taotoraa tia ore.” (Tesalonia 1, 4:3) Mai tei faahitihia i roto i te Bibilia, teie te auraa o te parau “peu taotoraa tia ore”, o te faaturi, te mau peu mahu e te taotoraa e te taata aita râ raua e faaipoipohia.

•  No te aha mea faufaa no te Atua ia faaipoipo te hoê tane e te hoê vahine o te hinaaro e faaea te tahi i te tahi?

•  E nehenehe anei te hoê tane e faaea i te hoê vahine hou te faaipoiporaa no te tamata e e tano anei raua?

•  Nafea te mau hoa faaipoipo e haapuai ai i to raua mau taairaa i rotopu i te faaipoiporaa?

•   Na te Atua i haamau i te faaipoiporaa. Ua faatupu te Atua i te faaipoiporaa matamua. (Genese 2:22-24) Aita te Atua i opua ia faaea te hoê tane i te hoê vahine ma te ore e faaipoipo.

•   Te ite nei te Atua eaha te mea maitai no te taata. Ua haamau te Atua i te faaipoiporaa ma te opua e e faaipoipo te hoê tane e te hoê vahine no te oraraa taatoa. Maoti teie faanahoraa, e oaoa e e paruruhia te mau mero atoa o te utuafare. A tapao na i teie hiˈoraa, no te ite nafea ia tamaumau i te mau apaapa raau, e horoahia te mau aratairaa e e titauhia i te taata ia pee i te reira. Hoê â huru no te faaipoiporaa. E horoa te Atua i te mau aratairaa no te ite e nafea ia oaoa i roto i te utuafare. Ia pee te mau taata i te mau faaueraa a te Atua, e oaoa iho â ratou.—Isaia 48:17, 18.

•   Ia faaea te hoê tane i te hoê vahine ma te ore e faaipoipo, e nehenehe raua e faaruru i te mau faahopearaa rahi mai te hapûraa hinaaro-ore-hia, te mau maˈi purumu aore ra te mauiui i te pae o te huru aau. a

•   Ua horoa te Atua i te tane e te vahine te ravea no te fanau i te tamarii. Mea faufaa roa te ora no te Atua e e ô faahiahia mau te mau tamarii. Te hinaaro nei te Atua ia haafaufaa tatou i teie ô ma te fanau i te tamarii i roto noa i te faaipoiporaa.—Hebera 13:4.

 I roto i te tahi mau tupuraa, e faaea te tane e te vahine hou a faaipoipo ai no te tamata mea tano anei raua e a nehenehe atu ai e faataa ê i muri aˈe. E ere râ na teie “tau tamataraa” e tauturu nei i teie mau taata ia oaoa i roto i te faaipoiporaa. E oaoa te hoê tane e te hoê vahine ia puai to raua mau taairaa e ia tahoê raua no te haapauma i te mau fifi. b E haapuai te faaipoiporaa i te mau taairaa i rotopu i te hoê tane e te hoê vahine.—Mataio 19:6.

 E faaruru te mau hoa faaipoipo atoa i te mau fifi. Tera râ, ia oaoa te mau hoa faaipoipo, e titauhia ia raua ia pee i te mau faaueraa Bibilia. Teie te tahi mau hiˈoraa:

•   A imi i te maitai o to oe hoa faaipoipo hou a imi ai i to oe iho.—Korinetia 1, 7:3-5; Philipi 2:3, 4.

•   A faatupu i te here e te tura i rotopu ia orua.—Ephesia 5:25, 33.

•   A haapao maitai i ta oe mau parau.—Maseli 12:18.

•   A faaoromai e a faaore oioi i te hapa a to oe hoa faaipoipo.—Kolosa 3:13, 14.