Aita roa e taata i ite i te Atua. (Exodo 33:20; Ioane 1:18; Ioane 1, 4:12) Te parau ra te Bibilia “e Varua te Atua” tei ite-ore-hia e te taata.—Ioane 4:24; Timoteo 1, 1:17.

 E nehenehe te mau melahi e ite mata roa i te Atua no te mea e varua atoa ratou. (Mataio 18:10) Hau atu â, e nehenehe te tahi mau taata e ite mata i te Atua, no te mea ua pohe e ua faatiahia mai ratou ei tino varua no te ora i te raˈi.—Philipi 3:20, 21; Ioane 1, 3:2.

 Te faaohipa pinepine ra te Bibilia i te taˈo “ite” no te faataa e ua taa aore ra ua maramarama te taata i nia i te tahi mea. (Isaia 6:10; Ieremia 5:21; Ioane 9:39-41) No reira, e nehenehe te taata e ite i te Atua na roto “i te mata o [to ˈna] aau” ma te faatupu i te faaroo i te Atua e ma te haapii o vai o ˈna e to ˈna mau huru maitatai. (Ephesia 1:18) Te faataa ra te Bibilia eaha te tia ia rave no te faatupu i taua faaroo ra.

•   A haapii eaha te tahi mau huru maitatai o te Atua mai to ˈna here, to ˈna aau horoa oia atoa to ˈna paari e to ˈna puai, na roto i te mau mea ta ˈna i poiete. (Roma 1:20) I muri aˈe i to ˈna feruri-noa-raa no nia i te poieteraa, e au ra ua ite mata te taata haapao maitai o Ioba i te Atua.—Ioba 42:5.

•   A haapii i te Bibilia no te ite o vai mau te Atua. Te haapapu mai ra te Bibilia: “Ia imi oe [i te Atua], e vaiiho oia ia itehia mai oia e oe.”—Paraleipomeno 1, 28:9; Salamo 119:2; Ioane 17:3.

•   A haapii o vai te Atua maoti te oraraa o Iesu. Ua pee maite o Iesu i te huru o to ˈna Metua, te Atua ra Iehova e ua nehenehe o ˈna e parau: “O tei ite mai ia ˈu, ua ite atoa ïa i te Metua.”—Ioane 14:9.

•   A ora ia au i to te Atua hinaaro a ite ai e nafea te Atua e haamaitai ia oe. Ua parau Iesu: “E oaoa te feia aau tia, e ite hoi ratou i te Atua.” Mai tei faahitihia, e faatia faahou mai te Atua i te tahi taata ia ora i te raˈi e i reira ratou e “ite i te Atua.”—Mataio 5:8; Salamo 11:7.

 I roto i te tahi aamu Bibilia e au ra e e ua ite mata roa te taata i te Atua. Ia hiˈopoa anaˈe râ i te tupuraa, ua paraparau te Atua i te taata na roto i te hoê melahi aore ra ua faaohipa o ˈna i te orama.

 Te mau melahi.

I tahito râ, ua tono te Atua i te mau melahi ei tia no ˈna ia paraparau ratou i te taata ma to ˈna iˈoa. (Salamo 103:20) Ei hiˈoraa, ua paraparau te Atua ia Mose mai roto mai i te raau taratara e te na ô ra te Bibilia: “Huna ihora Mose i to ˈna hohoˈa mata, no te mea te mǎtaˈu ra oia i te hiˈo i te Atua mau.” (Exodo 3:4, 6) Aita Mose i ite mata roa i te Atua. Te faaite ra te tupuraa, o “te melahi a Iehova” ta ˈna i ite.—Exodo 3:2.

 Ia faahiti te Bibilia e “paraparau maira Iehova ia Mose e aro e aro” mai te huru ra ïa e te paraparau ra te hoê taata i mua i te mata o to ˈna hoa. (Exodo 4:10, 11; 33:1) Aita mau â Mose i ite mata roa i te Atua no te mea te poroi ta te Atua i faatae ia ˈna “ua horoahia mai ïa na roto i te mau melahi.” (Galatia 3:19; Ohipa 7:53) Tera râ, no to Mose faaroo puai i te Atua, te faataa ra te Bibilia no ˈna mai te huru ra e “te ite ra oia i te Atua ite-ore-hia.”—Hebera 11:27.

 Mai ta ˈna i rave no te paraparau ia Mose, ua na reira atoa te Atua i nia ia Aberahama na roto i te mau melahi. Ia taio anaˈe te tahi mau irava Bibilia e au ra e te ite mata roa Aberahama i te Atua. (Genese 18:1, 33) Tera râ, te faaite ra te tahi mau irava no nia i na “toru tane” tei haere maira ia Aberahama, e melahi ratou ta te Atua i tono mai. Ua taa ia Aberahama e mau tia ratou no te Atua e ua paraparau o ˈna ia ratou mai te huru ra te paraparau ra o ˈna ia Iehova.—Genese 18:2, 3, 22, 32; 19:1.

 Te mau orama.

Ua fa atoa mai te Atua i mua i te taata na roto i te orama. Ei hiˈoraa, ia parau te Bibilia no nia ia Mose e te tahi atu mau Iseraela “ite aˈera ratou i te Atua o Iseraela,” te auraa ïa “ite orama aˈera ratou i te Atua mau.” (Exodo 24:9-11) Oia atoa, te tahi mau taime te parau ra te Bibilia no te mau peropheta “ite ihora [ratou] ia Iehova.” (Isaia 6:1; Daniela 7:9; Amosa 9:1) I roto i te hiˈoraa tataitahi, te faaite ra te tupuraa e ua ite orama te mau peropheta i te Atua aita râ ratou i ite mata roa ia ˈna.—Isaia 1:1; Daniela 7:2; Amosa 1:1.