Mea mau anei te Diabolo?

FAAROO NA ROTO TE REO

Te pahonoraa a te Bibilia

E, mea mau iho â te Diabolo. E “arii” oia “o teie nei ao”, e melahi oia o tei riro ei melahi ino e o tei orure hau i te Atua. (Ioane 14:30; Ephesia 6:11, 12) Te faaite mai ra te Bibilia i te huru o te Diabolo na roto i te faaohiparaa i teie mau taˈo:

Satani, o “Patoi” ïa te auraa.—Ioba 1:6.
Diabolo, o “Pari haavare” ïa te auraa.—Apokalupo 12:9.
Te ophi, ua faaohipahia teie taˈo i te tahi taime i roto i te Bibilia no te faahiti i te parau “Râmâ.”—Korinetia 2, 11:3.
Faahema.—Mataio 4:3.
Haavare.—Ioane 8:44.

E ere te Diabolo i te hoê huru ino i roto ia tatou

Te manaˈo nei te tahi mau taata no nia ia Satani te Diabolo, o te ino ïa e vai ra i roto ia tatou paatoa. Teie râ, te faahiti ra te Bibilia i te hoê tauaparauraa i rotopu i te Atua e ia Satani. Mea tia roa hoi te Atua, eita oia e nehenehe e tauaparau i te hoê huru ino i roto ia ˈna. (Deuteronomi 32:4; Ioba 2:1-6) Oia atoa, ua faahema Satani ia Iesu, e taata tia roa hoi o Iesu. (Mataio 4:8-10; Ioane 1, 3:5) No reira, te faaite mai ra te Bibilia e mea mau iho â te Diabolo e e ere oia i te hoê tapao o te ino.

E maere anei tatou i te mea e mea rahi te taata o te ore e tiaturi e mea mau te Diabolo? Aita roa ˈtu, no te mea te parau mai ra te Bibilia e te faaohipa nei Satani i te parau haavare ia manuïa oia. (Tesalonia 2, 2:9, 10) Hoê o ta ˈna mau ravea, o te haapoiriraa ïa i te taata e rave rahi no nia i to ˈna vai-mau-raa.—Korinetia 2, 4:4.

Te tahi atu â mau manaˈo hape no nia i te Diabolo

Haapiiraa hape: O Lucifero te tahi atu iˈoa o te Diabolo

Tupuraa mau: Te auraa o te taˈo Hebera tei hurihia i roto i te tahi mau Bibilia ei Lucifero, o “fetia anaana” ïa. (Isaia 14:12) Ia au i te tupuraa, ua faaohipahia teie parau no te faahiti i te opu hui arii no Babulonia ta te Atua i faahaehaa ˈtu no to ratou teoteo. (Isaia 14:4, 13-20) Ua faaohipahia te parau “fetia anaana” no te faaooo i te opu hui arii no Babulonia i muri aˈe i to ratou faatahuriraahia.

Haapiiraa hape: Te faaohipa nei te Atua ia Satani no te haava i te huitaata.

Tupuraa mau: E enemi te Diabolo no te Atua, e ere ta ˈna tavini. Te patoi e te pari haavare nei Satani te Diabolo i te mau taata atoa o te tavini i te Atua.—Petero 1, 5:8; Apokalupo 12:10.