E rave rahi taata tei ui i teie mau uiraa no te mea mea rahi ta ratou i ere. Eita ratou e imi noa i te mau pahonoraa, te hinaaro rahi nei ratou i te tamahanahanaraa. No te tahi atu, o te Taparahiraa a te mau Nazi te ohipa ino roa ˈˈe ta te taata i rave. E ere ïa i te mea ohie no ratou ia tiaturi i te Atua.

 Manaˈo hape: Mea tano ore ia ani no te aha te Atua i vaiiho ai ia tupu te Taparahiraa a te mau Nazi.

 Tupuraa mau: Ua ani te mau taata e faaroo rahi to ratou no te aha te Atua i vaiiho ai i te ino. Ei hiˈoraa, ua ani te peropheta Habakuka i te Atua: “No te aha oe e farii ai i te haavîraa? No te aha teie haamouraa e hamani-ino-raa ati aˈe ia u? E no te aha teie mau tatamaˈiraa e aimârôraa?” (Habakuka 1:3) Aita roa ˈtu te Atua i faahapa ia Habakuka. Ua haapapai te Atua i te mau uiraa ta Habakuka i ui i roto i te Bibilia no te mau taata atoa.

 Manaˈo hape: Aita te Atua e tâuˈa ra i te mauiui o te taata.

 Tupuraa mau: Mea riri na te Atua te ino e te mauiui ta te ino e faatupu. (Maseli 6:16-19) I te tau o Noa, ua “peapea [aore ra mauiui]” to te Atua aau no te mea ua î te fenua i te haavîraa uˈana. (Genese 6:5, 6) Papu maitai, ua mauiui rahi te Atua a ite ai oia i te Taparahiraa a te mau Nazi.—Malaki 3:6.

 Manaˈo hape: Ua faaohipa te Atua i te Taparahiraa a te mau Nazi no te faautua i te ati Iuda.

 Tupuraa mau: Ua vaiiho te Atua ia haamou to Roma ia Ierusalema i te senekele matamua. (Mataio 23:37–24:2) Mai reira mai râ, eita te Atua e faautua aore ra e haamaitai i te hoê nunaa taa ê. No te Atua, aita e taa-ê-raa i rotopu i te ati Iuda e te Heleni.—Roma 10:12.

 Manaˈo hape: Mai te peu e te vai ra iho â hoê Atua î i te here e te Mana hope, eita ïa oia e vaiiho ia tupu te Taparahiraa a te mau Nazi.

 Tupuraa mau: Eita roa ˈtu te Atua e faatupu i te mauiui. I te tahi taime, e vaiiho oia ia tupu te reira maa taime.—Iakobo 1:13; 5:11.

 Ua vaiiho te Atua ia tupu te Taparahiraa a te mau Nazi no te hoê â tumu i vaiiho ai oia ia mauiui te huitaata, oia hoi, no te faatitiaifaro i te mau pariraa a Satani. Te faaite papu mai ra te Bibilia o te Diabolo, eiaha râ te Atua, o te faatere nei i teie nei ao. (Luka 4:1, 2, 6; Ioane 12:31) E piti haapapuraa no roto mai i te Bibilia o te tauturu mai ia tatou ia taa no te aha te Atua i vaiiho ai ia tupu te Taparahiraa a te mau Nazi.

1.   Ua poiete te Atua i te taata ma te horoa ia ratou i te tiamâraa e maiti. Ua parau te Atua ia Adamu raua Eva eaha ta ˈna i titau ia raua. Aita râ oia i faahepo ia raua ia auraro ia ˈna. Ua maiti raua e na raua e faaoti eaha te mea maitai e te mea ino no raua. No teie faaotiraa ino mau ta raua i rave e ta te taata i rave atoa i te roaraa o te tau, ua faaruru te huitaata i te mau faahopearaa ino roa. (Genese 2:17; 3:6; Roma 5:12) Ia au i te buka Principes de foi du judaisme, te rahiraa o te mauiui ta tatou pauroa e faaruru nei, no ta tatou ïa faaohiparaa ma te tano ore i te tiamâraa e maiti tei horoahia ia tatou. Aita te Atua i faaore i to tatou tiamâraa e maiti, te horoa nei râ oia i te taime i te taata no te tamata i te faatere i to ratou oraraa ma te ore e turui i nia ia ˈna.

2.   E nehenehe te Atua e faaore i te mau faahopearaa ino ta te Taparahiraa a te mau Nazi i faatupu e e na reira iho â oia. Te fafau nei te Atua e e faatia faahou mai oia i na mirioni taata tei pohe, mai te taata tei haapohehia e te mau Nazi. E faaore atoa oia i te mauiui faaruruhia e te feia tei ora mai i te Taparahiraa a te mau Nazi no te mea te haamanaˈo nei ratou i te ohipa ino ta ratou i faaruru. (Isaia 65:17; Ohipa 24:15) E haapapuraa te here o te Atua no te huitaata, e e faatupu iho â oia i teie mau parau fafau.—Ioane 3:16.

 Ua nehenehe e rave rahi taata tei haapohehia e te mau Nazi, oia atoa te taata tei ora mai, e tapea i to ratou faaroo a taa ˈi ratou no te aha te Atua e vaiiho ai i te ino e a taa atoa ˈi nafea oia e faaore ai i te ino.