Te ora ra te mau melahi i nia i te raˈi aore ra i roto i te ao varua, te hoê vahi teitei aˈe i to tatou nei ao nui. (Te mau arii 1, 8:27; Ioane 6:38) Mea hau aˈe te mau melahi i te puai e te mana i te taata. (Petero 2, 2:11) Te parau-atoa-hia no nia i te mau melahi e varua ratou.—Te mau arii 1, 22:21; Salamo 18:10.

Na vai i poiete i te mau melahi?

 Ua poiete te Atua i te mau melahi na roto ia Iesu, oia hoi “te matahiapo o te mau mea atoa i poietehia.” No te faataa e mea nafea te Atua i faaohipa ˈi ia Iesu i roto i te poieteraa, te parau ra te Bibilia: “E mea na roto hoi ia [Iesu] i poietehia ˈi to te raˈi atoa e to te fenua atoa, tei itehia e tei ore i itehia.” I roto i te mau mea tei ore i itehia, te vai ra te mau melahi. (Kolosa 1:13-17) Eita ratou e faaipoipo e e fanau mai i ta ratou iho tamarii. (Mareko 12:25) Inaha, ei “tamaiti a te Atua mau,” ua poietehia ratou tataitahi.—Ioba 1:6.

 Ua poiete-aˈena-hia te mau melahi na mua roa i te fenua. I to te Atua poieteraa i te fenua, ua tuô te mau melahi “ma te arue” ia ˈna.—Ioba 38:4-7.

Ehia ratou?

 Aita te Bibilia e horoa ra i te hoê numera taa maitai, te mea papu râ mea rahi ratou. Ei hiˈoraa, ua ite orama te aposetolo Ioane e mau hanere mirioni melahi.—Apokalupo 5:11.

Ei iˈoa e e huru taa ê anei to te mau melahi?

 E. Te horoa ra te Bibilia i te iˈoa o na melahi e piti: Mihaela e o Gaberiela. (Daniela 12:1; Luka 1:26) a E iˈoa to te mau melahi, aita râ ratou i faaite atu.—Genese 32:29; Te mau tavana 13:17, 18.

 E huru taa ê to te mau melahi tataitahi. E nehenehe ratou e paraparau te tahi i te tahi. (Korinetia 1, 13:1) E nehenehe ratou e feruri e e arue atoa i te Atua. (Luka 2:13, 14) E tiamâraa to ratou no te maiti i te rave i te mea maitai aore ra i te mea ino. Ei hiˈoraa, ua faaoti vetahi o ratou i te apiti atu i te Diabolo ra o Satani i to ˈna orure-hau-raa i te Atua. A na reira ˈi, ua hara ratou.—Mataio 25:41; Petero 2, 2:4.

E tiaraa taa ê anei to te mau melahi?

 E. O Mihaela te melahi rahi e i roto i te mau melahi atoa tei ia ˈna ra te mana e te puai hau ê. (Iuda 9; Apokalupo 12:7) Te vai ra te mau seraphi, e tiaraa teitei to ratou o te tia ˈtu i pihai iho i to Iehova terono. (Isaia 6:2, 6) E tiaraa teitei atoa to te mau kerubi e te amo nei ratou i te tahi hopoia taa ê. Ei hiˈoraa, na te mau kerubi i tiai na i te tomoraa o te ô i Edene i muri aˈe i to Adamu raua Eva tiavaruraahia.—Genese 3:23, 24.

E tauturu anei te mau melahi i te taata?

 E. I teie mahana, te faaohipa ra te Atua i ta ˈna mau melahi haapao maitai no te tauturu i te taata.

•   Te faaohipa ra te Atua i te mau melahi no te aratai i ta ˈna mau tavini i roto i te ohipa pororaa o te parau apî oaoa o te Basileia o te Atua, aore ra te Faatereraa arii a te Atua. (Apokalupo 14:6, 7) Maoti teie aratairaa, ua haamaitaihia te feia poro oia atoa te mau taata o te faaroo ra i teie parau apî oaoa.—Ohipa 8:26, 27.

•   E tauturu te mau melahi ia ore te amuiraa Kerisetiano ia viiviihia i te haerea o te feia ino.—Mataio 13:49.

•   E aratai e e tiai te mau melahi i te feia taiva ore i te Atua.—Salamo 34:7; 91:10, 11; Hebera 1:7, 14.

•   Fatata te mau melahi e o Iesu Mesia e aro no te faaore i te ino i nia i te fenua e no te hopoi mai i te tamǎrûraa no te huitaata.—Tesalonia 2, 1:6-8.

E melahi tiai anei to tatou tataitahi?

 Noa ˈtu te haapeapea ra te mau melahi no te maitai pae varua a te mau tavini a te Atua, e ere te auraa e tono mai te Atua i te hoê melahi no te tiai i te taata tataitahi. b (Mataio 18:10) Eita te mau melahi e paruru i te mau tavini a te Atua i te mau ati e faahemaraa atoa. Te parau ra te Bibilia e pinepine te Atua i te “faaineine . . . i te faaoraraa” ma te horoa i te taata i te paari e te puai no te faaoromai tamau.—Korinetia 1, 10:12, 13; Iakobo 1:2-5.

Manaˈo hape no nia i te mau melahi

 Manaˈo hape: E nehenehe tatou e pure i te mau melahi no te tauturu mai.

 Tupuraa mau: Mea faufaa te pure i te Atua. O te Atua ra o Iehova anaˈe te tia ia tatou ia haamori. (Apokalupo 19:10) E pure tatou i te Atua anaˈe na roto ia Iesu.—Ioane 14:6.