Te parau ra te hoê taurearea o Will te iˈoa: “E au ra e mea haumani te Bibilia ia ore oe ia ite e nafea ia taio i te reira.”

 E hinaaro anei oe e ite e nafea oe e anaanatae ai i ta oe taioraa Bibilia? E tauturu teie tumu parau ia oe.

•  A faaoraora i te mau aamu Bibilia

•  A maimi!

•  To ratou manaˈo

 A taio mai te huru ra tei roto oe i te aamu. E nehenehe oe e na ô:

1.   A maiti i te hoê aamu Bibilia ta oe e hinaaro e haapii. E nehenehe oe e maiti i te hoê tupuraa i roto i te Bibilia, te hoê tuhaa o te mau Evanelia aore ra i te hoê taioraa Bibilia e au i te darama i nia i te jw.org.

2.   A taio i te aamu. E nehenehe oe e taio o oe anaˈe, aore ra ma te reo puai e te tahi mau hoa aore ra mero o te utuafare. E nehenehe hoê e taio i ta te taata faatia aamu, area te tahi atu mau taata, i te feia hauti ïa.

3.   A tamata hoê aore ra hau atu i to muri nei mau manaˈo:

   •   A papai i te tahi mau hohoˈa no nia i te aamu. Aore ra a papai i te tahi mau hohoˈa o te faataa ra i te mau tupuraa atoa o te aamu. A papai i te tahi parau poto noa no te faataa eaha te tupu ra i nia i tera e tera hohoˈa.

   •   Ia taio oe i te aamu o te hoê tavini haapao maitai, a papai i te huru maitatai o te hoê taata e ta ˈna mau ohipa, a faatuati atu ai i te mau haamaitairaa ta ˈna i fanaˈo.

   •   A taui i te tereraa o te aamu. A faatia i te aamu mai te huru ra e rave rahi taata hauti tera e faatia ra e a uiui i te manaˈo o te feia hauti e te mau taata tei ite mata i tei tupu.

   •   Mai te peu ua rave te feia hauti i te faaotiraa maamaa, a feruri eaha te faahopearaa. Ei hiˈoraa, i to Petero parauraa aita oia i ite ia Iesu. (Mareko 14:66-72) Eaha ta Petero i nehenehe e rave i mua i te faaheporaa?

   •   Mai te peu e nehenehe ta oe, a papai i ta oe iho aamu no nia i te aamu Bibilia. A faahiti atoa i te tahi mau haapiiraa e nehenehe e huti mai i te aamu.—Roma 15:4.

 Ia hiˈopoa maite oe, e nehenehe oe e ite mai i te tahi mau poe i roto i te hoê aamu. I te tahi mau taime, mea faufaa hoê taˈo aore ra e piti i roto i te hoê aamu Bibilia.

 Ei hiˈoraa, a faaau na i te Mataio 28:7 e te Mareko 16:7.

•    No te aha Mareko i haapapu roa ˈi e fatata Iesu i te fa i te mau pǐpǐ e “ia Petero”?

•  Manaˈo tauturu: Aita Mareko i ite mata i taua mau tupuraa ra. Papu, na Petero i faatia i te reira ia ˈna.

•  Te poe huna: No te aha Petero i tamahanahana-roa-hia ˈi i te faarooraa e ua hinaaro Iesu i te farerei faahou ia ˈna? (Mareko 14:66-72) E nafea Iesu i riro ai ei hoa papu no Petero? E nafea tatou e pee ai i te hiˈoraa o Iesu a riro ai ei hoa papu no vetahi ê?

 Ia faaoraora oe i te mau aamu Bibilia e ia maimi i te reira, e anaanatae roa ˈtu â oe i te taio i te Bibilia!