Ia au i te hoê titorotororaa, e 80 i nia i te hanere feia apî i Marite o te pure nei, tera râ, te afaraa noa o ratou o te pure nei i te mau mahana atoa. Mea papu, te uiui nei vetahi o ratou: ‘Ua riro anei te pure ei ravea ia maitai mai au aore ra mai te tahi mea faufaa ˈtu â?’

•  Eaha te pure?

•  E faaroo anei te Atua i te mau pure?

•  E pure au no te aha?

•  To ratou manaˈo

 Te pure, o te paraparauraa ïa i Tei poiete i te mau mea atoa. A feruri na i te auraa o te reira! Mea teitei roa Iehova i te huitaata i roto i te mau mea atoa. Tera râ, “aita . . . oia i atea ia tatou tataitahi.” (Ohipa 17:27) Te vai ra râ teie titauraa faahiahia mau i roto i te Bibilia: “A faafatata ˈtu i te Atua, e e faafatata mai oia ia outou.”—Iakobo 4:8.

 E nafea oe ia faafatata ˈtu â i te Atua?

•   A tahi, na roto i te pure: e na reira oe e paraparau ai i te Atua.

•   Te piti, na roto i te haapiiraa i te Bibilia: e na reira te Atua e “paraparau” ai ia oe.

 Ma teie na ravea e piti (te pure e te haapiiraa i te Bibilia), e tauturu te reira ia oe ia patu i te hoê auhoaraa puai e te Atua.

 “Te paraparauraa ia Iehova, te Atua Teitei roa ˈˈe, e ravea taa ê teie ta te taata e nehenehe e fanaˈo.”—Jeremy.

 “Ia paraparau vau ia Iehova no nia i to ˈu mau huru aau hohonu na roto i ta ˈu mau pure, e piri atu â vau ia ˈna.”—Miranda.

 Noa ˈtu te tiaturi ra oe i te Atua, e noa ˈtu te pure ra oe ia ˈna, e ere i te mea ohie ia farii i te manaˈo e te faaroo mau ra oia. Tera râ, te parau ra te Bibilia o Iehova te “faaroo i te pure.” (Salamo 65:2) Te titau atoa ra te Bibilia ia oe ia “huri . . . i to [oe] mau ahoaho atoa i nia ia ˈna.” No te aha? “No te mea te tâuˈa mai ra oia ia [oe].”—Petero 1, 5:7.

 To oe manaˈo: E rave anei oe i te taime no te paraparau pinepine i to oe mau hoa piri? E nehenehe atoa oe e na reira e te Atua. A pure pinepine ia ˈna e a faaohipa i to ˈna iˈoa, Iehova. (Salamo 86:5-7; 88:9) Inaha, te titau ra te Bibilia ia oe ia “tamau i te pure.”—Tesalonia 1, 5:17.

 “Ta ˈu mau pure, o te hoê ïa aparauraa i rotopu i to ˈu Metua i te raˈi e o vau, e taime ïa no ˈu no te haamahora i to ˈu aau.”—Moises.

 “Ia paraparau vau ia Iehova, e faaite pauroa vau ia ˈna, mai ta ˈu e rave e to ˈu mama aore ra e te hoê hoa piri roa.”—Karen.

 Te parau ra te Bibilia: “Na roto . . . i te pure e te taparuparuraa e te haamaitairaa, a faaite i ta outou mau aniraa i te Atua.”—Philipi 4:6.

 Te auraa anei râ e pure oe ia ˈna no nia i to oe mau fifi atoa? E! Te parau ra te Bibilia: “E tuu oe i ta oe hopoia ia Iehova ra, e na ˈna oe e tauturu mai.”—Salamo 55:22.

 Parau mau, ia pure oe i te Atua, eita oe e paraparau noa no nia i to oe mau fifi. Te parau ra te hoê tamahine apî o Chantelle te iˈoa: “Ia paraparau vau ia Iehova i te taime noa a hinaaro ai au i te tauturu, e ere ïa to maua auhoaraa i te mea puai, . . . Ia manaˈo vau, mea faufaa ia haamauruuru na mua ia ˈna, era aˈe te roa o ta ˈu mau haamauruururaa.”

 To oe manaˈo: Eaha te mau mea i roto i to oe oraraa e haamauruuru ai oe ia Iehova? Te vai ra anei e toru ohipa e haamauruuru ai oe ia Iehova i teie mahana?

 “I te mataitai-noa-raa i te hoê tiare nehenehe, e turai mai te reira ia tatou ia haamauruuru ia Iehova.”—Anita.

 “A feruri maite i nia i te hoê tuhaa o te mau mea i poietehia o ta oe i faahiahia aore ra i nia i te hoê irava Bibilia o tei haaputapû mau i to oe aau e a haamauruuru ia Iehova no te reira.”—Brian.