Te faaohipahia nei te mau fare atoa o te pu rahi i Warwick. I te haamataraa Tetepa, piri i te 500 taata tei faaea i Warwick, oia hoi te mau rima tauturu no te paturaa e te mau rave ohipa taime taatoa na Brooklyn mai.

Te hiˈopoa ra te hoê rima tauturu i te anaana o te hiˈo tapirihia i nia i te pǎpai o te vahi tomoraa o te faaiteiteraa “Te hoê nunaa no to Iehova iˈoa.” Ua hamanihia te reira ia manaˈohia e mea tahito, ia au i te manaˈo tumu o te faaiteiteraa i roto i te tuatapaparaa.

O Stephen Lett, mero o te Tino aratai a te mau Ite no Iehova, te peretiteni o te haamoriraa poipoi matamua i Warwick tei haapurorohia. I taua poipoi ra, ua taio taeae Lett i te hoê rata no te haamauruuru i te mau rima tauturu o te paturaa tei hau i te 27 000 e te tahi atu tei tauturu mai na roto i te mau ravea rau.

Te tapiri ra te hoê tamuta i te mau reta o te iri faaiteiteraa “Te hoê nunaa no to Iehova iˈoa” o te faataa ra i te aamu o te mau Ite no Iehova mai te mau matahiti 1870 e tae roa mai i teie mahana. Hoê teie o na toru faaiteiteraa aita e taata faaoriori ratere.

Te putuputu ra te Tomite papairaa, to ˈna mau tauturu e te mau mero o te Tuhaa papairaa. I nia i te mau paruai rarahi, e patahia te mau hohoˈa o te mau papai e piahia, e e nehenehe te tahi atu mau Tuhaa e tauaparau e te Tomite a putuputu ai ratou. Ua afaihia te airaa maa i Warwick Na Brooklyn mai, mea horoa-noa-hia mai te reira mea maoro aˈenei.

Te aparau ra te hoê tauturu o te Tomite tiaau e to ˈna mau hoa ohipa i raro aˈe i ta ˈna aratairaa e nafea ia tauturu i tei roohia i te mataˈi rorofai ra o Haima (Lawin) tei tairi i te fenua Philipino te mahana na mua ˈtu. Auaˈe te mau ravea aparauraa na roto i te video i te pu rahi e nehenehe ai te mau Tuhaa e faaafaro oioi i te mau fifi ru e e aparau e te mau amaa o te fenua taatoa.

E hopuna tamâ pape to ropu i te Fare tataîraa e atuaturaa e te purumu rahi o te tomoraa. Teie hopuna e te tahi atu i Warwick, e ravea ïa no te titia i te mau viivii o te pape ûa, a afa mai ai te haamâuˈaraa no te hamani i te hoê ravea titiaraa pape. Hau atu â, e maitai mai te mau raau e animara ia faahoˈihia te pape tamâhia i roto i te mau taheraa pape na pihai iho mai.

Te tari ra te hoê pǔpǔ i te mau taihaa i tae mai. Piri i te 80 tei tauturu i te feia rave ohipa o te pu rahi ia tari i ta ratou mau taihaa na Brooklyn mai e tae atu i Warwick to ratou nohoraa apî.

Te huri mai ra na taata tunu faraoa e tiapai faraoa ôihia no roto mai i te pani ôiraa faraoa. I te mea e hau roa te faraoa ôihia i te 45 kilo, auaˈe te hivi i mâmâ ˈi te ohipa. I te vahi euraa faraoa i Warwick, e nehenehe e faataere aore ra e faaoioi i te maraaraa o te faraoa ôihia ma te faatano i te anuvera e te haumi. Auaˈe teie ravea e mâmâ ˈi te ohipa i te euraa e rave rahi hanere faraoa i te mau hebedoma atoa.

Te turai ra na rave ohipa o te tuhaa paturaa i te vairaa pehu i rapae i te fare tataîraa e atuaturaa. I Warwick, ua puoihia te rahiraa o te mau fare o te pu rahi te tahi i te tahi i te eˈaturu, mea iti ïa te rave ohipa e te pereoo tei titauhia no te afai ê i te pehu mea faarue, e te faaohipa-faahou-hia.

Te pîpîhia ra hoê ahu oomo i te pape ia ohie te auriraa i nia i te matini auri ahu hohoˈa tino taata. Hau i te 5 000 kilo ahu e te ahu lino ta te tuhaa puˈa ahu e puˈa i te mau hebedoma atoa. E tapaohia te tahi numera i nia i te mau ahu ia itehia no vai tera e tera ahu. E hiˈohia te numera i te taime puˈaraa e auriraa ia papu e ua mâ e ua auri-pauroa-hia anei te ahu a afaihia ˈtu ai i te tuhaa aore ra te piha tano.

Te hiˈopoa ra e te atuatu ra te hoê rima tauturu i te hoê pereoo hivi o te fare uira ia ore ia ino oioi e ia ore te feia e faahoro i te reira ia fifi.

Te faaafaro ra te hoê rima tauturu i te hoê fifi o te faanahoraa roro uira e pata ra i te omuaraa o te faaiteiteraa “Faaroo e ohipa ra.”

Te faaineinehia ra te hoê pereoo taataahi hamanihia i 1903 no te faaiteiteraa “Te hoê nunaa no to Iehova iˈoa.” Mea horoahia mai te reira, ta te mau rave ohipa i Warwick i tataî maitai no te faaite i te mau tutavaraa e haapaeraa a te Feia haapii Bibilia (piihia i muri aˈe Ite no Iehova) tei faaohipa i te pereoo taataahi no te haaparare i te poroi Bibilia.

Te tamau ra na tamuta i te hiˈo o te paruru i te faaiteiteraa tauihaa no nia i te “Hohoˈa-Darama o te Poieteraa,” te hoê pataraa hohoˈa no nia i te Bibilia faaite-matamua-hia i 1914. Piri i te 9 mirioni taata tei ite i te reira i taua matahiti ra.

Te faaineinehia ra te Bibilia Latino no Zurich, piaraa 1544, no te faaiteiteraa “Te Bibilia e te iˈoa o te Atua.” Te faaite ra te tapao uteute i nia i te Bibilia i te pae aui i te hoê vahi e itehia ˈi te iˈoa o te Atua, Iehova. E haapao-maitai-hia te mau Bibilia tahito. E puohuhia te Bibilia iritihia e to ˈna vairaa, e faatanohia te anuvera, te haumi e te puairaa o te mori eiaha te reira ia tuino i te papie.

Te mataitai ra e piti ratere e te taata faaoriori ia Warwick i nia i te hoê pare 23 metera te teitei. Mai te 3 no Eperera 2017 i haamata ˈi te mau tere mataitairaa ia Warwick, e ta ˈna mau faaiteiteraa aita e taata faaoriori ratere. Mea titauhia râ na mua ia tapao i te iˈoa i nia i ta matou reni natirara, te tuhaa NO NIA IA MATOU > PIHA OHIPA E MATAITAIRAA.

Te tuuhia ra i to ˈna vairaa faaiteiteraa te Bibilia King James Version, piaraa matamua 1611 aita i rahi te toe ra. Na te feia rave ohipa i Warwick iho â i hamani i te mau vairaa faaiteiteraa.

Te tuuhia ra te hoê taupoo i to ˈna vairaa faaiteiteraa. No Joseph Rutherford teie taupoo, tei aratai i te mau Ite no Iehova hoê hanere matahiti aˈenei. I teie tuhaa o te faaiteiteraa “Te hoê nunaa no to Iehova iˈoa,” e faaitehia te mau tutavaraa a te mau Ite no Iehova no te poro i te parau apî oaoa o te Faatereraa arii.

Te haruharuhia ra te reo o te hoê taeae no te faaiteiteraa “Te Bibilia e te iˈoa o te Atua” aita e taata faaoriori ratere. I te afairaahia te mau mauhaa no te haruharuraa mai Brooklyn e tae atu i Warwick, aita i piti hebedoma i muri iho ua haamata faahou te mau haruharuraa. Te faaohipa-atoa-hia ra teie piha haruharuraa (tei te Pu Haapiiraa a te mau Ite no Iehova i Patterson te mau piha haruharuraa faaohipa-roa-hia aˈe) no te haruharu i te taioraa o te Huriraa o te ao apî, Te Pare Tiairaa e A ara mai na!, te mau tumu parau o te jw.org, e te vai atu ra.

Te penihia ra te poro o te mau vairaa hohoˈa. E tuhaa te reira o te faaiteiteraa “Te hoê nunaa no to Iehova iˈoa” e faaite ra i te tahi mau hohoˈa o te Feia haapii Bibilia i te hopea o te mau matahiti 1800.

Te penihia ra te hoê hohoˈa no Kaleba no roto i te anairaa hohoˈa teata A riro ei hoa no Iehova. E tuuhia te reira i roto i te hoê faaiteiteraa e faataa ra i te mau ravea e faanahoraa teata ta te mau Ite no Iehova i faanaho no te mau tamarii.

Te tâpûhia ra te tahi mau hohoˈa e iri faaiteraa no te faaiteiteraa “Te hoê nunaa no to Iehova iˈoa.” Hau i te 250 taata, te taata tarai raau, faanaho i te porotarama roro uira, hamani hohoˈa, tamau uira, tapiri carreau, taviri hohoˈa e te taata papai tei apiti i na toru faaiteiteraa mai te omuaraa mai e oti roa ˈtu ai.