No te mau Ite no Iehova, o te Bibilia te buka faufaa roa ˈˈe. Mea pinepine ratou i te haapii i te reira e i te faaohipa i tera buka no te haapii i te tahi no nia i te parau apî oaoa o te Basileia o te Atua. (Mataio 24:14) No reira e tahito oioi ai ta ratou Bibilia. Ua tutava maite ïa ratou ia riro te neneiraa faaapîhia o te Huriraa o te ao apî o te mau Papai moˈa (Beretane) tei matara i 2013 ei buka nehenehe mau e o te ore e tahito oioi.

E mea tia ia hamanihia te Bibilia apî no te vai maoro. Ua farerei ihora te mau tia o te tuhaa neneiraa a te mau Ite no Iehova i Wallkill, New York, Marite, i te peretiteni o te hoê taiete neneiraa buka. Ua faaite atu ratou i ta ratou e opua nei. Teie ta te peretiteni i parau: “Eita e nehenehe e nenei i te hoê Bibilia mai ta outou e hinaaro ra. Mea fifi teie parau, e parau mau râ: ua neneihia te rahiraa o te mau Bibilia no te faanehenehe i te airaa maa aore ra no te tuu atu i nia i te hoê paepae, eiaha râ no te vai maoro.”

Aita te tahi mau neneiraa tahito o te Huriraa o te ao apî e vai maoro e i te tahi mau taime e mataratara te mau api no te mahana veavea. Ua hiˈopoa te feia nenei i te vehî buka o te Bibilia, te huru tapiriraa e te tahoêraa i te mau api. E nehenehe ïa ratou e haamaitai atu â i to ˈna neneiraa ia vai maoro tera buka noa ˈtu to ˈna faaohiparaa pinepine aore ra te rau o te reva. Ia au i tei itehia, ua nenei ratou i te tahi mau Bibilia ia tamata te mau Ite no Iehova i te reira i te mau fenua veavea roa e toetoe roa.

I muri aˈe e ono avaˈe, ua faahoˈihia tera mau Bibilia no te hoê hiˈopoaraa. Ia au i ta te feia nenei i ite, ua haamaitai atu â ratou i te neneiraa o te Bibilia e ua hapono ratou i te reira ia tamatahia i roto i te pororaa. Ia amuihia, 1 697 Bibilia tei tamatahia. No te tahi mau Bibilia, e mau tupuraa ino mau opua ore tei itehia. Ei hiˈoraa, ua vaiihohia te hoê Bibilia i raro aˈe i te ûa i te hoê po taatoa. E i te hoê mataˈi rorofai, ua ninahia te tahi atu Bibilia e te pape anavai. Ua horoa mai te mau tamataraa i ravehia e te mau tupuraa opua-ore-hia i te mau haamaramaramaraa faufaa mau no nia i te vai-maoro-raa o te buka.

I 2011, a tamata-noa-hia ˈi te mau Bibilia i roto i te pororaa, ua hoo mai te mau Ite no Iehova i te mau matini apî no te tahoêraa i te buka ma te vitiviti no ta ratou fare neneiraa i Wallkill e i Ebina (Tapone). Te fa, e ere noa ia navai te mau Bibilia reo Beretane no te rururaa matahiti, ia tuea râ te huru neneiraa o te mau Bibilia i na vahi e piti.

I te omuaraa o te matahiti 2012, ua haamata na matini e piti i te nenei i te Huriraa o te ao apî e vehî buka ereere e hiri maoti te hoê ravea apî parauhia “polyuréthane.” Tera râ, ua faaohipa te mau matini apî i te hoê tapau e te mau ravea no te tahoê i te mau api aitâ i tamatahia ˈtura i roto i te pororaa. I te tapiriraa o te vehî buka e te mau api o te Bibilia, ua ite-maitai-hia e aita te reira e vai parahurahu. Aita te mau raveraa matamua no te faatitiaifaro i te fifi i manuïa e ua tapeahia te neneiraa.

Ua tapao te feia hamani i te hoê o na ravea i faaohipahia i nia i te vehî o te buka, e mea pinepine i te iteraahia tera fifi, no te mea e ere te reira i te mea etaeta e ohie ia faaafaro atu. Aita râ te mau Ite no Iehova i tuu. Ua faaoti ratou e nenei i te tahi Bibilia nehenehe mau e ere te vehî buka i te mea etaeta. E maha avaˈe tamataraa i muri iho, ua ite ratou i te hoê ravea ma te anoi e rave rahi mau tapau no te tapiri e tahoê i te mau api. Ua nehenehe ïa te neneiraa e haamata faahou. I teie nei râ, e vai parahurahu noa te vehî buka o te Bibilia noa ˈtu e e ere te reira i te mea etaeta.

I Tetepa 2012, ua titauhia ia faaea te neneiraa o te Huriraa o te ao apî e ia opere pauroa ratou i te mau Bibilia e toe ra. Oia atoa ia tiai no te haamata faahou i te neneiraa faaapîhia o te Huriraa o te ao apî. Ua faanahohia to ˈna piaraa i te 5 no Atopa 2013 no te rururaa matahiti a te Watch Tower Bible and Tract Society of Pennsylvania.

I te Mahana pae 9 no Atete 2013, ua haponohia maoti te natirara te mau papairaa o te Bibilia apî i te mau fare neneiraa. I te mahana i muri iho, ua haamata ratou i te nenei i te reira e ua oti te Bibilia matamua i te 15 no Atete. I te roaraa o na hitu hebedoma i muri mai, ua ohipa te feia nenei i Wallkill e i Ebina i te rui e te ao no te pia e no te hapono i na 1 600 000 Bibilia. E ua navai te reira na te mau taata atoa tei titau-manihini-hia no te rururaa matahiti.

Mea nehenehe te Bibilia apî e te vai maoro. Mea faufaa aˈe râ te poroi faaora e vai ra i roto. I te mahana i muri iho a noaa ˈi ta ˈna Bibilia apî, ua papai te hoê vahine no Marite: “Maoti teie neneiraa apî, e taa maitai aˈe au i te Bibilia.”