I te mau vahi o te pae hitia o te râ o Kanada e paraparauhia ˈi te reo Farani, e faaohipa te rahiraa o te feia tariˈa turi i te reo apǎraa rima Québec. a I te mea 6 000 anaˈe ratou, mea iti roa te mau video na roto i te reo apǎraa rima Québec. Aita râ i maoro aˈenei, ua tutava ˈtu â te mau Ite no Iehova i te hamani i te video tamoni ore na roto i te reo apǎraa rima Québec. No te aha? No te tauturu ia ratou ia haapii e ia taa i te Bibilia.

No te taa i te faahiahia o tera tutavaraa taa ê, a hiˈo na i ta Marcel e faatia ra. Ua fanauhia oia i 1941 i Québec. E piti matahiti i muri aˈe, ua roohia o ˈna i te hoê maˈi i roto i te roro e eita ˈtura ta ˈna e nehenehe faahou e faaroo. Te faatia ra Marcel: “I te ivaraa o to ˈu matahiti, ua haamata vau i te haere i te fare haapiiraa no te feia tariˈa turi. I reira vau i te haapiiraa i te reo apǎraa rima Québec. Na mua ˈˈe, maa buka iti noa tei vai na no te haapii i te mau mea rii na roto i te reo apǎraa rima, aita roa râ e video na roto i tera reo.”

Eaha te faufaaraa o tei piahia na roto i te reo apǎraa rima Québec? Te pahono ra Marcel: “Mea ohie aˈe no te feia tariˈa turi ia haapii na roto i te hoê reo o ta ratou e taa maitai. Aita anaˈe e video na roto i te reo apǎraa rima Québec, e tutava noa ïa matou i te haapii na roto i te mau reo e paraparauhia, mea rahi roa râ te mau mea ta matou e ore e taa!”

No te maitai o te feia tariˈa turi o te faaohipa i te reo apǎraa rima Québec mai ia Marcel, ua pia te mau Ite no Iehova i ta ratou video matamua na roto i tera reo i 2005. Aita i maoro aˈenei, ua faarahihia ta ratou piha huriraa i te oire Montréal i Québec. I teie mahana, e hitu rima tauturu o te haa nei i reira ma te taime taatoa e ua hau atu i te 12 o te ohipa ra afa taime. E toru pǔpǔ huri e e piti piha taa ê ta ratou e faaohipa no te taviri i te hohoˈa e no te hamani i te mau video na roto i te reo apǎraa rima Québec.

Te faahiahia ra te feia atoa o te faaohipa i te reo apǎraa rima Québec i te mau mea atoa ta te mau Ite no Iehova e pia ra na roto i to ratou reo. O Stéphan Jacques te mono faatere o te taatiraa Association des Sourds de l’Estrie. b Teie to ˈna manaˈo no nia i te mau video a te mau Ite no Iehova: “Mea hamani-maitai-hia ta ratou mau video. E taa-maitai-hia ta te taata [huri] e apǎ ra e mea au maitai te hautiutiraa o te hohoˈa mata. Mea faahiahia atoa na ˈu te faaahuraa tura o te feia atoa i roto i te mau video.”

E faaohipa-tamau-hia Te Pare Tiairaa i te mau putuputuraa a te mau Ite no Iehova na te ao nei. I teie mahana, e pia-atoa-hia te reira no na 220 Ite no Iehova e te feia atoa o te apiti ra i roto i na hitu amuiraa e pǔpǔ o te faaohipa i te reo apǎraa rima Québec. c Hau atu â, te tamau ra te mau Ite no Iehova i te pia e rave rahi video o te tuuhia i nia i te natirara mai te mau himene faaitoito mau niuhia i nia i te Bibilia.

Ua oaoa roa Marcel i te fanaˈo e rave rahi video na roto i te reo apǎraa rima Québec. O te mau video piahia e te mau Ite no Iehova ta ˈna e au roa ˈˈe. Te na ô ra oia: “E haamaitairaa mau ia ite e rave rahi video na roto i te reo apǎraa rima Québec i nia jw.org. Mea rahi roa te video e piahia ra na roto i to ˈu reo, auê au i te oaoa!”