E 68 fare auri i Paniora te farii nei i te mau Ite no Iehova e e 600 taata mau auri te haapii nei i te Bibilia.

I rotopu i tera mau Ite no Iehova, te vai ra o Miguel tei mau hoi i te fare auri i na mua ˈˈe 12 matahiti i te maoro. I teie mahana te hoˈi nei o ˈna i ǒ i te mau hebedoma atoa. Te tumu? No te tauturu i te taata mau auri ia taui i to ratou oraraa mai ia ˈna atoa.

I na vau matahiti i mairi aˈenei, ua haapii Miguel i te Bibilia i te taata mau auri e rave rahi. Te parau ra o ˈna: “Te oaoa nei au i te tauturu i te feia i roto i te fare auri i reira vau i na mua ˈˈe. E te oaoa nei au a ite ai i to ratou hinaaro ia matara mai i teie ao ino.”

E maha matahiti to Miguel a pohe ai to ˈna papa tei faaûhia e te hoê taero ava. Ua rave ïa to ˈna mama i te ohipa e rave rahi hora no te faatamaa i te utuafare.

Ua haamata Miguel e to ˈna tuaana i te faatau i te haapiiraa e i te tomo i roto i te mau fare no te eiâ e i te vavahi i te mau pereoo. I te 12raa o to ˈna matahiti, e taata ohipa ino o ˈna. I te 15raa o to ˈna matahiti, e topa noa mai ta ˈna moni a hoo ai i te raau taero. No to ˈna râ hinaaro maha ore i te raau taero, ua rahi atu â ta ˈna mau ohipa eiâ. Mai te 16raa o to ˈna matahiti, ua mau e ua matara mai o ˈna i te fare auri e rave rahi taime e aita i maoro ua riro mai o ˈna ei taata ohipa ino haapaari. Te na ô ra o Miguel: “Ua papu ia ˈu e e pohe vau i te fare auri aore ra no te mea ua rave rahi roa vau i te raau taero. E au vau i te hoê raˈo i roto i te puaverevere.”

Tera râ i 1994, ua ani hoê o to ˈna mau hoa i te hoê Ite no Iehova ia papai i te hoê rata ia Miguel i te fare auri. A taio ai i teie rata, ua haapii Miguel i te opuaraa a te Atua e faariro i te fenua ei paradaiso. Ua faaitoito te Ite no Iehova ia ˈna ia taui i to ˈna oraraa no te fanaˈo i teie parau tohu. Te parau ra o ˈna: “Ua putapû ta ˈna mau parau i to ˈu aau. I tera mahana, ua taui roa to ˈu oraraa e ua faaoti vau i te haapii i te Bibilia noa ˈtu e ua ite au e e ere roa ˈtu i te mea ohie.”

Ua ite o Miguel e e ere i te mea ohie no te mea e tîtî o ˈna no te raau taero e te avaava. E noaa ohie hoi tera na mea e piti. Pauroa te mahana, e pûpû atu to ˈna hoa piha i te raau taero. Ua tamau noa râ Miguel i te pure ia noaa i te puai no te haavî i tera hinaaro maha ore e ua manuïa i muri aˈe.

Toru avaˈe i muri aˈe, ua haamata Miguel i te faaite i ta ˈna mau tiaturiraa i te tahi atu mau taata mau auri. Ua opua atoa o ˈna e faaipoipo, ua fa mai râ te tahi fifi. Hoê avaˈe hou to ˈna faaipoiporaa, ua faautua te hoê tiripuna ia Miguel ahuru atu â matahiti fare taperaa no te tahi atu mau mea ta ˈna i rave na. I muri aˈe râ e toru matahiti e te afa, ua faatiamâhia oia no to ˈna haerea maitai. E ua faaipoipo iho â o ˈna. Aita roa ˈtu Miguel i hoˈi i to ˈna oraraa tahito.