I Titema 2012, ua rave te mau Ite no Iehova i Thaïlande i te hoê opereraa taa ê o te tauturu i te mau tamarii ia oaoa i te haapiiraa. Ua haere 20 taata paari Ite no Iehova i te mau fare haapiiraa i Bangkok. Ua farerei ratou i te faatere o te fare haapiiraa taitahi e ua horoa i te mau orometua haapii e ta ratou mau piahi i te A ara mai na! no Atopa 2012 (Farani). Teie te tumu parau matamua o te reira: “E nafea ia oaoa i te haapiiraa?”

Ua manuïa teie opereraa e ua na reira te mau Ite no Iehova no te mau oire atoa o Thaïlande. Hoê matahiti e te afa i muri iho, a haere ai i na 830 fare haapiiraa, ua ite ratou ua oaoa roa te mau orometua e te mau piahi i te fanaˈo i teie A ara mai na! Neneihia ˈtura tera vea toru â taime ia navai te reira. E 30 000 A ara mai na! no Atopa 2012 tei neneihia na mua. No te mea râ ua au roa te taata i te reira, ua operehia i te pae hopea hau atu i te 650 000 vea!

Ua ite oioi te mau faatere haapiiraa e orometua i te faufaaraa o te A ara mai na! Ua parau te hoê orometua: “E tauturu te vea i ta matou mau piahi ia piri atu â i to ratou utuafare e ia faaitoito no te naea i te mau fa maitatai.” Ua faaô atoa te tahi mau fare haapiiraa i te reira i roto i ta ratou porotarama. Ua faaohipa te tahi atu i tera vea no te haamatau i te mau piahi ia taio. I te hoê fare haapiiraa, ua parauhia i te mau piahi ia rave i te hoê parau papai niuhia i nia i te vea e ua horoahia te mau re no te mau parau papai maitai aˈe.

Ua au roa te hoê tamahine i te tumu parau no nia i te maˈi poria e vai ra i roto i teie vea. Ua faataa o ˈna e fifi matauhia te maˈi poria e e huru ê to ˈna mau hoa i te paraparau no nia i te reira. Ua na ô o ˈna: “Mauruuru no te horoaraa mai i te mau aˈoraa maramarama e te ohie ia faaohipa.”

Ua au roa atoa te mau metua i teie vea. Ua faaite te hoê mama i to ˈna mauruuru i te mau Ite no Iehova tei haere i ǒ ˈna ma te parau atu: “E ravea faufaa mau te reira no te tauturu i ta ˈu tamahine ia haamaitai i ta ˈna haapiiraa.”

Ua parau Pichai Petratyotin, te hoê auvaha a te mau Ite no Iehova i Thaïlande: “E faataa maitai te A ara mai na! i te paari e vai ra i roto i te Bibilia e e maitai-mau-hia te taata i teie mahana. No te mau Ite no Iehova, mea faufaa roa te haapiiraa. No reira matou i oaoa mau ai i te opere i teie vea i te mau taata atoa ma te tamoni ore.”