Eita. Ua faatano matou i ta matou mau tiaturiraa aita anaˈe te reira i tuea i ta te Bibilia e haapii ra.

 Hou a haamata ˈi te piaraa o te Huriraa o te ao apî o te mau Papai moˈa na roto i te reo Beretane i 1950, i hiˈopoa na matou i te Bibilia. Ua faaohipa matou i te mau huriraa e vai ra e ua faatano i ta matou mau tiaturiraa ia au i te reira. A hiˈopoa i te tahi mau tiaturiraa tahito a te mau Ite no Iehova e a hiˈo ua tuea anei te reira i ta te Bibilia e haapii mau ra.

1.   Ta matou e tiaturi ra: E ere te Atua i te hoê Toru tahi. Ua na ô te vea Le Phare de la Tour de Sion (Beretane) no Tiurai 1882: “Ua ite ta matou feia taio e e tiaturi matou ia Iehova, Iesu e te varua moˈa. Aita râ matou e tiaturi e e toru Atua i roto hoê taata aore ra hoê Atua i roto e toru taata, no te mea aita te reira e tuea i ta te Bibilia e parau ra.”

     Ta te Bibilia e parau ra: “O Iehova to tatou Atua, hoê Iehova.” (Deuteronomi 6:4, The Holy Bible, a Robert Young) “Hoê noa Atua, o te Metua, no reira mai te mau mea atoa nei, e no ˈna hoi tatou; hoê hoi Fatu o Iesu Mesia, na ˈna te mau mea atoa nei, e na ˈna atoa hoi tatou.” (Korinetia 1, 8:6, American Bible Union Version) Ua parau Iesu iho: “E rahi te Metua ia ˈu.”—Ioane 14:28, Douay-Rheims Version.

2.   Ta matou e tiaturi ra: Aita te taata e haamauiuihia e a muri noa ˈtu i roto i te hoê po auahi. Teie te upoo parau o te Phare de la Tour de Sion no Tiunu 1882: “E utua te pohe no te hara.” Ua faaohipahia te Roma 6:23 o te King James Version. Ua na ô teie vea: “E mea maramarama e ohie ia taa teie irava. E rave rahi taata te tiaturi ra e Parau a te Atua te Bibilia. Tera râ, te patoi atoa ra ratou i ta teie irava e parau ra. Te tiaturi nei ratou e te utua o te hara, o te haamauiuiraa e a muri noa ˈtu. No ratou, tera ta te Bibilia e haapii ra.”

     Ta te Bibilia e parau ra: “O tei rave i te hara ra, o tei pohe ïa.” (Ezekiela 18:4, 20, King James Version) O te “pohe mure ore” te utua hopea no te feia e patoi ra i te Atua, eiaha râ i te haamauiuiraa e a muri noa ˈtu.—Tesalonia 2, 1:9, King James Version.

3.   Ta matou e tiaturi ra: E faatereraa mau te Basileia o te Atua, eiaha râ i te huru o te aau. Ua parau te Phare de la Tour de Sion no Titema 1881 no nia i te Basileia o te Atua: “E haamou tera Basileia i te mau faatereraa atoa o te fenua nei.”

     Ta te Bibilia e parau ra: “Ia tae i te anotau o taua mau arii ra, e faatupu ai te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”—Daniela 2:44, King James Version.

 Eita. Te tamau ra matou i te faaohipa i e rave rahi huriraa Bibilia i roto i ta matou ohipa pororaa. E horoa matou i te Huriraa o te ao apî ma te tamoni ore ia haapii matou e te mau taata. Te oaoa atoa nei matou i te haapii e te feia e hinaaro ra e faaohipa i te tahi atu mau huriraa.