Ua piahia te tuhaa matamua o Te Bibilia, Huriraa o te ao apî i 1950 na roto i te reo Beretane. Mai reira mai, ua faaite te tahi mau taata i to ratou manaˈo no nia i te reira. No vetahi, e ere Te Bibilia, Huriraa o te ao apî a i te mea papu roa no te mea te vai ra te mau taa-ê-raa i roto i tera huriraa Bibilia e te tahi atu. Teie te mau tumu o teie mau taa-ê-raa.

•   Papuraa. Ua niuhia Te Bibilia, Huriraa o te ao apî i nia i te mau maimiraa aivanaa tano e te mau parau papai tahito papu roa ˈˈe. No te King James Version no 1611 râ, ua faaohipahia te tahi atu mau parau papai mea api aˈe e e ere i te mea papu roa.

•   Te auraa mau. I roto i Te Bibilia, Huriraa o te ao apî, ua hurihia te auraa mau o te poroi tumu arataihia e te varua moˈa o te Atua. (Timoteo 2, 3:16) Mea rahi râ huriraa Bibilia o tei haafaufaa aˈe i te tutuu a te taata eiaha râ i te poroi a te Atua. Ei hiˈoraa, ua monohia te iˈoa o te Atua, Iehova, na roto i te tiaraa iˈoa Fatu aore ra Atua.

•   Te mau taˈo. No Te Bibilia, Huriraa o te ao apî, ua hurihia te mau taˈo e vai ra i roto i te mau papai tumu. Mai te peu iho â râ e hee noa te taioraa o te huriraa aore ra no te tapea i te auraa mau. No te tahi atu râ mau huriraa, ua tuuhia te mau manaˈo taata aore ra ua tatarahia te tahi mau parau rii faufaa.

 Te mau buka aita to roto. Te vai ra te mau buka parauhia apokiripha i roto i te Bibilia a te Ekalesia Katolika Roma e te Ekalesia Orthodoxe no Hitia o te râ. Aita râ tera mau buka i roto i te taatoaraa o te mau buka arataihia e te varua o te Atua a te mau ati Iuda. Te parau ra hoi te Bibilia e ua ‘horoa te Atua i ta ˈna mau poroi moˈa’ i te mau ati Iuda. (Roma 3:1, 2) No reira, aita e apokiripha i roto i Te Bibilia, Huriraa o te ao apî e i roto e rave rahi mau huriraa Bibilia no teie tau.

 Te mau irava aita to roto. I roto i te tahi mau huriraa, ua tuuhia te tahi mau irava e pereota aita to roto i te mau parau papai tahito roa ˈˈe o te Bibilia. Aita râ i na reirahia i roto i Te Bibilia, Huriraa o te ao apî. I roto i te tahi atu mau huriraa e rave rahi no teie tau, aita atoa tera mau irava e pereota i tuuhia. Ua fariihia e aita te reira i roto i te mau parau papai tahito. b

 Te tahi atu mau taˈo. I te tahi taime, ia hurihia tera taˈo e tera taˈo, mea fifi paha ia taa i te auraa aore ra mea hape te huriraa. Ei hiˈoraa, e huri-pinepine-hia ta Iesu i parau i roto i te Mataio 5:3 ei: “E ao to tei veve te varua.” (English Standard Version; King James Version; New International Version) Mea rahi te taata e ore ra e taa i tera huriraa aore ra te manaˈo ra e ua haafaufaa Iesu i te haehaa aore ra te veve. Ua hinaaro râ oia e faaite e ia oaoa mau tatou, e hinaarohia ta te Atua aratairaa. I roto i Te Bibilia, Huriraa o te ao apî, ua hurihia te auraa mau o ta Iesu mau parau mai teie: “E oaoa te feia e hiaai ra i te mau mea pae varua.”—Mataio 5:3.

•   I roto i te hoê rata no te 8 no Titema 1950, teie ta Edgar Goodspeed, taata huri Bibilia tuiroo e aivanaa, i papai no nia i te Huriraa o te ao apî o te mau Papai Heleni Kerisetiano: “Te anaanatae nei au i te ohipa mitionare a to outou mau taata e to ˈna faufaaraa na te ao nei. Ua au roa vau i teie huriraa huna ore e te oraora. No ˈu, ua ohipa iho â te feia huri ma te aravihi.”

•   Ua parau Allen Wikgren, hoê orometua no te Fare haapiiraa tuatoru no Chicago e e Bibilia faahiahia roa Te Bibilia, Huriraa o te ao apî. Ua hurihia hoi te reira na roto i te reo o teie nei tau. Aita te reira i hurihia ia au i te tahi atu mau huriraa.—The Interpreter’s Bible, Volume I, api 99.

•   Teie ta Alexander Thomson i papai no nia i te Huriraa o te ao apî o te mau Papai Heleni Kerisetiano: “E mea papu maitai e e taata aravihi e te maramarama te feia i huri i te reira. Ua tutava ratou i te huri i te auraa mau o te papai Heleni na roto i te reo Beretane. Ua faaohipahia te mau ravea atoa a te reo Beretane no te na reira.”—The Differentiator, Eperera 1952, api 52.

•   Noa ˈtu e ua manaˈo te taata papai Charles Francis Potter e mea huru ê te huriraa i te tahi mau vahi, ua parau oia e: “Ua huri te feia huri o Te Bibilia, Huriraa o te ao apî i te mau parau papai maitai roa ˈˈe Heleni e Hebera ma te ite e te aravihi.”—The Faiths Men Live By, api 300.

•   No Robert McCoy, e mea huru ê te huriraa o Te Bibilia, Huriraa o te ao apî i te tahi mau vahi e mea maitai roa i te tahi atu. Ua papai râ oia i roto i ta ˈna hiˈopoaraa: “Te haapapu ra te huriraa o te Faufaa Apî e e mea aravihi te feia huri i te mea e noa ˈtu e mea fifi ia huri i te Bibilia, ua manuïa ratou.”—Andover Newton Quarterly, Tenuare 1963, api 31.

•   Noa ˈtu e aita te orometua haapii S. MacLean Gilmour e farii i te huriraa o te tahi mau pereota i roto i Te Bibilia, Huriraa o te ao apî, ua faˈi oia e iteraa taa ê to te feia huri i te reo Heleni.—Andover Newton Quarterly, Tetepa 1966, api 26.

•   I roto i ta ˈna hiˈopoaraa o Te Bibilia, Huriraa o te ao apî, hoê tuhaa o te Kingdom Interlinear Translation of the Greek Scriptures, teie ta te orometua haapii o Thomas Winter i papai: “Mea tano roa te huriraa a te feia huri tei ore i faaite i to ratou iˈoa.”—The Classical Journal, Eperera-Me 1974, api 376.

•   I 1989, teie ta te hoê aivanaa no te reo Hebera o Benjamin Kedar-Kopfstein i parau: “I roto i ta ˈu mau maimiraa no nia i te Bibilia Hebera e te mau huriraa, ua faaohipa pinepine au i te neneiraa Beretane Te Bibilia, Huriraa o te ao apî. Ua papu ïa ia ˈu e ua tutava te feia huri i te horoa i te hoê huriraa tano roa.”

•   I muri aˈe i ta ˈna faaauraa i e iva huriraa Beretane faufaa, teie ta Jason David BeDuhn, orometua no te haapiiraa faaroo, i papai: “O Te Bibilia, Huriraa o te ao apî te huriraa tano roa ˈˈe o te mau huriraa i hiˈopoahia.” No te rahiraa o te taata e aivanaa, e taa-ê-raa to roto i Te Bibilia, Huriraa o te ao apî no te paetahi o te feia huri i te pae faaroo. Ua parau râ BeDuhn: “Mea taa ê roa Te Bibilia, Huriraa o te ao apî no te mea ua hurihia te mau manaˈo tumu o te Faufaa apî ma te tano.”—Truth in Translation, api 163, 165.