Mai te matahiti 1948 e tae atu i te 1994, ua haamauhia i Afirika apatoa te hoê faatereraa parauhia apartheid e ua amahamaha roa teie fenua i te pae poritita. a I tera tau, e rave rahi taata tei rave i te mau ohipa tia ore i nia i te feia o te mau nunaa ê. Te haamanaˈo ra o Kallie e ua hiˈohia o ˈna ei “taata iri ê” i raro aˈe i tera faatereraa. Te na ô ra o ˈna: “Ua hiˈo ino atoa te feia e ere i te taata uouo te tahi i te tahi.”

 No te mau nunaa rau te mau Ite no Iehova e ora ra i Afirika apatoa. Nafea ratou i faaruru ai i tera tupuraa? Eaha te mau haapiiraa ta tatou e nehenehe e huti mai?

 I Afirika apatoa, ua patoi te tahi mau taata i tera mau amahamaharaa niuhia i nia i te iri o te taata. Ua faanaho ïa ratou i te mau taahiraa no te faaite i to ratou manaˈo. E rave rahi o ratou tei tapeahia e ua haapohehia te tahi atu. Ei faahopearaa, ua ino roa ˈtu â tera mau taata patoi. Area te mau Ite no Iehova, ua auraro ratou i te mau ture e aita ratou i patoi i te faatereraa aore ra i tamata i te taui i te reira. A na reira ˈi, ua pee ratou i te hiˈoraa o te mau Kerisetiano matamua tei ‘auraro i te feia mana.’—Roma 13:1, 2.

 E rave rahi taime i tamata ˈi te taata i te faahepo i te mau Ite no Iehova ia tia no ratou, oia hoi ia turu i te hoê faahuehueraa ino mau i te pae poritita aore ra ia hamani ino i to ratou mau hoa Kerisetiano. Ei hiˈoraa, te faataa ra o Thembsie e i te roaraa o te mau patoiraa tei tupu i 1976, e rave rahi taata apî tei faahepohia ia apiti i roto i tera mau faahuehueraa poritita. Te na ô ra o Thembsie: “E haere te feia apî orure hau i tera e tera fare no te imi i te tahi atu mau taata apî no te apiti ia ratou. Ia parau oe aita, e tanina ratou i to oe fare aore ra e taparahi haapohe roa ratou ia oe.” Ua parau te hoê tia poritita o te hoê pǔpǔ patoi ia Theophilus, te hoê Ite no Iehova: “Na mua roa, e haapohe matou i te taata uouo. I muri aˈe râ, e haapohe matou ia outou no te mea aita outou i tia no to outou fenua.”

 Noa ˈtu te mau fifi ta teie mau tupuraa ino mau i faatupu, ua tamau te mau Ite no Iehova i Afirika apatoa i te putuputu mai no te haamori i te Atua. (Hebera 10:24, 25) No tera faatereraa tei faataa ê i te taata ia au i to ratou iri, ua veve roa te tahi mau Ite no Iehova e aita te tahi mau amuiraa i nehenehe e patu i te hoê Piha a te Basileia. b Te na ô ra o Enver: “E rave rahi matahiti i te maoro, ua titauhia ia matou ia tarahu i te mau vahi, mea huru ino râ te reira. Ua faanaho ïa to ˈu papa i to matou fare ia nehenehe te amuiraa e haere mai no te mau putuputuraa. E 2 taime i te hebedoma, ua riro to matou fare ei Piha a te Basileia. I te tahi mau taime, ua hau atu matou i te 100 taata. I muri aˈe i te putuputuraa, oaoa matou i te amuimui e te mau taeae e tuahine.”

 Ua imi te mau taeae i te mau ravea faahiahia roa no te faaruru i te mau fifi poritita o te fenua. Ei hiˈoraa, i Limpopo, ua anihia te hoê taeae uouo ia vauvau i te hoê oreroraa parau i te tairururaa haaati i te tahi vahi mea rahi te feia ereere. Aita râ o ˈna i fariihia ia tomo atu. Tera râ, i pihai iho i tera vahi, te vai ra te hoê faaapu taotiahia ta te hoê taata uouo i fatu. Ani atura te taeae uouo ia tia o ˈna i te pae o ta ˈna faaapu no te orero atu e ua farii o ˈna. Ua nehenehe ïa te feia tei putuputu mai e fanaˈo i te tairururaa haaati mai rapae mai i te faaapu.

 I raro aˈe i tera faatereraa, ua faataa-ê-hia te mau taata ei pǔpǔ ia au i te û o to ratou iri e ua faahepohia ratou ia ora i te vahi i tuuhia ˈi ta ratou pǔpǔ. No reira, i roto i te tuhaa fenua o te hoê amuiraa, ua itehia te mau taata no te hoê â nunaa. No tera faataa-ê-raa i te taata, ua titauhia i te mau Ite no Iehova ia faatanotano i ta ratou huru faanahoraa i te pororaa. Ei hiˈoraa, mea fifi roa ia poro i roto i te mau tuhaa fenua aita e feia poro. Ua na ô o Krish, te hoê taeae tei hiˈohia ei “taata Initia” i raro aˈe i tera faatereraa: “Pinepine aita e itehia te vahi taotoraa no te feia e ere i te uouo. Ua titauhia ïa ia matou ia taoto i roto i te pereoo aore ra i raro aˈe i te tumu raau. I te poipoi, e hopu matou i te pape i te vahi haumitiraa o te hoê vahi titoraa mori. Tera râ, i te tahi mau taime, ua papaihia i nia i te uputa o tera mau vahi haumitiraa ‘No te feia uouo anaˈe.’ Noa ˈtu tera mau fifi, ua poro ratou ma te itoito rahi e ua oaoa ratou i te farerei i te mau taata tei anaanatae i te poroi i roto i te mau mataeinaa.”

 Noa ˈtu tera mau tupuraa fifi mau, ua rahi noa ˈtura te numera o te mau Ite no Iehova. I te taime i haamau ai te faatereraa i te apartheid i 1948, e 4 831 taata poro i Afirika apatoa. I te taime i oti ai te reira, i 1994 ïa, ua naeahia e 58 729 taata poro. I muri aˈe, ua maraa noa tera numera. I 2021, ua naeahia te hoê numera teitei roa, oia hoi e 100 112 taata poro i Afirika apatoa.

 I te roaraa o tera mau tupuraa ino mau, ua ora te mau Ite no Iehova no Afirika apatoa i te hoê fenua matauhia no te mau faataa-ê-raa i te taata ia au i te iri. Noa ˈtu râ, ua haa rahi te mau Ite no Iehova no te faaite i te here e te hau e te mau taata atoa. Ua na reira ratou ma te haapii atu e ma te pee i te mau aratairaa Bibilia. (Ohipa 10:34, 35) Noa ˈtu e ua haaatihia ratou e te aroha ore, ua vai hoê noa te mau Ite no Iehova na roto i te here.—Ioane 13:34, 35.

 I 1993, i Afirika apatoa, ua faatupu te mau Ite no Iehova i te hoê tairururaa nunaa rau. Ua ite te hoê tia poritita e tiaraa teitei to ˈna, i te mau Ite no Iehova no Afirika apatoa i te farii e i te tauahi i to ratou mau hoa haamoriraa no te mau fenua rau i te tauraa manureva. Ua na ô o ˈna: “Ahani ua hoê matou mai ia outou, mea maoro to matou mau fifi i te faatitiaifarohia.”