Aita te mau faatere e te mau faanahonahoraa na te ao nei e nehenehe e hopoi mai i te hau. I teie mahana, ua rahi atu â te faahuehueraa i to te mau tau atoa mai te piti o te Tamaˈi rahi mai â. E piti miria taata, oia hoi e 25 i nia i te hanere o te taata na te ao nei, o te ora nei i te mau vahi mea huehue roa.

 No te aha aita te taata e nehenehe e faatupu i te hau? Eaha ta te Bibilia e parau ra?

1.  1. Te faaite ra te taata i te hoê haerea o te tapea ia ratou ia faatupu i te hau. Ua tohu te Bibilia i to tatou tau: “E haapao noa te taata ia ratou iho, e nounou i te moni, e faateitei, e teoteo, . . . e taiva, . . . e etaeta, . . . e haavî ore ia ratou iho, e iria, . . . e farii ore i te aˈoraa, e faaoru.”—Timoteo 2, 3:2-4.

2.  2. Aita te taata, ei mero taitahi aore ei pǔpǔ, e nehenehe e faaafaro i to ratou fifi aita anaˈe te tauturu a te Atua poiete o Iehova. a Te faaite ra te Bibilia: “Aita e tiaraa to te taata e haere ra ia aratai i to ˈna mau taahiraa.”—Ieremia 10:23.

3.  3. Tei raro aˈe te ao i te puai e te faatere ino ra o Satani te Diabolo “o te haavare nei i to te ao atoa nei.” (Apokalupo 12:9) A vai noa ˈi “te ao atoa i raro aˈe i te mana o te varua ino,” e tupu noa iho â te tamaˈi e te faahuehueraa.—Ioane 1, 5:19.

 Te haapapu mai ra te Bibilia e tupu te hau eiaha i te taata i te Atua râ.

•   “‘Ua ite maitai hoi au i te mau manaˈo ta ˈu e manaˈo ra no outou,’ te parau ra Iehova, ‘e manaˈo hau, e ere i te manaˈo ati, no te horoa ˈtu i te tahi oraraa no a muri aˈe e te tahi tiaturiraa.’”—Ieremia 29:11.

 E nafea Iehova e faatupu ai i ta ˈna i fafau? ‘Te Atua o te horoa mai i te hau, ua fatata oia i te taahi roa ia Satani.’ (Roma 16:20) E faaohipa te Atua i te hoê faatereraa i te raˈi o ta te Bibilia e parau ra “te Faatereraa arii a te Atua,” o te faatupu i te hau na te ao nei. (Luka 4:43) Maoti Iesu Mesia, te Arii o te Faatereraa arii, e haapii te taata ia ora ma te hau.—Isaia 9:6, 7.

•   No te ite atu â, a taio i te tumu parau “Eaha ta te Faatereraa arii a te Atua e rave?”