Exodo 11:1-10
11 Na ô maira ïa Iehova ia Mose: “Hoê ati toe ta ˈu e hopoi i nia ia Pharao e i to Aiphiti. I muri iho, e tuu oia ia outou ia faarue i teie vahi.+ Ia tuu oia ia outou ia haere, e tiahi mau â oia ia outou i rapae.+
2 I teie nei, a parau i te nunaa ia ani te mau tane e te mau vahine i to ratou taata tapiri i te mau taoˈa ario e te auro.”+
3 Rave ihora Iehova ia hamani maitai to Aiphiti i te nunaa o Iseraela. Hau atu â, ua faatura-rahi-hia Mose e te mau tavini a Pharao e te nunaa atoa i te fenua o Aiphiti.
4 Parau atura ïa Mose: “Teie ta Iehova i parau: ‘I te tuiraa po, e haere au na roto ia Aiphiti,+
5 e e pohe pauroa te matahiapo i te fenua o Aiphiti,+ mai te matahiapo a Pharao o te parahi ra i nia i to ˈna terono e tae noa ˈtu i te matahiapo a te tavini vahine o te haa ra ma te rave i te taviri huero maa, e pauroa te fanauˈa matamua a te mau animara.+
6 E auê rahi te faaroohia na te fenua taatoa o Aiphiti, mai tei ore i faaroohia aˈenei e o te ore e faaroo-faahou-hia.+
7 Aita râ hoê noa ˈˈe urî e aoa i te ati Iseraela, te taata anei aore ra ta ratou mau animara, ia ite hoi outou e nehenehe Iehova e faataa ê i to Aiphiti i te ati Iseraela.’+
8 E e pou ta oe mau tavini atoa a tipapa mai ai i mua ia ˈu, a na ô mai ai: ‘A haere, o oe e pauroa te nunaa e na muri ra ia oe.’+ I muri iho i te reira, e haere au i rapae.” Haere atura ïa oia mai mua ˈtu ia Pharao ma te riri rahi.
9 Na ô maira Iehova ia Mose: “Eita Pharao e faaroo ia orua,+ ia faarahihia hoi ta ˈu mau semeio i te fenua o Aiphiti.”+
10 Ua faatupu Mose raua Aarona i teie mau semeio atoa i mua ia Pharao,+ tera râ ua vaiiho Iehova i te aau o Pharao ia etaeta, a ore atu ai oia e tuu i te ati Iseraela ia faarue i to ˈna fenua.+
