Exodo 15:1-27
15 I reira, himene aˈera Mose e te ati Iseraela i teie himene ia Iehova:+
“Ia himene au ia Iehova, ua faateitei-roa-hia hoi oia.+
Ua taora oia i roto i te miti i te puaahorofenua e to ˈna taata faahoro.+
2 O Ia* to ˈu puai e to ˈu mana, ua riro hoi oia ei faaoraraa no ˈu.+
O to ˈu Atua teie, e e arue au ia ˈna.+ O te Atua o to ˈu metua+ teie, e e faateitei au ia ˈna.+
3 E Atua puai i te tamaˈi o Iehova.+ O Iehova to ˈna iˈoa.+
4 Ta Pharao mau pereoo e ta ˈna nuu ua taora Oia i roto i te miti,+E ua paremo to ˈna mau taata tamaˈi puai roa ˈˈe i roto i te miti Uteute.+
5 Ua tapoˈi te vavea ia ratou. I raro i te hohonuraa ua topa ratou mai te ofai.+
6 To rima atau, e Iehova, mea puai rahi ïa.+Tei to rima atau, e Iehova, e huˈahuˈa ˈi te enemi.
7 I to oe teitei rahi, e nehenehe oe e taora i raro i te feia e tia no te aro ia oe.+E faatae atu oe i te uˈana o to riri, a pau atu ai ratou mai te aihere mǎrô.
8 I te hoê puhiraa o to apoo ihu e pue ai te mau pape,E tia noa ˈtura i reira, a tapea ˈi i te pape pue,E paari atura te vavea i ropu i te moana.
9 Ua parau te enemi: ‘E aˈuaˈu vau! E noaahia ˈtu e au!
E tufa vau i te noaa ia ˈu haapao mâha to ˈu hinaaro!
E tatara vau i ta ˈu ˈoˈe! Na to ˈu rima e faahepo ia ratou!’+
10 Puhi ihora oe i to aho, e tapoˈi atura te miti ia ratou.+Topa ihora ratou i raro mai te auri teiaha i roto i te miti puai.
11 O vai mai ia oe i rotopu i te mau atua, e Iehova?+
O vai mai ia oe, o te faaite ra i to moˈaraa hau ê?+
Tei tia ia mǎtaˈuhia i te mau himene arueraa, Tei rave i te mau ohipa faahiahia mau.+
12 Ua toro oe i to rima atau, e horomii ihora te fenua ia ratou.+
13 I to here taiva ore, ua aratai oe i te nunaa ta oe i hoo mai.+I to puai, e aratai oe ia ratou i to vahi faaearaa moˈa.
14 E faaroo iho â te mau nunaa,+ e rûrû ratou.E roohia to Philiseti i te ahoaho.*
15 I tera taime, e riaria te mau raatira o Edoma,E e rûrû te mau faatere puai* o Moabi.+
Pauroa to Kanaana te hepohepo.+
16 E roohia ratou i te mǎtaˈu e te riaria.+
No te rahi o to rima, mai te ofai ra ratou i te hautiuti oreE ia na mua to nunaa ia ratou, e Iehova,E ia na mua+ te nunaa ia ratou te nunaa ta oe i haamau.+
17 E hopoi oe ia ratou a haamau atu ai i nia i te mouˈa e fatuhia ra e oe,+Te vahi papu ta oe iho i faaineine ei faaearaa no oe, e Iehova,Te hoê nao,* e Iehova, ta to rima i haamau.
18 E faatere Iehova ei arii e a muri noa ˈtu.+
19 I te tomoraa ta Pharao mau puaahorofenua, ta ˈna mau pereoo tamaˈi e to ˈna feia faahoro puaahorofenua i roto i te miti,+Faahoˈi maira Iehova i te mau pape o te moana i nia ia ratou,+Ua haere râ te ati Iseraela na nia i te fenua mǎrô na ropu i te miti.”+
20 Rave maira ïa Miriama te peropheta vahine, to Aarona tuahine, i te hoê tariparau i to ˈna rima, e pee aˈera te mau vahine atoa ia ˈna ma te rave i te tariparau e ma te ori.
21 Himene ihora Miriama ei pahonoraa i te mau tane:
“A himene ia Iehova, ua faateitei-roa-hia hoi oia.+
Ua taora oia i roto i te miti i te puaahorofenua e to ˈna taata faahoro.”+
22 I muri iho, aratai atura Mose i te ati Iseraela mai te miti Uteute no te haere i te medebara o Sura, e haere aˈera ratou e toru mahana i te medebara, aita râ e pape i itehia mai e ratou.
23 Tae maira ratou i Mara,*+ aita râ ta ratou i nehenehe e inu i te pape no Mara no te avaava. No reira oia i parau ai i taua vahi ra o Mara.
24 Haamata aˈera te nunaa i te amuamu ia Mose,+ a na ô ai: “Eaha ta matou e inu?”
25 Tiaoro ihora oia ia Iehova,+ e aratai atura Iehova ia ˈna i te hoê tumu raau. I to ˈna taoraraa i te reira i roto i te pape, maaro maira te pape.
Haamau ihora Oia no ratou i te hoê faaueraa e te hoê hiˈoraa no te haavaraa, e tamata ˈtura Oia ia ratou.+
26 Na ô maira oia: “Ia faaroo maite outou i te reo o Iehova to outou Atua, ia rave outou i te mea tia i mua i to ˈna aro, ia haapao outou i ta ˈna mau ture e ia tapea outou pauroa ta ˈna faaueraa,+ eita vau e faatae i nia ia outou i te hoê o te mau maˈi ta ˈu i faatae i nia i to Aiphiti,+ o vau hoi o Iehova te rapaau ra ia outou.”+
27 I muri aˈe i te reira, tae maira ratou i Elima, 12 pape pihaa e 70 tumu tamara to reira. Puhapa ihora ratou i reira na te pae pape.
Nota i raro i te api
^ “Ia” e haapotoraa ïa o te iˈoa Iehova.
^ Heb: “mauiui fanau.”
^ Aore ra “faahepo.”
^ “Avaava” te auraa.
